Ekambi Waki Nzambi Wekɔ la Loshilambo

¹ Anto efula waya bu la loshilambo ɛlɔ kɛnɛ. Lande na na? Anto wosalaka akambo paka la shamanya ko wohɛka mbala efula awui w’ohomba wendana la loshilambo wele oko mbuta ɔnɛ “Lam’alangɛ,” “Losaka,” kana “Okimwe.” Ɔtɛkɛta wa Nzambi wakatatshi dia lo nshi y’ekomelo anto wayonga la lɔkɛwɔ loleki tshɛ kɔlɔ, lo mbuta dia vɔ ‘wayoyalanga, wayɔsɛma, wayotakola, hawokana losaka, wayoyala waha la ngandji ka mɛtɛ, wahayakimela, atunyi w’akambo w’ɔlɔlɔ, ndo akanga wa ndjambiya.’ (2 Tim. 3:​1-4) Waonga asɔ tshɛ mbotaka lɔsɛndji. Oko wewɔ ekambi waki Nzambi, Akristo pombaka mbewɔ di’aha mbokoya anto wa l’andja ɔnɛ wele bu la dilɛmiɛlɔ le anto akina.

² Elɛwɔ Loshilambo Na? Loshilambo koka nembetshiyama oko tshelo ya mbeya kanɛ anto akina kana dikoka dia sɛna l’anto akina lo wɔladi. Loshilambo mɛnamaka oma lo dilɛmiyɛlɔ, oshidimikwelo, ɔlɔlɔ, ɔkɔmi ndo oma lo kanɛ anto akina. Waonga asɔ ndjaka oma lo ngandji kele l’onto otsha le Nzambi ndo otsha le onyande onto. (Luka 10:27) Vɔ hawotoshishɛ kânga sɛngi ɔtɔi ka dikuta, koko wekɔ ohomba efula dia sho pamia lɔngɛnyi l’asaso l’anto akina.

³ Yeso Kristo akasha ɛnyɛlɔ ka kokele lo dikambo sɔ. Mbala tshɛ nde akakambaka l’ɔlɛmbɛ welewɔ ɔnɛ Yɛdikɔ ya Ntshanela wata ɔnɛ: “Nyutsheli antu uku alanganyu vo nyutshela.” (Luka 6:31) Onde hatambe lo menda woho wakakanɛka Yeso ambeki ande ndo wakandasalɛka akambo la ngandji? (Mat. 11:​28-30) Loshilambo lande kondja oma l’ɛlɛmbɛ wakafundama l’abuku amɔtshi. Lɔ lakaye oma l’otema ande w’ɔlɔlɔ ndo wa lokaho. Sho pombaka nyanga dia ndjela ɛnyɛlɔ kande k’ɔlɔlɔ.

⁴ Etena kakɔna kahomba Akristo monga la loshilambo? Onde paka lo waaso wa lânde, di’ɔnɛ kele anto wamɛnyi? Onde loshilambo lɔsɔ mongaka lohomba paka l’etena kayangawɔ dia monga la shɛngiya le anto akina? Ndoko! Sho pombaka mongaka la loshilambo wonya tshɛ. Lo toho takɔna ta lânde tahombaso mbidja yimba lo dikambo sɔ lo kɛnɛ kendana la lɔngɛnyi lele lam’asaso l’atei w’etshumanelo na?

⁵ Lo Mbalasa ka Diolelo: Mbalasa ka Diolelo ekɔ dihole diaso di’ɔtɛmwɛlɔ. Sho mbɔtɔka lɔkɔ nɛ dia Jehowa Nzambi mbatelɛ. Lâsɔ, mbokɛmaka dia tekɔ angɛndangɛnda. (Osam. 15:⁠1) Onde sho tekɔ angɛndangɛnda washa ɛnyɛlɔ ka dimɛna lam’ayaso lo Mbalasa ka Diolelo? Onde sho mbidjaka yimba dimɛna l’ɔlɔtɔ ndo lo yoho ya lɔngɔsɔlaso demba diaso? Mɛtɛ sho pombaka mbewɔ dia ndjalɛnga lo yoho yamboleka kana ya tshambandeko. Oyadi lam’ɔtɔwɔ lo nsanganya ya weke kana ya lomingu la lomingu ya l’etshumanelo, ekambi waki Jehowa mbeyamaka oma lo ɛnamelo kawɔ dia wekɔ anto watɛmɔla Nzambi. (1 Tim. 2:​9, 10) Lo woho ɔsɔ mbɛnyaso dia sho tekɔ la kɛnɛmɔ ndo la dilɛmiɛlɔ otsha le Onongɔnyi aso lele l’olongo ndo otsha le angɛndangɛnda akina wakelame kamɛ la so.

