Woho wakokaso nsambisha angɛndangɛnda dimɛna
1. Naa diaaso diele la so etena kasambishaso lo bɛtshi diaso dia nkɛtɛ?
1 Yeso Kristo akatatshi dia lokumu l’ɔlɔlɔ la Diolelo layosambishama lo nkɛtɛ k’otondo “uku omenyi le wedja tshe.” Wanɛ tshɛ wasambisha ndo wakamba olimu wa mbetɛ anto ambeki shihodiaka ohomba wele l’ɛtɛkɛta waki Yeso ɛsɔ. (Mat. 24:14; 28:19, 20) Etena kasambishaso ndo ketɛso anto ambeki, sho mbeyaka mpomana l’anto w’oma lo wedja wotshikitanyi watɛkɛta ɔtɛkɛta wele kema waso. Anto asɔ vɔ lawɔ sunganaka nkondja diaaso dia mboka losango la Diolelo ndo nshikimala lo akambo wa mɛtɛ la ntondo ka lushi la wɔma la Jehowa ndja. (Mal. 3:18) Ngande wakokaso nsambisha angɛndangɛnda wele lo ɛtshi kaso ka nkɛtɛ?
2. Lo yoho yakɔna yakokaso mbokoya Jehowa etena kasawolaso l’anto watɛkɛta ɔtɛkɛta okina?
2 Tɔshi wanɛ watɛkɛta ɔtɛkɛta okina woho wawaɔsa Jehowa: Dia sho nkɛnɛmɔla ngandji ka Jehowa otsha le onto tshɛ lele lo ɛtshi kaso ka nkɛtɛ aha la shɔnɔdi, sho pombaka monga la nsaki k’efula ka nkimanyiya anto dia vɔ nkondja ewo k’oshika ka Nzambi ka mɛtɛ Jehowa, oyadi ɔtɛkɛta akɔna watɛkɛtawɔ. (Osam. 83:18; Etsha 10:34, 35) Kânga mbele sho mbesaka dia nsambisha ntondotondo wanɛ watɛkɛta ɔtɛkɛta wasalema nsanganya lo etshumanelo kaso, sho pombaka mbidja yimba ndo l’ehomba wa wanɛ watɛkɛta ɔtɛkɛta okina ndo nyanga toho ta mbaewoya losango la Diolelo diaki Nzambi. Minya wanɛ watɛkɛta ɔtɛkɛta okina yimba hatɔtɔnɛ la sangwelo diaki Jehowa dia nsambisha anto wa lo wedja tshɛ. Lâsɔ, ngande wakokaso nkimanyiya wanɛ wahatɛkɛta ɔtɛkɛta aso?
3. Naa ehomɔ k’ohomba kele la so, ndo ngande wakokaso ndjalɔngɔsɔla dia nkamba la tɔ?
3 Tokambe la biukubuku Une bonne nouvelle pour des gens de toutes nations: Biukubuku shɔ yakatondjama l’oyango wa sho nkambaka la yɔ etena kahomanaso l’anto watɛkɛta ɔtɛkɛta wotshikitanyi la waso. Toyalake la biukubuku shɔ tena tshɛ, toyaekesanyiyake la awui wele lɔkɔ ndo toyâlɔngɔsɔlake la ntondo dia tokamba la yɔ. Dia mbisholaka ɔtɛkɛta wayangaso esadi esadi, todje tolembetelo lo ɛtɛkɛta ekina watɛkɛta anto wa lo ɛtshi kaso ka nkɛtɛ. Naka nyekɔ l’ekanda l’ɛtɛkɛta akɔ, kete mbeyaka monga ohomba dia nyu mbɔsa ekanda kɛmɔtshi k’ɔlɔlɔ ka nyu tosha anto l’ɔkɔngɔ wa nyu mbaɛnya losango lele lɔkɔ.
