Onde Dikambo sɔ Hadiotoshimbe dia Sambisha?
1 Anto efula wekɔ la lɔsɛnɔ loludi l’akambo. Sho, Ɛmɛnyi wa Jehowa tekɔ l’atei w’anto wele l’akambo woleki wa sala, ɛnyɛlɔ, wekelo w’Ɔtɛkɛta wa Nzambi, wɔtwɛlɔ wa lo nsanganya ya l’etshumanelo, ndo olimu w’esambishelo. Lâdiko dia lâsɔ, tekɔ l’awui efula wa sala, olimu wa l’emunyi, elimu wa la ngelo kana wa la kalasa, ndo ɛkɛndɛ ekina efula wele vɔ tshɛ mbɔsaka wenya. Ɔsɔ ekɔ okakatanu djekoleko le ewandji wa nkumbo.
2 L’ɔtɛ w’ekakatanu wendana l’ekondjelo wele l’anto l’ahole efula, ewandji wa nkumbo pombaka kamba wolo wenya efula dia sɛnya nkumbo yawɔ. Etena kawaɔsɛ elimu wa l’emunyi wenya ndo wolo awɔ efula, vɔ mongaka paka la yema ya wenya tshitshɛ dia sambisha. Lam’ele vɔ wekɔ l’ɔkɛndɛ wa kotsha ehomba wa l’emunyi wa nkumbo yawɔ, ewandji ɛmɔtshi wa nkumbo mbeyaka fɔnya dia vɔ koka sambisha paka yema tsho. (1 Tim. 5:8) Mɛtɛ, ekakatanu wekɔ efula ɛlɔ kɛnɛ dia ndjakotshɛ ehomba wa lo lɔsɛnɔ. Koko olimu aso wa l’emunyi hawohombe toshimba dia sambisha lokumu l’ɔlɔlɔ. (Mako 13:10) Lâsɔ, sho pombaka ndjasɛdingola dimɛna.
3 Lam’ele awui wa l’andja ɔnɛ wekɔ lo tatshikitana tsho, owandji wa nkumbo mbeyaka ndjasha amboleka l’olimu wa l’emunyi la kanyi ya ndjaombɛ falanga dikambo di’ekakatanu wa shashimoya. (1 Kor. 7:31) Eelo, lo kamba efula sho koka kondja lomombo la l’emunyi efula ndo ndjangɛnyangɛnya yema. Ko onde nkumbo kaso kayonga l’ɔngɛnɔngɛnɔ woleki naka tɔsaka wenya wahombaso mbetsha l’akambo wa lo nyuma kana lo wɔtwɛlɔ wa lo nsanganya dikambo di’olimu akɔ? Sho pombaka mɛtɛ mbewɔ kɛnɛ tshɛ kakoka mbidja lonyuma laso lo wâle. Ndjela dako diaki Yeso diata dia ‘ndjaombela diangɔ l’olongo’ ndo monga la “ukundji le [Nzambi]” ekɔ dikambo dia lomba.—Mat. 6:19-21; Luka 12:15-21.
4 Toyange Ntondo Wahɔ wa Diolelo: Yeso aketsha ambeki ande dia mbetsha akambo wa lo nyuma la ntondo k’oseka ɛngɔ kekina tshɛ. Nde akâkeketsha ate: “Okone tanyuyakananyaki nyati: Ayutole na? kana, ayutono na? kana, ayutolota na?” Lande na kakandate ngasɔ? Nde akalembetshiya ate: “Shenyu leli l’ulungu mbeyaka ati: Nyu dihumbaka dio tshe.” Naka sho mɛtɛ mbetawɔ dikambo sɔ, kete ndoko kakoka toshimba dia sala kɛnɛ kakate Yeso nto ate: “Keli ntundu nyutayangi diulelu la ololo wa [Nzambi], ku diango so [diele ohomba l’emunyi] tshe diayuyala dianyu.” Nzambi ayotosha diangɔ diele ohomba le so! (Mat. 6:31-33) Ɔnɛ kema etena ka mpekɔ lo ndjasha ntondo dia kondja ka ndjasɛnya kana kombola monga la lɔsɛnɔ la dimɛna efula lo dikongɛ nɛ di’akambo diaya kasuke la ndanyema.—1 Pet. 5:7; 1 Joa. 2:15-17.
5 Oyango wa ntondo w’olimu wa l’emunyi ele di’onto ndjakotshɛ ehomba ande. Ko kakɔna keso latɔ ohomba na? Ɔpɔstɔlɔ Paulo akafunde ate: “Keli lam’ayutuyala la diango dia nde ndu la diango dia ndota, shu tayuyala la ongenongeno lu diango diako.” Onde sho nyangaka kondja diangɔ diamboleka? Naka eelo, kete etombelo wa kɔlɔ wakatewola Paulo ɛnɛ wayotokomɛ: “Wane wakomiya ndjala ongonyi, wayoko lu uhimba la lu djunga ndu lu saki ya dinginya yatutshelaka antu kolo, yayudi[ndj]a antu lu elanyelu la eshishwelu.” (1 Tim. 6:8, 9; Mat. 6:24; Luka 14:33) Ngande wakokaso mbeya dia taya la saki kamboleka ka lomombo?
6 Naka tekɔ lo ndjasha paka yema tsho l’esambishelo l’ɔtɛ w’elimu aso wa l’emunyi kana hatɛnyi ohomba wa ndjahombia dikambo dia lokumu l’ɔlɔlɔ, kete sho pombaka nyomenda awui wahombaso mbidja lo dihole dia ntondo. (Heb. 13:15, 16) Yoho ya lɔsɛnɔ l’ɔsɛlɛngɛ yayoleka tokimanyiya dia minya wekamu efula watoshimba dia sho sambisha. Sho pombaka nshi tshɛ kambaka la wenya ndo la wolo aso ntondo dikambo dia wahɔ wa Diolelo.
7 Pâ Kele Bu Anyanya: Ɛtɛkɛta wa Paulo tokeketshaka nshi tshɛ ɔnɛ “nyutamanya ntsha olimu wa Khumadiondjo nshi tshe, ne dia [sho mbeyaka shate]: pâ ka[so] le Khumadiondjo kema anyanya.” (1 Kor. 15:58) “Olimu wa Khumadiondjo” woleki ohomba ele wa sambisha Diolelo ndo wa mbetɛ anto ambeki. (Mat. 24:14; 28:19, 20) Naka sho nangaka sambisha lo yɛdikɔ y’efula, kete sho pombaka ndjaombɛka wenya lomingu tshɛ dikambo di’olimu ɔsɔ ndo sala la wolo di’aha kambaka la wenya ɛsɔ l’elimu ekina. (Ef. 5:15-17) Lâsɔ, oyadi olimu wa l’emunyi kana ɛngɔ kekina tshɛ, hatonga wekamu l’olimu aso w’esambishelo.
8 Etena kayakimɔso shamɛ dia mbetsha anto akina akambo wa mɛtɛ w’oma lo Bible, sho mongaka l’ɔngɛnɔngɛnɔ w’efula w’oma lo lokaho. (Etsha 20:35) Naka sho ndjasha l’olimu w’esambishelo ka Diolelo, kete hatotatɛ asolo lo kɛnɛ kendana la nshi yayaye, “ne dia [Nzambi] kema kolo, dia ndi mbuhela olimu [aso] la ngandji kaka[tɛnya] antu lu lukumbu landi.”—Heb. 6:10.