Teyanya Lokombo la Nzambi
1. Mbeya lokombo laki Nzambi kokaka monga l’etombelo akɔna le anto?
1 Ngande wakayaoke etena ka ntondo kakayeye lokombo la Nzambi? Anto efula ndjaokaka oko woho wakayaoke womoto ɔmɔtshi lakate ate: “Mbala ka ntondo kakamɛnyi lokombo la Nzambi lo Bible, dimi lakalele. Dimi lakakeketshama efula lo woho ɔnɛ wakameye dia dimi mɛtɛ kokaka mbeya ndo kamba la lokombo laki Nzambi hita.” Le nde, mbeya lokombo la Nzambi aki naa di’ohomba lo kɛnɛ kendana la mbeya Jehowa oko onto ndo monga l’akoka wa ndjala la diɔtɔnganelo la nde.
2. Lande na kele ekɔ ohomba efula le so dia mbetsha anto akina awui wendana la Jehowa?
2 Lande Na Kahombaso Lieyanya? Lokombo la Nzambi kakatana la waonga ande, asangwelo ande ndo etsha ande. Lɔ kakatana nto la panda. Ɔpɔstɔlɔ Paulo akafunde ate: “Untu tshe latetaka lukumbu la [Nzambi], ayushimbamela.” Koko Paulo akɛnya ate “ukundi ayuweya mbeta one lahawatetawo,” naka haweki ntondo akambo wendana la Jehowa ndo monga la mbetawɔ le nde na? Ɔnkɔnɛ, ekɔ ohomba efula le Akristo dia mbeyanya lokombo la Nzambi le anto akina ndo kɛnɛ tshɛ kalembetshiyalɔ. (Romo 10:13, 14) Lo wedi okina, tekɔ l’ɔkɔkɔ ɔmɔtshi w’ohomba efula wahombaso mbeyanya lokombo la Nzambi.
3. Ɔkɔkɔ akɔna woleki woke watotshutshuya dia sambisha?
3 L’ɛnɔnyi wa 1920, ekambi wa Nzambi wakasɛdingola oma l’Afundelo dikambo dimɔtshi diendana l’anto tshɛ, mbut’ate oyindjamelo wa lowandji laki Nzambi la okidiamelo wa lokombo lande. La ntondo ka Jehowa nanya anto wa kɔlɔ dia minya sɔnyi kamboshama lokombo lande, akambo wa mɛtɛ wendana la nde pombaka ‘mbeyama lo nkɛtɛ k’otondo.’ (Is. 12:4, 5; Ezek. 38:23) Oma lɔkɔ, ɔkɔkɔ woleki woke wasambishaso ele dia tombola Jehowa lo sɛkɛ ndo dia kidia lokombo lande la ntondo k’anto tshɛ. (Heb. 13:15) Ngandji kokaso Nzambi ndo osekaso onto totshutshuyaka dia nyomoleka ndjasha efula l’olimu wakatosha Nzambi.
4. Woho akɔna wakayeyamaka Ɛmɛnyi wa Jehowa oma lo lokombo laki Nzambi?
4 ‘Anto Wakasɔnama Dikambo dia Lokombo Lande’: L’ɔnɔnyi 1931 takɔshi lokombo l’Ɛmɛnyi wa Jehowa. (Is. 43:10) Tatɛ oma l’etena kɛsɔ, ekambi wa Nzambi wekɔ lo mbeyanya lokombo lande polo lo yoho nyɛ yele dibuku Prédicateurs, lɛkɛ 124, mbutaka ɔnɛ: “Lo wedja efula, onto tshɛ lakamba la lokombo Jehowa mbɔsamaka esadi eto oko Ɔmɛnyi wa Jehowa.” Onde wɛ mbeyamaka oko Ɔmɛnyi wa Jehowa? Lowando lele laso l’ɔlɔlɔ wa Jehowa totshutshuyaka dia ‘tombola lokombo lande’ ndo tɛkɛta awui wendana la nde l’oseka diaaso tshɛ diakondjaso.—Esam. 20:7; 145:1, 2, 7.
5. Ngande wendana lɔkɛwɔ laso la lokombo la Nzambi lɔlɔtshiso?
5 Oko weso ‘anto wakasɔnama dikambo dia lokombo lande,’ sho pombaka sukɛ ɛlɛmbɛ ande. (Etsha 15:14; 2 Tim. 2:19) Mbala efula Ɛmɛnyi wa Jehowa mbeyamaka oma lo lɔkɛwɔ lawɔ l’ɔlɔlɔ. (1 Pet. 2:12) Sho hatolange pondjo tɛngamisha lokombo lande lo mɔnyɔla ɛlɛmbɛ ande kana lo mbetsha ɔtɛmwɔlɔ ande lo dihole dia hende lo nsɛnɔ yaso. (Lew. 22:31, 32; Mal. 1:6-8, 12-14) Ɔnkɔnɛ, nyɛsɔ tɛnya oma lo yoho yaso ya lɔsɛnɔ dia sho ngɛnangɛnaka diɛsɛ nɛ diele laso dia ndɔta lokombo la Nzambi.
6. Diɛsɛ diakɔna diakokaso monga la diɔ kakianɛ ndo pondjo pondjo?
6 Ɛlɔ kɛnɛ, tekɔ lo mɛna woho wakotshama ɛtɛkɛta waki Jehowa ɛnɛ: “Uma l’ehutwelu ka unya pulu ndu l’edjelu kawo, lukumbu lami layuyala wuki l’atei a wedja.” (Mal. 1:11) Nyɛsɔ totetemale mbeyanya akambo wa mɛtɛ wendana la Jehowa ndo ‘totombole lokombo lande l’ekila pondjo pondjo.’—Osam. 145:21.