Tokambe la wenya aso la lomba
1 Nsaki kaso ka ngɛnyangɛnya Jehowa totshutshuyaka dia ndeka ndjasha lo elimu wa lo nyuma lo nsɛnɔ yaso. Ɔtɛkɛta ande tɔlɔmbaka dia ‘nyanga ntondo diolelo’ ndo dia ‘shikikɛ awui woleki ohomba.’ (Mat. 6:33; Fil. 1:10) Ngande wakokaso ndjatshungwɛ etena dikambo dia wahɔ wa Diolelo ndo kitsha elimu wele bu ohomba efula lo ahole awɔ?—Ef. 5:15-17.
2 Tetsha elimu wa Diolelo la ntondo: Tokongɛ wenya aso diaha vɔ mbeta lo elimu wele bu ohomba. Amɔtshi tatɛka Ngɔndɔ tshɛ lo kongɛ tena dia shikaa lo alamanaka awɔ dikambo dia esambishelo. Oma lâsɔ, vɔ salaka la wolo diaha awui akina ndjofukutanya ekongelo kɛsɔ. Sho koka sala woho akɔ wâmɛ dia ndjatshungwɛ etena dikambo dia nsanganya ya lo etshumanelo, wekelo w’onto ndamɛ ndo nsanganya ya weke. Anto efula wekɔ la ekongelo ka lushi la lushi katatɛ kana kakomɛ la wadielo wa Bible. Toyaombe etena ka shikaa dikambo dia olimu tshɛ w’ohomba ndo tetawɔke dia awui akina wele bu ohomba ndjotodjɛ wekamu.—Und. 3:1; 1 Kor. 14:40.
3 Tatoyashake amboleka lo andja ɔnɛ: Lo wedja ɛmɔtshi, tɔkɛnyɔ ta weho la weho, ɔkɔkwɛlɔ wa demba ndo eyango ekina wekɔ efula. Anto efula mbetshaka wenya wamboleka lo mendaka televiziɔ kana lo kɛnyaka tɔkɛnyɔ ta lo ɔrdinatɛrɛ. Koko, ndjasha amboleka lo tɔkɛnyɔ ta kɔkɔla demba ndo ta lo ɔrdinatɛrɛ ta lo andja ɔnɛ ayokonya paka lo kɔlɔ. (1 Joa. 2:15-17) Diɔ diakɔ diatokeketsha Afundelo diaha ndjasha amboleka lo andja ɔnɛ. (1 Kor. 7:31) Lo kitanyiya dako dia lomba sɔ, wɛ koka mɛnya Jehowa dia ɔtɛmwɛlɔ ande mbɔsa dihole dia ntondo lo lɔsɛnɔ layɛ.—Mat. 6:19-21.
4 Etena kambotshikalɛ dikongɛ nɛ kaya suke la komɛ. Wanɛ wetsha wahɔ wa Diolelo lo dihole dia ntondo wayonga la ɔngɛnɔngɛnɔ ndo wayetawɔma le Nzambi. (Tuk. 8:32-35; Jak. 1:25) Ɔnkɔnɛ, nyɛsɔ tokambe la lomba la ɛngɔ k’oshinga wolo kɛsɔ kele laso, mbuta ate wenya aso.