Ɔkɔkɔ wakalolaso mbala la mbala tenda anto
1. Dimbola diakɔna diambwama lo kɛnɛ kendana la olimu aso w’esambishelo?
1 Lo ahole efula, sho shidiyaka la kindjakindja ɛtshi kaso ka nkɛtɛ mbala efula. Sho tetemalaka kalola lo mvudu yakatashile sambisha, oyadi kânga wambototɛka ɔnɛ hawɔngɛnangɛna lokumu l’ɔlɔlɔ. Lande na katetemalaso ntshɔ tenda anto waki kombetawɔ losango laso ntondo?
2. Naa ɔkɔkɔ wa ntondo watotshutshuya dia tetemala sambisha?
2 Ngandji kokaso Jehowa ndo wonyaso onto: Ɔkɔkɔ wa ntondo watetemalaso sambisha ele sho mbokaka Jehowa ngandji. Etema aso totshutshuyaka dia sho tetemala mbutɛ anto akina akambo wendana la Nzambi kaso ka woke. (Luka 6:45) Ngandji kokaso Jehowa totshutshuyaka dia sho kitanyiya wadjango ande ndo kimanyiya anto akina dia vɔ sala woho akɔ wâmɛ. (Tuk. 27:11; 1 Joa. 5:3) Oyadi anto mbetawɔ kana hawetawe, sho pombaka tetemala la sambisha olimu aso la kɔlamelo tshɛ. Kânga etena kakahɛnyahɛnyamaka Akristo wa lo ntambe ka ntondo, vɔ wakatetemala sambisha ‘aha la mpekɔ.’ (Etsha 5:42) Hatohombe kɔmɔ naka anto wambotona tohokamɛ, koko sho pombaka tshikalaka nge, lo mɛnyaka ɔnɛ sho mbokaka Jehowa ngandji ndo sho mbomamemaka.
3. Ngande wayotokimanyiya ngandji kokaso anto dia sho tetemala sambisha?
3 Sho tetemalaka sala olimu ɔsɔ nto nɛ dia sho mbokaka wonyaso onto ngandji. (Luka 10:27) Jehowa halange di’onto ɔmɔtshi ndanyema. (2 Pet. 3:9) Oyadi lo ɛtshi ka nkɛtɛ kambokindjakindjama efula, sho tetemalaka tana anto wakombola kambɛ Jehowa. Ɛnyɛlɔ, lo wodja wa Guadeloupe, lɛnɛ ele lo anto 56 tshɛ, onto 1 ekɔ Ɔmɛnyi wa Jehowa, anto 214 wakabatizama ɔnɔnyi w’etshi. Suke la anto 20000 wakɔtɔ lo Eohwelo, mbuta ate lo anto 22 tshɛ, onto 1 la lo wodja wa Guadeloupe akaye lo Eohwelo!
4. Lo toho takɔna tatshikitana awui wa lo bɛtshi diaso dia nkɛtɛ?
4 Etshikitanu wasalema lo bɛtshi dia nkɛtɛ: Mbala la mbala anto monɔka ndo akina ndjaka ndjodjasɛ lo ɛtshi kaso ka nkɛtɛ. Mbala kayotokalola lo luudu lɔmɔtshi laki onto konanga tohokamɛ, mbeyaka monga ko tayosawola la ose nkumbo okina, ondo onto lahatahokamɛka losango laso mbeyaka kombola tohokamɛ. Kana sho mbeyaka tana anto akina w’eyoyo wambɔtɔ lo luudu lakɔ wayɔngɛnangɛna tohokamɛ. Ana wele ambutshi awɔ tonaka lokumu l’ɔlɔlɔ ndjolaka ndo ndjonɔka dia todjasɛ lo ahole akina, ɔnkɔnɛ vɔ mbeyaka tokombola mpokamɛ losango la Diolelo l’ahole wayawɔ.
5. Kakɔna kakoka tshutshuya anto dia vɔ ndjetawɔ tohokamɛ?
5 Anto vɔ lawɔ tshikitanaka. Ɔpɔstɔlɔ Paulo aki ntondo “otenganyi, la usuyanyi, la utshanedi a kolo.” (1 Tim. 1:13) Woho akɔ wâmɛ mbele anto efula wakambɛ Jehowa kakianɛ konangaka ntondo akambo wa mɛtɛ. Mbeyaka monga ko amɔtshi wakalɔshaka lokumu l’ɔlɔlɔ. Oko watatshikitana awui wa lo andja ɔnɛ, andɔshi ɔmɔtsi kana anto waki la wendjodi mbeyaka ndjetawɔ mpokamɛ lokumu l’ɔlɔlɔ. Anto akina mbeyaka ndjetawɔ l’ɔkɔngɔ wa vɔ pomana la mpokoso kɛmɔtshi, ɛnyɛlɔ oko nyɔi k’onto ɔmɔtshi la lo nkumbo, oshishelo w’olimu, ekakatanu wendana la ekondjelo kana hemɔ.
6. Lande na kahombaso tetemala sambisha la wangasanu?
6 Dikongɛ nɛ di’akambo diekɔ lo tatshu lo ekomelo kadiɔ, koko olimu aso wa sambisha ndo wa mbetsha anto wekɔ lo tatshu otsha la ntondo. (Is. 60:22) Ɔnkɔnɛ, sho tetemalaka sambisha la ɔngɛnɔngɛnɔ ndo ndjaketembolaka dia monga la kanyi y’ɔlɔlɔ. Ondo onto layosawola la so mbala kayaye ayotohokamɛ. Sho pombaka tetemala sambisha! ‘Lo sala dui sɔ tayoyashimbɛ shoamɛ ndo wanɛ watohokamɛ.’—1 Tim. 4:16.