⁶ Yoho kina yɛnyaso dia tekɔ la loshilambo lo kɛnɛ kendana la nsanganya ele lo komaka la wonya. Lo mɛtɛ, dikambo sɔ hatongaka nshi tshɛ wɔdu. Amɔtshi mbeyaka monga ko wekɔ lo mbidjasɛ etale kana wekɔ l’ana efula wahombawɔ nɔngɔsɔla la ntondo ka tshɔ lo nsanganya. Koko mɛnamaka dia lo tshumanelo dimɔtshi, ndekana pursa 25 y’apandjudi wekɔ la mbekelo ka komaka lo Mbalasa ka Diolelo l’ɔkɔngɔ w’osambo ndo wa dɔmbɛlɔ dia mbɔtwɛlɔ. Ɔsɔ mɛtɛ ekɔ dikambo diahombaso mbidja yimba dimɛna. Sho pombaka mbohɔ dia monga la loshilambo nembetshiyaka nto mbeya kɛnɛ kakoka kana anto akina. Jehowa ɔnɛ lele Olongɔnyi aso woludi la ngandji akatɔlɔngɔsɔlɛ alambo wa lo nyuma dikambo dia wahɔ aso. Sho mɛnyaka dia tekɔ la lowando ndo nangaka mbɔngɛnyangɛnya lo komaka la wonya. Ndo nto, okomelo wa l’ɔkɔngɔ lo nsanganya futanyaka ndo hɛnya dia tekɔ la dilɛmiyɛlɔ otsha le wanɛ wakashidi la koma lo losanganya.

⁷ Lam’atshumanaso, onde sho salaka dia nembetɛ anto w’eyoyo wele l’atei aso? Ndjayola eyoyo ekɔ yoho mɔtshi ya mɛnya loshilambo. (Mat. 5:47; Romo 15:⁠7) Mbayayola la ngandji, mbasha mɔyɔ wa l’anya la wangasanu kana sawola la wɔ l’elongi k’ɔmɔnɔmɔnɔ, ekɔ towuiwui ta totshitshɛ, koko tɔ kimanyiyaka di’anto mbishola ɔnɛ sho tekɔ Akristo wa mɛtɛ. (Joa. 13:35) L’ɔkɔngɔ wa nde ndja mbala ka ntondo lo Mbalasa ka Diolelo, pami kɛmɔtshi akate ate: “Lakahomana l’anto wele la ngandji k’oshika, wotshikitanyi l’akina tshɛ ndo ndoko lushi lakamahomana l’anto wa ngasɔ l’ɔtɛmwɛlɔ wakamodiama lɔkɔ. Akɛnama hwe dia lakashola mɛtɛ.” Dui sɔ diakotshutshuya dia tshikitanya lɔsɛnɔ lande, ndo ngɔndɔ esambele l’ɔkɔngɔ, nde akabatizama. Eelo, lɔkɛwɔ l’ɔlɔlɔ mbeyaka tondja etombelo wa mamba!

⁸ Naka tekɔ la loshilambo otsha le anto wahateye wahomana laso, shi kete lâsɔ sho pombaka monga lalɔ “djekaleka le embetawudi?” (Ngal. 6:10) Ɔlɛmbɛ ɔmɔtshi mbutaka ate: “Kolemiaki usumbi w’untu.” (Lew. 19:32) Tatohɛke weho w’anto wa ngasɔ pondjo lo nsanganya yaso.

⁹ Toyele la Yambalo Tshɛ: Lo nsanganya ya l’etshumanelo, Akristo wele ekambi waki Nzambi tɛkɛtaka l’oyango wa mbisha weshasha ɛmɔtshi wa lo nyuma dia tokeketsha. (Romo 1:11) Tayɛnya mɛtɛ dia sho kema la loshilambo naka tayonyingɔnyingɔka djɔ lo losanganya, tɔmaka bazɔka la wolo, tɛkɛtaka tɔhɔtɛhɔtɛ mbala la mbala l’onto lodjashi suke la so, mbetetaka weteteteta otsha lo nkomba, mbadiaka akambo wahɔtɔnɛ la wanɛ watama lo losanganya, kana mbidja yimba l’akambo akina wonya wa losanganya. Dikumanyi pombaka mbisha ɛnyɛlɔ lo dikambo sɔ. Loshilambo l’Okristo layototshutshuya dia monga la dilɛmiyɛlɔ di’oshika otsha le ɔtɛkɛtshi ndo l’akambo w’oma lo Bible wetshande, lo mboshaka lotui laso tshɛ.

