“Wanɛ wakitanyiya ɔtɛkɛta wa Nzambi” —losanganya la Distrikɛ l’Ɛmɛnyi wa Jehowa la lo 2000
1 ‘Dimi layokandolaka l’atei wa tshunda dia woke di’anto; layokotombola l’atei w’anto efula.’ (Osam. 35:18) Ohokanyiya ɔngɛnɔngɛnɔ wohonga la Davidi ɛlɔ kɛnɛ dia mɛna woho wosanganyi nunu di’anto kâmɛ lo wɔladi dia Nzambi mbalakanya lo nsanganya yaso ya weke! Onde wɛ aki l’atei w’anto ndekana 250000 wakɔtɔ lo losanganya lɔmɔtshi la Distrikɛ laki l’ɔtɛ a dui ɔnɛ: “Ɔtɛkɛta wa Prɔfɛsiya Waki Nzambi”? Tatɛ oma l’atei atei wa Ngɔndɔ k’Esambele polo oya l’ekomelo ka Ngɔndɔ k’Enanɛi 1999, nsanganya 77 yakalɔngɔswama l’esomba 59 wa lo République démocratique du Congo la lo Congo-Brazzaville.
2 L’Osambo 122:1 omembi w’esambo akate ate: ‘Dimi lakangɛnangɛna lam’akawambutɛ ɔnɛ: Totshu otsha lo luudu la Jehowa.’ Ndo wɛ mɛtɛ mbaki l’ɔngɛnɔngɛnɔ wa ngasɔ lam’akayalongola dikatshi di’okotsha di’Olimu Aso wa Diolelo diakewoya ɔnɛ losanganya la distrikɛ layonga. Aha la taamu, wɛ akohɔ akambo w’ɔlɔlɔ wakateke lo losanganya lɔsɔ. Lo ntambe ka ntondo (premier siècle), ɔpɔstɔlɔ Petero akohola Akristo ɔnɛ ayonga dikambo di’ɔlɔlɔ naka vɔ mbidja yimba l’ɔtɛkɛta wa prɔfɛsiya oko wanɛ wenda ‘tala diahɛta lo dihole dia wodjima.’ (2 Pet. 1:19) Ɔsɔku mbediɔ ndo lo nshi yaso nyɛ. Oko weso lo nsɛna l’andja ɔnɛ walɔmbwama oma le Satana, tekɔ l’ɔngɛnɔngɛnɔ efula dia tomba oma lo wodjima wa lo nyuma. (Kol. 1:13; 1 Pet. 2:9; 1 Joa. 5:19) Dia sho tetemala kɛndakɛnda l’osase, sho pombaka monga la mbetawɔ ka nge lo mpokɛ lotui l’Ɔtɛkɛta waki Jehowa wakasambiyama oma le nyuma k’ekila. Kɛsɔ mbakatokeketsha losanganya la distrikɛ dia ntsha.
3 Onde wanɛ wakɔtɔ lo losanganya lɔsɔ la woke, wakalongola kɛnɛ kakawalongamɛka oka? Onde losanganya lakɔ lakakotsha ehomba wa wanɛ wakɔtɔ lɔkɔ? Awui wakate anto efula wakɔtɔ lo losanganya lakɔ mɛnyaka di’ekongelo kɛsɔ kakasungana efula l’etena kɛnɛ kasɛnaso. Onto ɔmɔtshi akate ate: “Losanganya lɔsɔ layokimanyiya dia dimi nsɛnaka wolo kana mambalɛka dia dimi kema kokele, nɛ dia naka hambohe dikambo sɔ, kete layokokaka kongɛ lushi la Jehowa aha la mbisana l’awui wa kɔlɔ wa l’andja ɔnɛ.” Ɔnangɛso ɔmɔtshi laya edja efula lo mɛtɛ akate ate: “Losanganya lɔnɛ lamboyotokaloya lo mboka. Lɔ lamboyotokimanyiya dia mbeya kana tatâtakɔ mboka.” Ɔnangɛso okina nde lawɔ ate: “Lo menda ekakatanu wa wolo wele lo ndɔshana laso ɛlɔ kɛnɛ, dimi kɔfɔnyaka dia layɔtɔ losanganya la nganɛ. Lɔ lakatɛnya dia tekɔ kâmɛ lo mbetawɔ oyadi lɛkɛ lakɔna lodjashiso kana etale ka ngande kanganyiso. Jehowa ekɔ kanga lokaho ndo kanga ngandji. Nde tokanɛka.” Onde tekɔ lo nyanga lo menda welo wakatadje dia mbɔtɔ lo losanganya l’ɔnɔnyi ɔnɛ? Kema, hatonyange.
