Tônge l’Ɛnamelo ka Pudipudi ndo Kasungana Mandɔma
1. Lam’ayalɔngɔsɔlaso otsha lo losanganya la distrikɛ, lande na kahombaso kana yimba dikambo di’ɛnamelo kaso?
1 Pami kɛmɔtshi kakamba l’ɔtɛlɛ ɔmɔtshi akate lo dikambo di’anangɛso ndo di’akadiyɛso wakɔtɔ lo losanganya lɔmɔtshi la distrikɛ l’ɔnɔnyi wêtshi ate: “Ɛmɛnyi wa Jehowa wekɔ anto w’ɔlɔlɔ efula! Anto anyu wekɔ la loshilambo ndo ndɔtaka dimɛna, ndo vɔ wekɔ la dilɛmiɛlɔ di’efula.” Lo losanganya lokina womoto ɔmɔtshi lakamba l’ɔtɛlɛ ɔmɔtshi akate ate: “Mɛnamaka di’anto anyu ndɔtaka dia ngɛnyangɛnya Nzambi.” Eelo, wanɛ wɔ̂tɔ lo losanganya sɛdingɔmaka oma le anto akina. Ɔnkɔnɛ, sho nangaka ndɔta lo ‘yoho yasungana la lokumu l’ɔlɔlɔ,’ ndo mbala efula dui sɔ tshutshuyaka wanɛ wele bu Ɛmɛnyi wa Jehowa dia tândola ndo mɛnya hwe dia sho mbele ekambi wa Nzambi. (Fil. 1:27) Lam’ayalɔngɔsɔlaso dia mbɔtɔ lo losanganya la distrikɛ, ekɔ ɔlɔlɔ tâkanyi yimba dikambo di’ɛnamelo kaso.
2. Lande na kele ekɔ tshondo y’okakatanu dia ndɔta ndo nɔngɔsɔla divo lo yoho ya pudipudi?
2 Ombeki Jakɔba akafunde ate: “Yimba yakahulo uma l’ulungu, ntundu yeko pudipudi.” (Jak. 3:17) Monga l’ɛnamelo ka pudipudi koka monga tshondo y’okakatanu. Andja waki Satana wa kɔlɔ tshutshuyaka anto dia ndɔta lo yoho ya kɔlɔ, y’emula nsaki ya demba, y’epakapaka ndo yahasungana. (1 Joa. 2:15-17) Omalɔkɔ, lam’ɔsaso tɛdikɔ tendana l’ɛlɔtɔ ndo la yoho ya nɔngɔsɔla divo diaso, sho pombaka ndjela dako dia lo Bible diatɔlɔmba dia ‘tona akambo wa kɔlɔ ndo nsaki y’andja ɔnɛ ko sɛna la yimba y’ɔlɔlɔ, . . . l’atei wa dikongɛ nɛ di’akambo.’ (Tito 2:12) Hatolange pondjo nyangiya akina oma l’ɛnamelo kaso, oyadi anangɛso, ase ɔtɛlɛ kana ase rɛstora, ko kana anto akina watɔsɛdingola.—1 Kor. 10:32, 33.
3. Wembola akɔna wayotokimanyiya dia sɛdingola ɛnamelo kaso?
3 Ɔlɔtɔ wa Dimɛna ndo wa Kɔmba: Lam’ayalɔngɔsɔlaso otsha lo losanganya la woke, toyambole shoamɛ ɔnɛ: ‘Onde ahɔndɔ ami wekɔ amɛna, kana vɔ kotolaka yambalo y’anto oya le mi okotolakotola? Onde ɔlɔtɔ ami mɛnyaka dia dimi nɛmiyaka anto akina? Onde dibaya diami diekɔ mondo efula kana tshikaka ahɛka tshɛ l’andja? Onde ahɔndɔ ami wekɔ mpika kana tshikaka tenyi dia demba efula l’andja? Onde ahɔndɔ ami wekɔ pudipudi ndo bu la solo ya kɔlɔ? Lam’alɛyɛ yangɔ mɔtshi la pindju l’ɔtɛlɛ kana wonya watayasembola ekolo l’ɔkɔngɔ wa losanganya, onde wɛ mɛnamaka kɔmba ndo pudipudi oko okambi wa Nzambi, ko kana ahɔndɔ ayɛ bu kɔmba, wekɔ oko heyama heyama ndo hawosungana l’onto lɔlɔtshi tshapa ya lo losanganya? Onde dihɔndɔ diɔlɔtshimi l’etena kɔsami yema ya lɔpɛpɛ kokaka shimbami dia sambisha lo tshakitudi?’—Romo 15:2, 3; 1 Tim. 2:9.
4. Ngande wakoka akina tokimanyiya dia monga l’ɛnamelo ka pudipudi?
4 Sho kokaka kondja wahɔ lo sɛdingola Akristo wambotshunda. Wâdi kokaka mimbola waomɛwɔ ɔnɛ anto akina ayowota naka dimi ndɔta ahɔndɔ anɛ? Ambutshi w’Akristo kokaka kimanyiya anawɔ weke l’ɛnɔnyi dikumi l’ɛmɔtshi lo dikambo sɔ. Ndo nto, akadiyɛso wayasha nɛmɔ waya epalanga kokaka ‘mbohola esekaseka dia vɔ ndjalama . . . monga la yimba y’ɔlɔlɔ ndo ya pudipudi’ lo ɛnamelo kawɔ ‘di’aha anto ndjɔtɛkɛta kɔlɔ lo dikambo di’Ɔtɛkɛta wa Nzambi.’ (Tito 2:3-5) Ekanda aso w’Akristo wekɔ l’esato efula wɛnya woho wɔlɔtshi anto dimɛna ndo la tɔkɔmba.
5. Ngande wakokaso sho tshɛ tombola Jehowa lo losanganya la woke?
5 Vɔ Mbelaka Jehowa Lotombo: Nsanganya ya Distrikɛ toshaka sho tshɛ, aha tsho wanɛ washa asawo, diaaso dia dimɛna efula dia tombola Jehowa. Lo mɛtɛ, lɔkɛwɔ laso l’Okristo ndo ɛtɛkɛta aso wayosha Jehowa nɛmɔ. Koko dui dia ntondo diɛna wanɛ watenda ele ɔlɔtɔ aso ndo yoho yɔlɔngɔsɔdiso divo. Nyɛsɔ sho tshɛ totombole Jehowa oma l’ɛnamelo kaso ka pudipudi ndo kasungana.—Osam. 148:12, 13.
[Kiombo ya lo lɛkɛ 6]
Kɛnɛ Katokimanyiya dia Monga l’Ɛnamelo Kasungana Mandɔma
◼ Ɔtɛkɛta wa Nzambi
◼ Ɔsɛdingwelo w’onto ndamɛ
◼ Ɔsɛdingwelo w’anto akina
◼ Ekanda w’Akristo