¹⁰ Ndo nto, dia nɛmiya ɔtɛkɛtshi ndo anto wele lo losanganya, sho la dia mbewɔ di’aha telefɔnɛ ya l’anya futanyaka.

¹¹ Loshilambo la Ana: Ambutshi pombaka sɛna dimɛna lo kɛnɛ kendana la lɔkɛwɔ l’anawɔ. Naka ɔna ambotatɛ la ndela kana mbeteta wonya wa losanganya ndo naka dikambo sɔ diofukutanya anto akina, kete nɔmbamaka dia mbɔsa ɔnakɔ ko tomba la nde l’andja wa mbalasa aha la tshimbatshimba woho wa towɔladja. Kɛsɔ mbeyaka monga wolo esangɔ ɛmɔtshi, koko tohɔ dia kɛsɔ mɛnyaka dia tekɔ lo kanɛ anto akina. Ambutshi wele l’ana wa totshitshɛ wakoka ondo ndjokoma dia futanya wonya wa nsanganya, todjasɛka tena efula l’ekala wa l’ɔkɔngɔ woho wa naka ana wambotatɛ ndela wonya wa losanganya ko vɔ tomba la wɔ l’andja. Ndo, anto akina mbeyaka monga la dilɛmiyɛlɔ di’oshika otsha le wanɛ wele la nkumbo lo tshika ekala kana kɔsa ya l’ɔkɔngɔ dikambo dia ambutshi wele l’ana wa totshitshɛ, naka vɔ nangaka.

¹² Ambutshi pombaka nto menda lɔkɛwɔ l’anawɔ la ntondo ndo l’ɔkɔngɔ wa nsanganya. Ana hawohombe ndawɔlawɔka letei ka mbalasa nɛ dia dikambo sɔ mbeyaka ndjotondja wâle. Ndawɔlawɔ l’andja wa Mbalasa ka Diolelo mbeyaka monga nto wâle, djekoleko l’otsho etena kele hayɛnama dimɛna. Ntɛkɛta la wolo polo ndo mbokɛma l’andja wa lokombo mbeyaka fukutanya asukanyi ndo ndjokonya anto dia tɛkɛta kɔlɔ dikambo di’ɔtɛmwɛlɔ aso. Ambutshi wasala la wolo dia nama anawɔ oyadi l’etei kana l’andja wa Mbalasa ka Diolelo pombaka mandɔma nɛ dia dikambo sɔ kotshaka ɔngɛnɔngɛnɔ aso waya oma lo woho wasanganaso kamɛ.​—⁠Osam. 133:⁠1.

¹³ Loshilambo lo Wekelo wa Dibuku: Sho mandolaka anangɛso wetawɔ dia sho salaka nsanganya lo mvudu yawɔ. Lam’asanganaso, sho pombaka mɛnya dilɛmiɛlɔ ndo kɛnɛmɔ lo diangɔ diawɔ. La ntondo ka mbɔtɔ, sho pombaka kitola sabata yaso dimɛna di’aha mbidja odihe mindo. Ambutshi pombaka nama ana awɔ dimɛna ndo ndjashikikɛ dia vɔ wekɔ lo komɛ paka lam’akalɔngɔswama dia wekelo wa dibuku salemaka mbut’ate hawohombe tshɔ lam’akina. Kânga mbakoka djui ya wekelo monga tshitshɛ, ndo dihole mbeyaka monga mbala mɔtshi ko bu l’ɛlɛmbɛ efula wahomba ndjela, sho pombaka nɛmiya diangɔ diaki anto, mbut’ate aha kimɛ diangɔ diakana okimɛkimɛ. Ambutshi la dia tshindɛka ana wa totshitshɛ otsha lo nkomba. Ndo nto, lam’ele wekelo wa dibuku ekɔ losanganya lɔmɔtshi la l’etshumanelo, sho pombaka ndɔta dimɛna woho watotɔlɔtaka lam’atshɔso lo Mbalasa ka Diolelo.

¹⁴ Loshilambo Ekɔ Ohomba Efula: Monga la loshilambo l’Okristo hatokimanyiya tsho l’olimu aso w’esambishelo, koko lɔ tokimanyiyaka nto dia monga la lɔngɛnyi la dimɛna lam’asaso l’anto akina. (2 Kor. 6:​3, 4, 6) Oko weso atɛmɔdi wa Nzambi k’ɔngɛnɔngɛnɔ, hatohombe monga la dungi dia lomendja, koko di’ɛmɔnɔmɔ ndo sala akambo amɔtshi wa totshitshɛ w’ɔlɔlɔ wangɛnyangɛnya anto akina. Dionga dia loshilambo sɔ diayɔlɛnga nsɛnɔ yaso oko weso ekambi waki Nzambi.