4 Losanganya laso la distrikɛ la l’ɔnɔnyi wa 2000 ayotosha diaaso dikina dia sho sangana kâmɛ la anyaso atɛmɔdi wa Jehowa wanɛ ‘wayakiyanya di’ehomba awɔ wa lo nyuma’ ndo wele l’asolo walokɔlokɔ dia ‘mpokamɛ kɛnɛ katɛ nyuma tshumanelo.’—Mat. 5:3; Eny. 2:29.
5 Onde wɛ ayɔtɔ lo losanganya lakɔ? Tâyalɔngɔsɔdi oma ko kakianɛ. Ntsha tshɛ dia monga lo nshi shato shɔ ya dambo dia dimɛna efula dia lo nyuma, oma ko osambo wa tatelo polo lo dɔmbɛlɔ dia ndjihelo. Esangɔ efula, losanganya lokelewɔ mongaka lɔnɛ loleki suke la lakayɛ. La Société ntshaka tshɛ dia nyonyɛ wotsho ɔmɔtshi lo dikambo sɔ. Wambokotsha dihole dikina diayosalema losanganya dia kimanyiya onto tshɛ l’atei aso dia ndeshama lo nyuma kâmɛ l’ase nkumbo kande tshɛ. (Euh. 31:12) Etena ka tatɛ momba kutakuta ya talɛka lo mboka kana ya futa mutuka tɔ kɛnɛ. Amɔtshi wakatshe tshɛ dia mbɔtɔ lo nsanganya ya distrikɛ ya lo 1999. Oko ɛnyɛlɔ, ɔnangɛso ɔmɔtshi akadje ɔnande l’ɔkɔngɔ ko munda lɔkɛndɔ la kilɔmɛtɛlɛ 300 lo dikalo dia koma lo dihole dia losanganya. Nde akande lɔkɛndɔ lɔsɔ nshi shato l’ɔkɔngɔ wa wadiɛnde mvɔ wonya wakandôtaka. Nde akatatshiki ɔna ashashi ɔsɔ le aseka wadiɛnde dia vɔ mbokokɛka, ko akande lɔkɛndɔ polo lo losanganya ndo tosha dako diaki lande! Lowando lele laso lo tɛdikɔ tɔsa la Société ayototshutshuya dia sho mbɔtɔ lo nsanganya yayosalema l’ɔnɔnyi wa 2000.
6 Mpango: Anto tohangaka tena efula lo mvudu yakana. Sho pombaka monga la lowando le anangɛso wetawɔ todjasha lawakawɔ. Ndo nto, hosungana dia anto walongolawɔ ngasɔ nanya ɔlɔlɔ ɔsɔ ndo tohika ɔnɛ wâhangia nshi efula la ntondo kana l’ɔkɔngɔ wa losanganya. Mpango mbishamaka paka lo nshi ya losanganya. Wanɛ washawɔ mpango ya ngasɔ pombaka nɛnya diangɔ dia kanga luudu, aha nanya ndoko ema, aha ntshɔ l’ahole wewɔ hawowaele ndo mbidja yimba dia ndo anawɔ sala ngasɔ. Naka akanga a mvudu wekɔ l’okakatanu ɔmɔtshi lo dikambo sɔ, vɔ la dia mbewoya esadi wanɛ wakamba olimu wa pangia anto, ko wayonga l’ɔngɛnɔngɛnɔ dia mbâkimanyiya. Ekimanyielo k’onto l’onto kekɔ ohomba di’olimu wa pangia anto kɛndakɛnda dimɛna. (Heb. 13:17) Takalongola alapɔlɔ ɔnɛ anto amɔtshi totshikaka luudu lakawawasha dia panga aha la ndaka ko ntshɔ lo lokina lele ɔngɛnyi ande kana onto ɔmɔtshi leyana la nde. Dikambo sɔ futanyaka lotumu l’anangɛso wakamba olimu wa pangia anto. Sho nyɔlɔmbaka nyu tshɛ dia tokimanyiya l’olimu ɔsɔ.
