Wokelo Wa Mbalasa ya Diolelo L’états-unis

¹ Lam’okaso sso l’olimu wa l’andja w’otondo, sho keketshamaka lam’ɛnaso ohamelo wa woke wambosalema l’ɔlɔngɔswamelo wa Jehowa wa la nkɛtɛ. Ɔnɔnyi wetshi, tshumanelo 246 diakâtema l’États-Unis, koko lofulo la tshumanelo tshɛtshɛ diakâtema l’andja w’otondo laki 3288. Lo menda ohamelo wa ngasɔ, mɛtɛ ohomba wa Mbalasa efula ya Diolelo mɛnamaka hwe.

² Anangɛso l’akadiyɛso efula wekɔ l’ohetoheto wa mamba ndo sukɛka ɔlɔngɔswamelo wa Jehowa lo kimɔka wenya awɔ ndo ekundji awɔ la lolango lawɔ lo dikambo dia wokelo wa Mbalasa ya Diolelo. Lo kɔmite rɛgiɔnalɛ 75 ya wokelo yele l’États-Unis, kɔmite tshɛ ekɔ l’ɔkɛndɛ wa tshumanelo 140 l’etenyi ka wodja kokishawɔ. Ɔnɔnyi tshɛ, yɛdikɔ ya Mbalasa ya Diolelo 200 mbikamaka ndo 200 kina nɔngɔswamaka. Wa kɔmite rɛgiɔnalɛ mbele l’ɔkɛndɛ w’elimu ɛsɔ tshɛ, ndo yɔ kambaka lotumu layɔ dimɛna efula. Kɛnɛ tshɛ kasalema lo wokelo wa Mbalasa ya Diolelo ndjâka oma lo yimba ya Lokristo yendana la mbisha ndo ndjasɛka, yimba yotshikitanyi la nyɛ ya l’andja ɔnɛ.​—⁠2 Tim. 3:​2, 4.

³ Dia sunganya mvudu yakɔ, la Société akasha wa kɔmite rɛgiɔnalɛ toho tɔmɔtshi ta Mbalasa ya Diolelo yakama l’États-Unis yele la plans yayɔ lo D.A.O. (Dessin assisté par ordinateur.) Yɛdikɔ shɔ kimanyiyaka dia mbika esadi esadi ndo di’aha nyanga anto efula wayakimɔ la lolango. Ndo nto, yɔ kimanyiyaka dia mbeya dimɛna lofulo la falanga layɔsama oma l’Okundji wa la Société wakombama dia mbika Mbalasa ya Diolelo. Nshi nyɛ, dikumanyi wɔsɔnaka yoho ya mbalasa kalangawɔ oma lo plans yakɔ shɔ. L’ɔkɔngɔ wa vɔ nongola ehomɔ kɛsɔ k’oyoyo, kɔmite rɛgiɔnalɛ kɛmɔtshi ka wokelo akate ate: “Taki l’ɔngɛnɔngɛnɔ wa mamba ndo, lo mbuta mɛtɛ, taki la wangasanu dia nongola plans yakɔ.  . . . Anangɛso weya akambo efula wa manga plans ya mvudu ndo wa mbika mvudu mɛnaka ɔnɛ: naka sho kamba la wa plans shɔ kete lo dihole dia sho mbika mbalasa ɔtɔi l’edja ka nshi kana dikumi, tayokika lo nshi tshanu kana nyɛi tsho. Plans shɔ yayotokimanyiya nto dia kanyiya tɛdikɔ toleki ɔlɔlɔ ndo taleka sungana lo dikambo dia Mbalasa ya Diolelo.” Lam’ele tshumanelo mɛnyaka yimba y’ɔlɔlɔ y’anto wakamba kamɛ oma lo woho wasukɛwɔ olimu wa nɔngɔsɔla Mbalasa ya Diolelo, sho nongamɛka dia olimu w’amangi wa plans ya mvudu (architectes), ambewi w’elimu w’anya (techniciens), kamɛ ndo ambikimbiki a mvudu walɔmbɔla elimu wetawɔwɔ kamba l’otema ɔtɔi dia mbisha ekimanyielo kawɔ la lolango, kitakitaka efula.

