Onga ɔnɛ lakitanyiya l’ɔngɛnɔngɛnɔ
1 Yeso akate ate lo nshi ya wôngelo ande, anto efula ‘hawotodja yimba,’ oko woho wakadionge lo nshi ya Nɔa. (Mat. 24:37-39) Lâsɔ, sho hatokoke nongamɛ ɔnɛ anto efula wayohokamɛ lokumu l’ɔlɔlɔ la Diolelo. Ko lâsɔ, kakɔna kakoka tokimanyiya dia sho nama yimba yaso y’ɔngɛnɔngɛnɔ lam’atatakambe olimu aso na?—Osam. 100:2.
2 Ntondotondo, sho la dia mbohɔka ɔnɛ losango laso ndo olimu aso wa sambisha ndja oma le Nzambi. Naka onto ambɔnyɔla olimu aso oyadi welo akɔna wadjaso, kete aha sho mbɔnyɔlande, koko Jehowa. Naka tayohɔ dia kɔlamelo yaso l’esambishelo ngɛnyangɛnyaka Jehowa, kete hatotoshisha ɔngɛnɔngɛnɔ aso mbidja ndo wɔnɛ wa l’etei k’otema oko weso wanɛ wakitanyiya ɔtɛkɛta waki Nzambi.—Jak. 1:25.
3 Dui dia hende, teye dia anto wêkekɔ wakoka mbetawɔ ehomɔ ka Jehowa kayondosha anto panda. Kânga mbakoka anto efula monga la wendjodi, anto wele oko ɛkɔkɔ wahomba tshumanyema wekekɔ, polo ndo l’etena kɛnɛ kambotɔnyɔngɔmɛ etale l’etena k’ekomelo. Sho la dia tetemala sambisha, lo ntshɔ ‘l’osomba kana lo ngelo tshɛ’ woho wa ‘nyanga anto wakoka tolongola.’—Mat. 10:11-13.
4 Onga la dionga dia dimɛna: Lokumu la kɔlɔ lele l’ɛtɛmwɛlɔ wa kashi wakatɛwɔla anto amɔtshi. Akina “wakahenyahenyama, ndu kundjala la ekimanyelu” l’ɔtɛ w’awui wasalema l’andja ɔnɛ. (Mat. 9:36) Mbeyaka monga ko efula wekɔ lo ndjakiyanya l’ɔtɛ wewɔ bu l’elimu, wewɔ bu l’alemba wa wolo, ndo wewɔ bu l’ekokelo k’ɔlɔlɔ. Naka sho mana dui sɔ fundo, kete tayokimanyiyama dia tetemala l’olimu aso. Tosale la wolo dia tatɛ sawola l’anto wa l’ɛtshi kaso ka nkɛtɛ awui walekawɔ ndjakiyanya. Kimanyiyawɔ dia vɔ mbeya ɔnɛ paka Diolelo diaki Nzambi mbayoyokandola awui tshɛ. Kamba l’Afundelo ndo l’awui amɔtshi w’eshika w’oma l’ekanda aso dia lokumu l’ɔlɔlɔ minanda etema awɔ.—Heb. 4:12.
5 Wanɛ wakitanyiya ɔtɛkɛta wa Nzambi l’ɔngɛnɔngɛnɔ mbohɔka nshi tshɛ ɔnɛ: ‘Ɔngɛnɔngɛnɔ waki Jehowa mbele etangelo [kaso].’ (Neh. 8:10) Lâsɔ, hatohombe shisha ɔngɛnɔngɛnɔ aso. “Naka wane weli lu luudu lako weko ololo, ki kanyu kayali loko. Keli naka vo kema ololo, ki kanyu kakaluli le nyu.” (Mat. 10:13) Jehowa toshaka nto ɔngɛnɔngɛnɔ ndo wolo lam’atetemalaso la lotutsha tshɛ l’olimu ande w’ekila, ndo nde tshɔkɔlaka kɔlamelo yaso.