Bandɛ vidɛo kahombaso kana la tɔ yimba dimɛna
“Bandɛ vidɛo kɛnɛ tshutshuyaka mɛtɛ onto dia nde kana yimba!”
“Tɔ kakananda otema ami!”
“Otema ami wakangasana efula!”
1 Onde ngasɔ mbakayaoke l’ɔkɔngɔ wa wɛ menda bandɛ vidɛo Les jeunes s’interrogent. . . Comment se faire de vrais amis ? Ambeta ɛnɔnyi ɛmɔtshi wele ɔlɔngɔlɔngɔ ɔmɔtshi w’Okristo aki la okakatanu lo lɔsɛnɔ lande l’ɔtɛ w’angɛnyi wakandasɔnɛ. Angɛnyi ande asɔ wakokonya lo nde shisha mposa k’akambo wa mɛtɛ ndo ndanya diɔtɔnganelo diasande la Jehowa. L’ɔkɔngɔ diko, mbakayotombaka bandɛ vidɛo Vrais amis. Nde akafunde ate: “Etena kakamendaka bandɛ vidɛo kɛsɔ mbala ko mbala, dimi lakalelaka. Dimi mbishaka Jehowa losaka l’ɔtɛ w’ekimanyielo kakamakondja la wonya.” Bandɛ vidɛo kɛsɔ kakotshutshuya dia nde tshikitanya dionga diande ndo monga l’angɛnyi w’ɛlɔlɔ. Nde akakotsha ɔnɛ: “Mɛnamaka dia wanɛ wakatondja bandɛ vidɛo kɛnɛ mbeyaka ekakatanu wele la ɛlɔngɔlɔngɔ la esekaseka.” Ambutshi ndo ana lee, lande na kahanyende nto bandɛ vidɛo kɛsɔ lo wekelo anyu wa lo nkumbo wa mbala kayaye? Nyemadiake bandɛ vidɛo kakɔ l’ɔkɔngɔ wa nyu menda etenyi tshɛ, ndo nyɔkɛtshanya ambola wa lo edingɔ wayela ɛnɛ aha l’onto mboka wɔma.
2 Mbɔtwɛlɔ: Elɛwɔ ɔngɛnyi wa mɛtɛ?—Tuk. 18:24.
3 Awui watodjɛ wekamu dia mbɔtɔ lɔngɛnyi l’anto: Ngande wakokayɛ minya tokanyi ta ndjaokaka oko okalema? (Fil. 2:4) Lande na kahombayɛ monga suke dia ndowanya lonto layɛ, ndo onto akɔna lakoka kokimanyiya dia wɛ sala ngasɔ? Kakɔna kayokokimanyiya dia wɛ monga la angɛnyi efula, ndo lende akokayɛ mbatana?—2 Kor. 6:13.
4 Lɔngɛnyi la la Nzambi: Ngande wakokayɛ monga la diɔtɔnganelo dia ma ma la Jehowa, ndo lande na ekɔ ohomba mbidja welo dia sala dikambo sɔ? (Osam. 34:8) Onto akɔna akoka ndeka kokimanyiya dia wɛ keketsha lɔngɛnyi lasayɛ la Nzambi?
5 Angɛnyi wa kɔlɔ: Waa na wele angɛnyi wa kɔlɔ? (1 Kor. 15:33) Ngande wakoka angɛnyi wa kɔlɔ ndanya lonyuma l’onto? Naa wetshelo wakondjaso oma lo ɔkɔndɔ wa lo Bible wendana la Dina?—Etat. 34:1, 2, 7, 19.
6 Kɛnyɔ mɔtshi ya nshi nyɛ: Lande na kakayaokaka Tara okalema? Yɛkɛ nɛndɛ yakɔna yakandasha lo woho wakandasɔnɛ dia mbɔtɔ lɔngɛnyi la ɛlɔngɔlɔngɔ l’esekaseka wa l’andja ɔnɛ? Lo wâle akɔna wakawawodje? Lande na kaki ambutshi ande kɔmɛna ɔnɛ Tara aki lo wâle, ndo ngande wakawatshikitanya dionga diawɔ dia vɔ mbokimanyiya dia monga la lonyuma l’ɔlɔlɔ laki lande ntondo? Ngande wakɛnya kadiyɛso kɛmɔtshi k’ombatshi mboka dia nde aki ɔngɛnyi wa mɛtɛ le Tara? Lande na kahomba Akristo kitanyiya dako diele lo Tukedi 13:20 ndo Jeremiya 17:9? Naa wetshelo w’ohomba wakakondja Tara oma lo kɛnɛ kakokomɛ?
7 Ndjihelo: Wetshelo akɔna wamboyokondja oma lo bandɛ vidɛo kɛnɛ? Ngande wakokayɛ kamba la vidɛo kɛnɛ dia kimanyiya anto akina?—Osam. 71:17.