Onde wɛ ayongamula lotombo laki Nzambi?
‘Sho ngamulaka lotombo laki Jehowa oko talatala.’—2 KORETO 3:18.
1. Kakɔna kakɛnyi Mɔsɛ, ndo dui diakɔna diakatombe oma lâsɔ?
ƆSƆ aki ɔtɔi ɔmɔtshi l’atei wa waɛnɛlɔ woleki diambo wele onto atɛnaka. Etena kakinde ndamɛ lo okongo wa Sinai, Mɔsɛ akalɔmbɛ dui dimɔtshi dia lânde, ko wakawoshadiɔ. Nde akakondja diaaso dia mɛna kɛnɛ kahatɛnaka ndoko onto, mbuta ate nde akɛnyi lotombo laki Jehowa. Lo mbuta mɛtɛ, Mɔsɛ komɛna tshondo ya Jehowa nganɛ. Ɛnamelo ka Nzambi kekɔ ngaingai ka mamba woho ɔnɛ wele ndoko onto lakoka mbɛna ko tshikala la lɔsɛnɔ. Koko, Jehowa akahɛ Mɔsɛ ‘diwambo’ diande oko ekombɔ dia mbokokɛ edja ndo etena kakandete, lo kamba aha la tâmu la ondjelo ɔmɔtshi waki onyimpala ande. Oma lâsɔ, Jehowa akasha Mɔsɛ diaaso dia mɛna ngɛdi ka lotombo lande. Ndo nto, Jehowa akatɛkɛtaka la Mɔsɛ mbala tshɛ lo tshimbo ya ondjelo ɔmɔtshi. Bible kɔndɔlaka kɛnɛ kakete oma lâsɔ, ɔnɛ: “Lam’akayahuloka Mose uma l’Ukungu a Sinai . . . elundji kandi kakahete lam’akandasawulaka la [Jehowa].”—Etumbelu 33:18–34:7, 29.
2. Kakɔna kakafunde ɔpɔstɔlɔ Paulo lo kɛnɛ kendana la lotombo langamula Akristo?
2 Ohɔsa dia wɛ aki kâmɛ la Mɔsɛ lo dikona sɔ. Shi wɛ otonga mɛtɛ la ɔngɛnɔngɛnɔ wa mamba dia mɛna ngaingai ka mamba ka Kanga-Wolo-Tshɛ ndo mpokamɛ ɛtɛkɛta ande! Ɔsɔ otonga mɛtɛ diɛsɛ dia woke dia kɛndakɛnda kâmɛ la Mɔsɛ, ompakemi wa sheke ya Ɛlɛmbɛ lo okongo wa Sinai! Ko, onde wɛ mbeyaka dia lo toho tɔmɔtshi Akristo wa mɛtɛ ngamulaka lotombo laki Nzambi lo yoho yoleki kânga woho wakalingamula Mɔsɛ? Kanyi y’ohomba efula shɔ kɛnɛmɔma lo mukanda ɔmɔtshi wakafunde ɔpɔstɔlɔ Paulo. Nde akafunde dia Akristo w’akitami ‘ngamulaka lotombo laki Jehowa oko talatala.’ (2 Koreto 3:7, 8, 18) Lo yoho mɔtshi, Akristo wele la elongamelo ka nsɛna la nkɛtɛ vɔ lawɔ ngamulaka lotombo laki Nzambi.
Woho wangamula Akristo lotombo laki Nzambi
3. Toho takɔna tambotoyeya Jehowa, tele Mɔsɛ komonga la tɔ?
3 Ngande wakokaso ngamula lotombo laki Nzambi? Tatɛnaka Jehowa kana mboka ɛtɛkɛta ande oko Mɔsɛ. Koko, tamboyeya Jehowa lo toho tele Mɔsɛ kokoka mbêya. Yeso akayɛnamaka oko Mɛsiya paka suke la ɛnɔnyi 1500 l’ɔkɔngɔ wa nyɔi ka Mɔsɛ. Koko, Mɔsɛ kokoka mbeya woho wakahombe Ɛlɛmbɛ ndjokotshama le Yeso, lakakimɔ lɔsɛnɔ lande dia tshungola anto oma lo shɔkɔ ya pɛkato la nyɔi. (Romo 5:20, 21; Ngalatiya 3:19) Ndo nto, Mɔsɛ akakoke shihodia dimɛna dia sangwelo diaki Jehowa diendana la Diolelo diaki Mɛsiya ndo Paradiso kayodiela paka yema tshitshɛ. Ɔnkɔnɛ, sho mɛnaka lotombo laki Jehowa la washo aso wa mbetawɔ wohikami lo wetshelo wa Akristo, koko aha la washo aso wa mɛtɛ mɛtɛ. Ndo nto, takoke dui diaki Jehowa, aha oma lo tshimbo ya ondjelo ɔmɔtshi, koko oma lo ekimanyielo ka Bible, djekoleko Evanjiliɔ wakɔndɔla lo yoho ya dimɛna efula wetshelo ndo olimu waki Yeso.
