Totombole Jehowa oma l’etsha w’ɛlɔlɔ

¹ Etena kakɔlwɛ mvula ngembe, wɛ tongaka mɛtɛ l’ohomba wa tana dihole dia mbikama! Naka dihole diakɔ bu tshitshi k’efula ko diekɔ l’ekokelo ka dimɛna ndo naka anto wa lawɔ nongɔnaka dimɛna, kete wɛ ayɔngɛnangɛna dia tshikala lo dihole sɔ. Olimu w’esambishelo ka Diolelo minyaka anto oma l’andja wa Satana ko mbâtɔla otsha lo dihole di’ekokelo dia ngasɔ. Onde lɔkɛwɔ laso la lushi la lushi kokaka kotola anto akina oya lo dihole di’ekokelo sɔ? Eelo, nɛ dia Yeso akate ate anto ‘wayɛna etsha aso w’ɛlɔlɔ ko wayotombola Shɛso lele l’olongo.’​—⁠Mat. 5:⁠16.

² Ngande wakokaso kɛndakɛndaka di’etsha aso kotola anto akina oya le Jehowa ndo oya l’ɔlɔngɔswamelo ande na? Ele lo mbɔtɔnganyiya nsɛnɔ yaso lushi tshɛ l’ɛtɛkɛta waki Yeso wele lo Luka 6:31 ndo Luka 10:27. Kɛsɔ kayototshutshuya dia ndjâkiyanya la ngandji tshɛ dikambo di’asekaso anto ndo diayototshikitanya l’anto wa l’andja ɔnɛ wahokana ngandji ndo wahayâkiyanya dikambo di’anto akina.

³ Kadiyɛso kɛmɔtshi kakatatshɔka lo masuwa akɛnyi osekaseka ɔmɔtshi wa womoto ele baka la hemɔ woho ɔnɛ wele nde komonga nto l’akoka wa nkokɛ ɔnande l’ashashi. Kadiyɛso kɛsɔ akakokɛ ɔn’ɔsɔ. Lam’akayowombola mama kɛsɔ ɔnɛ akokami kosalɛ lo menda tshɛ kosaleyɛ ɔnami, kadiyɛso akawotɛ ate: ‘Lambokɔsɛngasɛnga dia wɛ mpokamɛ kɛnɛ kayokotɛ Ɛmɛnyi wa Jehowa lushi lokowɔkɔkɔla lo luudu layɛ.’ Womoto ɔsɔ akasale ɔsɔku ndo kakianɛ nde l’omɛnde waya Ɛmɛnyi wa Jehowa. Etsha w’ɛlɔlɔ tshikitanyaka tokanyi t’anto lo woho wɔsawɔ losango la Diolelo.

⁴ Lɔsɛnɔ laso l’otondo mendanaka la dikambo sɔ: Lɔkɛwɔ lele laso lo dihole diodjashiso, lo dihole diakambaso olimu kana la kalasa ndo lo tena dia tɔkɛnyɔ tshutshuyaka anto akina dia vɔ monga la kanyi mɔtshi lo kɛnɛ kendana la so ndo l’ɔtɛmwɛlɔ aso. Diakɔ diahombaso ndjambola ɔnɛ: ‘Anto watenda ngande wambɔsawɔ dimi la nkumbo kami? Onde asukanyi mɛnaka dia luudu ndo sɛkɛ diaso diekɔ pudipudi ndo dimɛna? Onde asekaso wa l’olimu kana wa la kalasa tɔsaka oko anto walɛnya wonya ndo wele l’etete l’olimu? Onde anto akina mɛnaka dia tekɔ tɔkɔmba ndo ndɔtataka lo yoho yasungana anto tosha dilɛmiɛlɔ?’ Anto akina kokaka ngɛnangɛna ɔtɛmwɛlɔ waki Jehowa efula diɛsɛ oma l’etsha aso w’ɔlɔlɔ.

⁵ Petero akewola Akristo dia anto wayowaɔnyɔla. (1 Pet. 4:⁠4) Sho pombaka ndjâshikikɛ ɔnɛ dionga diaso hadiotshutshuya anto akina dia vɔ tɛkɛta kɔlɔ lo dikambo diaso. (1 Pet. 2:12) Naka etsha aso wa lushi la lushi tombolaka Nzambi katɛmɔlaso, kete tayonga oko atala wokitshishawɔ lo dihole dia lâdiko dia ngamula osase woho wa kotola anto akina oya lo dihole di’ekokelo diambɔlɔngɔsɔla Jehowa.​—⁠Mat. 5:​14-16.