‘Toyale akanga wa lokaho’
1 Ambeta ɛnɔnyi nkama, ɔpɔstɔlɔ Paulo akatɛ Timɔtɛ dia keketsha asekande ambetawudi ‘dia monga atshi w’akambo w’ɔlɔlɔ, ndo ndjala akanga wa lokaho.’ (1 Tim. 6:18) Paulo akohola nto Akristo w’ase Hɛbɛru di’aha vɔ ‘mbohɛ ntshaka akambo w’ɔlɔlɔ ndo monga la lokaho otsha le anto akina.’ (Heb. 13:16) Lande na kakandasha alako asɔ na? Nɛ dia nde akeyaka ɔnɛ ‘lotombo la kɛnɛmɔ ndo wɔladi wayonga le onto tshɛ latotshaka kɛnɛ kele ɔlɔlɔ.’—Romo 2:10.
2 Oko wende Otungi, Jehowa Nzambi kele Kanga diangɔ tshɛ. (Eny. 4:11) Sho mɛtɛ ngɛnangɛnaka akambo w’ɔlɔlɔ watosalɛnde l’ekimanyielo ka diangɔ diakandatonge. Kânga mbele anto efula wekɔ la lɔhɛndɛ, Nkum’Olongo ekɔ lo tetemala la mbisha anto tshɛ diaaso dia vɔ kondja ɛlɔlɔ oma lo tɛdikɔ toludi la lokaho tɔsande dia nsukɛ nsɛnɔ y’anto. (Mat. 5:45) Nde akakimɔ ndo Ɔnande lolekinde nanga oko olambo dia sho kondja lɔsɛnɔ la pondjo. Shi ngandji kakawatoke la dia totshutshuya dia sho mɛnya lowando laso lo monga la lokaho le asekaso anto?—2 Kor. 5:14, 15.
3 Kakɔna kakokaso kaha? Sunganaka sho kamba la kɛnɛ tshɛ kele laso lo yoho yangɛnyangɛnya Nzambi. Aha la tamu sho nangaka sukɛ olimu wa Diolelo wakambema l’andja w’otondo oyadi lo yoho ya l’emunyi kana ya lo nyuma. Mɛtɛ, lokumu l’ɔlɔlɔ ekɔ ɛngɔ koleki oshinga wolo kakoka onto tshɛ kondja nɛ dia lɔ lekɔ ‘nkudu kaki Nzambi dia mbisha panda.’ (Romo 1:16) Naka tayokambaka la lokaho tshɛ la wenya aso ndo la diangɔ diaso di’oshinga wolo ngɔndɔ tshɛ dia mbidja lonya l’olimu w’esambishelo ndo wa wetshelo, kete sho koka monga l’akoka wa kahana l’anto akina ɛngɔ kɛnɛ k’oshinga wolo ka lo nyuma kayowalɔmbɔla otsha lo lɔsɛnɔ la pondjo.
4 Jehowa ngɛnangɛnaka efula lam’akimanyiyaso anto wele bu l’ekondjelo k’efula. Nde tolakaka ɛtshɔkɔ ndo toholaka nto ɔnɛ: ‘Diangɔ diaso di’oshinga wolo diayonga anyanya lo lushi la nkɛlɛ [kande], koko losembwe katotshungolaka anto oma lo nyɔi.’ (Tuk. 11:4; 19:17) Sukɛ olimu wa Diolelo la diangɔ diaso dia l’emunyi ndo ndjâkimɔ la tshondo l’esambishelo ka lokumu l’ɔlɔlɔ ekɔ weho w’eshika wakokaso mɛnya dia sho mɛtɛ tekɔ atshi w’akambo w’ɔlɔlɔ, ndo akanga wa lokaho.