Esambishelo l’Andja Wahakɔhɛ Awui Tshikitana

¹ Akambo kokaka mɛtɛ tshikitana esadi eto! Mpokoso k’oma lo diangɔ diakatongama, ekakatanu wa weke wendana l’awui wa falanga, esukusuku w’awui wa pɔlitikɛ kana dui dimɔtshi dia kandji koka tomba la shashimoya ko diɔ koma sawo l’enyɔ w’anto tshɛ. Koko esadi eto, anto mbeyaka minya yimba oma lo dikambo sɔ ko mengesola yimba l’awui akina. (Etsha 17:21; 1 Kor. 7:31) L’andja ɔnɛ wahakɔhɛ awui tshikitana, ngande wakokaso kotola yambalo y’anto woho wa mbaewoya losango la Diolelo na?

² Tɔsɛdingole Awui Wayakiyanya Anto Akina: Yoho mɔtshi ya kotola yambalo y’anto ele tɛkɛta awui amɔtshi weta nshi nyɛ. Lo keketsha ampokami ande dia kana yimba dimɛna lo diɔtɔnganelo diele lam’asawɔ la Nzambi, lo diaaso dimɔtshi Yeso akatɛkɛta dikambo dia mpokoso mɔtshi yaki yêke ka tomba yaki lo timba tawɔ. (Luka 13:​1-5) Lo woho akɔ wâmɛ, lam’ewoyaso anto lokumu l’ɔlɔlɔ, ekɔ dimɛna sho mboliɔtɔnganyiya la nsango mɔtshi yeke katɛkɛtama lo tita sango kana liɔtɔnganyiya la dui dimɔtshi diêke ka tomba diele la shɛngiya lo sɛnɔ y’anto wa lo mbilo kaso. Koko, sho pombaka monga la yewo etena kasawolaso l’anto awui asɔ, di’aha sho ndjosukɛ awui wa pɔlitikɛ kana olui ɔmɔtshi w’anto oma lo kɛnɛ kataso.​—⁠Joa. 17:⁠16.

³ Ngande wakokaso mbeya kɛnɛ kakanyiya anto nshi nyɛ? Yoho yoleki dimɛna ele ondo mbaoka wombola ɔmɔtshi ko l’ɔkɔngɔ mbahokamɛ. (Mat. 12:34) Woho wayashaso le anto ayototshutshuya dia mbidja yimba lo tokanyi tayakiyanyawɔ ndo mbaoka wembola ekina la yewo y’efula. Dui dia ntondo diayokotɛ ompokami ayɛ mbeyaka kɛnya dui dimɔtshi diayakiyanya anto efula wa lo dihole sɔ ndo diɔ koka kosha diaaso dia sambisha.

⁴ Woho wa Nɔngɔsɔla Mbɔtwɛlɔ ka Sawo: Lam’ayalɔngɔsɔlaso dia tomba l’esambishelo l’andja ɔnɛ wahakɔhɛ awui tshikitana, sho koka kamba la biukubuku Woho wa Tatɛ ndo Tetemala . . . Alako w’amɛna wendana la woho wakokaso mbidja awui wa nshi nyɛ lo mbɔtwɛlɔ yaso tanemaka lo lɛkɛ 2-4 l’ɔtɛ a dui wata ɔnɛ “Akambo Weta l’Andja” ndo “Kɔlɔ/Okokelo.” Alako wa woho akɔ wâmɛ kokaka tanema l’Olimu Aso wa Diolelo, wa Ngɔndɔ ka Divwa 2000 lɛkɛ 8. Etena kalɔngɔsɔlayɛ mbɔtwɛlɔ kayɛ ka sawo, yashikikɛ dia mbidja divɛsa diasungana.

⁵ Naka sho mbidja yimba l’awui waleka kiyanya anto wa lo mbilo kaso, kete tayohomba mbɔtɔnganyiya mbɔtwɛlɔ kaso ka lokumu l’ɔlɔlɔ l’awui asɔ. Lo sala ngasɔ, mbayotosawola l’anto kɛnɛ kele mɛtɛ l’etema awɔ. Ɔnkɔnɛ, sho kimanyiyaka anto efula dia mbeya Ɔnɛ lele waonga ande ndo ɛlɛmbɛ ande hatshikitana.​—⁠Jak. 1:⁠17.