Tohike nkumbo kele nge lo nyuma
“Nyuwaudia lu elembe la lu wetshelu wa [Jehowa].”—EFESO 6:4.
1. Naa sangwelo diakonge la Nzambi lo dikambo dia nkumbo, ndo kakɔna kakayotomba?
“NYUYALI la diwutshi, nyufulaneli, nyuludia kete.” (Etatelu 1:28) Lam’akandatɛ Adama nde l’Eva ɛtɛkɛta ɛsɔ, Jehowa Nzambi akahɔhɔla lɔsɛnɔ la nkumbo. (Efeso 3:14, 15) Otowɛna etale, tshike atshukanyi wa ntondo asɔ wotokoka kanyiya woho wotoyolola nkɛtɛ l’anawɔ mbut’ate la nkumbo ka woke k’anto wa kokele wasɛna l’ɔngɛnɔngɛnɔ lo paradiso ka la nkɛtɛ ndo watɛmɔla Otungi awɔ wa Woke kamɛ. Koko Adama nde l’Eva wakayotshaka pɛkato, diakɔ diele nkɛtɛ kondola nto l’anto w’ɔlɔlɔ ndo woka Nzambi wɔma. (Romo 5:12) Lɔsɛnɔ la nkumbo lakayolana esadi eto, lohetsho, awui wa ngala ndo oshishwelo wa “ngandji ka mete” wakayoleka, djekoleko lo nshi nyɛ “y’ekumelu.”—2 Timote 3:1-5; Etatelu 4:8, 23; 6:5, 11, 12.
2. Ana waki Adama waki l’akoka akɔna, ndo kakɔna kakahombamaka dia mbika nkumbo kele nge lo nyuma?
2 Adama nde l’Eva wakatongama l’efanelo ka Nzambi. Kânga mbakakome Adama otshi wa pɛkato, Jehowa akawosha lotshungɔ la nde mbota ana. (Etatelu 1:27; 5:1-4) L’ɛnyɛlɔ ka shɛwɔ, ana waki Adama waki l’akoka wa monga la lonto l’ɔlɔlɔ ndo wakakoke mbeka dia mbeya tshikitanya ɔlɔlɔ la kɔlɔ. Vɔ wakakoke mbetshama woho wa tɛmɔla Otungi awɔ ndo ohomba wa mbôlangaka l’otema awɔ tshɛ, l’anima awɔ tshɛ, la yimba yawɔ tshɛ ndo la wolo awɔ tshɛ. (Mako 12:30; Joani 4:24; Jakoba 1:27) Lâdiko dia lâsɔ, vɔ wakakoke mbetshama “dia ntsha akambo w’ololo, dia nanga ketshi ndu dia kendakenda la ndjakitshakitsha kame la [Nzambi].” (Mika 6:8) Lâsɔ, oko wakiwɔ akanga wa pɛkato, vɔ wakahombe mbidja yimba efula dia mbika nkumbo kele nge lo nyuma.
Nyoyâtshungwele etena
3. Ngande wakoka ambutshi ‘ndjatshungolɛ etena’ dia mbodia ana wayokoma Akristo?
3 Lo tena dia wolo nɛ, pombaka mbidja weolo w’efula dia ana koma “wane watukaka [Jehowa] ngandji” ndo ‘wahetsha kɛnɛ kele kɔlɔ.’ (Osambo 97:10) Ambutshi wa lomba ‘wayoyatshungolɛ etena’ woho wa mbeya ndɔshana l’okakatanu ɔsɔ. (Efeso 5:15-17) Naka wɛ ekɔ ombutshi, ngande wakokayɛ sala dikambo sɔ? Ntondotondo, enda akambo wahombayɛ mbetsha la ntondo ndo dja yimba ‘l’akambo woleki ohomba,’ mbidja ndo wetshelo la ohokwelo w’anayɛ. (Filipi 1:10, 11) Dikambo dia hende ele, onga la lɔsɛnɔ l’ɔsɛlɛngɛ. Wɛ koka tshika elimu ɛmɔtshi wele mɛtɛ bu ohomba. Kana wɛ koka sondja kana kaha diangɔ diayɛ dimɔtshi diele bu ohomba diakɔsɛ wenya efula dia dikokɛ. Oko weyɛ ombutshi w’Okristo, wɛ hanyangaki pondjo lo welo wadjayɛ dia mbodia ana woka Nzambi wɔma.—Tokedi 29:15, 17.
