Tosambisha Losango la Diolelo
1 “Dieli la mi dia nsambisha lukumu l’ololo la diulelu dia [Nzambi] . . . , ne dia dimi lakatumama dia dikambu diako.” (Luka 4:43) Oma l’ɛtɛkɛta ɛsɔ mbakashikikɛ Yeso lokanyi loleki ohomba lendana l’olimu ande—Diolelo diaki Nzambi. Ndo losango lasambishaso ɛlɔ kɛnɛ mbikaka epole ɔsɛkɛ lo Diolelo, oko wakadiatama lo Mateu 24:14 ɔnɛ: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” Naa akambo wa mɛtɛ wendana la Diolelo diaki Nzambi wahomba anto mboka?
2 Diolelo diaki Nzambi diekɔ lo mbolɛ kakianɛ oma l’olongo ndo kem’edja diɔ diayanga kita mandji y’ana w’anto. Satana amboshilaka mbikadjema oma l’olongo, ndo dikongɛ di’akambo nɛ dia kɔlɔ diambɔtɔka lo nshi yadiɔ y’ekomelo. (Eny. 12:10, 12) Andja ɔnɛ wa kɔlɔ ndo w’omusu waki Satana wayolanyema tshɛ, koko Diolelo diaki Nzambi hadiosutshasutshamaki. Diɔ diayotshikala pondjo.—Dan. 2:44; Heb. 12:28.
3 Diolelo diayokotsha nsaki y’ɛlɔlɔ y’anto tshɛ wele l’okitanyiya. Diɔ diayotshungola anto oma l’asui tshɛ w’oma l’awui w’ata, wa ngala, wa diakatanelo, ndo oma lo wola. (Osam. 46:8, 9; 72:12-14) Anto tshɛ wayonga la mbo ya ndɛ tshavutshavu. (Osam. 72:16; Is. 25:6) Elando ndo dikɔmɔ hatonga nto. (Is. 33:24; 35:5, 6) Lam’ayokoma anto kokele, nkɛtɛ kayokadimɔma paradiso, ndo anto wayodjasɛ kamɛ lo diokanelo.—Is. 11:6-9.
4 Sho mɛnyaka dia sho nangaka sɛna l’ɛlɔmbwɛlɔ ka Diolelo diaki Nzambi oma lo yoho yasɛnaso ɛlɔ kɛnɛ. Losango la Diolelo pombaka monga la shɛngiya lo yoho yaso ya lɔsɛnɔ l’otondo, ndo l’eyango aso kana akambo wetshaso lo dihole dia ntondo. Ɛnyɛlɔ, kânga mbeso l’ɔkɛndɛ wa kotsha ehomba w’ase luudu laso, hatokoke mbetawɔ di’ekiyanu wendana la diangɔ dia l’emunyi ndjotshindja wahɔ wa Diolelo l’ɔkɔngɔ. (Mat. 13:22; 1 Tim. 5:8) Koko, sho pombaka kitanyiya dako diaki Yeso diata ɔnɛ: “Keli ntundu nyutayangi diulelu la ololo wa [Nzambi], ku diango so tshe diayuyala dianyu.”—Mat. 6:33.
5 Ekɔ ohomba efula di’anto mboka losango la Diolelo ndo mbɔsa yɛdikɔ yahombama di’aha vɔ ndjohɔ okanga a kɔngɔlɔ wanyu amboshila. Nyɛsɔ takimanyiya dia vɔ sala dikambo sɔ lo “mbaetawuya akambu wa diulelu dia [Nzambi].”—Etsha 19:8.