4. Ngande wakokaso nkamba la biukubuku yele l’ɔtɛ a dui ɔnɛ Une bonne nouvelle l’esambishelo?
4 Naka wɛ ambohomana l’onto ɔmɔtshi latɛkɛta ɔtɛkɛta okina l’olimu w’esambishelo ko wɛ heye ɔtɛkɛta akɔ, kete ɛnyande lohoso la biukubuku nyɛ. Oma lâsɔ, folɛnde kartɛ k’andja w’otondo kele lo lohoso la l’etei, ɛnyande wodja wodjashiyɛ ndo ɛnyande dia wɛ nangaka mbeya wodja woyende ndo ɔtɛkɛta watɛkɛtande. L’ɔkɔngɔ wa wɛ mbeya ɔtɛkɛta watɛkɛtande, enda ɛtɛ w’awui wele lo biukubuku yakɔ dia wɛ mbeya lɛkɛ latanema ɔtɛkɛta ande, kotola yambalo y’ompokami ayɛ lo etelo kofundami l’alɛta w’edima kele la diko dia dikatshi ndo oma lâsɔ ɛnyande dia wɛ nangaka nde mbadia losango lele lɔkɔ. Naka nde ambomana la mbadia, ko wɛ mbosha traktɛ kele l’ɔtɛkɛta ande kana wɛ mbɛ̂nya etelo kofundami l’alɛta w’edima wɛnya dia wɛ nangaka nkalola dia mbêla ekanda wa l’ɔtɛkɛta ande hita. Oma lâsɔ, ɛnyande etelo kofundami ɔnɛ “lokombo lami” l’alɛta w’edima ndo tɛnde lokombo layɛ lo yoho yokɛma hwe. Ɛnyande ɛtɛkɛta wofundami ɔnɛ “lokombo layɛ” l’alɛta w’edima ndo konga dia nde kotɛlɔ. Nyôkane lushi layoyokalola dia wɛ tosala wendelo w’oyoyo.
5. Kakɔna kahombaso nsala l’ɔkɔngɔ diko dia sho nkimanyiya wanɛ watɛkɛta ɔtɛkɛta okina wɛnya nsaki?
5 Tokalole dia tenda onto lakɛnya nsaki: Sho pombaka mbidja welo dia tenda wanɛ wakɛnya nsaki lo losango la Diolelo, oyadi ɔtɛkɛta akɔna watɛkɛtawɔ. Naka tambɛna dia onto ɔmɔtshi ekɔ lo ndjasha le Nzambi ndo lo Ɔtɛkɛta ande, Bible, kete sho pombaka ndodja fɔrmilɛrɛ Personne qui demande à être visitée (S-43) aha la ntshimbatshimba ko sho ndjosha sekeletɛlɛ ka l’etshumanelo dia nde ntomɛ Bɛtɛlɛ woho wa vɔ ntoma opandjudi watɛkɛta ɔtɛkɛta akɔ dia nde towembola. Oma lâsɔ, Bɛtɛlɛ ayotomɛ olui wasala nsanganya l’ɔtɛkɛta akɔ fɔrmilɛrɛ kakɔ. L’ɔkɔngɔ wa vɔ kilongola, vɔ wayotoma opandjudi ɔmɔtshi dia tembola onto akɔ aha la ntshimbatshimba. Sekeletɛlɛ mbeyaka mbisha omendji w’olimu kɔpi kɛmɔtshi ka fɔrmilɛrɛ kakɔ dia nde lawɔ mbeya dia onto kapanda latɛkɛta ɔtɛkɛta okina ekɔ lo mɛnya nsaki. Kanyokambake la fɔrmilɛrɛ kɛnɛ paka naka onto ambɛnya nsaki l’otema ɔtɔi.
6. Naka tambohomana l’onto lɛnya nsaki latɛkɛta ɔtɛkɛta okina, ɔkɛndɛ akɔna wele la so?
6 Nshi mɔtshi mbeyaka mbeta lam’asa etena kakimɔma fɔrmilɛrɛ ka S-43 la etena katomawɔ opandjudi leya ɔtɛkɛta w’onto lakɛnya nsaki dia nde towembola. Ɔnkɔnɛ, dia nde nkimanyiya onto lakɛnya nsaki, opandjudi wakakimɔ fɔrmilɛrɛ ka S-43 pombaka nsala la wolo dia ntetemala nomialomia nsaki k’onto akɔ edja ndo lam’ayotomama opandjudi weya ɔtɛkɛta ande dia towembola. Mbala mɔtshi, nde mbeyaka nɔmbɔla wekelo wa Bible kâmɛ la onto lakɛnya nsaki. Ko l’etena kâkandakonge onto layotomama ɔsɔ, ngande wayokoka opandjudi akɔ nkondja ekanda wa l’ɔtɛkɛta w’onto lakɛnya nsaki?
