Todje Tɔkɛnyɔ lo Dihole Diatɔ
1 Lo nshi ya pâ nyɛ, sho tshɛ tekɔ l’ohomba wa tshikitanyaka tena la tena yema y’akambo wasalaso. Kema kɔlɔ ndjakimɔka yema lo tɔkɛnyɔ. Koko naka tayoleka mbetsha wenya efula lo tɔkɛnyɔ, l’ɔsɛnyɛlɔ a washo, ndo l’afɛstɔ, kete tayoyokoma dia mbetshaka paka yema ya wenya tshitshɛ tsho l’akambo wa lo nyuma. Sho pombaka mbidja tɔkɛnyɔ lo dihole diatɔ. (Mat. 5:3) Ngande wakoka dikambo sɔ salema na? Ele lo ndjela dako diele l’Efeso 5:15-17.
2 Toyadje Elelo: Paulo akafunde dia Akristo pombaka ‘menda ɔlɔlɔ’ dia kamba la nsɛnɔ yawɔ la lomba. Monga la wɛdimo ndo la ndjakimɛ ekɔ ohomba dia mbeya mbidja elelo lo wenya wetshaso lo tɔkɛnyɔ ndo ndjakimɔ lo kɛnɛ kele mɛtɛ ohomba. Ekɔ ohomba efula sho kana yimba dimɛna lo kɛnɛ kendana la woho wakambaso la wenya aso wa momuya. Tɔkɛnyɔ la dia monga l’eyango ɛmɔtshi w’ohomba lo dihole dia tɔ ndjotokonya dia mbɔsa dia taketshisha wenya aso wetshetsha kana tɔlɛndja alemba ɔlɛndjalɛndja. Naka l’ɔkɔngɔ wa sho ndjasha lo tɔkɛnyɔ tɔmɔtshi ko tekɔ lo ndjaoka dia hatɔngɛnyingɛnyi, hatokondjisha ndoko wahɔ, ndo toyatshumuya, kete sho pombaka sala etshikitanu ɛmɔtshi lo yoho yakambaso la wenya aso.
3 Tonge l’Ekanelo k’Ɔlɔlɔ: Paulo akatolake dia ‘ndjatshungwɛ etena’ dikambo di’akambo woleki ohomba lo lɔsɛnɔ ndo aha monga “dinginya.” Akristo wamboyakimɔka hawetawɔ dia kimɔ nsɛnɔ yawɔ paka l’awui wa tɔkɛnyɔ. Kânga mbakoka diomuyelo la tɔkɛnyɔ nyomotosha wolo lo demba, teye dia wolo waki Nzambi wakamba olimu mbele kiɔkɔ ya wolo wa lo nyuma. (Is. 40:29-31) Sho nongolaka nyuma kande oma lo tshimbo y’elimu wa teokrasi wele oko: wekelo wa Bible, wɔtwɛlɔ wa lo nsanganya ya l’etshumanelo ndo oma l’olimu w’esambishelo, koko aha oma lo tɔkɛnyɔ.
4 Todje Akambo Woleki Ohomba lo Dihole dia Ntondo: Paulo akadjangɛ Akristo dia vɔ ‘shihodia lolango laki Jehowa.’ Yeso akatetsha dia sho pombaka mbetsha Diolelo diaki Nzambi lo dihole dia ntondo lo lɔsɛnɔ lo elimu tshɛ wayotokambaka. (Mat. 6:33) Sho pombaka ntondotondo sala akambo wayotokimanyiya dia sɛna yoho yɔtɔnganɛ la ndjakimɔ kaso le Jehowa. L’ɔkɔngɔ wa lâsɔ, mbakoka tɔkɛnyɔ ndjodjama lo dihole diatɔ. Naka sho tidja lo dihole diatɔ, kete tɔ tayonga l’etombelo w’amɛna le so, ndo tayotingɛnangɛna efula.—Und. 5:12.