Wembola W’oma Le Ambadi

◼ Etena kakɔna kasungana mbata olui ɔmɔtshi watɛkɛta ɔtɛkɛta w’angɛndangɛnda?

Naka l’ɛtshi ka nkɛtɛ k’etshumanelo nyaya l’anto efula watɛkɛta ɔtɛkɛta w’angɛndangɛnda, kete dikumanyi pombaka sala kɛnɛ kewɔ l’akoka wa sala dia kongɛ olimu w’esambishelo l’ɔtɛkɛta akɔ. (km 7/02 lɛkɛ 1; km 3/98 3-4) Mbeyaka monga k’anto watɛkɛta ɔtɛkɛta w’angɛndangɛnda pandjɔnɛ lo mbilo ya tshumanelo dihende kana ndekana diosukanyi. Lo dikambo sɔ, omendji w’otshimbedi ayowaɛnya kɛnɛ kahombama salema lo kimanyiya tshumanelo diendana la dikambo sɔ dia mbeya woho wakokadiɔ kamba lonya lo lonya dia sambisha lo mbilo shɔ. Tena la tena, sawo dia lo sɛkɛ kana Wekelo wa Tshoto y’Etangelo mbeyaka nɔngɔswamaka l’olui ɔsɔ watɛkɛta ɔtɛkɛta w’angɛndangɛnda dia menda anto angana wayonga lo wekelo ɔsɔ.

Olui w’ɔtɛkɛta w’angɛndangɛnda koka mbatema naka akambo wayela anɛ wambokotshama: (1) Naka apandjudi kana anto wayasha l’akambo wa mɛtɛ woka lokumu l’ɔlɔlɔ dimɛna efula l’ɔtɛkɛta w’angɛndangɛnda wekɔ. (2) Naka ekumanyi kele l’akoka kana okambi w’olimu ekɔ dia nɔmbɔlaka olui ɔsɔ ndo nɔmbɔlaka kânga losanganya ɔtɔi lo lomingu tshɛ. (3) Naka olui wa dikumanyi wayetawɔ dia sukɛ olui ɔsɔ. Naka akambo asɔ wambokotshama, kete dikumanyi pombaka mbewoya biro ka filialɛ di’olui ɔsɔ mbeyama ndo dia filialɛ mbasha alako akina wahombama.

Elui efula tatɛka la sala Wekelo wa Dibuku wa l’Etshumanelo lomingu tshɛ. L’ɔkɔngɔ diko, dikumanyi mbeyaka ndjetawɔ dia mbahɛ nsanganya nkina, oko Losanganya la lo Sɛkɛ ndo Wekelo wa Tshoto y’Etangelo. Sawo No. 2, 3 ndo No. 4 dia lo Kalasa k’Olimu wa Teokrasi mbeyaka mbishama lo kalasa kekina naka ekumanyi kana okambi w’olimu wele l’akoka wa tɛkɛta l’ɔtɛkɛta ɔsɔ koka kamba oko ondaki. Koko olui ɔsɔ pombaka ndjela sawo dia wetshelo, Awui w’ohomba wa lo Bible, ndo Losanganya l’Olimu kamɛ l’etshumanelo. Nsanganya y’otsha l’esambishelo mbeyaka nɔngɔswama dikambo di’olui ɔsɔ.

Anto tshɛ wa l’olui wayokamba kâmɛ lo ndjela ɛlɔmbwɛlɔ k’olui wa dikumanyi. Dikumanyi pombaka mbisha ɛlɔmbwɛlɔ kahombama ndo sala tshɛ dia kotsha ehomba w’anto wa l’olui ɔsɔ. Etena kembolande etshumanelo kasukɛ olui ɔsɔ, omendji w’otshimbedi ayɔlɔngɔsɔla dia sambisha kâmɛ l’anto wa l’olui ɔsɔ dia mbakeketsha lo nyuma. Oma l’ɛtshɔkɔ wa Jehowa, olui w’ɔtɛkɛta w’angɛndangɛnda mbeyaka ndjokoma etshumanelo l’edjedja ka wonya.