Fudia Ɔngɛnɔngɛnɔ Ayɛ l’Esambishelo
1 Ɔngɛnɔngɛnɔ waya oma lo mbewoya lokumu l’ɔlɔlɔ—onde wɛ mongaka la wɔ lam’asambishayɛ? Naka hatɔsɛnyi dimɛna, kete andja ɔnɛ wa kɔlɔ wotodingi mbeyaka totsha wɔma dia sambisha ndo toshishɛ ɔngɛnɔngɛnɔ aso. Okambelo wa lo mbilo kahawetawɔ losango laso mbeyaka nto tɔtɛwɔla. Tɛdikɔ takɔna takokaso mbɔsa dia fudia ɔngɛnɔngɛnɔ aso l’esambishelo?
2 Ɛna Akambo la Sso di’Ɔlɔlɔ: Tetemala monga la dionga di’ɔlɔlɔ kimanyiyaka mɛtɛ. Yoho mɔtshi ya sala dikambo sɔ ele kanaka yimba lo diɛsɛ dia woke diele laso dia monga “ekambi kame la [Nzambi].” (1 Kor. 3:9) Yeso nde lawɔ ekɔ kâmɛ laso lam’atatakambe olimu ɔnɛ. (Mat. 28:20) Ndo nde tosukɛka la lemba l’andjelo. (Mat. 13:41, 49) Lâsɔ, sho kokaka ndjashikikɛ dia welo wadjaso wekɔ lo nɔmbɔma oma le Nzambi. (Eny. 14:6, 7) Ɔnkɔnɛ, oyadi woho akɔna tshɛ wayɔsa anto amɔtshi olimu aso, woho wɔsa ase olongo olimu akɔ ekɔ ɔngɛnɔngɛnɔ ɔmɔtshi wa woke!
3 Yalɔngɔsɔla Dimɛna: Ɔlɔngɔswɛlɔ wa dimɛna toshaka nto ɔngɛnɔngɛnɔ. Ndjalɔngɔsɔla otsha l’olimu w’esambishelo halɔmbɛ akambo efula. Dikambo sɔ mbɔsaka paka minitɛ ngana tsho dia sɔnɔla dui dimɔtshi oma lo periodikɛ yêke katomba kana yayotokahɛ anto ngɔndɔ kakɔ. Sɔnɔla mbɔtwɛlɔ kɛmɔtshi oma l’ɔtɛ a dui wa lo Olimu Aso wa Diolelo wata ɔnɛ: “Woho wa Mbisha Anto Periodikɛ.” Enda dikatshi di’okotsha di’Olimu Aso wa Diolelo wa Ngɔndɔ ka Ntondo 2002, lo sawo diele l’ɔtɛ a dui ɔnɛ: “Mbɔtwɛlɔ ya Kamba Layɔ l’Olimu w’Esambishelo,” kana enda lo dibuku Comment raisonner dia kondja mbɔtwɛlɔ kɛmɔtshi ka dimɛna. Naka ekɔ wekamu kana wombola ɔmɔtshi wambokokonya ewo wonyiya ampokami ayɛ mbala la mbala, kete lɔngɔsɔla okadimwelo wɔtɔnɛ la tokanyi tawɔ ndo kotola yambalo yawɔ oya lo dikambo dimɔtshi diakoka memula nsaki kawɔ. Dibuku Comment raisonner kimanyiyaka efula l’awui wa ngasɔ. Naka tayokamba la dihomɔ nɛ, kete tayokondja eshikikelo kele laso ohomba dia nsambisha l’ɔngɛnɔngɛnɔ.
4 Lɔmba l’Otema Ɔtɔi: Dɔmbɛlɔ diekɔ ohomba dia ndjala l’ɔngɛnɔngɛnɔ w’oshika. Lam’ele olimu wa Jehowa mbakambaso, sho pombaka mbɔlɔmba nyuma kande, kele olowa atɔ ɔmɔtshi ekɔ ɔngɛnɔngɛnɔ. (Ngal. 5:22) Jehowa ayotosha wolo wa sho tetemala nsambisha. (Fil. 4:13) Sala dɔmbɛlɔ diendana l’olimu aso kokaka tokimanyiya dia mɛna akambo lo yoho y’ɔlɔlɔ lam’ahomanaso l’ekakatanu. (Etsha 13:52; 1 Pet. 4:13, 14) Etena kokaso wɔma, dɔmbɛlɔ koka tokimanyiya dia tetemala monga la dihonga ndo l’ɔngɛnɔngɛnɔ.—Etsha 4:31.
5 Yanga Waaso wa Nsambisha: Lo mɛtɛ, olimu aso ndjalaka ɔlɔ efula lam’atanaso anto ndo wasambishaso. Tshikitanya ekongelo kayɛ dia sambisha lo luudu la luudu lo wenya wotshikitanyi, ondo wɛ koka kondja etombelo w’ɔlɔlɔ lo sambisha la dikɔlɔ dia yɔ̂ kana la tosho ta shimba. Wɛ pomanaka l’anto wonya tshɛ watayeteta lo shinga, watshɔyɛ dia tosomba diangɔ, weyɛ lo mutuka, kana watshɔyɛ dia tɔsa yema ya lɔpɛpɛ lo tanolaka ekolo. Bonde kahayalɔngɔsɔla sawo dia lo tshena pe ko tatɛ sawola la wanɛ wakoka kohokomɛ? Kana mbeyaka monga ko wɛ ekɔ lo kamba olimu ɔmɔtshi wa l’emunyi kana ekɔ lo mbɔtɔ lo kalasa ka lɛɛta, lɛnɛ ele wɛ sawolaka l’anto akina lushi la lushi. Wɛ mbeyaka kondja diaaso dia sambisha onto paka lo kamba la dui dimɔtshi di’oma l’Afundelo diakoka kotola yambalo. Alako w’amɛna tanemaka lo lɛkɛ la ntondo la dikatshi di’okotsha di’Olimu Aso wa Diolelo wa Ngɔndɔ ka Ntondo 2002. Welo ɛsɔ tshɛ mbeyaka fudia ɔngɛnɔngɛnɔ w’onto l’esambishelo.
6 Lam’ele ɔngɛnɔngɛnɔ tokimanyiyaka dia tetemala, ekɔ ohomba efula dia sho tetemala monga lawɔ! Naka tayosalaka ngasɔ, kete sho tayokondja difuto dia woke lam’ayoshila olimu ɔnɛ wahakambemaki nto pondjo. Elongamelo kɛsɔ twamɛmɛ kokaka fudia ɔngɛnɔngɛnɔ aso l’esambishelo.—Mat. 25:21.