7. Yɛdikɔ yakɔna yatokimanyiya dia nkondja ekanda wa l’ɔtɛkɛta wa wanɛ wakoka mpomana la so l’esambishelo?
7 Ekanda wa l’ɛtɛkɛta ekina: Tshumanelo hadiohombe monga la ekanda efula wa l’ɛtɛkɛta ekina lo lɔkɔtɔ lawɔ. Koko naka omendji w’olimu amboshikikɛ dia anto efula watɛkɛta ɔtɛkɛta okina wekɔ lo mɛnya nsaki lo akambo wa mɛtɛ, kete nde mbeyaka mɛna ɔlɔlɔ dia momba ekanda kɛmɔtshi k’ekanda wa l’ɔtɛkɛta akɔ dia apandjudi ndjokambaka la wɔ. Ko naka ekanda ɛsɔ bu lo lɔkɔtɔ l’etshumanelo, kete nde mbeyaka nsala kɔmandɛ. Nshi mɔtshi mbeyaka mbeta la ntondo k’ekanda walɔmbaso l’ɔtɛkɛta okina ndjoya. Ɔnkɔnɛ, nyu kokaka ndjakimanyiya lo mbɔsa awui wele lo ekanda akɔ oma lo adrɛsɛ aso wa l’Ɛtɛrnɛtɛ ɔnɛ: www.watchtower.org. Opandjudi kana onto lakɛnya nsaki kokaka mbɔsa abuku wakatondjama lo nkama y’ɛtɛkɛta aha l’okakatanu lo adrɛsɛ ɔsɔ. Aha la tâmu, yɛdikɔ shɔ yayotokimanyiya dia sho nomialomia nsaki kakɛnya onto latɛkɛta ɔtɛkɛta okina.
8. Ɔkɛndɛ akɔna wele la etshumanelo lo kɛnɛ kendana la nomialomia nsaki ka wanɛ watɛkɛta ɔtɛkɛta okina wakɛnya nsaki?
8 Ɔkɛndɛ wele la etshumanelo: Tena dimɔtshi mbeyaka monga ko ndoko etshumanelo kasala nsanganya l’ɔtɛkɛta okina watɛkɛta anto efula woye oma lo wodja okina kele suke la wɔ. L’etena kɛsɔ, nyu pombaka mbelɛ wanɛ wakɛnya nsaki watɛkɛta ɔtɛkɛta okina lo nsanganya. Woho wayonyâlongola ndo wayonyoyasha le wɔ l’otema ɔtɔi ayowakeketsha dia vɔ ndjaka lo nsanganya mbala la mbala. L’etatelo, mbeyaka monga ko ɔtɛkɛta ndo mbekelo yawɔ mbadjɛka wekamu dia vɔ ndjasha le nyu, koko ndoko wekamu wakoka nshimba Ɛmɛnyi wa Jehowa wa lo nkumbo k’anto l’ɔnango ka l’andja w’otondo dia vɔ mbokana ngandji ka mɛtɛ k’Okristo. (Zef. 3:9; Joa. 13:35) Onde wɛ tɛkɛtaka ɔtɛkɛta okina dimɛna? Naka ngasɔ mbediɔ ndo wɛ nangaka ntshɔ dia tembolaka wanɛ wakɛnya nsaki, kete tambokɔsɛngasɛnga dia wɛ mbewoya sekeletɛlɛ ka l’etshumanelo kayɛ dia nde mbewoya Bɛtɛlɛ. Dui sɔ diayokimanyiya Bɛtɛlɛ dia mbeya opandjudi wakokawɔ ntoma dia tolomialomia nsaki.
9. Etena kakɔna kakoka apandjudi nongola lotshungɔ la ndihola kalasa yetshawɔ anto ɔtɛkɛta, ndo ngande wakoka dikambo sɔ nsalema?
