“Embetsha w’Ɔtɛkɛta Waki Nzambi” Losanganya la Distrikɛ Laki Ɛmɛnyi wa Jehowa la l’Ɔnɔnyi wa 2001
1 Omvutshi Isaya akate dia Jehowa ekɔ Ombetsha wa Woke wele, oko watotshaka ombutshi wa pami, nde nɔmbaka ekambi ande ate: “Mbuka keku, nyokendekende loko, nyokendekende loko!” (Is. 30:20, 21) Ko ngande wokaso dui diaki Jehowa sɔ diakatama dikambo dia wahɔ wakiso na? Jehowa tɛkɛtɛka ekambi ande oma lo tshimbo ya Bible, y’abuku walembetshiya awui wa lo Bible, ya nsanganya ya l’etshumanelo kana ya weke yalɔngɔsɔma oma le ‘ɔhɔmbɔ wa kɔlamelo ndo wa kɛsɔ.’ (Mat. 24:45) Sho koka monga la lowando le Jehowa lo woho watetemalande tɔlɔmbɔla lo mboka kahombaso kɛndakɛnda.
2 Ɔnɔnyi tshɛ, losanganya la distrikɛ toshaka diaaso dia tshumana kâmɛ l’asekaso ambetawudi dia pokamɛ wetshelo waki Jehowa la yambalo tshɛ. Ɔnɔnyi wetshi, nunu di’anto wakɔtɔ lo Losanganya la Distrikɛ lakatokeketsha efula lo nyuma laki l’ɔtɛ ɔnɛ: ‘Wanɛ Wakitanyiya Ɔtɛkɛta wa Nzambi.’ L’ɔnɔnyi wa 2001, Losanganya la Distrikɛ la nshi shato lele l’ɔtɛ ɔnɛ: “Embetsha w’Ɔtɛkɛta Waki Nzambi” layosalema lo Congo-Kinshasa la lo Congo-Brazzaville.
3 Nsanganya yaso ya distrikɛ ya l’ɔnɔnyi wa 2001 yayotosha diaaso dikina dia tombola Jehowa kâmɛ l’anyaso ambetawudi wanɛ weya dia vɔ ‘wekɔ ase wola lo nyuma’ ndo walomɔlomɔ dia ‘mboka kɛnɛ katɛ nyuma tshumanelo.’—Mat. 5:3; Eny. 2:29.
4 Onde tayonga la wɔ? Toyalɔngɔsɔlɛ tatɛ oma ko kakianɛ. Tɔshi yɛdikɔ ya mbɔtɔ lo nshi yakɔ shato ya dambo dia lo nyuma dia dimɛna sɔ, tatɛ oma l’osambo wa ntondo polo lo dɔmbɛlɔ dia ndjihelo. Mbala efula vɔ nyɔlɔmbaka dia mbɔtɔ lo losanganya lasalema suke la lama wodjashinyu. Société ntshaka tshɛ kahombama dia nyonyɛ wotsho ɔmɔtshi lo dikambo sɔ. Wambokotsha dihole dikina diayosalema losanganya dia kimanyiya onto tshɛ l’atei aso dia ndeshama lo nyuma kâmɛ l’ase nkumbo kande. (Euh. 31:12) Etena ka tatɛ momba dikuta dia talɛka lo mboka kana dia futa mutuka tɔ kɛnɛ. Amɔtshi wakasale tshɛ dia mbɔtɔ lo losanganya l’ɔnɔnyi wa 2000. Oko ɛnyɛlɔ, kadiyɛso kɛmɔtshi nde l’omɛnde l’anawɔ ahende wakakɛndakɛnda l’ekolo kilɔmɛtɛrɛ 150 dia koma lo dihole dia losanganya. Kadiyɛso kɛso aki la diemi dia suke la mbota ndo akakongɛka dia mbota ɔnande la sato lo lomingu lakahombe losanganya salema. Lam’akawɛnaka woho waketaka anto otsha lo losanganya, nkumbo kɛsɔ kakakeketshama ko wakɔshi yɛdikɔ ya vɔ lawɔ munda lɔkɛndɔ. Lam’akawasale kilɔmɛtɛrɛ 70 kadiyɛso akandama la lɔnɔ ko akote ɔna l’olangala hangɔnɛ laki la demba dia wolo. Nkumbo kɛsɔ kakatetemala la lɔkɛndɔ otsho otsho ndo wakatokoma la wonya lo dihole dia losanganya ndo wakɔtɔ lo tɛnyi diakɔ tshɛ dia losanganya nshi yakɔ shato. Tayɛnya lowando laso lo welo wadja Société naka sho sala tshɛ dia mbɔtɔ lo losanganya lɔmɔtshi l’atei wa nyɛ yayosalema lo 2001.