4. Ngande wakoka nkumbo tshikalaka kamɛ?
4 Lo mbɔsa wenya dia mbidjasɛ kamɛ l’ananyu, djekoleko lam’etshawɔ wenya akɔ l’akambo wa lo nyuma ekɔ etena k’ohomba efula ndo ekɔ yoho mɔtshi yoleki dimɛna ya nkumbo mongaka kamɛ. Koko dikambo sɔ hadiohombe salemaka paka lo pai. Sala ekongelo ka tena dimɔtshi diayonyodjasɛka kamɛ. Kɛsɔ halange mbuta ɔnɛ mbidjasɛ luudu ɔtɔi ko onto l’onto salaka akambo ande. Ana mbolaka dimɛna efula naka ɔna l’ɔna mbidjamaka yimba lushi la lushi. Pombaka vɔ mɛna dia wɛ mbaokaka ngandji ndo ndjakiyanyaka dikambo diawɔ. Kânga la ntondo ka vɔ mbɔsa yɛdikɔ ya mbota ana, atshukanyi pombaka kana yimba dimɛna lo kɛnɛ kendana l’ɔkɛndɛ w’ohomba ɔsɔ. Lâsɔ mbahawatoyɔsa wodielo w’ana oko ɔkɛndɛ wa wolo. Koko vɔ wayɔsa ɔkɛndɛ ɔsɔ oko tshondo ya diɛsɛ.—Etatelu 33:5; Osambo 127:3.
Etsha oma l’ɛtɛkɛta ndo oma lo ɛnyɛlɔ
5. (a) Ngande wahomba ambutshi tatɛ mbetsha ana dia mboka Jehowa ngandji? (b) Dako diakɔna diashawɔ ambutshi lo Euhwelu k’Elembe 6:5-7?
5 La ntondo ka wɛ ndjetsha ana dia vɔ mboka Jehowa ngandji, paka wɛ ambotɛnyisha woho wawokayɛ wɛmɛ ngandji. Ngandji k’efula kokayɛ Nzambi ayokotshutshuya dia wɛ ndjela ɛlɛmbɛ ande tshɛ la kɔlamelo. Dikambo sɔ nembetshiyaka mbodia ana “lu elembe la lu wetshelu wa [Jehowa].” (Efeso 6:4) Nzambi ndakaka ambutshi dia mbishaka anawɔ ɛnyɛlɔ, dia sawolaka la wɔ, ndo dia mbaetshaka. Euhwelu k’Elembe 6:5-7 mbutaka ate: “Ulangi [Jehowa, Nzambi k]aye, l’utema aye tshe, la lumu laye tshe, ndu la wulu aye tshe. Aui ane wamumukudjangela elo, wayali l’utema aye. Kuwakokomiyaki an’aye, kuwatelakewo lam’udjashiye lu luudu laye, ndu lam’atayakendakenda lu mbuka, lam’etam[a]ye, ndu lam’etoye.” Lo mbashaka alako mbala la mbala ndo lo mbaoholakawɔ, wɛ koka tɔtɔmiya wadjango waki Nzambi l’etema w’anayɛ. Ɔnkɔnɛ, anayɛ wayɛna ngandji kokayɛ Jehowa ndo vɔ lawɔ wayotshutshuyama dia monga la diɔtɔnganelo di’oshika vɔ la nde.—Tukedi 20:7.
6. Ngande wakoka ambutshi sala oko weyawɔ ɔnɛ ana mbekaka oma l’ɛnyɛlɔ kawashawɔ?
6 Ana wekɔ la mposa k’efula ka mbeka. Vɔ pokamɛka ndo sɛdingolaka akambo dimɛna ndo wekɔ suke dia mbokoya ɛnyɛlɔ kayɛ. Etena kɛnawɔ dia wɛ bu la nsaki ka lomombo, dikambo sɔ mbakimanyiyaka dia vɔ mbeka woho wa ndjela dako diaki Yeso. Wɛ ekɔ lo mbaetsha di’aha vɔ monga la nsaki k’efula ka diangɔ dia l’emunyi koko dia vɔ ‘nyanga ntondo Diolelo diaki Nzambi.’ (Mateu 6:25-33) Naka wɛ sawolaka l’anayɛ asawo w’amɛna ndo wodia wendana l’akambo wa mɛtɛ wa lo Bible, l’etshumanelo kaki Nzambi, ndo la dikumanyi diakasɔnama, kete wɛ ekɔ lo mbetsha anayɛ dia vɔ nɛmiya Jehowa ndo mbɔsa tɛdikɔ ta lo nyuma la nɛmɔ. Lam’ele ana mbahahɔka l’akambo efula, wetshelo wa l’onyɔ pombaka kakatana la lɔkɛwɔ ndo la dionga di’ɛnya woho wangɛnangɛnayɛ akambo wa lo nyuma efula. Ekɔ tshondo y’ɔtshɔkɔ etena kɛna ambutshi dia ɛnyɛlɔ kawɔ k’ɔlɔlɔ kambokimanyiya anawɔ dia mboka Jehowa ngandji l’otema ɔtɔi!—Tukedi 23:24, 25.
