Ngandji totshutshuyaka dia sho sambisha
1 Oko weso Ɛmɛnyi wa Jehowa, sho ndeka mbeyama oma lo yoho yasambishaso losango la Diolelo l’etete. (Mat. 24:14) Anto ndekana miliyɔ shamalo wekɔ lo sambisha l’andja w’otondo; lofulo lɔsɔ lekɔ lo tatetemala mbudɛ lam’asangana anto w’eyoyo dia sambisha kamɛ la so. Lemba l’anto lɔsɔ wamboyasha l’olimu ɔnɛ.
2 Kakɔna katotshutshuya dia sho kamba olimu ɔsɔ wa wolo la lolango laso shamɛ na? Ndoko onto latotshutshuya la wolo ndo sho hatokotwama l’ɔtɛ wa diangɔ dia l’emunyi, kana wa kondja lotombo la lânde. L’etatelo, efula ka l’atei aso waki la wɔma nɛ dia wakayaokaka oko vɔ bu l’akoka wa kamba olimu ɔsɔ, ndo anto kondekaka mbetawɔ losango lawɔ. (Mat. 24:9) Efula k’anto watenda hawomane kɛnɛ katotshutshuya fundo. Ekɔ shadiya mɔtshi yatotshutshuya dia sho tetemala l’olimu ɔsɔ.
3 Wolo wele la ngandji: Yeso akɛnya ɔlɛmbɛ woleki woke lam’akandate ate sho ‘pombaka nanga Jehowa l’otema aso tshɛ, la yimba yaso tshɛ, ndo la wolo aso tshɛ.’ (Mako 12:30) Ngandji kokaso Jehowa ndja oma lo lowando l’efula lele laso lo woho wende, Omboledi w’Andja w’otondo, Otungi wa diangɔ tshɛ, ɔnɛ ‘lasungana nongola lotombo, kɛnɛmɔ, la nkudu.’ (Eny. 4:11) Waonga ande wa mamba haweyama mbɛdika.—Etum. 34:6, 7.
4 Ewo la ngandji kele laso otsha le Jehowa totshutshuyaka dia sho ngamula osase aso la ntondo k’anto. (Mat. 5:16) Osase aso pɛtaka lam’awotombolaso lo sɛkɛ, lam’atɛkɛtaso dikambo di’elimu ande wa diambo ndo lam’adianganyaso losango lendana la Diolelo diande. L’ɛnyɛlɔ k’ondjelo watafumbɔ l’atei w’olongo, sho tekɔ “la lukumu l’ololo la pundju, . . . [la mbewoya] wa la kete, ndu wedja tshe ndu wauhu tshe ndu eteketa tshe ndo antu tshe.” (Eny. 14:6) Ngandji kaso mbele wolo watokeketsha dia sho kamba olimu w’esambishelo wa l’andja w’otondo.
5 Ase andja ɔnɛ mbɔsaka esambishelo kaso oko ‘dikambo di’anyanya’ diahawahombe kitanyiya. (1 Kor. 1:18) Anto efula wakadje weolo wa memadja olimu aso. Ngandji kaso ka kɔlamelo tokeketshaka dia sho mbuta oko wakate apɔstɔlɔ ɔnɛ: “Shu hateyi ntsha dikambo dikina, paka mvuta akambu wakatenyi la wakatuki. . . . Dieli la su dia nkitanyia aui wa [Nzambi] aha aui w’antu atu.” (Etsha 4:20; 5:29) Olimu w’esambishelo wekɔ lo tatetemala kokanɛ lo bɛkɛ tshɛ dia la nkɛtɛ kânga mbatodjɛwɔ wekamu.
6 Ngandji kokaso Jehowa kekɔ oko lômbe la dja latotshutshuya dia tasanyaka akambo ande w’ɛlɔlɔ l’ahole tshɛ. (Jer. 20:9; 1 Pet. 2:9) Tayotetemala la “[tasanyiɛka] wedja dia etsha andi . . . ne dia akambu wa mamba wakandatshi.”—Is. 12:4, 5.