4. a) Ngande wangamula Akristo w’akitami lotombo laki Nzambi? b) Lo toho takɔna takoka ɛkɔkɔ ekina ngamula lotombo laki Nzambi?
4 Akristo hawongamula lotombo laki Nzambi lo tondja esase oma lo dungi diawɔ. Koko lo mbuta mɛtɛ dungi diawɔ ngaimaka etena katɛwɔ anto akina awui wendana la lonto la diambo laki Jehowa ndo asangwelo ande. Lo dikambo dia nshi yaso nyɛ, ɔprɔfɛta Isaya akatatshi dia ekambi waki Nzambi “wayututela wedja dia lutumbu [laki Jehowa].” (Isaya 66:19) Ndo nto, sho mbadiaka lo 2 Koreto 4:1, 2, ɔnɛ: “Okone, dia shu ndjala la ulimu one . . . , shu tambutuna akambu wushami wa sonyi, shu hatutshi lu akambu wa doho, kana hatukesi antu la diui dia [Nzambi], keli tambushula akambu wa mete. Okone tambuyaenyanya le khum’utema k’untu l’untu lu ashu a [Nzambi].” Paulo akatɛkɛtaka lo yoho ya lânde dikambo dia Akristo w’akitami wele “ekambi wa sheki y’uyuyu.” (2 Koreto 3:6) Koko diɛsɛ oma lo olimu awɔ mbele lofulo laheyama mbadia la anto waya la elongamelo ka nsɛna pondjo pondjo la nkɛtɛ. Olimu wa elui ehende w’anto ɛsɔ mendanaka la ngamula lotombo laki Jehowa koko aha tsho oma lo kɛnɛ ketshawɔ koko ndo oma lo etsha awɔ. Tekɔ la ɔkɛndɛ ndo la diɛsɛ dia ngamula lotombo laki Nzambi ɔnɛ Laheme lâdiko dia tshɛ!
5. Ɔngɔnyi aso wa lo nyuma mɛnyaka dui diakɔna?
5 Ɛlɔ kɛnɛ, lokumu l’ɔlɔlɔ la lotombo la Diolelo diaki Nzambi lekɔ lo sambishama lo nkɛtɛ tshɛ oko wakate Yeso. (Mateu 24:14) Anto wa lo wedja tshɛ, waoho tshɛ, weho w’anto ndo wa ɛtɛkɛta tshɛ wambetawɔ lokumu l’ɔlɔlɔ la wangasanu tshɛ ndo wambotshikitanya nsɛnɔ yawɔ dia sala lolango la Nzambi. (Romo 12:2; Enyelo 7:9) Lo ɛnyɛlɔ ka Akristo wa ntondo, vɔ hawokoke tshika mvuta akambo wakawɛnyi ndo wakawoke. (Etsha 4:20) Anto ndekana miliyɔ shamalo wekɔ lo ngamula lotombo laki Nzambi nshi nyɛ lo yoho yahatasalemaka ndoko lushi lo ɔkɔndɔ wa anto. Onde wɛ ekɔ l’atei awɔ? Ɔngɔnyi wa lo nyuma wele la ekambi wa Nzambi mɛnyaka la wolo tshɛ dia Jehowa mbatshɔkɔlaka ndo mbakokɛka. Lo menda welo watɔlɔsha, tekɔ la djembetelo ya shikaa yɛnya dia nyuma ka Jehowa kekɔ lâdiko diaso. Nyɛsɔ tende kakianɛ lande na keso lo mbuta ngasɔ.