7, 8. Ɛnyɛlɔ kakɔna kɛnya ohomba wa mbetsha ana oma ko tɔkɛndakɛnda tawɔ, ndo akɔna akoka nongola lotombo lo dikambo sɔ?
7 Ohomba wa mbetsha ana oma ko tɔkɛndakɛnda mɛnamaka oma l’ɛnyɛlɔ kɛmɔtshi k’oma lo wodja wa Venezuela. (2 Timote 3:15) Tɔ mendanaka l’atshukanyi ahende w’akɛnda, Félix nde la Mayerlín. Vɔ wekɔ ambatshi mboka. Lam’akawote ɔnawɔ Felito, vɔ waki la nsaki k’efula ka sala la wolo awɔ tshɛ dia mbôdia woho wa nde ndjala ɔtɛmɔdi wa mɛtɛ waki Jehowa. Mayerlín akatatɛ mbadiɛka Felito Buku di’Ɛkɔndɔ wa lo Bible, diakatondja Ɛmɛnyi wa Jehowa la dui dia wolo. Oma ko dikɛnda, akɛnama dia Felito akeye Mɔsɛ ndo anto akina wɔtɛkɛtshiwɔ lo dibuku sɔ.
8 Lam’akinde êke dikɛnda, Felito akatatɛ sambisha ndamɛ. Nde akakotsha lolango lande la monga opandjudi wa Diolelo, l’ɔkɔngɔ nde akabatizama. L’edjedja wonya Felito akayokomaka ombatshi mboka wa pondjo. Ambutshi ande mbutaka ɔnɛ: “Lam’ɛnaso ohamelo w’ɔnaso, sho mbetawɔka dia Jehowa ndo wetshelo ande mambosala dikambo nɛ.”
Nyokimanyiya ana dia pama lo nyuma
9. Lande na kahombaso ngɛnangɛna wetshelo wa lo nyuma walongolaso oma lo tshimbo y’olui w’ɔhɔmbɔ wa kɔlamelo ndo wa kɛsɔ?
9 Ekɔ tojurunalɛ efula, nkama y’abuku, ndo nunu di’ahole w’Internet washa alako lo woho wa mbodia ana. Koko, numɛlɔ kɛmɔtshi ka jurunalɛ Newsweek kakatɛkɛta paka dikambo di’ana mbutaka dia mbala efula “alako watomba oma lo tojurunalɛ l’abuku asɔ hawɔtɔnɛ. Ndo kɛnɛ katolekaka tshindja wɔɔngɔ tshɛ ele, etena kɛnayɛ dia alako wafɔnyayɛ ɔnɛ wɛ koka ndjaɛkɛ lɔkɔ wambokadimɔ alako woleki tshɛ kɔlɔ.” Tekɔ mɛtɛ la lowando efula le Jehowa lo woho wakandalɔngɔsɔla akambo efula dikambo dia wetshelo ndo di’ohamelo wa lo nyuma wa nkumbo! Onde wɛ kondjaka wahɔ w’efula oma lo tɛdikɔ tshɛ takɔsama oma lo tshimbo y’olui w’ɔhɔmbɔ wa kɔlamelo ndo wa kɛsɔ?—Mateu 24:45-47.
10. Ngande wele wekelo wa lo nkumbo w’oshika ekɔ la wahɔ oyadi le ambutshi kana le ana?
10 Dikambo dimɔtshi diele ohomba efula ele wekelo wa Bible wa lo nkumbo wa mbala la mbala wasalema ndo lo yoho yokoki onto tshɛ tɛkɛta aha la wɔma. Dia wekelo ɔsɔ mbisha wetshelo, ɔngɛnɔngɛnɔ ndo ekeketshelo, ekɔ ohomba ndjalɔngɔsɔla dimɛna. Lo mongaka suke suke l’anawɔ, ambutshi koka mbeya kɛnɛ kele l’etema ndo lo timba tawɔ. Yoho mɔtshi ya mbeya nshikikɛ ɔnɛ wekelo wa lo nkumbo wekɔ l’etombelo w’ɛlɔlɔ ele mendaka dia kana ase nkumbo tshɛ kongɛka wekelo akɔ l’asolo walomɔlomɔ.
