Tokambake Olimu W’ekila Ndo La Yanyi Ndo L’otsho
1 Tekɔ la diɛsɛ dia mamba: nɛ dia ndjâla Ɛmɛnyi wa Jehowa. Tekɔ l’atei w’ɔlɔngɔswamelo wa l’andja w’otondo w’esambisha a lokumu l’ɔlɔlɔ wakamba Jehowa lawɔ dia ntsha olimu woleki woke wa mbewoya Diolelo dia tena tshɛ. (Mako 13:10) Lam’ele tekɔ lo sɛna lo tena dia wolo, onde sho ndjashaka tshɛ l’olimu ɔsɔ lo menda akoka aso?
2 Hateye anto angana wayetawɔ esambishelo kaso. Jehowa ekɔ lo tosha eshikikelo ɔnɛ ayonga “ului a wuki” weyama oma l’‘olimu w’ekila wakambawɔ ndo la yanyi ndo l’otsho.’ (Eny. 7:9, 15) Ɛmɛnyi ndekana miliyɔ tshanu wakamba olimu wa Nzambi nshi nyɛ kema ambuki ato wɛnya yema ya saki, kana anto wɔtɔ paka lo nsanganya tsho. Vɔ wekɔ anto wakamba olimu ɔmɔtshi, wasambisha lokumu l’ɔlɔlɔ l’andja w’otondo.
3 Nshi tshɛ tekɔ la waaso wa tombola Jehowa, oyadi l’esambishelo ka tâyalɔngɔsɔdi kana ka tshakitudi. Tokanyiya woke w’olimu w’esambishelo wotokoka tshama otondoyala onto l’onto l’atei aso mbɔsaka yɛdikɔ ya mbewoya kânga onto ɔtɔi akambo wa mɛtɛ lushi tshɛ. Lowando laso le Jehowa otohombaka tosokoya dia sanya dikambo diande l’ohetoheto.—Osam. 92:1, 2.
4 Tokimanyiya Akina dia Vɔ Kamba Olimu w’Ekila: Jehowa ekɔ lo tetemala tɔtshɔkɔla lo toshaka ohamelo. (Hang. 2:7) Ɛnyɛlɔ oko lo Congo-Kinshasa, yɛdikɔ ya l’atei atei y’ambeki wa Bible l’ɔnɔnyi w’olimu wetshi aki 217480 ngɔndɔ tshɛ. Lam’ekaso l’anto, oweso aso ele mbakimanyiya dia vɔ koma ambeki wa Yeso Kristo. (Mat. 28:19, 20) Efula l’atei awɔ wambohama efula ndo wekɔ lo mbɔtɔ tena tshɛ lo nsanganya. Vɔ wakamɛ mbutɛ anto weyana la wɔ “akambo w’amɛna efula wa Nzambi” wakaweke. (Etsha 2:11, NW) Onde sho kokaka mbaelɛ kakianɛ dia vɔ kamba olimu wa lo sɛkɛ?
5 Lo ngɔndɔ ka Nɛi, tayodja wolo a lânde dia mbelɛ ambeki wakotsha akambo walɔmbama dia vɔ sangana la so l’esambishelo. Onde onto leka la yɛ ambɛnya saki? Naka ɔsɔku, onde nde ekɔ lo kotsha akambo walɔmbama l’Afundelo? (Enda lo dibuku Notre ministère, lɛkɛ 98-100.) Etena kalanga ombeki tomba l’esambishelo, sawola l’omendji-walɔmbɔla dia saki kande, ko nde ayɔsa tɛdikɔ dia dikumanyi dihende menda dikambo diakɔ. Naka nde ekɔ lo kotsha akambo walɔmbama dia koma opandjudi wahatabatizama, kete nyele ombeki akɔ dia nde nyotshindɛ l’esambishelo. Omendji w’olimu kâmɛ l’anɔmbɔdi wa wekelo wa dibuku wayodja yimba djekoleko dia kimanyiya wanɛ wakoka kotsha akambo walɔmbama dia tatɛ sambisha lo Ngɔndɔ ka Tanu.
6 Ayonga dimɛna dia ambutshi menda kana anawɔ wambokoka koma apandjudi wahatabatizama. (Osam. 148:12, 13) Naka ɔnayɛ nangaka tɛkɛta l’olimu wa Diolelo ndo naka nde ekɔ la lɔkɛwɔ l’ɔlɔlɔ, kete wɛ kokaka mbewoya ekumanyi kɛmɔtshi k’ose kɔmite k’olimu dikambo diakɔ. L’ɔkɔngɔ wa vɔ sangana la yɛ wɛ l’ɔna, dikumanyi dihende wayoshikikɛ dia kana nde kokaka mbadiema l’ɔnɔngɔ w’apandjudi. Ekɔ ɔngɛnɔngɛnɔ wa lânde dia ana tombola Nzambi kâmɛ la so!