⁴ Wanɛ Wayakimɔ la Lolango Sukɛka Olimu wa Dimɛna Efula: La Société mandolaka lokema l’anto wayakimɔ la lolango dia mbika Mbalasa ya Diolelo. Ekɔ dimɛna efula dia mɛna anto nunu akumi wayakimɔ la lolango lo ntumu tshɛ yasalema lo wokelo ɔsɔ. Ekongelo ka wokelo ɔnɛ kambokotshama oma lo yimba ya ndjakimɔ la lolango, ya lokaho ndo ya kamba kamɛ yɛnya anto wahayange difuto ndo wakamba la lolango lawɔ, wanɛ wetsha wenya awɔ wotowosala awui akina lo tshumanelo diawɔ ndo lo nkumbo yawɔ. (Osam. 110:3; Kol. 3:23) Dionga sɔ dioludi la ngandji kokaka tombɔma, mandɔma ndo sukamɛ oma le so l’ɔlɔlɔ tshɛ.​—⁠Romo 12:10; Heb. 13:⁠1.

⁵ Sho nɔmbaka wanɛ tshɛ wele la diewo dia kimanyiyaka wa kɔmite rɛgiɔnalɛ tena la tena dia vɔ ndodja fɔrmilɛrɛ ka Construction des Salles du Royaume ​—⁠ Questionnaire pour les volontaires (S-82). Etshumanelo mbayotomɛ kɔmite rɛgionalɛ fɔrmilɛrɛ yakɔ dia mbaewoya akoka wele l’anto akɔ wayakimɔ la lolango ndo diaaso diele lawɔ. Naka awui w’onto lakayakimɔ la lolango wambotshikitana, ɛnyɛlɔ oko naka nde ambônɔ kana aya okambi w’olimu kana ekumanyi, kete nde pombaka ndodja fɔrmilɛrɛ k’oyoyo esadi, kayondosha sekeletɛrɛ ka l’etshumanelo dia nde totomɛ. Naka onto hayokotsha kɛnɛ kalɔmbama, kete dikumanyi pombaka mbewoya kɔmite rɛgiɔnalɛ esadi lo mukanda. Naka nyekɔ l’ohomba wa fɔrmilɛrɛ efula ya questionnaires ko nyu nɔmba lo fɔrmilɛ ka ngɔndɔ la ngɔndɔ ka Demande de publications. Ndo omendji w’otshimbedi mbenana la listɛ l’anto wayakimɔ la lolango dia kamba yoho shɔ y’olimu w’ekila. Nde mendaka nto wɔɔmbɔ wa fɔrmilɛrɛ ya questionnaires pour volontaires tena tshɛ diembolande etshumanelo.

⁶ Tokitshakitsha Eshinga wa Wokelo k’Ɛse: Wambotɛka wa kɔmite rɛgiɔnalɛ ya wokelo dia vɔ mbidja olimu w’osombelo wa diangɔ (service des achats) wayɔlɔmbwamaka oma le ekumanyi kɛmɔtshi kele l’akoka. Anangɛso wakamba olimu ɔsɔ tendaka diangɔ dia somba l’ahole tshɛ dia menda eshinga w’amɛna, ko vɔ mbɛdika dia mbeya lɛnɛ oleki l’ɛse. Lo yoho shɔ, mbayoweya makashinyi akɔna wayowosombaka ndo diangɔ diakɔna diayowosomba. Tena dimɔtshi, lam’asangoyawɔ mbika Mbalasa ka Diolelo, vɔ nɔmbaka anangɛso wa l’etshumanelo kakɔ wele l’akoka dia vɔ kimanyiya wanɛ wakamba olimu akɔ.

⁷ Dia ndjashikikɛ ɔnɛ nyekɔ lo tɛtɔla akuta l’ɔlɔlɔ tshɛ mɛtɛ, paka kɔmite rɛgiɔnalɛ ka wokelo mbeyaka oseka dui tshɛ diendana la wokelo dialɔmba falanga dia nde sinyɛ shɛkɛ kana futa faktirɛ. Naka wayanga mbika kana nɔngɔsɔla Mbalasa ka Diolelo kɛmɔtshi, ko woyanga anto wayakimɔ la lolango wele lo tshumanelo dikina diahatosanganaka lo mbalasa kakɔ, lâsɔ kete kɔmite rɛgiɔnalɛ ayonga l’ɔkɛndɛ wa nɔmbɔla lotumu lɔsɔ.

