Lɔmba ekimanyielo
1 Tekɔ lo sɛna lo tena dia ‘wolo mbikikɛ’ mbata ɛtɛkɛta wakafundama lo wolo wa nyuma k’ekila. (2 Tim. 3:1) Lâsɔ, akokayɛ sala lam’ahomanayɛ l’ekakatanu wa lo nyuma wakokayɛ mɛna oko wɛ hokoka mbatondoya na?
2 Onde wɛ ayolanga tɛkɛta l’ose etshumanelo ɔmɔtshi lambotshunda lo nyuma? Amɔtshi kokaka la kandakanda dia nyanga ekimanyielo dikambo vɔ hawoyeya kɛnɛ ka sala, kana hawolange fundɛ onto dui, ko kana vɔ mɛnaka di’ɔnɛ ndoko onto lakoka mbakimanyiya lo mɛtɛ. Eelo mɛtɛ, sho pombaka ntsha tshɛ dia mɛmba wetsho aso hita lo yɛdikɔ yɛdimi laso, koko hatokoke kandakandaka dia nyanga ekimanyielo l’akambo wendana la lonyuma laso.—Ngal. 6:2, 5.
3 Lɛnɛ ahombaso tatɛ: Wɛ mbeyaka ntshɔ le ɔnɔmbɔdi anyu wa wekelo wa dibuku ko towombola dia kana wɛ kokaka tomba la nde l’esambishelo. Kɛsɔ ayokosha diaaso dia wɛ mbotɛ saki kayɛ ka pama lo nyuma. Naka nde ekɔ okambi w’olimu, tɛnde lɛnɛ eyɛ l’ohomba w’ekimanyielo ka lo nyuma, ko nde ayototɛ dikumanyi dia vɔ kokimanyiya. Kana wɛ kokaka sawola l’ekumanyi tshɛ kayoyɛna lo kɛnɛ kendana l’ekakatanu ayɛ.
4 Ekimanyielo ka ngande keyɛ l’ohomba? Onde dui dimɔtshi diambokitshakitsha ohetoheto ayɛ? Onde wɛ ekɔ ombutshi w’onyemba wasala la wolo tshɛ di’aha anayɛ kakitɔna l’etshumanelo kânga yema? Onde wɛ ekɔ osombe w’onto wele l’ohomba w’ekimanyielo? Kana onde ekɔ awui amɔtshi wakɔkɔmɔla otema? Nsɛna lo tena diaso dia wolo nɛ ekɔ pâ efula, koko kɛsɔ hɛnya ɔnɛ hatokoke nsɛna. Sho kokaka kondja ekimanyielo.
5 Woho wakimanyiyana dikumanyi: Dikumanyi ndjakiyanyaka l’otema lo dikambo di’anto akina. Vɔ wayenda ekakatanu wele layɛ. Naka apandjudi akina wekɔ l’ekakatanu wa woho wâmɛ, kete dikumanyi wayenda dikambo sɔ ɔlɔlɔ wonya watshɔwɔ dia tembolaka ɛkɔkɔ kana wonya wetshawɔ etshumanelo. Oko wewɔ ‘bɛnyɛlɔ le ɛkɔkɔ,’ vɔ mongaka wonya tshɛ suke dia kamba kâmɛ layɛ l’ɔngɛnɔngɛnɔ tshɛ. (1 Pet. 5:3) Naka wɛ pokamɛ anangɛso wambotshunda wɔɔngɔ asɔ woho wakanawɔ yimba l’awui w’oma lo Bible, kete wɛ ayokoka nɔngɔsɔla esambishelo kayɛ ndo lɔsɛnɔ layɛ hita.—2 Tim. 3:16, 17.
6 Yeso akatosha ‘apami wele oko weshasha.’ (Ef. 4:8) Kɛsɔ nembetshiyaka ɔnɛ dikumanyi wekɔ dikambo dia kokambɛka. Vɔ wekɔ suke dia kokimanyiya. Vɔ ‘wekɔ oko wɛ mbawakanga.’ (1 Kor. 3:21-23) Lâsɔ, lo dihole dia wɛ momba dikambo l’otema, tadiɔ hwe hwe. Lɔmba ekimanyielo keyɛ l’ohomba.