7 Paka Jehowa oto mbasungana sho mbokambɛ olimu w’ekila. (Luka 4:8) Nyɛsɔ sho tshɛ tokondja ɛlɔlɔ oma lo diɛsɛ dia diambo diele la so dia mbotombola “efula!”—Esam. 109:30; 113:3.
[Caption on page 1]
Olimu Aso: Djembetelo Ya Ngandji K’oshika
1 Oma l’olimu aso sho mɛnyaka okitanyia aso l’ɛlɛmbɛ ehende woleki weke. (Mat. 22:37-39) Ngandji kokaso Jehowa totshutshuyaka dia sho mbutɛ anto akambo ande w’ɔlɔlɔ. Ngandji kokaso anyaso anto tosokoyaka dia sho mbâkeketsha dia vɔ nyanga dia mbeya lolango la Nzambi l’asangwelo ande woho wa vɔ ndjokoma lo mboka Jehowa ngandji ndo monga la waɛsɛ wa kondja difuto dia lɔsɛnɔ la pondjo. Ɔnkɔnɛ, oma l’olimu aso, sho nɛmiyaka lokombo la Jehowa ndo mbewoyaka anyaso elongamelo ka diambo ka Diolelo. Aha la tamu, olimu aso wekɔ djembetelo ya ngandji k’oshika kokaso Nzambi l’anto.
2 Ngandji totshutshuyaka dia sawola la weho w’anto tshɛ ndo wele l’atei w’akambo wa weho tshɛ. (1 Kor. 9:21-23) Oko ɛnyɛlɔ: Lam’akawatatshɔka lo ndɛkɛ, ekumanyi kɛmɔtshi k’Okristo akadjasɛ suke l’owandji ɔmɔtshi w’ɔtɛmwɛlɔ. Nde akatatɛ sawola la nde lo mbôka tombolambola tɔmɔtshi la yêwo tshɛ, ko l’ɔkɔngɔ nde ndjɔlɔmbɔla sawo diakɔ otsha lo Diolelo. Lam’akaholɔ owandji w’ɔtɛmwɛlɔ ɔsɔ oma lo ndɛkɛ, nde aketawɔ abuku aso ahende. Ande etombelo w’ɔlɔlɔ wakakondja ekumanyi kɛsɔ oma lo ngandji kande k’oshika ka onyande onto lee!
3 Ngandji k’Oshika Totshutshuyaka dia Sambisha: Wanɛ wakamba olimu w’ombatshi mboka wa tshanda kana wa lo tena tshɛ mɛnyaka ngandji k’oshika kokawɔ Nzambi la onyawɔ onto. Ambatshi mboka kimɔka wenya la wolo awɔ tshɛ dia kimanyiya anto lo nyuma. Kakɔna kâtshutshuya na? Ombatshi mboka ɔmɔtshi wa omoto akate ate: “Dimi mbeyaka nte ngandji ekɔ olowa ɔmɔtshi wa nyuma ka Nzambi. Ɔnkɔnɛ, aha tɔ, tshike dimi kema lo mɛtɛ kana monga ombatshi mboka. Ngandji kimanyiyakami dia dimi kanɛ anto akina, sɛdingola ehomba awɔ, ndo mbeya ɔnɛ vɔ nangaka anto mbaoka ngandji.” Ngandji ka ngasɔ mbakokaka Yeso anto. Lushi lɔmɔtshi lam’akandalange ntshɔ nde l’ambeki ande lo dihole dimɔtshi ‘dia tomuya yema’ nɛ dia wambɔlɛmba, nyemba y’anto yakakomɛ ntondo lɛnɛ akawalange tomuya. Ko akandatshe na? ‘Nde akawaoke kɛtshi,’ ko aketsha wahɔ ande hita l’ɔkɔngɔ dia nde ‘mbaetsha akambo efula.’—Mako 6:30-34.
4 Kânga lam’atona anto lokumu l’ɔlɔlɔ lawaewoyaso, sho mongaka l’ɔlɔ l’otema, teya ɔnɛ, oma lo ngandji kaso, sho takatshe tshɛ dia mbakimanyiya dia vɔ kondja panda. Lam’ayotolomboyama sho tshɛ oma le Kristo, tayɔngɛnangɛna efula nɛ dia takɛnya anto ngandji k’oshika kawaokaso lo ‘kamba olimu aso dimɛna dimɛna.’—2 Tim. 4:5.