5 Ohangelo: Sho tohangaka lo mvudu yaki anangɛsɔ. Sho pombaka monga la lowando le anangɛso wetawɔ todjasha lawakawɔ. Ndo nto, hosungana dia anto walongolawɔ ngasɔ nanya ɔlɔlɔ ɔsɔ ndo tohika ɔnɛ wâhangia nshi efula la ntondo kana l’ɔkɔngɔ wa losanganya. Pango mbishamaka paka lo nshi ya losanganya. Wanɛ washawɔ pango ya ngasɔ pombaka nɛnya diangɔ dia kanga luudu, aha nanya ndoko ema, aha ntshɔ l’ahole wewɔ hawowaele ndo mbidja yimba dia ndo anawɔ sala ngasɔ. Naka akanga a mvudu wambonga l’okakatanu ɔmɔtshi lo dikambo sɔ, vɔ la dia mbewoya esadi wanɛ wakamba olimu wa pangia anto, ko wayonga l’ɔngɛnɔngɛnɔ dia mbâkimanyiya. Ekimanyielo k’onto l’onto kekɔ ohomba di’olimu wa pangia anto kɛndakɛnda dimɛna. (Heb. 13:17) Takalongola alapɔlɔ ɔnɛ anto amɔtshi totshikaka luudu lakawawasha dia panga aha la mbuta ko ntshɔ lo dihole diele ɔngɛnyi awɔ kana onto ɔmɔtshi leyana la wɔ. Dikambo sɔ futanyaka lotumu l’anangɛso wakamba olimu wa pangia anto. Sho nyɔlɔmbaka nyu tshɛ dia mbisha lonya l’olimu ɔsɔ.
6 Mɛtɛ Jehowa sukɛka kɛnɛ katshama lo dikambo dia nsanganya ya weke yasalema ɔnɔnyi l’ɔnɔnyi. Lam’ele anangɛso efula wamɔ oma lawakawɔ dia tɔɔtɔ lo losanganya la distrikɛ tongaka l’ohomba wa mvudu ya panga, sho kokaka monga l’eshikikelo ɔnɛ Jehowa ayokotsha ehomba awɔ lo woho wakoka. Lam’ele akambo asɔ mendanaka la ɔtɛmwɛlɔ wa mɛtɛ, sho la dia ndjela alako tshɛ watoshawɔ l’ɔngɛnɔngɛnɔ tshɛ. Tɛnya dia tekɔ la kɔlamelo lo kɛnɛ koleki tshitshɛ; ko tayonga la dikoka dia kondja ɛlɔlɔ efula wakongɛ wanɛ walangema le Jehowa.—Luka 16:10.
7 Nyokimanyiya Wanɛ Wele l’Ehomba wa Lânde: Esombe w’anto, akanga wa dikɔmɔ, wanɛ wakamba olimu wa tena tshɛ ndo anto akina mbeyaka monga l’ohomba w’ekimanyielo dia vɔ koma lo dihole dia losanganya. Ewotɔ awɔ, dikumanyi ndo ase etshumanelo kawɔ weya ehomba wa lânde wele lawɔ, kokaka sala kɛnɛ kele ohomba la ngandji tshɛ, koko aha tshika wotsho awɔ tshɛ l’ahɛka w’anangɛso walɔngɔsɔla losanganya.—1 Tim. 5:4.
8 Toyalɔngɔsɔlɛ dia Mbɔtɔ Nshi Yakɔ Shato: Onde Satana akahembe dia nyekola yimba oma l’akambo wa lo nyuma? Lonyangu ko anangɛso l’akadiyɛso efula kâmɛ ndo nkumbo yawɔ ndjadimaka mbo ya ndɛ ya dimɛna efula ya lo nyuma. Lo yoho yakɔna na? Lo pandja ekongelo ka Lushi la Tanu. Lo nsanganya mɔtshi, takɛnyi di’anangɛso l’akadiyɛso efula wakahandja wetshelo wa lo nyuma wa Lushi la Tanu ndo nto wakahandja monga kâmɛ la anyawɔ. Ondo anangɛso amɔtshi wakakɔmɔ otema dia mbɔtɔ lo nsanganya ya weke nɛ dia wakayowavaka diangɔ lo mvudu yawɔ wonya wakiwɔ lo losanganya. Dia mbewɔ weho w’akambo asɔ, anangɛso amɔtshi wakɔshi tɛdikɔ dia ase nkumbo kawɔ wele bu Ɛmɛnyi ndjolamaka luudu wonya wewɔ vɔ la nkumbo yawɔ tshɛ lo losanganya.
