Lande na Kahombaso Tetemala la Sambisha?
1 Onde aya edja kambokambema olimu w’esambishelo ka Diolelo lo ngelo kanyu? (Mat. 24:14) Naka ngasɔ, kete nyu koka fɔnya dia nyamboshila kindjakindja ɛtshi ka nkɛtɛ kakawasha etshumanelo kanyu tshɛ. Wony’ɔnɛ, lam’asambishanyu, ondo nyu pomanaka l’anto wele la wendjudi lo losango la Diolelo. Kânga mbediɔ ngasɔ, enda kɛnɛ kakate anto lo dikambo di’ambeki wa mɛtɛ waki Yeso lo lɛkɛ 141 la dibuku La prophétie d’Isaïe II : “L’ahole amɔtshi, vɔ kondjaka etombelo wele bu amɛna l’olimu awɔ lo mbɛdika l’olimu ndo la welo w’efula wakawadje. Koko, vɔ wekɔ lo tetemala.” Ko lande na kahombaso tetemala sambisha?
2 Tohɔ Ɛnyɛlɔ Kaki Jeremiya: Etete kaso l’olimu w’esambishelo hahombe nemanɛ la woho wayotohokamɛ kana wahatotohokamɛ anto. Jeremiya akasambisha ɛnɔnyi 40 lo mbilo kakɔ kamɛ kânga mbele anto yema tshitshɛ tsho mbakohokamɛ ndo efula wakatone losango lande. Lande na kakatetemala Jeremiya? Aki nɛ dia nde akatshaka olimu wakawodjangɛ Nzambi dia sala ndo woho wakandeyaka kɛnɛ kayoyotomba l’ɔkɔngɔ akotshutshuya dia nde tetemala la sambisha la dihonga.—Jer. 1:17; 20:9.
3 Ɔsɔku mbediɔ ndo lo kɛnɛ kendana la so. Yeso “akatokokomiya ati: nyusambisha antu, nyuwaenya nyati: ndi akasonwama le [Nzambi], dia ndjala umbuledi a wasena la wakavu.” (Etsha 10:42) Losango latatɛmbɛ nembetshiyaka lɔsɛnɔ kana nyɔi le wanɛ walioka. Anto wayolomboshama lo ndjela woho wayowotsha la ntondo ka lokumu l’ɔlɔlɔ. Oko wele dikambo sɔ ngasɔ, ɔkɛndɛ aso ele dia kotsha kɛnɛ kakawatodjangɛ dia ntsha la kɔlamelo tshɛ. Koyanga anto wayotona tohokamɛ, kɛsɔ toshaka diaaso dia sho mbaɛnya ngandji k’efula kawaokaso ndo ndjakimɔ kaso otsha le Jehowa lo tetemalaka ntsha kɛnɛ kahombaso ntsha. Koko awui wa sala wekɔ efula.
4 Tekɔ lo Kondja Wahɔ: Sala lolango la Nzambi oyadi dionga diakɔna diele l’anto wa lo mbilo kaso, toshaka wɔladi wa l’etei k’otema, ɔlɔ, ndo ɔngɛnɔngɛnɔ wahatakoke tana ndoko dihole dikina. (Osam. 40:8) Nsɛnɔ yaso ndjalaka l’oyango wa mɛtɛ. Lam’alekaso sambisha, mbatataleke monga l’eshikikelo l’etema ndo lo timba taso lo elongamelo ndo ɔngɛnɔngɛnɔ wa sɛna l’andja w’oyoyo waki Nzambi. Kana yimba l’alaka wa l’Afundelo keketshaka lonyuma laso ndo diokanelo diasaso la Jehowa.
5 Oyadi kânga hatokondjisha etombelo mbala kakɔ ɔtɔi oma l’olimu aso w’esambishelo, mbeyaka monga ko lɔtɔngɔ l’akambo wa mɛtɛ lakonɛma l’otema w’onto wele lɔ layola l’etena kayolanga Jehowa. (Joa. 6:44; 1 Kor. 3:6) Ndoko onto l’atei aso leya anto angana wayonyomeka awui wa Diolelo oma lo welo wadja ekambi wa Jehowa, oyadi wa lo ngelo kaso kana wa l’andja w’otondo.
6 La shamanya yoleki tshɛ, sho pombaka kitanyiya dako diaki Yeso diata ɔnɛ: “Nyewo, nyendaki, ne dia nyu hanyeya lam’ayukuka etena kako. [Koko] diui diunyutedimi ne, antu tshe mbaditelami nti: nyendaki.” (Mako 13:33, 37) Lâsɔ, nyɛsɔ totetemale sho tshɛ la mbewoya lokumu l’ɔlɔlɔ la Diolelo, lo ngɛnyangɛnyaka otema wa Jehowa lam’ashaso lonya lo ekidiamelo ka lokombo lande la woke ndo l’ekila.