7 Mɛtɛ Jehowa sukɛka kɛnɛ katshama lo dikambo dia nsanganya ya weke yasalema ɔnɔnyi l’ɔnɔnyi. Lam’ele anangɛso efula wamɔ oma lawakawɔ dia ntshɔ lo losanganya la distrikɛ tongaka l’ohomba wa mvudu ya panga, sho kokaka monga l’eshikikelo ɔnɛ Jehowa ayokotsha ehomba awɔ lo woho wakoka. Lam’ele akambo asɔ mendanaka l’ɔtɛmwɛlɔ wa mɛtɛ, sho pombaka ndjela alako wotoshawɔ l’ɔngɛnɔngɛnɔ tshɛ. Tɛnya dia tekɔ la kɔlamelo lo kɛnɛ koleki tshitshɛ; ko tayonga la dikoka dia kondja ɛlɔlɔ efula wakongɛ wanɛ walangema le Jehowa.—Luka 16:10.
8 Nyokimanyiya wanɛ wele l’ehomba wa lânde: Esombe w’anto kana wanɛ wele la dikɔmɔ, ekambi wa lo tena tshɛ kana akina mbeyaka monga l’ohomba w’ekimanyielo dia vɔ monga lo losanganya la woke. Wanɛ wôtɔ la wɔ, dikumanyi kana ase etshumanelo weya pâ yawɔ ya lânde kokaka sala kɛnɛ kahombama la ngandji tshɛ, koko aha kitsha ɔkɛndɛ awɔ tshɛ l’ahɛka w’anangɛso walɔngɔsɔla losanganya la woke.—Enda lo 1 Timote 5:4.
9 Onde Satana tonyekolaka yimba di’aha nyu mbidja akambo wa lo nyuma yimba? Lonyangu ko, anangɛso l’akadiyɛso efula kâmɛ ndo nkumbo yawɔ wakahandja mbo y’ohomba ya lo nyuma. Lo yoho yakɔna na? Lo pandja ekongelo ka Lushi la Tanu ka Losanganya laso la distrikɛ. Mbala mɔtshi, akɛnamaka di’anangɛso l’akadiyɛso efula wakahandja wetshelo wa lo nyuma wa Lushi la Tanu ndo wakahandja monga kâmɛ la anyawɔ.
10 Anangɛso l’akadiyɛso amɔtshi mbokaka wolo nɔmba ewandji awɔ w’olimu dikimɔ dia vɔ mbɔtɔ lo losanganya la woke. Onde ndo wɛ mboka wolo nɔmba dikimɔ? Bonde kahayalɔmbɛ Jehowa dia dikambo sɔ ndo monga la dihonga dia mbokiya owandji ayɛ w’olimu na? Ohɔ etombelɔ w’ɔlɔlɔ wakakondja Nehemiya ɔnɛ lakahomana la dikambo dia ngasɔ. (Neh. 2:1-6) Nyonge la mbetawɔ le Shɛso lele l’olongo ɔnɛ nde ayetawɔ nyokimanyiya, aha la nyu mbohɛ ɔnɛ naka nyu mbetsha wahɔ wa Diolelo la ntondo, kete nde ayonyokotshɛ ehomba anyu wa lo lɔsɛnɔ.—Mat. 6:32b, 33.
11 Shɛngiya yakɔna yele la nsanganya yaso le yɛ? Kadiyɛso kɛmɔtshi k’oma lo lɛkɛ l’ehotwelo ka wonya, lo wodja w’États-Unis akafunde ate: “Lambonyokaloya losaka efula lo dikambo dia losanganya la distrikɛ la 1999. Monga kâmɛ l’analengo ndo l’akadiyɛmi wɛnana la mi paka mbala ɔtɔi l’ɔnɔnyi mbishakami ɔngɛnɔngɛnɔ heyama. Lam’akamamɛ mbeka akambo wa mɛtɛ ko lele la diemi, lâsɔ ko leke dikɛnda efula, koko lâkohɔ l’ɔlɔlɔ tshɛ mbala kakamatshu l’ombetsha ami wa Bible otsha lo losanganya lami la ntondo. Lakawalɛka wange waki l’ɔtɛ ami lo sɛkɛ sɔ dia ponde dia tshɛnɛkɔ lam’akatembaka osambo wa Diolelo wata ɔnɛ: ‘Nunu la Nunu di’Anangɛso.’ Kɛdikɛdi, lakakɛdia ndo asɔyi. Lo menda anto asɔ tshɛ waki la dungi di’ɔngɛnɛngɛnɔ wakadinge, dimi lakayambola nte: ‘Ngande wakoka Jehowa nangami na?’ Lushi lɔsɔ mbakamɔshi yɛdikɔ ya kambɛ Jehowa lɔsɛnɔ lami l’otondo.” Dikambo sɔ munandaka asolo mɛtɛ! Shi ekɔ diɛsɛ ndo ɔngɛnɔngɛnɔ tanema l’atei w’ekambi wa Jehowa wa pudipudi?