11. (a) Eyango akɔna wakoka ambutshi kimanyiya anawɔ dia vɔ ndjadjɛ? (b) Etombelo akɔna wakonge lam’akawese ɔsekaseka ɔmɔtshi w’ose Japon oyango ande?
11 Ndo eyango wɔtɔnɛ l’Afundelo kimanyiyaka dia nkumbo monga nge lo nyuma, ndo ambutshi pombaka kimanyiya anawɔ dia vɔ ndjadjɛ eyango ɛsɔ. Eyango ɛmɔtshi w’ɛlɔlɔ wakokawɔ ndjadjɛ ele mbadiaka Bible lushi la lushi, koma opandjudi wa lokumu l’ɔlɔlɔ, ndo pama polo ndo lo ndjakimɔ ndo batizama. Eyango ekina mbeyaka monga wa kamba olimu wa lo tena tshɛ oko ombatshi mboka, lo Bɛtɛlɛ kana monga misiɔnɛrɛ. Lam’akinde eke lo kalasa ka primɛrɛ, osekaseka ɔmɔtshi w’ose Japon wakawelɛka Ayumi akayadjɛ oyango wa sambisha onto tshɛ la lo kalasa kawɔ. Dia nde memula saki k’ombetsha ande ndo k’asekande wa lo kalasa, nde akalɔmbɛ dikimɔ dia nde mbidja abuku efula walembetshiya Bible lo bibliɔtɛkɛ wa la kalasa. Dui sɔ diakokimanyiya dia monga l’ambeki 13 wa Bible l’edja k’ɛnɔnyi esamalo wakinde lo primɛrɛ. Ombeki ɔmɔtshi wa womoto wa l’atei wa wanɛ wakekaka la nde Bible ndo anto akina wa lo nkumbo k’ombeki ɔsɔ wakakome Akristo wambobatizama.
12. Ngande wokoka ana kondja wahɔ woleki oma lo nsanganya y’Akristo?
12 Kɛnɛ kele nto ohomba dia monga nge lo nyuma, ele wɔtwɛlɔ wa mbala la mbala lo nsanganya. Ɔpɔstɔlɔ Paulo akakeketsha asekande ambetawudi ‘di’aha vɔ tshika sanganaka kamɛ oko aki mbekelo k’anto amɔtshi.’ Tatongake la mbekelo ka ngasɔ, nɛ dia oyadi akɛnda kana epalanga, sho tshɛ kondjaka wahɔ efula lo mbɔtɔka lo nsanganya y’Akristo mbala la mbala. (Heberu 10:24, 25; Euhwelo k’Elembe 31:12) Pombaka mbetsha ana dia mpokamɛka la yambalo tshɛ. Ndo nto, ɔlɔngɔswɛlɔ wa nsanganya ekɔ ohomba efula nɛ dia wahɔ w’efula ndjaka oma lo woshelo wa kɔmatɛrɛ. Kânga mbakoka ɔna dikɛnda tatɛ kadimola lo tɔtɛkɛta tongana toto kana mbadia tshinyi ya tshitshɛ y’odingɔ ɔmɔtshi, ayonga dimɛna efula naka ana mbetshama woho wa nyangaka ekadimwelo ndo mbashaka l’ɛtɛkɛta awɔ vamɛ. Onde nyu ambutshi mbâshaka ɛnyɛlɔ lo mbishaka kɔmatɛrɛ y’eshika mbala la mbala? Ekɔ nto ohomba di’ose nkumbo tshɛ monga la Bible, la dibuku di’esambo ndo periodikɛ kana okanda wakamba la wɔ dia mbeka awui w’oma l’Afundelo.
13, 14. (a) Lande na kahomba ambutshi tombaka l’anawɔ l’esambishelo? (b) Kakɔna kayokimanyiya di’olimu w’esambishelo monga dikambo diele la wahɔ ndo di’ɔngɛnɔngɛnɔ le ana?
