‘Nyonge Ɛngɔnyi l’Elimu w’Ɔlɔlɔ’

¹ Oya l’ɛnɔnyi w’ekomelo w’olimu wakandakambe l’ohetoheto, ɔpɔstɔlɔ Paulo akakambe dihɛka lo dihɛka nde la Timɔtɛ ndo la Tito. Nde akafundɛ ɔm’ɔmɔ la l’atei awɔ ɛtɛkɛta w’ekeketshelo wa woho ɔtɔi. Nde akatɛ Tito “dia wane waketawo [Nzambi]” pombaka “ntetemala vame lu ditshelu di’ololo.” (Tito 3:⁠8) Nde akatɛ Timɔtɛ dia wanɛ wele l’elongamelo le Nzambi pombaka “ndjala engonyi wa lu elimu w’ololo.” (1 Tim. 6:​17, 18) Ɔsɔ ekɔ dako dia dimɛna efula le so sho tshɛ! Ko kakɔna kayototshutshuya dia kamba elimu w’ɔlɔlɔ lo nsɛnɔ yaso? Ndo elimu akɔna shikaa wayotokamba lo nshi yayaye?

² Kɛnɛ kahomba totshutshuya dia monga ɔngɔnyi l’elimu w’ɔlɔlɔ ele mbetawɔ ndo ngandji kaso le Jehowa ndo elongamelo ka diambo kakandatosha. (1 Tim. 6:19; Tito 2:11) Djekoleko l’etena kɛnɛ ka l’ɔnɔnyi, wekɔ lo tohola dia Jehowa akatome Ɔnande la nkɛtɛ dia nde ndjoyindja She ndo ndjodiholɛ anto w’ɔlɔlɔ tshɛ mboka k’otsha lo lɔsɛnɔ la pondjo. (Mat. 20:28; Joa. 3:16) Dikambo sɔ mbayolembetshiyama hwe lo Eohwelo ka nyɔi ka Kristo lo Ngɔndɔ ka Sato 28. Lam’ele tekɔ l’elongamelo ka kondja lɔsɛnɔ la pondjo, onde hatotshutshuyama dia ntsha tshɛ kakokaso sala dia “ndjala engonyi wa lu elimu w’ololo”? Eelo mɛtɛ sho kokaka! Ko elimu akɔna wahombaso kamba wonya ɔnɛ?

³ Elimu w’Ɔlɔlɔ wa Sala lo Ngɔndɔ ka Sato ndo lo Ngɔndɔ Yayela: Lo mɛtɛ, tayɔtɔ lo Eohwelo, dikambo dia l’ɔnɔnyi dioleki ohomba l’Ɛmɛnyi wa Jehowa wa l’andja w’otondo. (Luka 22:19) Koko sho nangaka kahana ɔngɛnɔngɛnɔ wa diaaso sɔ sho l’anto efula. Enda alapɔlɔ w’olimu wele l’Annuaire w’ɔnɔnyi 2002, ko wɛ ayɛna dia, ɔnɔnyi wetshi lo wedja efula wa l’andja w’otondo lofulo l’anto wakɔtɔ lo losanganya la Eohwelo lakalekana lofulo l’apandjudi mbala shato, nyɛi, tshanu, kana ndekana. Lâsɔ mɛtɛ, akahombe as’etshumanelo tshɛ mbidja welo dia kahanya akatshi efula wa leeta w’oya lo Eohwelo lo mbilo yawɔ. Lâsɔ, sho pombaka mbetsha wenya efula lo ndjela akoka wele laso dia mbeta anto oya lo Eohwelo tatɛ nshi nyɛ polo ndo lo Ngɔndɔ ka Sato 28 ndo mbakimanyiya woho wa vɔ ndjala l’ewo kendana l’elongamelo ka panda.

⁴ Ngande wakoka onto l’onto kamba dimɛna la waaso w’ɔlɔlɔ wele lande dia “ndjala engonyi wa lu elimu w’ololo” na? Naka sho tetemala kamba olimu w’esambishelo ka lokumu l’ɔlɔlɔ la wangasanu tshɛ, kete tayonga l’‘ohetoheto l’elimu w’ɔlɔlɔ.’ (Tito 2:14; Mat. 24:14) Naka wɛ kokoka kamba oko ombatshi mboka wa tshanda lo Ngɔndɔ ka Sato, onde wɛ hakoke kamba lo Ngɔndɔ ka Nɛi kana ndo ka Tanu? Naka wɛ ekɔ ombatshi mboka lo Ngɔndɔ ka Sato, onde wɛ kokaka tetemala?

