Nsanganya ya Distrikɛ ndo ya Wedja Efula Totshutshuyaka dia Mbisha Nzambi Lotombo!
Nsanganya ya Distrikɛ la ya Wedja efula yele l’ɔtɛ a dui ɔnɛ: “Tosha Nzambi Lotombo” yasalema mbishaka esambishelo ka mamba. Akambo asɔ w’ohomba wa teokrasi tokimanyiyaka dia tombola lokombo la Jehowa ndo pamia akoka aso wa ‘mbisha Jehowa lotombo lɛdimi la lokombo lande.’ (Osam. 96:8) Lo mɛtɛ, nde kokaka tombwama l’ɔtɛ w’elimu ande w’etongelo wa diambo wakɛnɛmɔla waonga ande wa mamba.—Jobo 37:14; Eny. 4:11.
Lo kamba la wembola wayela ɛnɛ kâmɛ la nɔtɛ yanyu, nyoyalɔngɔsɔlɛ dia ndjokadimola l’ovuswelo wayosalema lo lomingu la Ngɔndɔ ka Dikumi 20, wendana l’awui wakatɛkɛtama lo losanganya la distrikɛ.
1. Ditongami diele kema la lɔsɛnɔ ngande watombolawɔ Nzambi, ndo ngande wotshikitanyiwɔ la woho wawotombola anto? (Osam. 19:1-3; “Etongelo Mbewoyaka Lotombo Laki Nzambi”)
2. Ohilwelo waki didjidji di’akambo akɔna wa mɛtɛ wɛnaso ɛlɔ kɛnɛ, ndo ngande wakeketshama Akristo wa nshi nyɛ l’akambo wa mɛtɛ asɔ? (Nyango dako: “Waɛnɛlɔ wa Lotombo wa Prɔfɛsiya Tokeketshaka”)
3. Ngande wakokaso monga la yoho ya ndjakitshakitsha yaki l’omvutshi Danyɛlɛ, ndo ɛtshɔkɔ akɔna wayotokondja lo sala ngasɔ? (Dan. 9:2, 5; 10:11, 12; “Jehowa Mɛnyaka Lotombo Lande le Wanɛ Wele la Ndjakitshakitsha”)
4. (a) Naa awui asato wendana l’elombwelo kaki Nzambi wakokaso mbeka oma lo prɔfɛsiya kaki Amɔsɛ? (Am. 1:3, 11, 13; 9:2-4, 8, 14) (b) Wekelo akɔna wa dimɛna wakoka kondja Ɛmɛnyi wa Jehowa ɛlɔ kɛnɛ oma l’ɔhɛmwɛlɔ watanaso l’Amose 2:12? (“Losango Lendana la Nshi Yaso Lele lo Prɔfɛsiya k’Amɔsɛ”)
5. (a) Wâle akɔna watanema oma lo ɔnwɛlɔ wa wanu wa tshambandeko, ongi kânga onto hadjwe? (b) Ngande wakoka onto tshika ɔnwɛlɔ a wanu wa tshambandeko? (Mako 9:43; Ef. 5:18; “Tewɔ Djonga Yendana l’Ɔnwɛlɔ a Wanu wa Tshambandeko”)
6. Ngande wakondjayɛ wahɔ oma lo dibuku di’oyoyo diele l’ɔtɛ a dui ɔnɛ: “Enda Nkɛtɛ y’Ɔlɔlɔ”? lo Falase (“ ‘Nkɛtɛ y’Ɔlɔlɔ’ Mɛnyaka Woho Wayonga Paradiso”)
7. Naa toho tosato takokaso ‘ngamula lotombo laki Jehowa oko talatala’? (2 Kor. 3:18; “ ‘Tongamule Lotombo la Jehowa oko Talatala’ ”)
8. Oma l’ɔkɔkɔ akɔna wahetshamaso ohetshamahetshama, ndo kakɔna kokoki tokimanyiya dia sho nama kɔlamelo yaso kânga mbahetshamaso ngasɔ? (Osam. 109:1-3; “Tekɔ lo Petshama Ohetshamahetshama”
9. Kanyi yakɔna yaki la Kristo lo kɛnɛ kendana la monga onto la woke, ndo ngande wakoka onto shikikɛ ɔnɛ lo dikambo kapanda, nde ekɔ l’ohomba wa kɛnɛmɔla kanyi shɔ lo yɛdikɔ y’efula? (Mat. 20:20-26; “Tonge la Kanyi Yaki la Kristo lo Kɛnɛ Kendana la Monga Onto la Woke”)
10. Kakɔna kakoka tokimanyiya dia sho tshikala nge lo nyuma kânga tambɔlɛmba lo demba? (“Tambɔlɛmba lo Demba Koko Aha lo Nyuma”)
11. Naa atshunda amɔtshi wakamba la Satana dia keketsha awui wa kashi, ndo kakɔna kakokaso sala lo ndjela Afundelo dia kokɛ mbetawɔ kaso? (Joa. 10:5; “ ‘Tonge la Lokaho ndo Suke dia Kahana l’Anto Akina’ ”)
12. (a) Ngande wakoka ambutshi ndjela ɛnyɛlɔ kaki Yeso kofundami lo Mako 10:14, 16? (b) Kakɔna kalangayɛ lo kɛnɛ kendana la dibuku di’oyoyo diele l’ɔtɛ a dui ɔnɛ: Etshama Oma le Ombetsha a Woke? (“Anaso Wekɔ Sango dia Nɛmɔ Efula”)
13. Ngande watombola ɛlɔngɔlɔngɔ l’esekaseka Jehowa? (1 Tim. 4:12; “Woho Watombola Ɛlɔngɔlɔngɔ l’Esekaseka Jehowa”)
14. Awui akɔna wa lo dramɛ diaki l’ɔtɛ a dui ɔnɛ: “Tosambisha la Dihonga Kânga l’Atei w’Ɔlɔshamelo” wahashishɔki oma lo yimba yayɛ?
15. Ngande wakokaso ndjela ɛnyɛlɔ kakatshike: (a) Petero nde la Joani? (Etsha 4:10) (b) Stɛfano? (Etsha 7:2, 52, 53) (c) Akristo wa l’etshumanelo ka lo ntambe ka ntondo? (Etsha 9:31; “Tewoya Lokumu l’Ɔlɔlɔ ‘Aha la Mpekɔ’ ”)
16. (a) Lo toho takɔna tambotoyashikikɛ dia mbisha Nzambi lotombo? (b) Dui diakɔna diakokaso ndjashikikɛ naka sho kamba l’awui wakateke lo Nsanganya ya Weke yaki l’ɔtɛ a dui ɔnɛ: “Tosha Nzambi Lotombo”? (Joa. 15:9, 10, 16; “ ‘Totetemale la Ntɔ Elowa Efula’ dia Lotombo la Jehowa”)
Lo kana yimba la wetshelo wa dimɛna wa lo nyuma wakashama lo losanganya la woke, tayotshutshuyama dia kamba l’awui wakateke. (Fil. 4:8, 9) Dui sɔ diayokeketsha eshikikelo kaso dia ‘ntsha akambo tshɛ dia lotombo laki Nzambi.’—1 Kor. 10:31.