13 Ambutshi wele la lomba wayokeketsha anawɔ dia kambɛ Jehowa kam’ekewɔ la wolo awɔ w’ɔlɔngɔlɔngɔ lo mbâkimanyiya dia vɔ mbɔsaka esambishelo oko dikambo dimɔtshi dioleki ohomba lo nsɛnɔ yawɔ. (Heberu 13:15) Paka lo tombaka l’anawɔ l’esambishelo mbakoka ambutshi shikikɛ dia kana anawɔ wekɔ lo nongola ekimanyielo kahombama dia vɔ koma ekambi ‘waha la dikambo dia mbotshama sɔnyi koko wamanyamanya ɔtɛkɛta w’akambo wa mɛtɛ.’ (2 Timote 2:15) Ko kayotota dikambo diayɛ na? Naka wɛ ekɔ ombutshi, onde wɛ kimanyiyaka anayɛ dia ndjalɔngɔsɔlaka lo dikambo di’esambishelo? Naka wɛ sala dikambo sɔ, kete wɛ ayowakimanyiya di’olimu w’esambishelo monga dikambo di’ɔngɛnɔngɛnɔ, di’ohomba ndo diatondja etombelo w’ɛlɔlɔ le wɔ.
14 Lande na kele ekɔ ohomba di’ambutshi kambaka kamɛ l’anawɔ l’esambishelo? Ekɔ ohomba nɛ dia dikambo sɔ ayokimanyiya ana dia nembetɛ ndo sangola ɛnyɛlɔ k’ɔlɔlɔ kaki ambutshi awɔ. Ndo l’etena kakɔ kamɛ, ambutshi koka sɛdingola dionga, lɔkɛwɔ, ndo akoka wele l’anawɔ. Sala tshɛ dia tombaka kamɛ l’anayɛ lo toho totshikitanyi t’olimu aso w’esambishelo. Naka kokaka, sala di’ɔna l’ɔna monga la tapa diande hita di’otsha l’esambishelo ndo lakanyande woho wa nde nɔngaka diangɔ dimɛna lɔkɔ ndo wa dietɛka olangala. Lo mbaetshaka ndo lo mbakeketshaka mbala la mbala , ana wayɔngɛnangɛna olimu w’esambishelo ndo wayɔsaka olimu akɔ oko yoho y’oshika ya mɛnyaka ngandji kokawɔ Nzambi ndo osekawɔ onto.—Mateu 22:37-39; 28:19, 20.
Tolamake lonyuma la nkumbo
15. Lam’ele ekɔ ohomba efula nama lonyuma la nkumbo, naa toho tɔmɔtshi takoka dikambo sɔ salema?
15 Nama lonyuma la nkumbo ekɔ ohomba efula. (Osambo 119:93) Yoho mɔtshi ya salaka dikambo sɔ ele sawolaka akambo wa lo nyuma la nkumbo kayɛ lo diaaso tshɛ diakondjayɛ. Onde wɛ sɛdingolaka divɛsa dia Bible dia lushi la lushi wɛ la wɔ? Onde wɛ ekɔ la mbekelo ka mbatɛka akambo wakete l’esambishelo kana akambo w’oma lo Tshoto y’Etangelo la Réveillez-vous ! “lam’ata[n]yakendakenda lu mbuka”? “Lam’etam[a]ye, ndu lam’etoye,” onde wɛ mbohɔka dia mbisha Jehowa losaka lo dɔmbɛlɔ l’ɔtɛ wa lɔsɛnɔ lakoshande lushi tshɛ ndo oma l’efula ka diangɔ diakoshande? (Euhwelo k’Elembe 6:6-9) Naka anayɛ mɛnaka woho wɛnama ngandji kokayɛ Jehowa l’akambo tshɛ wasalayɛ, kete dikambo sɔ diayowakimanyiya dia vɔ mbidja akambo wa mɛtɛ l’atei w’etema awɔ.
16. Naa ohomba wa mɛnya ana dia sala eyangelo awɔ vamɛ?
16 Esangɔ efula, ana wayongaka l’ohomba w’ɛlɔmbwɛlɔ dia mbeya kandola ekakatanu kana awui watomba dimɛna. Lo dihole dia mbâtɛka kɛnɛ kahombawɔ salaka lushi tshɛ, lande na kahayawaɛnya woho wa vɔ mbeya nganɛ wɛna Nzambi akambo lo mbâkeketsha dia vɔ salaka eyangelo vamɛ na? Mbetsha ana woho wa vɔ kamba dimɛna la dihomɔ tshɛ ndo l’ekanda watondja ‘ɔhɔmbɔ wa kɔlamelo’ ayowakimanyiya dia vɔ monga la diɔtɔnganelo di’oshika la Jehowa. (1 Samuele 2:21b) Ndo lam’akahanawɔ akambo w’ɔlɔlɔ w’oma l’eyangelo wasalawɔ lo Bible vɔ l’ase nkumbo akina, lonyuma la nkumbo keketalaka efula.