⁸ Kanyɔlɔmbɛ onto tshɛ lalɔmbɔla lotumu la wokelo a mvudu, ɔnɛ layokana la nyu dia mbikisha Mbalasa ka Diolelo dia nde nyosha djembetelo yɛnya ɔnɛ as’olimu ande wekɔ l’assurance, kamɛ ndo assurance wambondetawɔ ɔkɛndɛ w’awui tshɛ, oyadi kânga sonas kôfutaka yema tshitshɛ, yɛnya ɔnɛ etshumanelo ambɔtɔ lo assurance ande ndo ɔnɛ nde ayetawɔ shisha naka mpokoso kɛmɔtshi kambotomba.

⁹ Woho wa Kimanyiya Filialɛ Nkina: Filialɛ nkina tongaka tena dimɔtshi l’ohomba w’ekimanyielo ka wa kɔmite rɛgiɔnalɛ ya wokelo yele l’États-Unis. Dui sɔ salemaka mbala efula naka filialɛ nangaka nɔngɔsɔla mvudu yolani la dito dimɔtshi kana ndowanya ase kɔmite rɛgiɔnalɛ ka wokelo etena kakawɔ Mbalasa kɛmɔtshi. Anangɛso wele l’ɛkɛndɛ lo dikambo sɔ ndo wele suke suke dia ntshɔ otsha lo wodja okina, l’atikɛ awɔ vamɛ, dia tokimanyiya anto akina mbishaka ɛnyɛlɔ ka mamba ka ngandji. Naka dɛmandɛ diakasale filialɛ kɛmɔtshi diambetawɔma, kete la Société ayelɛ kɔmite rɛgiɔnalɛ kɛmɔtshi kele ondo bu la mvudu efula ya mbika l’etena kakɔ. Ngasɔ mbasalema akambo tshɛ l’ɔnɔngɔ.

¹⁰ Lam’ele ohomba wa Mbalasa ya Diolelo lo wedja ekina wekɔ lo tafule tsho, ekɔ ohomba mbeya munanda ekundji wakalamema dia mbikaka mvudu shɔ. Mukanda wakawafundɛ tshumanelo tshɛ dia l’États-Unis lo Ngɔndɔ ka Samalo 15, 1995 akatokeketsha dia sho tɛtɔla falanga lo wokelo kana ɔlɔngɔswɛlɔ wa mbalasa. Ɔsɛngɔsɛngɔ ɔsɔ waketawɔma dimɛna efula. Omalɔkɔ, oko akate Olimu Aso wa Diolelo wa Ngɔndɔ ka Sato 1997 (États-Unis), etenyi kɛmɔtshi k’Okundji wa la Société wa Mbalasa ya Diolelo ambomama dia sɔndjaka tshumanelo dia lo wedja ɛmɔtshi lɛnɛ ele ohomba efula wa mbalasa, ko ɔngɔnyi bu efula ndo wele l’ekakatanu l’ekondjelo.

¹¹ Annuaire 1997 mbikaka epole ɔsɛkɛ l’ohomba wa monga la mbalasa efula lo wedja ɛmɔtshi. Oko l’Ukraine, lɛnɛ ambowoka Mbalasa ya Diolelo 47 kakianɛ, ko 56 nkina yekɔ lo mbikama. Mbokɛmaka hwe dia ohomba wekɔ lo wedja ɛsɔ. Ngasɔ mbɛnyawɔ lo alapɔlɔ ɔmɔtshi ɔnɛ: “La Russie, anto wekɔ l’ohomba wa mbalasa efula. Lofulo l’Ɛmɛnyi wa Jehowa lekɔ lo tadɛ esadi esadi, koko yɛdikɔ ya % 85 ya tshumanelo diele lo filialɛ ka Russie bu l’ahole shikaa wa mbɔtɔka nsanganya. La Zimbabwe, lɛnɛ ele yɛdikɔ ya tshumanelo 800, efula kayɔ sanganaka paka l’andja lo sɛkɛ. Diɔ diakɔ diele, anto amɔtshi weke ka mɛnya saki hawolange ntshɔ lo nsanganya.” Awui wa ngasɔ salemaka l’Erɔpɛ wa l’Ehotwelo ka onya, l’Afrika ndo l’Amérique latine.

