Lowando la l’Otema Ɔtɔi!
1 Nkumbo y’Akristo ya l’ahole tshɛ yekɔ lo mɛnya lowando lawɔ la mɛtɛ lo kɛnɛ kendana la bandɛ vidɛo Les jeunes s’interrogent. . . Comment se faire des vrais amis? Ombutshi wa pami ɔmɔtshi wa l’États-Unis akate dia l’ɔkɔngɔ w’anande menda bandɛ vidɛo kɛnɛ vɔ wakadjasɛ ki yɔɔ, vɔ wakakoke shihodia ndo ngɛnangɛna awui tshɛ wakawɛnyi lɔkɔ! Alapɔlɔ ɔmɔtshi w’oma lo wodja wa Malawi mbutaka di’anangɛso l’akadiyɛso w’akɛnda wa lo wodja ɔsɔ wakakoke shihodia ndo ngɛnangɛna awui asɔ nɛ dia ndo vɔ lawɔ mbele lo tɔsɛngiya t’oma le asekawɔ wa la kalasa. Ombutshi ɔmɔtshi wa pami wa l’Allemagne akate lo dikambo dia bandɛ kɛnɛ ɔnɛ: “Dimi kiɔsaka oko okadimwelo w’alɔmbɛlɔ ami.” Osekaseka ɔmɔtshi akate ate: “Losaka lo woho wamonyombohola dia Jehowa ndjakiyanyaka dikambo diami.” Ekumanyi kɛmɔtshi ka lo wodja wa Nouvelle - Zélande akate ate: “Tɔ kakakimanyiya ɔnaso la womoto leke osekaseka dia nde kalola lo mboka ka lɔsɛnɔ.” Womoto ɔmɔtshi lotshukami laya opalanga akate l’ɔkɔngɔ wa nde menda bandɛ kɛnɛ ate: “Dimi kombolaka mɛtɛ di’akɛnda tshɛ wele lo mɛtɛ menda bandɛ vidɛo kɛnɛ ndo tshutshuyama dia mbɔtshiya akambo wa mɛtɛ l’etema awɔ!” Ase nkumbo le, lande na kahanyende nto bandɛ kɛnɛ na? L’ɔkɔngɔ diko ko nyu kɛtshanya kamɛ wembola wayela ɛnɛ.
2 Mbɔtwɛlɔ: Ɔngɛnyi wa mɛtɛ kɛdikɛdi na?—Tuk. 18:24.
3 Etakanya Wendana la Lɔngɛnyi: Ngande wakokayɛ tondoya kanyi y’ɔnɛ angɛnyi ayɛ wambokokasha? (Fil. 2:4) Bonde kahombayɛ ndowanya lonto layɛ, ndo akoka kokimanyiya dia sala dikambo sɔ? Kakɔna kayokosha waaso wa nyomoleka monga l’angɛnyi, ndo lende akokayɛ tana angɛnyi akɔ?—2 Kor. 6:13.
4 Lɔngɛnyi la la Nzambi: Ngande wakokayɛ monga la diɔtɔnganelo di’ɔlɔlɔ lam’asayɛ la Jehowa, ndo bonde kele ekɔ ɔlɔlɔ mbidja welo lo dikambo sɔ? (Osam. 34:8) Onto akɔna lokoki ndeka keketsha lɔngɛnyi lele lam’asayɛ la Nzambi?
5 Weho wa Lɔngɛnyi la Kɔlɔ: Ele ɔngɛnyi wa kɔlɔ na? (1 Kor. 15:33) Ngande wakoka angɛnyi wa kɔlɔ ndanya lonyuma l’onto? Wetshelo akɔna wakondjayɛ oma l’ɔkɔndɔ wa lo Bible wendana la Dina?—Etat. 34:1, 2, 7, 19.
6 Kɛnɛ Kasalema Nshi Nyɛ: Ngande wakayaoke Tara lo woho wakinde komonga l’angɛnyi? Ngande wakandɛnya dia aki ɔlɔlɔ le nde dia mbɔtɔ lɔngɛnyi l’ɛlɔngɔlɔngɔ ndo l’esekaseka wa l’andja ɔnɛ? Angɛnyi asɔ waki suke la mbokonya lo wâle akɔna? Lande na kaki ambutshi ande kɔmɛna dia nde aki lo wâle, ko la dionga dia ngande diakawokimanyiya dia nde ndjɔkɔlɔngana lo nyuma? Ngande wakɛnya kadiyɛso kɛmɔtshi k’ombatshi mboka dia nde ekɔ ɔngɛnyi w’oshika le Tara? Lande na kahomba Akristo ndjela kɛnɛ kofundami lo Tukedi 13:20 ndo lo Jeremiya 17:9? Naa wetshelo w’ohomba wakakondja Tara?
7 Ndjihelo: Wetshelo akɔna wamboyokondja oma lo bandɛ vidɛo kɛnɛ? Ngande wakokayɛ kamba la tɔ dia kimanyiya anto akina?—Osam. 71:17.