Nyoyaɛkɛ tshɛ le Jehowa
17. Lande na kahahombe ambutshi wodia anawɔ vamɛ shisha elongamelo etena ketshawɔ anawɔ dia koma Akristo?
17 Ko kayotota dikambo di’ambutshi wodia anawɔ vamɛ na? Vɔ mongaka l’ekakatanu ekina lo kɛnɛ kendana la wodielo w’ana. Koko ambutshi wodia anawɔ vamɛ hawɔkɔmɔ otema! Vɔ kokaka tondoya, oko wakadiɛnya ambutshi efula wakayaɛkɛ le Nzambi ndo wakayele alako ande l’okitanyiya tshɛ ndo wakodia ana w’eshika ndo wele la lonyuma la wolo. (Tukedi 22:6) Lo mɛtɛ, Akristo wodia anawɔ vamɛ pombaka ndjaɛkɛ tshɛ le Jehowa. Vɔ pombaka monga la mbetawɔ ɔnɛ nde ayowakimanyiya.—Osambo 121:1-3.
18. L’ehomba akɔna wa lo yimba ndo wa lo demba wahomba ambutshi mbidja anawɔ yimba ndo lo dikambo diakɔna diahombawɔ ndeka mbidja yimba?
18 Ambutshi wa lomba mbeyaka dia ‘ekɔ etena ka mbɔla . . . l’etena ka nɔ wɛnyɛ.’ (Undaki 3:1, 4) Asawo ndo tena dia tɔkɛnyɔ tele la wɛdimo ekɔ akambo wele ohomba dia keketsha yimba ndo demba di’ɔna. Mishiki wa dimɛna ndo djekoleko wembelo w’esambo watombola Nzambi ayokimanyiya ɔna dia nde monga la yimba y’ɔlɔlɔ yakoka monga ohomba efula dia keketsha diɔtɔnganelo diasande la Jehowa. (Kolosai 3:16) Etena keke onto ɔlɔngɔlɔngɔ mbakokande nto ndjalɔngɔsɔla woho wa ndjonga opalanga woka Nzambi wɔma dia nde ndjokoka tetemala ngɛnangɛna la lɔsɛnɔ la pondjo lo paradiso ka la nkɛtɛ.—Ngalatiya 6:8.
19. Lande na kakoka ambutshi ndjashikikɛ dia Jehowa ayɔtshɔkɔla welo wadjawɔ dia mbodia anawɔ?
19 Jehowa nangaka dia nkumbo y’Akristo tshɛ tetemala la monga nge lo nyuma ndo kamɛ. Naka sho mɛtɛ nangaka Nzambi ndo salaka la welo aso tshɛ dia kitanyiya Ɔtɛkɛta ande, kete nde ayɔtshɔkɔla welo aso ndo ayotosha wolo wahombama dia sho ndjela ɛlɔmbwɛlɔ kande. (Isaya 48:17; Filipi 4:13) Tohɛke dia diaaso diele layɛ kakianɛ dia ndakanya ndo mbekiya anayɛ diekɔ l’elelo ndo naka diɔ diambeta kete diambeta. Sala la wolo ayɛ tshɛ dia kitanyiya alako wa l’Ɔtɛkɛta waki Nzambi ko Jehowa ayɔtshɔkɔla welo wadjayɛ dia mbika nkumbo kele nge lo nyuma.
Akayakime?
• Lande na kele ndjatshungolɛ etena ekɔ ohomba efula lo wodielo w’ana?
• Lande na kele ɛnyɛlɔ k’ɔlɔlɔ k’oma le ambutshi kekɔ ohomba?
• Naa toho tɔmɔtshi t’ohomba takoka kimanyiya ana dia vɔ pama lo nyuma?
• Ngande wakokaso nama lonyuma la nkumbo?
[Esato wa lo lɛkɛ 20]
Nkumbo yele nge lo nyuma mbekaka Ɔtɛkɛta waki Nzambi mbala la mbala, mbɔtɔka lo nsanganya y’Akristo, ndo sambishaka kamɛ