Ɔkɛndɛ Wele la Falasa Kɛmɔtshi ka Ta Wendana la Yɛ
1, 2. Ngande wendana ekambi waki Nzambi ɛlɔ kɛnɛ l’ekotshamelo k’ɛnɛlɔ ka prɔfɛsiya ka l’Enyelo 9:13-19?
1 ‘Ondjelo wa samalo akade ponge.’ Oma lâsɔ, “elui w’alimbi” waki “nunu akumi ahendi” wakasanganya awui awɔ kâmɛ. Ɔsɔ komonga alembe w’anto k’anto. “Ete wa falasa waki uku ete wa tambwe.” Dja, dinga, la mbɔkɔ ya dja yakatombaka oma l’enyɔ ayɔ, ndo “wela ayo waki uku elui.” Ɔkɛndɛ wa falasa ka didjidji kɛsɔ ekɔ wa ndanya. (Eny. 9:13-19) Onde wɛ mbeyaka woho wendanayɛ l’ekotshamelo k’ɛnɛlɔ ka prɔfɛsiya kɛsɔ ka diambo?
2 Atshikadi w’akitami w’esɔ kâmɛ l’asekawɔ, ɛkɔkɔ ekina, wekɔ lo mbewoya kâmɛ dombwelo diaki Nzambi. Olimu wambowasha diaaso dia kɛnɛmɔla lo sɛkɛ eongelo ka kɔlɔ ka lo nyuma ka lo Lokristokristo. Nyɛsɔ tɔsɛdingole akambo ahende wa l’ɛnɛlɔ ka prɔfɛsiya kɛsɔ wɛnya lande na kele olimu w’ekambi waki Nzambi wekɔ l’etombelo w’ɛlɔlɔ.
3. Wetshelo akɔna wamboyokondja dia mbeya mbewoya losango laki Nzambi dimɛna?
3 Tambetshama ndo Tekɔ la Dihomɔ Diahombama dia Mbewoya Losango Laki Nzambi: Oma lo Kalasa k’Olimu wa Teokrasi ndo nsanganya kina ya l’etshumanelo, ekambi waki Nzambi mbetshamaka dia mbewoya losango laki Nzambi la dihonga. Lo mbokoya Yeso nde l’ambeki ande, vɔ tshɔka dia toyanga anto wasungana, lo sambisha l’ahole tshɛ wakoka anto tanema. (Mat. 10:11; Mako 1:16; Luka 4:15; Etsha 20:18-20) Yoho ya sambisha shɔ yotombi oma lo Bible yekɔ mɛtɛ l’etombelo w’amɛna!
4. Dihomɔ diakɔna diele l’apandjudi efula dia mbakimanyiya dia vɔ kotsha olimu awɔ?
4 Miliyara ya Bible, y’abuku, ya tobukubuku ndo ya periodikɛ yambokahanyema oma le Akristo lam’akambawɔ olimu w’esambishelo wakawasha Nzambi. Ekanda ɛsɔ wambotomba l’ɛtɛkɛta suke la 400. Vɔ wekɔ l’awui efula wotshikitanyi ndo vɔ kambaka la mbɔtwɛlɔ yangɛnyangɛnya weho w’anto wotshikitanyi. Onde wɛ kambaka dimɛna la dihomɔ sɔ?
5, 6. Kakɔna kɛnya ɔnɛ Nzambi ekɔ lo sukɛ ekambi ande?
5 Ɛlɔmbwɛlɔ ndo Osukɔ w’oma l’Olongo: Ɛnɛlɔ ka prɔfɛsiya kɛsɔ mɛnyaka nto di’olimu ɔnɛ wele oko wɔnɛ waki ombahemi wa falasa ka ta ka didjidji wekɔ lo sukamɛ oma le Nzambi. (Eny. 9:13-15) Olimu w’esambishelo ka l’andja w’otondo wambokotshama, aha oma lo yimba kana wolo w’onto, koko oma l’ekimanyielo ka nyuma ka Nzambi. (Zek. 4:6) Jehowa ekɔ lo kamba l’andjelo dia nɔmbɔla olimu ɔnɛ. (Eny. 14:6) Ɔnkɔnɛ, kâmɛ la welo wadja Ɛmɛnyi ande, Jehowa mbasukɛka dia vɔ kotola akanga a memakana oya le nde ndamɛ.—Joa. 6:45, 65.
6 Oma lo woho wambowetshama, woho wewɔ la dihomɔ di’amɛna diahombama dia mbewoya losango laki Nzambi, ndo lo woho wakambawɔ l’ɛlɔmbwɛlɔ ka andjelo, ndoko kakoka memɛ olimu w’ekambi waki Jehowa. Nyɛsɔ totetemale la kotsha ɔkɛndɛ aso lo ekotshamelo k’ɛnɛlɔ ka prɔfɛsiya ka dimɛna efula kɛsɔ.