⁵ Apandjudi amɔtshi wakamba olimu wa l’emunyi mɛnaka dia vɔ kokaka sambisha wonya ɔtɔi wa tango kana ndekana lam’atawatshu otsha l’olimu lo sambisha lo toshinga kana lo membola wanɛ wadihola makashinyi awɔ la lɔkɛsɛ. Akina ndjalɔngɔsɔlaka dia sambisha wonya walɛwɔ yangɔ ya midi. Anto amɔtshi mɛnaka ɔlɔlɔ mbeka Bible l’osekande ɔmɔtshi la l’olimu l’etena kɛsɔ. Akadiyɛso efula wotshukami wakonge l’akoka wa kondja etena ka tomba l’esambishelo wonya wele anawɔ la kalasa. Lam’emɔwɔ esadi nshi mɔtshi dia shidiyaka elimu awɔ wa lo ngelo, vɔ kondjaka wenya efula lo lushi dia kamba olimu w’esambishelo ndo wa wetshelo.​—⁠Ef. 5:​15, 16.

⁶ Oyadi wɛ bu l’akoka wa monga ombatshi mboka wa tshanda, ondo wɛ kokaka ndjalɔngɔsɔla dia sambisha efula, ndo sala kɛnɛ tshɛ kakokayɛ sala “dia tshela akina ololo, la dia ndjala engonyi wa lu elimu w’ololo, la dia ndjala la lukahu, ndu [“monga suke dia kahana,”NW]” l’anto akina akambo wa mɛtɛ.​—⁠1 Tim. 6:⁠18.

⁷ Tohɛke Olimu w’Ɔlɔlɔ wa Mbetɛ Anto Ambeki: Ɔnɔnyi tshɛ anto wakɛnya nsaki ndjâka lo Eohwelo. Onde anto amɔtshi wa l’etshumanelo koka mbidja yimba dikambo dia wanɛ waya lo nsanganya koko ndoko onto leka la wɔ? Onde hakoke towaembola l’oyango wa mbakimanyiya dia vɔ pama lo nyuma? Mbeyaka monga k’anto amɔtshi wɔtɔ lo Eohwelo wekɔ ewotɔ w’Ɛmɛnyi wa Jehowa. Akina mbeyaka monga anto wakekaka Bible ntondo wele paka l’ohomba wa yema y’ekeketshelo dia vɔ nyomotatɛ mbeka ndo mbɔtɔka lo nsanganya mbala la mbala. Tayonga mɛtɛ l’ɔngɛnɔngɛnɔ etena kayotowaɛna wambokoma ekambi wa Jehowa wasambisha kâmɛ la so!

⁸ Naka sho sambisha efula lo Ngɔndɔ ka Sato ndo ngɔndɔ yayela, kete mɛtɛ tayotana anto efula wayasha wahombaso kalola dia towaenda. Ona woho wa mbatshika la wombola ɔmɔtshi. Oma lâsɔ ko wɛ mbalaka dia ndjakadimola mbala kayaye. Naka sho sala ngasɔ, kete tayokoka sala wendelo w’oyoyo. Ayonga dimɛna, sho kalola esadi dia towaenda. Naka sho hatokoki tatɛ wekelo lo wendelo wa ntondo, kete sho koka pemba dia tatɛ wekelo lo mbala kayela kayotowaembola naka kokaka.

⁹ Etena kasambishaso lo toshinga, sho pombaka sala tshɛ dia pemba tatɛ sawola l’anto. Apandjudi efula wakafunde adrɛsɛ, nkombo, ndo numɛlɔ ya telefɔnɛ y’anto wakɛnya nsaki, wakahomana lawɔ l’esambishelo ka lo toshinga. Naka onto losawudi layɛ hadjasɛ l’ɛtshi kanyu ka nkɛtɛ, kete ewoya sekeletɛlɛ ka l’etshumanelo kanyu woho wa nde mbewoya etshumanelo kakamba l’ɛtshi ka nkɛtɛ kadjasɛ onto akɔ. Naka sekeletɛlɛ hakoke sala dui sɔ, kete nde ayewoya Bɛtɛlɛ dia tɔ mendana la dikambo sɔ. Woho ɔsɔ, mbakokaso ndjela nsaki kakɛnya onto.

