Onde wɛ ekɔ opandjudi wasambisha mbala la mbala?
1 Sho tshɛ takangɛnangɛna lam’akatoke ɔnɛ Congo-Kinshasa ambokotsha lofulo l’apandjudi 114071 lo Ngɔndɔ ka Divwa 1999. Lofulo lɔnɛ ndja mɛtɛ oma lo weolo wakatadje sho tshɛ ndo oma l’eshikikelo kaso! Koko, lo ngɔndɔ kakayele, amɔtshi wa l’atei w’apandjudi asɔ wakayonga l’okakatanu dia monga apandjudi wa Diolelo wasambisha mbala la mbala, nɛ dia yɛdikɔ ya l’atei ya lofulo l’apandjudi akayongaka oko 105600. Kɛsɔ mɛnyaka dia opandjudi ɔtɔi l’atei w’apandjudi 13 kôsambishaka ngɔndɔ kɛsɔ. Tekɔ la mbetawɔ dia ekeketshelo kayela kɛnɛ, kokaka mbakimanyiya dia tondoya okakatanu ɔsɔ.
2 Tɔngɛnɛngɛnɛ diɛsɛ nɛ: Sho pombaka ngɛnangɛna efula diɛsɛ diele laso dia mbewoya anto akina lokumu l’ɔlɔlɔ la Diolelo. Olimu ɔnɛ ngɛnyangɛnyaka otema wa Jehowa ndo kimanyiyaka anto wele l’etema wosembwe dia mbishola mboka ka lɔsɛnɔ. (Tuk. 27:11; 1 Tim. 4:16) Esambishelo ka nshi tshɛ fudiaka ewo kaso l’olimu w’esambishelo ndo toshaka ɔngɛnɔngɛnɔ.
3 Tokimɔke alapɔlɔ w’olimu: Anto amɔtshi mbohɛka kimɔ alapɔlɔ awɔ w’olimu w’esambishelo la wonya. Tatɔfɔnyake pondjo ɔnɛ ndoko k’ɔlɔ kakatasale kahombaso kimɔ alapɔlɔ. (Enda lo Mako 12:41-44.) Lo weho akɔ tshɛ, sho pombaka kimɔ alapɔlɔ w’olimu wakatakambe! Naka tayonga la mbekelo ka fundaka wenya wasambishaso, ɛnyɛlɔ oko lo kamba l’alamanaka, kete kɛsɔ ayotokimanyiya dia ndjôhɔ esadi eto wenya wahombaso kimɔ lo komelo ka ngɔndɔ tshɛ.
4 Tokimɔ ekimanyielo kahombama: Etshumanelo kokaka mbɔsa tɛdikɔ t’amɛna dia kimanyiya wanɛ wele l’ohomba w’ekimanyielo dia tombaka nshi tshɛ l’esambishelo. Sekeletɛlɛ ka l’etshumanelo nde la ɛnɔmbɔdi wa wekelo wa dibuku pombaka menda di’apandjudi wambohokɔ akambo kimanyiya akina. Naka wɛ ekɔ l’ana kana l’ambeki wa Bible wele apandjudi wahatabatizama, kete etshawɔ woho wa vɔ kimɔka alapɔlɔ awɔ w’olimu oseka ngɔndɔ tshɛ.
5 Ohɔ ɔkɔndɔ wa lɔsɛnɔ laki kadiyɛso Ottilie Mydland wata ɔnɛ: “Lowando le Jehowa lo Woho Wakandambisha Lɔsɛnɔ l’Otale l’Olimu Ande,” wele lo Tshoto y’Etangelo ya Ngɔndɔ ka Dikumi 1, 1997, (lo Falase). Kadiyɛso kɛsɔ k’ose Norvège akayala opandjudi wakasambishaka lokumu l’ɔlɔlɔ nshi tshɛ, la ntondo ka nde ndjolongola batismu lo 1921. Ɛnɔnyi akumi esambele l’esamalo l’ɔkɔngɔ, lâsɔ ko nde aya l’ɛnɔnyi 99, nde akate ate: “Lekɔ l’ɔngɛnɔngɛnɔ dikambo lêke l’akoka wa sambisha lokumu l’ɔlɔlɔ mbala la mbala.” Ɔsɔ mɛtɛ ekɔ dionga di’ɔlɔlɔ efula diahomba ekambi tshɛ wa Jehowa monga ladiɔ!