Ekambi wa Nzambi hawotɔlɛmbɔhayama
6. Lande na kahombaso monga la mbetawɔ ndo la dihonga dia mbeta lo wedi waki Jehowa?
6 Ohɔsa dia wambokelɛ dia tota kɛnɛ keyayɛ lo dikambo dia ondjakanyi ɔmɔtshi wa ngala efula. Wɛ mbeyaka dia ondjakanyi ɔsɔ ekɔ la okongamelo ɔmɔtshi wa wolo efula ndo nde ayosala tshɛ dia koshimba dia wɛ ndjotondja sɛkɛ. Dia wɛ tota awui weyayɛ lo dikambo diande, wɛ pombaka monga la dihonga ndo ndjashikikɛ dia ewandji wayokokokɛ. Tekɔ la ntondo ka dui dimɔtshi dia woho wâmɛ. Etena kasambishaso dikambo dia Jehowa ndo dia asangwelo ande, sho mɛnyaka dia Satana Diabolo ekɔ ondjakanyi ndo kanga kashi langanyiya nkɛtɛ k’otondo. (Joani 8:44; Enyelo 12:9) Dia mbeta lo wedi waki Jehowa ndo ndɔshana la Diabolo, pombaka wɛ monga la mbetawɔ ndo la dihonga.
7. Ngande wasɛngiya Satana anto, ndo kakɔna kahembande dia sala?
7 Lo mɛtɛ, Jehowa ekɔ Nkumi Kaheme lâdiko dia tshɛ. Wolo ande ndeka waki Satana la fwa. Naka tekɔ lo kambɛ Jehowa la kɔlamelo tshɛ, kete sho koka ndjashikikɛ ɔnɛ nde bu tsho la akoka wa tokokɛ, koko ndo la nsaki k’efula ka tokokɛ. (2 Ekondo 16:9) Koko, Satana ekɔ owandji wa ɛdiɛngɛ ndo wa andja ɔnɛ wanganyi etale la Nzambi. (Mateu 12:24, 26; Joani 14:30) Oko akawawokadja lo emamu wa nkɛtɛ ndo wende la ‘nkɛlɛ k’efula,’ Satana ndɔshanaka la ekambi wa Jehowa la ngala tshɛ ndo kambaka la andja wele lo ɛlɔmbwɛlɔ kande dia pemba dia ndiha enyɔ wa wanɛ tshɛ wasambisha lokumu l’ɔlɔlɔ. (Enyelo 12:7-9, 12, 17) Ngande wasalande dui sɔ na? Nde kambaka la toho tosato.
8, 9. Satana tshutshuyaka anto dia monga angɛnyi wa na ndo lande na kahombaso sɔna la yambalo tshɛ anto wa mbekesanɛ la wɔ?
8 Yoho mɔtshi yahemba andja waki Satana dia tekola yimba ele oma lo ekiyanu wa lo lɔsɛnɔ. Anto wa lo nshi y’ekomelo nyɛ wekɔ anangi wa falanga, ndjalangaka vɔamɛ ndo wekɔ nto anangi wa ɛngɛnɔngɛnɔ. Vɔ kema angɛnyi wa Nzambi. (2 Timote 3:1-4) Anto efula ‘hawoyodja yimba’ lo lokumu l’ɔlɔlɔ lawaɛmbɛso, nɛ dia wamboleka ndjasha lo awui wa lo lɔsɛnɔ la lushi la lushi. Vɔ bu la nsaki ka mbeka akambo wa mɛtɛ wa lo Bible. (Mateu 24:37-39) Anto asɔ koka tosambiyɛ dionga diawɔ sɔ, ko ndjotokonya dia minya yimba lo awui wa lo nyuma. Naka sho tshika dia monga la ngandji ka diangɔ dia l’emunyi ndo ka ɛngɛnɔngɛnɔ wa lo lɔsɛnɔ, kete ngandji kokaso Nzambi kayɔla.—Mateu 24:12.
9 Lo ɔkɔkɔ ɔsɔ mbasɔna Akristo la yambalo tshɛ anto wa mbekesanɛ la wɔ. Sɔlɔmɔna, nkumekanga ka lomba akafunde ate: “One [lakɛndakɛnda] kame la akanga a yimba, atuyalaka kanga yimba. Keli one latekesanelaka la akanga a dinginya, atuhumoka lukulu l’engeno.” (Tukedi 13:20) Nyɛsɔ ‘tɔkɛndakɛndake’ la wanɛ wangamula lotombo laki Nzambi. Sala ngasɔ, ekɔ mɛtɛ dui dia dimɛna efula! Etena katshumanaso kâmɛ la anangɛso ndo la akadiyɛso wa lo nyuma lo nsanganya yaso ndo lo tena dikina, sho keketshamaka la ngandji kawɔ, mbetawɔ kawɔ ndo lomba lawɔ. Lɔngɛnyi la dimɛna la ngasɔ keketshaka yɛdikɔ yakatɔshi ya tetemala lo olimu aso.
