Tetemala la ‘Salaka Kɛnɛ Kele Ɔlɔlɔ’
1 Wɛ akasale dimɛna dia koma okambi waki Jehowa Nzambi. Koko, okakatanu wele layɛ kakianɛ, lo tena nɛ dia pâ ele wa tetemala la ‘salaka kɛnɛ kele ɔlɔlɔ.’ (Ngal. 6:9) Kânga mbele dia sala dikambo sɔ nɔmbaka dia paka mbidja wolo, wɛ kokaka disala. Ko woho akɔna wakokayɛ disala na?
2 Onga la Woho wa Yimba Yaki la Yeso: Wɛ kokaka mbikikɛ ehemba oko Yeso naka wɛ tetemala la mbidja yimba yayɛ paka l’elongamelo ka Diolelo. (Heb. 12:2, 3) Eya dia Jehowa kokaka ngandji ndo nde nangaka dia wɛ monga la lɔsɛnɔ la dimɛna. (2 Pet. 3:9) Yaɛkɛ tshɛ le nde, l’eshikikelo dia nde ayokokimanyiya. (1 Kor. 10:13) Tetemala lo dɔmbɛlɔ, lɔmbaka Jehowa dia nde kokimanyiya dia wɛ mbeya mbikikɛ. (Romo 12:12) Ngɛnangɛna lo eshikikelo k’ɔnɛ ekikelo kayɛ kayotokonya dia sho mbetawɔma lo washo wa Nzambi. (Romo 5:3-5) Woho wayɔkɛnɛmɔla ‘dionga diaki la Yeso Kristo’ la kɔlamelo tshɛ ayokela ɔngɛnɔngɛnɔ ndo ayɔngɛnyangɛnya otema waki Jehowa.—Romo 15:5; Tuk. 27:11.
3 Tetemala la Salaka Akambo w’Ɔlɔlɔ: Kondja wahɔ w’efula oma lo tɛdikɔ tɔsa Jehowa dikambo di’ekambi ande dia mbakimanyiya woho wa vɔ tetemala la salaka kɛnɛ kele ɔlɔlɔ. Onga la mbekelo k’ɔlɔlɔ ka mbadiaka Ɔtɛkɛta wa Nzambi ndo ka mbekaka ekanda walembetshiya awui wa lo Bible wakatondja olui w’ɔhɔmbɔ wa kɔlamelo ndo wa kɛsɔ. La kɔlamelo tshɛ, lɔngɔsɔlaka, ɔtɔka, ndo shaka kɔmatɛrɛ lo nsanganya tshɛ ya l’etshumanelo. La ntondo ndo l’ɔkɔngɔ wa nsanganya y’Akristo, ongaka kamɛ l’ananyɔ ndo l’akadiyɛyɛ wa lo nyuma. Yadjɛ eyango w’ɔlɔlɔ l’olimu ayɛ woho wa ndjâkimɔ efula l’olimu w’esambishelo ndo wa ndowanya akoka ayɛ wa mbewoya anto akina lokumu l’ɔlɔlɔ.
4 Woho ɔnɛ mbayoyokoka tetemala la salaka kɛnɛ kele ɔlɔlɔ ndo monga l’ɔngɛnɔngɛnɔ w’efula. Lo dikambo sɔ, ɔnangɛso ɔmɔtshi la l’Italie akate ate: “Lam’adja wonya, ndo wakawolami la ngelo l’ɔkɔngɔ wa dimi mbetsha lushi l’otondo l’olimu waki Jehowa, dimi mbokaka dia lambɔlɛmba, ngasɔ mɛtɛ mbatomoyaokaka. Koko dimi lekɔ l’ɔngɛnɔngɛnɔ, ndo lekɔ lo mbisha Jehowa losaka oma lo woho wambishande ɔngɛnɔngɛnɔ wahakoke ndoko onto kɔsɔlami.” Ɔnkɔnɛ, tetemala la salaka kɛnɛ kele ɔlɔlɔ, ko ndo wɛ lawɔ ayonga l’ɔngɛnɔngɛnɔ w’efula.