9 Wekelo w’ɔtɛkɛta: Etena kakimanyiyayɛ wanɛ watɛkɛta ɔtɛkɛta okina, ayoleka ɔlɔlɔ dia wɛ mbakeketsha dia vɔ ntatɛ mbɔtɔ l’etshumanelo kasala nsanganya l’ɔtɛkɛta awɔ naka vɔ kokaka nsala dikambo sɔ. Koko naka vɔ hawokoke nsala dikambo sɔ, kete apandjudi amɔtshi mbeyaka mbɔsa yɛdikɔ ya mbeka ɔtɛkɛta akɔ dia vɔ monga la akoka wa ndeka nkimanyiya wanɛ wɛnya nsaki. Naka ndoko etshumanelo kɛmɔtshi kele suke, kete Bɛtɛlɛ mbeyaka mbɔsa yɛdikɔ ya ndihola kalasa ya mbetsha anto ɔtɛkɛta okina naka wanɛ watɛkɛta ɔtɛkɛta akɔ wekɔ efula. Naka ngasɔ mbediɔ, kete Bɛtɛlɛ mbeyaka mbewoya tshumanelo diele suke lo kɛnɛ kendana la ohomba ɔsɔ ndo nsala dia diewoyelo diendana la odihwelo wa kalasa yetshawɔ anto ɔtɛkɛta mbishama lo tshumanelo diakɔ. Wanɛ wayofundja nkombo yawɔ lo kalasa yakɔ pombaka ndjadjɛ oyango wa ndjotshɔ otsha lo olui kana etshumanelo kasala nsanganya l’ɔtɛkɛta akɔ dia towakimanyiya.
10. Etena kakɔna kakoka olui wasala nsanganya l’ɔtɛkɛta okina mbatema, ndo ngande washikikɛma dikambo sɔ?
10 Woho wa mbata olui: Dia nongola dikimɔ dia mbata olui ɔmɔtshi wasala nsanganya l’ɔtɛkɛta okina, akambo anɛi anɛ pombaka nkotshama: 1) Pombaka monga anto efula wɛnya nsaki watɛkɛta ɔtɛkɛta akɔ. 2) Djui mɔtshi y’apandjudi pombaka mbeya ɔtɛkɛta akɔ kana monga suke dia mbêka. 3) Ekumanyi ka manamana kana okambi wakimanyiya ɔmɔtshi pombaka monga suke dia nɔmbɔlaka kânga losanganya ɔtɔi lo lomingu l’ɔtɛkɛta akɔ. 4) Olui wa dikumanyi ɔmɔtshi pombaka monga la nsaki ka nkimanyiya olui ɔsɔ. Naka akambo walɔmbama asɔ wambokotshama lo yɛdikɔ yakoka, kete olui wa dikumanyi wayofundɛ Bɛtɛlɛ lo kɛnɛ kendana la olui ɔsɔ ndo vɔ wayɔlɔmba dia vɔ ntatɛ mbɔsama oko etshumanelo kasukɛ olui akɔ ɔsɔ. (Enda dibuku Tamboyakongɛ, lɛkɛ 106-107.) Ekumanyi kana okambi wakimanyiya walɔmbɔla nsanganya shɔ ayokoka mbɔsama oma le olui akɔ oko “omendji w’olui” kana “okambi w’olui” wele l’ɔkɛndɛ wa kimanyiyaka olui ɔsɔ.
11. Lande na kele ekɔ tshondo ya diɛsɛ dia nsambisha angɛndangɛnda wele lo ɛtshi kaso ka nkɛtɛ?
11 Nsambisha angɛndangɛnda wele lo etshi kaso ka nkɛtɛ ekɔ etenyi kɛmɔtshi k’ohomba k’olimu w’esambishelo wakambema l’andja w’otondo wakatatɛ nkamba Yeso Kristo, ɔnɛ lele Ɛnyɛlɔ kaso. Nyɛsɔ tosale kɛnɛ tshɛ kakokaso nsala l’ohetoheto ndo tende woho watetemala Jehowa nsutshasutsha wedja dia mbɔtshiya diangɔ dia nɛmɔ lo tɛmpɛlɔ kande. (Hang. 2:7) Ande diɛsɛ diele la so dia nkamba olimu ɔsɔ dihɛka lo dihɛka ndo dimɛna dimɛna lee! Tambokombola dia Jehowa ntshɔkɔla welo wadjaso dia nsambisha angɛndangɛnda wele lo ɛtshi kaso ka nkɛtɛ oko wohɔso nshi tshɛ dia ndoko wekamu wendana l’ɔtɛkɛta wakoka anto todjɛ nɛ dia Nzambi mbatondja lɔtɔngɔ!—1 Kor. 3:6-9.