12 L’etenyi ka ndjihelo ka nshi nyɛ y’ekomelo, tekɔ l’ohomba w’efula wa mbɔtɔka nsanganya yaso ya distrikɛ l’ɔnɔnyi l’ɔnɔnyi oleki nshi nkina. Ɔsɔ ekɔ yɛdikɔ y’oma le Jehowa yatokimanyiya dia sho tshikalaka nge lo nyuma aha la mɛngɛnga. Omalɔkɔ, nyotshe tshɛ dia monga nshi yakɔ shato ya losanganya la distrikɛ l’ɔnɔnyi ɔnɛ lele l’ɔtɛ a dui ɔnɛ: “Wanɛ Wakitanyiya Ɔtɛkɛta wa Nzambi.” Ngande wakokayɛ kotsha yɛdikɔ yayɛ shɔ y’aha pandja losanganya la woke lɔsɔ na? Kotalɔmbi owandji ayɛ w’olimu dikimɔ kɔɔmɔ dia wɛ mbɔtɔ lo losanganya lɔsɔ l’otondo. Naka wɛ bu l’ekondjelo k’efula, kete tatɛ momba kutakuta oma ko kakianɛ dia monga l’akoka wa mbɔtɔ lo losanganya lɔsɔ. Lɔmba Jehowa dia nde kokimanyiya dia wɛ tondoya okakatanu ɔsɔ. Lam’ayalɔngɔsɔlayɛ, wɛ kokaka kanyiya nganɛ wayoyotonga l’ananyɔ ndo l’akadiyɛ ndo woho wayoyotoka ɛtɛkɛta washa lɔsɛnɔ la pondjo oma le Jehowa, Shɛso ka ngandji lele l’olongo. —Enda lo Joani 6:68.
[Caption on page 3]
[Box on page 3]
Ekongelo ka wenya
Lushi la Tanu la la Samalo:
9 h 30 – 17 h 00
Lushi la Lomingu:
9 h 30 – 16 h 00
[Caption on page 4]
[Box on page 4]
Tɛdikɔ tɔmɔtshi ta mbɔsa dia mbɔtɔ lo losanganya la Distrikɛ “wanɛ wakitanyiya ɔtɛkɛta wa Nzambi.”
1. Naka wɛ pombaka ntsha lɔkɛndɔ l’otale dia tɔɔtɔ lo losanganya la woke, kete tatɛ momba falanga ya lɔkɛndɔ layɛ wɛ la nkumbo kayɛ, ndo y’olelo anyu lɛkɔ.
2. Kanyokanyiya ndo dia sukɛ ɔlɔngɔswɛlɔ wa losanganya la woke la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔ̂lɛmia la diangɔ dianyu di’oshinga wolo.’—Euh. 16:16; Tuk. 3:9.
3. Tayotombola lokombo la Jehowa nto lo monga la lɔkɛwɔ l’ɔlɔlɔ l’assemblée kamɛ ndo ɔlɔtɔ wa pudipudi ndo wa kɔmba.—1 Kor. 10:31.
4. Ntsha tshɛ dia kamba kâmɛ l’anangɛso wele l’ɔkɛndɛ wa nɔnga anto. Tâmbɛke ahole tshanana, paka di’ase nkumbo kayɛ kana dia wanɛ woye la yɛ.
5. Lo wenya wa mumuya, kôle diangɔ di’osadi woho wa wɛ ndjoyela etenyi ka l’ɔkɔngɔ a midi dimɛna. Mbo ya ndɛ ya wotsho mbishaka djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto katshake tshɛ dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ndo dikadja l’ahole wakalɔngɔsɔma dia mbikadjaka mindu.—1 Pet. 1:15, 16.