10. Lo toho takɔna takamba Satana la lɔsɔkɔ dia ndɔsha wanɛ wangamula lotombo laki Nzambi?
10 Yoho ya hende yahemba Satana dia shimba Akristo diaha vɔ ngamula lotombo laki Nzambi ele lo kamba la lɔsɔkɔ. Yoho shɔ hayohombe tambiya. Etena kakandakambaka olimu ande lanɛ la nkɛtɛ, Yeso Kristo akasɔkama, mbuta ate wakawɔlɛ, wakɔsɔkɛ, wakawɔsɛ oko ɛngɔ k’anyanya ndo wakakome polo ndo lo mbotɛ sɔyi. (Mako 5:40; Luka 16:14; 18:32) Akristo wa ntondo wakɔlama vɔ lawɔ. (Etsha 2:13; 17:32) Ekambi waki Jehowa wa nshi nyɛ pomanaka la awui wa kɔlɔ wa ngasɔ. Ɔpɔstɔlɔ Petero akatatshi dia vɔ wayɔsama oko aprɔfɛta wa kashi. Petero akate ate: “Lu nshi y’ekumelu, asoki wayuya la losoko lawo, wayutshaka uku saki yawo; wayuta vati: Daka dia eyelu kandi, lend’edio? . . . diango tshe dieko pupu uku akidio uma l’etatelu k’etungelu.” (2 Petero 3:3, 4) Ekambi waki Nzambi sɔkamaka ɔnɛ vɔ hawɛnyi akambo la sso di’ɔlɔlɔ. Atɔndɔ wa lo Bible wendana la lɔkɛwɔ mbɔsamaka oko wambeta loowe. Le anto efula, losango lasambishaso lekɔ anyanya. (1 Koreto 1:18, 19) Akristo sɔkamaka la kalasa, lo olimu ndo mbala mɔtshi oma le ase nkumbo yawɔ. Aha la kɔmɔ etema, sho tetemalaka ngamula lotombo laki Nzambi oma lo esambishelo kaso teya oko Yeso ɔnɛ Ɔtɛkɛta wa Nzambi wekɔ mɛtɛ.—Joani 17:17.
11. Ngande wakamba Satana la ɛhɛnyɔhɛnyɔ dia nɛmbɔhaya Akristo?
11 Yoho ya sato yakamba la Diabolo dia tɔlɛmbɔhaya ele lo kamba la ɔlɔshamelo kana ɛhɛnyɔhɛnyɔ. Yeso akatɛ ambeki ande ate: “Vo wayunyukimo lu asui, wayunyudiaka. Nyu nyayuhetshama lu wedja tshe ne dia lukumbu lami.” (Mateu 24:9) Lo mɛtɛ, oko weso Ɛmɛnyi wa Jehowa, sho pomanaka la ɛhɛnyɔhɛnyɔ wa wolo lo ahole efula wa la nkɛtɛ. Sho mbeyaka dia Jehowa akatatshi edja efula la ntondo dia lohetsho layonga lamasa wanɛ wayokambɛ Nzambi la wanɛ wayokambɛ Satana Diabolo. (Etatelu 3:15) Sho mbeyaka nto dia etena kalamaso olowanyi aso lo ehemba, sho mɛnyaka ɔnɛ Jehowa ekɔ la lotshungɔ la mbolɛ nkɛtɛ k’otondo. Kanyi shɔ koka tokeketsha la ntondo k’ekakatanu woleki wolo. Naka sho ndjashikikɛ dia tetemala ngamula lotombo laki Nzambi, kete ndoko ɔhɛnyɔhɛnyɔ wayotɔlɛmbɔhaya lo pondjo.
