Ambutshi ​—⁠Nyolakanya Ananyu oma ko Tɔkɛndakɛnda

¹ ‘Lakanya ɔnayɛ mboka kahombande mbidjɛ, ko lam’ayondola nde hatangana oma lɔkɔ.’ (Tuk. 22:⁠6) Ambutshi le, naka hanyolange ananyu ‘ndjotakɔ’ mboka k’akambo wa mɛtɛ, etena kakɔna kahombanyu tatɛ la mbalakanya na? Kam’ekewɔ akɛnda mbahombanyu tatɛ!

² Lam’akate Paulo dia Timɔtɛ akalongola wetshelo wa lo nyuma ‘oma ko kɛndakɛnda,’ nde akalange mbuta ɔnɛ oma k’ashashi. (2 Tim. 3:​14, 15) Etombelo w’oma lo dikambo sɔ ko Timɔtɛ akakome pami kele la lonyuma la dimɛna efula. (Fil. 2:​19-22) Ambutshi, nyu lawɔ pombaka mbisha ananyu wetshelo wewɔ l’ohomba dia ‘mbola la ntondo ka Jehowa’ ‘oma ko tɔkɛndakɛnda’ tawɔ.​—⁠1 Sam. 2:⁠21.

³ Nyowate Ashi Wahombama dia Vɔ Mbola: Oko wele tombatomba dieke totshitshɛ l’ohomba w’ashi tena la tena dia diɔ mbola ko koma weke, ana wa nɔnga tshɛ wekɔ l’ohomba efula w’ashi w’akambo wa mɛtɛ wa lo Bible dia vɔ koma ekambi waki Nzambi wambotshunda. Wekelo wa Bible wa mbala la mbala wa lo nkumbo mbele yoho yoleki tshɛ ya mbetsha ana akambo wa mɛtɛ ndo mbakimanyiya dia vɔ mamatana ma la Jehowa. Koko ambutshi la dia sɛdingola dikoka diele l’ɔna tshɛ dia mbidja yimba lɔkɔ. Le ana weke akɛnda, wekelo wahɔshi wenya efula ndeka dimɛna oleki wɔnɛ wɔsa wenya efula.​—⁠Euh. 11:​18, 19.

⁴ Tɔnyɔlake pondjo akoka wele l’ana dia mbeka. Nyakɔndɔlɛke ɛkɔndɔ w’anto watɛkɛtawɔ lo Bible. Wakɛnya oko kɛnyɔ awui kana akambo amɔtshi wakatombe watɛkɛta Bible. Nyokambe dimɛna la wa bandɛ vidɛo kana y’aradiyo kamɛ ndo adramɛ w’awui wa lo Bible. Nyɔtɔnganyiya wekelo wa lo nkumbo l’ɛnɔnyi wele l’ana ndo l’akoka awɔ wa mbeka. L’etatelo pombaka mbetsha ɔna awui wa wɔdu, aha awui akɔ monga efula; koko lam’ayole ɔna mbayonyoyakotshaka awui akina yema yema. Nyosale dia wetshelo w’oma lo Bible monga dimɛna efula ndo l’awui wotshikitanyi. Naka nyu nangaka di’ananyu ‘nanga awɛlɛ’ w’Ɔtɛkɛta, kete nyosale tshɛ dia mbetsha wonya wa wekelo etena k’ɔngɛnɔngɛnɔ.​—⁠1 Pet. 2:⁠2.

⁵ Nyowaekesanyiya l’Etshumanelo: Nyodje ananyu eyango yema yema woho wa vɔ ndjasha tshɛ l’etshumanelo. Naa oyango wa ntondo wakokanyu mbadjɛ na? Ambutshi w’ana ahende weke akɛnda wakate vate: “Ndjela kɛnɛ katɛkɛtama ndo mbidjasɛ ki lo Mbalasa ka Diolelo.” L’ɔkɔngɔ diko, nyokimanyiya ana dia vɔ mbisha kɔmatɛrɛ lo nsanganya l’ɛtɛkɛta awɔ hita, ndo vɔ ndjadjɛ oyango wa fundja nkombo lo Kalasa k’Olimu wa Teokrasi. L’olimu w’esambishelo, eyango w’amɛna wakokawɔ kotsha ele wa mbisha traktɛ lo soko dimɔtshi, mbadia divɛsa dimɔtshi, mbisha onto periodikɛ, ndo kɛtshanya l’atɛkɛtshi awɔ dimɛna.

⁶ Sha Ɛnyɛlɔ ka Wangasanu: Onde ananyu nyokaka nyatɛkɛta lushi la lushi dikambo dia Jehowa ndo nyɔ̂lɔmba? Onde vɔ mɛnaka woho wekanyu Ɔtɛkɛta ande, wɔtɔnyu lo nsanganya, wasambishanyu, ndo woho wangɛnangɛnanyu sala lolango laki Nzambi? (Osam. 40:⁠8) Ekɔ ohoma efula vɔ sala akambo asɔ ndo nyu sala akambo asɔ kamɛ. Ɔna ɔmɔtshi la womoto lambola akate dikambo dia nyango lakodia ana asamalo wakakome Ɛmɛnyi wa kɔlamelo ate: “Kɛnɛ kakaleke minanda etema aso aki ɛnyɛlɔ ka Mama kaso, tɔ kakɛnamaka oma l’etsha koko aha oma l’ɛtɛkɛta.” Ombutshi ɔmɔtshi wele l’ana anɛi akate ate: “Sho kombutaka tsho l’onyɔ ɔnɛ: ‘Jehowa mbele lo dihole dia ntondo,’ koko awui wakatasalaka lo lɔsɛnɔ wakɛnyaka ɔnɛ mɛtɛ sho mbetshaka Jehowa lo dihole dia ntondo.”

⁷ Ambutshi le, nyotate mbetsha ananyu oma ko totshitshɛ tawɔ, nyowaetsha akambo wa mɛtɛ w’oma l’Ɔtɛkɛta wa Nzambi, nyowadje eyango wa vɔ ndjakotshaka yema yema, ndo nyowasha ɛnyɛlɔ ka dimɛna. Naka nyu sala akambo asɔ, kete nyayoyonga l’ɔngɛnɔngɛnɔ!