¹² Mɛtɛ, lo nshi y’ekomelo nyɛ, ngandji k’anto efula kambɔla, koko ekambi wa Nzambi tetemalaka la mɛnyanya ngandji l’asawɔ, ngandji kaheye dia bariyɛlɛ ya lokoho la demba kana ya wodja. (Mat. 24:12) Nyɛsɔ tokoya Shɛso ka l’olongo lo tetemalaka la mɛnya ngandji ka ngasɔ la sukɛka wokelo wa Mbalasa ya Diolelo l’otema ɔtɔi, oyadi l’États-Unis kana lo wedja ekina! Naka tayosala ngasɔ, kete tayetawɔma ndo tayɔtshɔkwama efula oma le Jehowa.​—⁠Mal. 3:10; Heb. 6:⁠10.

Wokelo Wa Mbalasa Ya Diolelo L’andja W’otondo

¹ Ohomba wa Mbalasa ya Diolelo wekɔ efula l’andja w’otondo. L’ɔnɔnyi w’olimu wa 1996, tshumanelo 3 288 diakâtema, efula kadiɔ l’Afrika, l’Amɛrika wa l’atei atei, l’Amɛrika wa lo Sudɛ, l’Asie ndo l’Erɔpɛ wa l’Ehotwelo ka onya.

² Numɛlɔ yakete y’Olimu Aso wa Diolelo yakakɔndɔla woho watasalema olimu wa wokelo wa Mbalasa ya Diolelo lo wedja ɛmɔtshi. Kânga mbediɔ ɔsɔku, alapɔlɔ mɛnyaka ɔnɛ ndjâka lo wodja wele la tshumanelo 568 ko Mbalasa ka Diolelo ɔtɔi oto. Lo wodja okina, mbalasa ɔtɔi ko tshumanelo 129. L’ahole akina nto, ndjâka mbalasa ɔtɔi ko tshumanelo 41. Lo wedja ekina efula nto wele la tshumanelo ndekana 1 000, kokoka mbika kânga Mbalasa ka Diolelo ɔtɔi, tshɛ kɛsɔ l’ɔkɔkɔ w’ekakatanu w’ekondjelo. Olimu wa woke wamboshila kambema, koko okina wekekɔ efula nto. Tekɔ l’eshikikelo ɔnɛ anangɛso wa l’États-Unis nangaka kimanyiya tshumanelo dia lo wedja ekina diele bu la Mbalasa ya Diolelo yasungana.

³ Dikambo sɔ mɛtɛ mbɔtɔnɛka la 2 Koreto 8:​14, kata ɔnɛ: “Ne dia mbedimia yediko pupu, diango dianyu efula l’etena kene, diambukuka dia [“nemanyia,” NW] ehumba awo.” Lo wedja efula wakombe Okundji dia mbikaka Mbalasa ya Diolelo, koko ekakatanu w’ekondjelo hasha anangɛso diaaso dia vɔ mbika mbalasa efula oko ahombama. Koko, oma l’ekimanyielo k’anangɛso wa lo wedja ekina, la Société akasukɛ wokelo wa Mbalasa ya Diolelo 413 ndo akalɔngɔsɔla kina 727 lo wedja oko 75 wotshikitanyi, ko olimu ɔsɔ tshɛ wakasalema lo ngɔndɔ nyɛi tsho. Lam’ele ohomba weke efula, pombaka mbidja lonya lo mpata kaso k’Okundji wakombama dia mbikaka Mbalasa ya Diolelo woho wa sukɛ wokelo lo wedja ekina. Etena katetemalaso la sɔmbiana falanga dia mbika wa mbalasa yahombama l’États-Unis, ko naka ohomba amboshila koko falanga yekekɔ, kete tayɔsa ndo ekundji aso dia kimanyiya tshumanelo dia lo wedja ekina. Sho ngɛnangɛnaka dia mbika Mbalasa ya Diolelo efula l’andja w’otondo, dia lotombo la Jehowa.​—⁠Osam. 102:16; Hang. 1:​7, 8.