9 Wahɔ Akɔna Wakondjaso lo Nsanganya Yaso? Ɔnangɛso ɔmɔtshi lakanandema la wetshelo w’oma lo dramɛ diaki l’ɔtɛ ate: “Bɛnyɛlɔ Diatewola” akate ate: “Ɔtɛ a dui ɔnɛ mbɔtɔnɛka dimɛna l’etena kasɛnaso kɛnɛ, etena kɔfɔnyi la kɛnɛ kakasɛnaka ase Isariyɛlɛ lam’akiwɔ l’oswe wa shɛnga suke la mbɔtɔ lo nkɛtɛ ya daka. Pɛkato yakasale ase Isariyɛlɛ mbasala anto nshi yaso nyɛ, ɛnyɛlɔ oko ɔtɛmwɛlɔ wa dikishi (ɔtɛmwɛlɔ w’akanga a lokumu) ndo monanyi. Diakɔ mɛtɛ diatewola dramɛ nɛ.” Onde ndo wɛ lawɔ mbakanandema la wetshelo wakatombe oma lo dramɛ nɛ?
10 Komelo: Oko wayasukana nshi ya wɛ mbɔtɔ lo losanganya lanyu la distrikɛ, lɔmbaka Jehowa lo dikambo sɔ dia wɛ mbɔtɔ lo tenyi dia nshi yakɔ shato ndo dia wɛ kondja wahɔ w’efula oma l’ekongelo kɛnɛ. Onde wɛ amboshilaka la nɔmba dikimɔ oma le owandji ayɛ w’olimu dia wɛ mbɔtɔ lo losanganya lɔsɔ la nshi shato layalɔngɔsɔlayɛ dia mbɔtɔ? Naka wɛ atasale, kete sala dikambo sɔ aha la tshimbatshimba. Mbala efula dikimɔ diayɔlɔmbamaka paka lo minitɛ k’ekomelo hadioyetawɔmaka. Ɔhɔmbɔ wa kɔlamelo ndo wa kɛsɔ ambɔlɔngɔsɔla Losanganya la Distrikɛ l’ɔnɔnyi ɔnɛ lele l’ɔtɛ a dui ɔnɛ: “Embetsha w’Ɔtɛkɛta Waki Nzambi” dia tetsha lo nyuma ndo dia keketsha mbetawɔ kaso. Ɔnkɔnɛ, tatɛ ndjalɔngɔsɔla oma ko kakianɛ dia monga l’atei wa wanɛ wayɔtɔ lo losanganya lɔsɔ, lo ndjela kɛnɛ kakate omembi w’esambo ate: “Nyutumbuli [Nzambi] lu elui w’antu a waki.”—Osam. 68:26.
[Caption on page 3]
[Box on page 3]
Ekongelo ka Wenya
Lushi la Tanu la la Samalo
9 h 30 – 17 h 00
Lushi la Lomingu
9 h 30 – 16 h 00
[Caption on page 4]
[Box on page 4]
Tɛdikɔ Tɔmɔtshi ta Mbɔsa dia Mbɔtɔ lo Losanganya la Distrikɛ “Embetsha w’Ɔtɛkɛta Waki Nzambi”
1. Naka wɛ pombaka ntsha lɔkɛndɔ l’otale dia tɔɔtɔ lo losanganya, kete tatɛ momba falanga ya lɔkɛndɔ layɛ wɛ la nkumbo kayɛ, ndo y’olelo anyu lɛkɔ.
2. Kany’ohɔ dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔ̂lɛmia la diangɔ dianyu di’oshinga wolo.’—Euh. 16:16; Tuk. 3:9.
3. Tayotombola lokombo la Jehowa nto lo monga la lɔkɛwɔ l’ɔlɔlɔ lo losanganya kamɛ ndo ɔlɔtɔ wa pudipudi ndo wa kɔmba.—1 Kor. 10:31.
4. Ntsha tshɛ dia kamba kâmɛ l’anangɛso wele l’ɔkɛndɛ wa nɔnga anto. Tâmbɛke ahole tshanana, paka di’ase nkumbo kayɛ kana dia wanɛ woye la yɛ.
5. Lo wenya wa mumuya, kôle diangɔ di’osadi woho wa wɛ ndjoyela etenyi ka l’ɔkɔngɔ a midi dimɛna. Mbo ya ndɛ ya wotsho mbishaka djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto katshake tshɛ dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadja l’ahole wakalɔngɔsɔma dia mbikadjaka mindo.—1 Pet. 1:15, 16.