12. Lande na kahombaso ngɛnangɛna etena katshikalaso la kɔlamelo le Nzambi la ntondo ka ɔlɔshamelo wa Satana?
12 Onde wɛ shikaka ekolo la ntondo ka tɔsɛngiya ta andja ɔnɛ ndo tshikalaka la kɔlamelo le Nzambi oyadi lɔsɔkɔ kana ɔlɔshamelo akɔna wayohomana layɛ? Naka ngasɔ, kete wɛ ekɔ la ɔkɔkɔ wa ngɛnangɛna. Yeso akashikikɛ wanɛ wakahombe mboyela ɔnɛ: “Lam’ayuwunyotenga, lam’ayuwunyusuya, lam’ayuwunyumamanyia wehu tshe w’akambu wa kolo dia dikambu diami, nyeko la [ɔngɛnɔngɛnɔ]. Nyongenengene, nyutamanya ngenangena, ne dia difutu dianyu dieko efula l’ulungu, ne dia wakasuya amvutshi waki la ntundu kanyu wuhu ako.” (Mateu 5:11, 12) Ekikelo kayɛ mɛnyaka dia nyuma k’ekila ka Jehowa kele la nkudu k’efula kekɔ lâdiko diayɛ ndo tɔ koshaka wolo wa ngamula lotombo Lande.—2 Koreto 12:9.
Ekikelo ndjaka oma le Jehowa
13. Naa ɔkɔkɔ ɔmɔtshi wa woke watetemalaso mbikikɛ lo olimu aso w’Okristo?
13 Ɔkɔkɔ ɔmɔtshi wa woke wakikɛso lo olimu aso ele sho mbokaka Jehowa ngandji ndo ngɛnangɛnaka ngamula lotombo lande. Anto mongaka la mbekelo ka mbokoya anto walangawɔ ndo walɛmiyawɔ. Koko Jehowa Nzambi mbele onto lahombaso ndeka kombola dia mbokoya. L’ɔtɛ wa ngandji kande k’efula, nde akatome Ɔnande la nkɛtɛ dia sambisha akambo wa mɛtɛ ndo tshungola anto wele la okitanyiya. (Joani 3:16; 18:37) Lo ɛnyɛlɔ ka Nzambi, sho kombolaka dia weho tshɛ wa anto ndjatshumoya ndo panda. Diɔ diakɔ diasambishaso. (2 Petero 3:9) Nsaki kɛsɔ kâmɛ ndo yɛdikɔ yaso ya mbokoya Nzambi, totshutshuyaka dia tetemala ngamula lotombo lande lo olimu aso.
14. Ngande watokeketsha Jehowa dia sho mbikikɛ lo olimu aso?
14 Ntondotondo, wolo wele laso wa mbikikɛ lo olimu w’Okristo ndjaka oma le Jehowa. Nde tosukɛka ndo tokeketshaka oma lo ekimanyielo ka nyuma kande, ka okongamelo ande ndo ka Ɔtɛkɛta ande, Bible. Jehowa ‘mbishaka ekikelo’ le wanɛ walanga ngamula lotombo lande. Nde kadimolaka lo alɔmbɛlɔ aso ndo toshaka lomba lele laso ohomba dia mbikikɛ ehemba. (Romo 15:5; Jakoba 1:5) Ndo nto, Jehowa hetawɔ dia sho pembama polo lo yɛdikɔ yahatakoke mbikikɛ. Naka sho ndjaɛkɛ le Jehowa, kete nde ayotodiholɛ mboka ka sho tetemala ngamula lotombo lande.—1 Koreto 10:13.
15. Kakɔna katokimanyiya dia mbikikɛ?
15 Ekikelo kaso lo olimu aso shikikɛka dia nyuma ka Nzambi ekɔ lâdiko diaso. Ɛnyɛlɔ: Ohɔsa dia onto ɔmɔtshi ambokɔlɔmba dia wɛ tokahanya yoho mɔtshi ya mapa lo soko la soko aha la nɔmba anto falanga. Nde ambokotɛ dia sala dui sɔ la akuta ayɛ ndo dia sala dui sɔ lo wonya wɛnayɛ ɔlɔlɔ. Ndo nto, wɛ amboyeya dia paka anto yema tshitshɛ tsho mbalanga mapa ɛsɔ ndo amɔtshi wayokoshimba dia kahanya mapa akɔ. Onde wɛ fɔnyaka dia wɛ ayotetemala kamba olimu ɔsɔ ngɔndɔ la ngɔndɔ, ɔnɔnyi la ɔnɔnyi aha la mpekɔ? Ondo kema. Eelo, aya ɛnɔnyi efula kana ɛnɔnyi akumi weyɛ lo ndjaketembola dia mbewoya anto lokumu l’ɔlɔlɔ lo etena kɛnayɛ ɔlɔlɔ ndo la falanga yayɛ hita. Lande na? Shi ekɔ nɛ dia wɛ mbokaka Jehowa ngandji ndo oma lo ekimanyielo ka nyuma kande nde ekɔ lo tshɔkɔla welo ayɛ lo kokimanyiya dia mbikikɛ? Ngasɔ mɛtɛ mbediɔ!