¹⁰ Naka numɛlɔ ka telefɔnɛ mbakandakosha, koko aha adrɛsɛ, kete sala wendelo w’oyoyo lo mbeta onto akɔ lo telefɔnɛ. Lɔngɔsɔla la ntondo kɛnɛ kalangayɛ sawola la nde. Kitsha dibuku Comment raisonner suke dia mbeya mboka sso lɔkɔ esadi eto. Amɔtshi wekɔ lo kondja etombelo w’ɔlɔlɔ lo mbeka l’anto oma l’ekimanyielo ka telefɔnɛ, mbidja ndo anto wele aki wolo le wɔ dia mbatana lawakawɔ. Kadiyɛso kɛmɔtshi akambola numɛlɔ ya telefɔnɛ ya wamato amɔtshi wakɛnya nsaki wakahomana la nde l’esambishelo ka lo soko la soko, ndo etombelo wakonge ele nde akakoke tatɛ wekelo wa Bible l’anto ahende.

¹¹ Kamba Kâmɛ la Dikumanyi dia Kimanyiya Wanɛ Wahayosambisha: Dikumanyi ndjashaka efula dia mbidja yimba yawɔ la ngandji tshɛ le anto asɔ. Oma l’ɛlɔmbwɛlɔ kawɔ, efula ka l’atei w’anto asɔ, wamboshila nyomotatɛ nto la wɔtwɛlɔ wa nsanganya ya l’etshumanelo. Vɔ wambɛna ohomba wa kakatana kâmɛ l’ɔlɔngɔswɛlɔ waki Jehowa dia kondja ekokelo ka lo nyuma kakatama lo Osambu 91. Amɔtshi wa l’atei awɔ waya suke kakianɛ dia sambisha nto. Naka anto akina wahayosambisha wambɔtɔ lo Eohwelo ngɔndɔ kɛnɛ, kete ondo wayetawɔ dia vɔ mbeka Bible. Naka dikambo sɔ diamonga ɔsɔku, kete dikumanyi wayenda woho w’onto ɔmɔtshi mbeka la wanɛ wele l’ohomba w’ekimanyielo. Naka wambokɔlɔmba dia mbisha lonya lo dikambo sɔ, kete ekimanyielo kayɛ kayandɔma efula.​—⁠Romo 15:​1, 2.

¹² Tetemala l’‘Elimu w’Ɔlɔlɔ’: Efula ka wanɛ wakakambe oko ambatshi mboka wa tshanda ngɔndɔ ɔtɔi kana ndekana wakɛnyi di’olimu awɔ w’esambishelo wakahame lo ngɔndɔ yakayele. Vɔ wakahomana l’anto wakɛnya nsaki wakawɛnyi dia ekɔ ohomba wa kalola dia nyomotowaenda. Dui sɔ diakatshutshuya dia mbidja welo wa lâdiko dia nyomoleka tomba l’esambishelo mbala efula dia nyomotenda anto wakɛnya nsaki asɔ. Amɔtshi wakatatɛ mbeka l’anto, ndo dikambo sɔ diakakimanyiya dia nyomoleka sambisha.

¹³ Amɔtshi wakakondja ɔngɛnɔngɛnɔ efula lo ndjasha efula l’olimu w’esambishelo ndo wa mbetɛ anto ambeki, ndo dui sɔ diakatshutshuya dia sɛdingola akambo wahombawɔ mbetsha la ntondo. Etombelo wakonge ele, amɔtshi wakakoke kitshakitsha elimu awɔ wa l’emunyi l’oyango wa tetemala kamba oko ambatshi mboka wa tshanda. Akina wakonge l’akoka wa kamba oko ambatshi mboka wa pondjo. Vɔ wakakoke mbidja elongamelo kawɔ tshɛ le Nzambi koko aha lo kɛnɛ kakoka mbasha andja ɔnɛ. Vɔ wakɛnyi dia “ntshela akina ololo,” mbakondjiyɛka ɛtshɔkɔ efula oma le Jehowa ndo keketshaka elongamelo kawɔ ka monga la ‘lɔsɛnɔ l’oshika.’ (1 Tim. 6:​18, 19) Lo mɛtɛ, etshumanelo k’otondo kondjaka ɛtshɔkɔ lam’akamba anto efula olimu w’ombatshi mboka. Ambatshi mboka wekɔ la mbekelo ka kɔndɔlaka awui wakawɛnyi ndo ka mbeta anto akina dia nsambisha kâmɛ la wɔ. Dui sɔ pamiaka lonyuma la l’etshumanelo.

¹⁴ Sho tshɛ tosale dia “ndjala engonyi wa lu elimu w’ololo” l’etena kɛnɛ ka Eohwelo ndo lo tena dikina, ndo toleke ndjasha l’olimu w’Akristo. Nyɛsɔ tɛnya lowando laso lo kɛnɛ kakasale Jehowa dia tosha elongamelo ka lɔsɛnɔ la pondjo lo nkɛtɛ k’oyoyo ka losembwe.​—⁠2 Pet. 3:⁠13.