Mbalasa ya Diolelo Ekongelo ka Wokelo Ayɔ Kekɔ lo Tatshu Otsha la Ntondo
1 L’ɔnɔnyi 1983 lo losanganya la distrikɛ laki l’ɔtɛ a dui ɔnɛ: “Tɛkɔ Kâmɛ Diɛsɛ oma lo Diolelo” lakasalema l’États-Unis wakewoya ɔnɛ falanga ya lânde yakahombe mɔtshama dia sukɛ wokelo ndo ɔlɔngɔswɛlɔ wa Mbalasa ya Diolelo l’États-Unis w’otondo la lo Canada. L’etena kɛsɔ sho kombeyaka ɛtshɔkɔ wakatahombe ndjokondja oma l’ekongelo kakatatɛ lo yema tshitshɛ kɛsɔ. Takatatɛ mɛna dimɛna ekotshamelo k’Osambu 92:4 lɛnɛ adiaso ɔnɛ: “[Jehowa] li, we atôngenyangenyaka lu akambu aye! Layukutumbulaka ne dia elimu w’anya aye.”
2 Kakianɛ tekɔ l’ɔngɛnɔngɛnɔ heyama lo menda kɛnɛ kele lo salema. Ɛlɔ kɛnɛ ekongelo ka wokelo w’esadi esadi wa Mbalasa ya Diolelo kekɔ lo tatetemala tshɔ otsha la ntondo. Lo toho totshikitanyi, sho tshɛ tekɔ la diɛsɛ dia mbisha lonya l’olimu ɔsɔ. Sho salaka dikambo sɔ lo kimɔka weshasha oyadi wa totshitshɛ kana wa weke dia sukɛ wokelo w’ahole w’ɔtɛmwɛlɔ l’andja w’otondo. Ndo anangɛso l’akadiyɛsɔ efula wekɔ lo mbetawɔ kimɔ la lolango dihomɔ diawɔ dia kimanyiya wokelo, amɔtshi wekɔ lo mbisha wenya awɔ, akoka awɔ, ndo timba tawɔ dia sukɛ ekongelo kɛsɔ ka wokelo. Etombelo w’ɔlɔlɔ w’oma l’ekongelo kɛsɔ k’otondo ndja oma l’ɛlɔmbwɛlɔ ndo osukɔ waki Jehowa ndo oma lo woho watshɔkɔlande welo wadjaso kamɛ.—Osam. 127:1.
3 Filialɛ efula yekɔ lo ndjela ɛnyɛlɔ kakashikikɛma ntondo lo tshumanelo dia l’États-Unis. Mbalasa ya Diolelo ya lo wedja efula yekɔ la shɛtɛshɛtɛ yadja apandjudi weshasha awɔ wa Falanga ya Mbalasa ya Diolelo. L’États-Unis, Olimu Aso wa Diolelo wa Ngɔndɔ ka Sato 1997 lo Angɛlɛ akewoya otshikitanu ɔmɔtshi wendana l’ekongelo kɛsɔ. Vɔ wakate ɔnɛ: “Tatɛ lam’akɔshi Société yɛdikɔ ya tshumanya Falanga ya Mbalasa ya Diolelo lo 1983, anangɛsɔ wakakimɔ weshasha la lokaho tshɛ ndo yɛdikɔ shɔ yakakimanyiya anangɛso dia sɔmba falanga le Société dia mbikisha Mbalasa ya Diolelo. Tshumanelo oko 2700 dia lo wodja ɔsɔ diamboshila la kondja wahɔ oma lo yɛdikɔ shɔ. Tshumanelo efula dia bu la woho okina wa mbikisha Mbalasa ya Diolelo y’eyoyo kana nɔngɔsɔla nyɛ yahombama. Ɛlɔ kɛnɛ ekɔ ohomba efula dia sɔndja tshumanelo dia lo wedja wele bu l’ekondjelo ka dimɛna falanga mɔtshi oma lo falanga yakakimɔma shɔ. Société kâmɛ ndo tshumanelo diakondja wahɔ oma lo weshasha anyu diekɔ la lowando efula lo woho watetemalanyu sukɛ yɛdikɔ shɔ.”