Olimu wahohamamɛki
16. Ayotoyokondja oma lo ekikelo kaso lo olimu aso, le so shoamɛ ndo le wanɛ watohokamɛ?
16 Olimu wa sheke y’oyoyo ekɔ woshasha wa nɛmɔ efula. (2 Koreto 4:7) Woho akɔ wâmɛ mbele, olimu w’Okristo wakamba ɛkɔkɔ ekina lo nkɛtɛ k’otondo ekɔ mɛtɛ ɛngɔ k’oshinga wolo. Etena katetemalayɛ lo olimu ayɛ, wɛ koka oko wakafundɛ Paulo Timɔtɛ, ‘ndjashimbɛ ndo shimbɛ wanɛ wakohokamɛ.’ (1 Timote 4:16) Ohokanyiya kɛnɛ kalembetshiya dui sɔ. Lokumu l’ɔlɔlɔ lasambishayɛ lekɔ lo mbisha anto diaaso dia nsɛna pondjo pondjo. Wɛ koka monga la dimama dia wolo dia lɔngɛnyi la wanɛ wakimanyiyayɛ lo nyuma. Ohokanyiya ɔngɛnɔngɛnɔ wa nsɛna pondjo pondjo lo Paradiso kâmɛ la wanɛ wakayakimanyiya dia vɔ mbeya Nzambi! Lo mɛtɛ, wɛ hohɛki pondjo welo wakayadje dia mbakimanyiya. Ɔsɔ ekɔ ɔkɔkɔ w’ɔlɔlɔ wa wɛ ngɛnangɛna!
17. Lande na kele etena ka lo ɔkɔndɔ w’anto kasɛnaso kɛnɛ ekɔ etena ka lânde le so?
17 Tekɔ lo nsɛna lo etena ka lânde ka lo ɔkɔndɔ w’anto. Lokumu l’ɔlɔlɔ hosambishama nto pondjo lo andja wambangana la Nzambi. Nɔa akasɛnaka lo andja wa ngasɔ ndo nde akɛnyi elanyelo ka andja ɔsɔ. Nde mɛtɛ akangɛnangɛna efula dia mbeya ɔnɛ nde akakotsha la kɔlamelo tshɛ olimu wakawosha Nzambi wa sɛla wato wa luudu wakakimanyiya dia mboshimbɛ ndo shimbɛ nkumbo kande! (Heberu 11:7) Wɛ lawɔ koka monga la ɔngɛnɔngɛnɔ wa ngasɔ. Ohokanyiya yema woho wayoyotoyaoka lo andja w’oyoyo etena kayoyotohɔ olimu wakayasale lo nshi y’ekomelo nyɛ, lo mbeya ɔnɛ wɛ akasale tshɛ kakayakoke sala dia tɔla wahɔ wa Diolelo otsha la ntondo.
18. Naa eshikikelo ndo ekeketshelo kasha Jehowa ekambi ande?
18 Ɔnkɔnɛ, nyɛsɔ totetemale ngamula lotombo laki Nzambi. Hatotohɛ pondjo dia takakambe olimu ɔsɔ. Jehowa lawɔ hohɛki olimu aso pondjo. Bible toshaka ekeketshelo kɛnɛ ɔnɛ: “[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi, uku akanyakimanyia ekilami, ndu uku atshanyu edja ndu elo. Shu nangaka nyu tshe untu l’untu ntetemala dia ndjala la ukalanganu one lu akambu tshe w’elungamelu edja ndu l’ekumelu, diaha nyu ndjala tusuasua. Keli nyukuya wane wambukita alaka ne dia mbetawo la etetemalu kawo.”—Heberu 6:10-12.
Onde wɛ koka nembetshiya
• Ngande wangamula Akristo lotombo laki Nzambi?
• Naa toho tɔmɔtshi takamba la Satana dia nɛmbɔhaya ekambi wa Nzambi?
• Naa djembetelo yele laso yɛnya dia nyuma ka Nzambi ekɔ lâdiko diaso?
[Osato wa lo lɛkɛ 9]
Elundji kaki Mɔsɛ akangamulaka lotombo
[Esato wa lo lɛkɛ 10]
Sho ngamulaka lotombo laki Nzambi lo olimu aso