Ɛlɔngɔlɔngɔ—Nyoyâlɔngɔsɔlɛ Dimɛna Nshi Yanyu Yayaye
1. Lande na kahomba ɛlɔngɔlɔngɔ w’Akristo monga la mbetawɔ ka wolo?
1 Dui diakɔna dioleki ohomba lo yimba yayɛ? Akanyiyayɛ lo kɛnɛ kendana la dui sɔ? Onde wɛ ndjâkiyanyaka ntondotondo l’awui wa nshi nyɛ kana l’awui wa lo nshi yayaye ndo wɛ mbikaka yimba yayɛ tshɛ lo kɛnɛ kakalake Nzambi? (Mat. 6:24, 31-33; Luka 8:14) Mbetawɔ ka wolo kekɔ ohomba dia sala akambo lo yoho yɔtɔnɛ l’alaka waki Nzambi, oko wadiɛnya ɛnyɛlɔ k’Abarahama la kaki Mɔsɛ. (Heb. 11:8-10, 24-26) Ngande wakokɛ monga la mbetawɔ ka ngasɔ ndo ndjâlɔngɔsɔlɛ ‘nshi yayaye y’ɔlɔlɔ’?—1 Tim. 6:19.
2. Wetshelo akɔna wakondjaso oma l’ɛnyɛlɔ kaki Nkumekanga Josiya?
2 Nyoyange Jehowa: Naka wɛ ekɔ l’ekongelo k’akambo wa lo nyuma kâmɛ la nkumbo kayɛ, kete tekɔ lo kândola. Koko tokanyiyake ɔnɛ weho akɔ tshɛ ekongelo kɛsɔ ayonyosha mbetawɔ ka wolo. Dia kondja ‘ewo k’oshika ka Nzambi,’ wɛ pombaka nyanga Jehowa wɛmɛmɛ. (Tuk. 2:3-5; 1 Ek. 28:9) Kɛsɔ mbakasale Josiya, Nkumekanga ka dikɛnda. Kânga mbakandole lo nkumbo kaki komonga la lonyuma l’ɔlɔlɔ, “ndi akatatela nyanga [Nzambi k]a tshendi Davidi,” lam’akinde l’ɛnɔnyi 15.—2 Ek. 34:3.
3. Ngande wakoka ɛlɔngɔlɔngɔ w’Akristo nyanga Jehowa ɛlɔ kɛnɛ?
3 Ngande wakokanyu nyanga Jehowa? Ele lo sɛndingola la yambalo tshɛ awui wetawɔnyu ndo ‘nyu ndjashikikɛ nyamɛ’ di’awui akɔ wekɔ mɛtɛ akambo wa mɛtɛ. (Romo 12:2) Oko ɛnyɛlɔ, onde nyu koka nembetshiya kɛnɛ kata Bible lo dikambo dia dikila kana mɛnya dia Diolelo diaki Nzambi diakatatɛ mbolɛ l’olongo l’ɔnɔnyi 1914? Kondja “ewu ka mete” ekɔ ohomba dia ndjalɔngɔsɔlɛ dimɛna nshi yayaye.—1 Tim. 2:3, 4.
4. Ngande wakoka apandjudi wahatabatizama mɛnya ohamelo awɔ lo sɛkɛ?
4 Woho wakayange Josiya Jehowa akonge l’etombelo w’ɛlɔlɔ. La ntondo ka nde kotsha ɛnɔnyi 20, la dihonga tshɛ nde akanya ɛtɛmwɛlɔ wa kashi oma lo wodja. (2 Ek. 34:3-7) Woho akɔ wâmɛ mbele ohamelo anyu wa lo nyuma wayɛnama oma lo ditshelo dianyu. (1 Tim. 4:15) Naka nyekɔ apandjudi wahatabatizama, kete nyosale la wolo dia ndowanya esambishelo kanyu. Tanyokomɛke tsho paka lo kahanyaka ekanda eto ko pe. Nyoyadje oyango wa kambaka la Bible, wa kanaka l’anto yimba, ndo wa mbesa wahɔ tshɛ wakɛnya anto. (Romo 12:7) Kɛsɔ mbayonyokimanyiya dia pama lo nyuma.
5. Waaso akɔna wele l’Akristo wambobatizama dia pamia olimu awɔ?
5 Nyosha Jehowa Kɛnɛ Koleki Dimɛna: Lam’ayakimɔnyu le Jehowa lo nongola batismu, nyu komaka ekambi ande wambolowɔma. (2 Kor. 3:5, 6) Dui sɔ nyoshaka waaso akina efula wa kambɛ Jehowa olimu wa lo tena tshɛ. Ɛnyɛlɔ olimu w’ombatshi mboka, wa lo Bɛtɛlɛ, wa misiɔnɛrɛ kana koma ekambi wa lo wedja efula. Toho tokina nto takokanyu pamia olimu anyu ele lo mbeka ɔtɛkɛta okina kana ntshɔ dia tokamba lɛnɛ ele ohomba efula.
6. Ngande wakokaso sho tshɛ ndjalɔngɔsɔlɛ dimɛna nshi yaso yayaye?
6 Oma lɔkɔ, aha anto tshɛ mbakoka monga la waɛsɛ w’olimu asɔ, koko sho tshɛ koka mbisha Jehowa kɛnɛ koleki dimɛna le so. (Mat. 22:37) Oyadi awui akɔna wele lanyu, nyoyasha tshɛ l’olimu waki Jehowa lo lɔsɛnɔ la nyu. (Osam. 16:5) Lo ntsha ngasɔ, wɛ ɛkɔ lo ndjatshumanyɛ okundji w’ɔlɔlɔ ndo wa shikaa lo nshi yayɛ yayaye.