Tohɔ Esombe Wele la Kɔlamelo
1 Kânga mbakinde wadi aki odo ndo osombe w’ɛnɔnyi 84, Ana “kumumoka lu etemwelo.” Oma lo kɔlamelo yande Jehowa ak’ɔtshɔkɔla lo yoho ya lânde. (Luka 2:36-38) Ɛlɔ kɛnɛ, anangɛso l’akadiyɛso efula wekɔ la woho wa dionga diaki la Ana kânga mbahomanawɔ l’ekakatanu. Anto asɔ wele la kɔlamelo mbeyaka kɔmɔ etema mbala mɔtshi etena kalɔshanawɔ l’ekakatanu wa lo demba ndo la wekamu woye oma lo woho wayawɔ esombe. Nyɛsɔ tɔsɛdingole toho tɔmɔtshi t’ɔlɔlɔ takokaso mbakeketsha ndo mbakimanyiya dia vɔ tetemala monga l’ekongelo k’ɔlɔlɔ k’akambo wa lo nyuma.
2 Nsanganya ndo Olimu w’Esambishelo: Esombe efula wele la kɔlamelo kokaka mbɔtɔka mbala la mbala lo nsanganya y’Akristo aha l’okakatanu naka anto akina wayowaɛmbaka la ngandji tshɛ oya lo nsanganya shɔ. Dikambo sɔ keketshaka ekambi ɛsɔ wa kɔlamelo wambokambɛ Jehowa edja lo nyuma ndo etshumanelo nto kondjaka ɛlɔlɔ efula. Onde wɛ ambokimanyiyaka anto asɔ?—Heb. 13:16.
3 Esambishelo ka mbala la mbala mbishaka Akristo wa mɛtɛ ɔlɔ ndo ɔngɛnɔngɛnɔ. Koko dikambo sɔ mbeyaka monga wolo le anto waya esombe ndo wele la dikɔmɔ kana wele la hemɔ. Onde ekɔ yoho mɔtshi yakoka ɔmɔtshi l’atei wa anyaso wa ngandji asɔ kotshindɛ lo toho tɔmɔtshi t’esambishelo oko wende ‘onyayɛ okambi’? (Romo 16:3, 9, 21) Ondo wɛ koka mbɔlɔmba dia wɛ la nde sala esambishelo ka lo telefɔnɛ kana wɛ ntshɔ la nde dia tembola onto ɔmɔtshi kana dia teka l’ombeki ayɛ ɔmɔtshi wa Bible. Naka osombe ɔsɔ bu la wolo wa kɛndakɛnda, onde ombeki wa Bible koka ndja dia nyu ndjeka laka ɔnangɛso kana kadiyɛso kɛsɔ?
4 Wekelo ndo Osanganelo wa Kamɛ: Mbala la mbala, anto amɔtshi mbelɛka osombe kana onto ɔmɔtshi lele l’ɛkɔmɔ dia nde ndjoyela wekelo awɔ wa lo nkumbo, kana vɔ tshɔ tosala wekelo ɔsɔ lakande. Mama kɛmɔtshi akatshu l’an’ande ahende w’akɛnda otsha laka kadiyɛso kɛmɔtshi kaya osombe dia tosala wekelo awɔ wa dibuku l’ekimanyielo ka dibuku diaso diele l’ɔtɛ a dui ɔnɛ Buku di’Ɛkɔndɔ wa lo Bible, ndo vɔ tshɛ wakakeketshama oma lo woho wakawasangana kamɛ. Anto asɔ ngɛnangɛnaka nto vɔ mbaelɛ lo dambo kana lo fɛtɛ kɛmɔtshi. Naka anto wele la dikɔmɔ waya mɛtɛ bu la wolo wa ndja lo leeta layɛ, kete ondo wɛ koka mbatelefɔnɛ kana tshɔ towaenda ndo mbawawadiɛ dui dimɔtshi lo tshena pe, sala la wɔ dɔmbɛlɔ, kana mbakɔndɔlɛ ɔkɔndɔ ɔmɔtshi wakeketsha.—Romo 1:11, 12.
5 Jehowa mbɔsaka esombe wele la kɔlamelo la nɛmɔ di’efula. (Heb. 6:10, 11) Sho kokaka mbôkoya lo mɛnya woho wawaɔsaso la nɛmɔ ndo lo mbakimanyiya dia vɔ tetemala monga l’ekongelo k’ɔlɔlɔ k’akambo wa lo nyuma.