4 Diewoyelo sɔ aki oko leeta lalɔmba anto dia mbisha lonya l’ekongelo ka wokelo w’esadi esadi wa Mbalasa ya Diolelo. Ayonga ohomba kamba la Falanga ya Mbalasa ya Diolelo shɔ dia kotsha ehomba w’anangɛso wa lo wedja ekina etena keso lo tetemala sɔndja tshumanelo dia l’États-Unis falanga ya vɔ mbikisha Mbalasa ya Diolelo. Sawo dimɔtshi diakatombe l’Olimu Aso wa Diolelo wa Ngɔndɔ ka Divwa 1997 diakate dia: “Tekɔ l’ohomba efula wa Mbalasa ya Diolelo l’andja w’otondo. Paka l’ɔnɔnyi w’olimu wa 1996 oto, tshumanelo di’eyoyo 3288 diakatema. Efula ka tshumanelo sɔ diekɔ l’Afrikɛ, l’Asie, l’Amérique Central la l’Amérique du Sud, ndo l’Erɔpɛ wa lo Ɛstɛ.”
5 Etombelo akɔna wambokondjama tatɛ oma k’etena kɛsɔ na? Annuaire 2001 mbishaka alapɔlɔ ɔnɛ: “Oma l’ekongelo kɛsɔ, lo wedja 30, Mbalasa ya Diolelo 453 yamboshila mbikama kakianɛ, ndo Mbalasa kina ya Diolelo 727 yekɔ lo mbikama. Welo wa mamba wakadjama dia kamba l’ekongelo ka wokelo wa Mbalasa ya Diolelo kele bu wolo woho wa wodja la wodja kamba la diangɔ ndo la toho ta wokelo ta lo ngelo kawɔ. Lo Kenya, wekɔ lo kamba l’abanga; lo Togo wekɔ la mbekelo ka kamba l’atafadi; lo Cameroun anto ndekaka kamba l’atafadi wa sima. Lo yoho shɔ, anangɛso wa lo wodja la wodja ndjaekesanyiyaka esadi eto la kɛnɛ kahombama dia kotsha olimu awɔ wendana l’ekongelo ka wokelo lo ngelo kawɔ.”
6 Djembetelo yɛnya woho watshɔkɔla Jehowa ekongelo kɛsɔ koka mɛnama lo dihonda dia woke di’Afrikɛ. Lam’endayɛ esato wa Mbalasa mɔtshi ya Diolelo yamboshila mbikama, kanyiya shɛngiya yamonga la wokelo ɔsɔ l’olimu wakamba Ɛmɛnyi wa Jehowa! Shɛngiya shɔ mɛnamaka l’akambo asato anɛ: kâmɛ ka nkumbo kaso k’anto l’ɔnango ka l’andja w’otondo, shɛngiya yele la dikambo sɔ lo ngelo yakama Mbalasa shɔ, ndo ohamelo wa lofulo l’anto wɔtɔ lo nsanganya. Kânga mbele dikatshi nɛ di’okotsha di’Olimu Aso wa Diolelo diambɔtɛkɛta dia Mbalasa ya Diolelo yambokama l’Afrikɛ, Olimu Aso wa Diolelo wa Ngɔndɔ yayaye wayɛnya woho watatshu ekongelo ka wokelo wa Mbalasa ya Diolelo otsha la ntondo l’ahole akina.
[Esato wa lo lɛkɛ 3]
REPUBLIQUE CENTRE AFRICAINE
Bimbo, Bangui
Begoua, Bangui
[Esato wa lo lɛkɛ 4]
Ukonga, Tanzanie
[Osato wa lo lɛkɛ 4]
Accra, Ghana
[Osato wa lo lɛkɛ 4]
Salala, Liberia
[Osato wa lo lɛkɛ 4]
Karoi, Zimbabwe
[Esato wa lo lɛkɛ 4, 5]
Allada, Bénin—Mbalasa ka Diolelo k’edjedja
Allada, Bénin—Mbalasa ka Diolelo k’oyoyo
[Osato wa lo lɛkɛ 5]
Kpeme, Togo
[Osato wa lo lɛkɛ 5]
Sokodé, Togo
[Osato wa lo lɛkɛ 4, 5]
Fidjrosse, Bénin
[Osato wa lo lɛkɛ 6]
Lyenga, Zambie—Mbalasa ka Diolelo k’edjedja
[Osato wa lo lɛkɛ 6]
Lyenga, Zambie—Mbalasa ka Diolelo k’oyoyo
[Osato wa lo lɛkɛ 6]
Kinshasa, Congo
[Osato wa lo lɛkɛ 6]
Musambira, Rwanda