Ɔlɔtɔ w’Ɔlɔlɔ Mɛnyaka dia Sho Tombolaka Nzambi
1. Ngande wakokaso mɛnya lowando laso lo losanganya la distrikɛ layaye?
1 Kema edja tayonga la diɛsɛ dia mbelamɛ angɛndangɛnda waki Jehowa lo Losanganya la Distrikɛ la lo 2003 lele l’ɔtɛ a dui ɔnɛ: “Tosha Nzambi Lotombo.” Ande lowando l’efula lele laso otsha le Jehowa lo woho wamondotelɛ lo dambo dia woke dia lo nyuma sɔ lee! Sho kokaka mɛnya dilɛmiyɛlɔ ndo lowando laso otsha le nde lo mbo ya ndɛ ya lo nyuma yatoshande oma l’ɔlɔtɔ ndo oma l’ɔlɔngɔswɛlɔ aso wa divo.—Osam. 116:12, 17.
2. Lande na kele ekɔ ohomba le so dia monga pudipudi ndo kiɔmba?
2 Pudipudi ndo Kiɔmba: Ɛnamelo kaso pombaka mɛnya dia sho ndjelaka wadjango waki Nzambi kaso ka pudipudi ndo ka kiɔmba. (1 Kor. 14:33; 2 Kor. 7:1) Lonto laso, divo diaso, ndo nkala yaso pombaka monga pudipudi, ndo ɛnamelo kaso pombaka monga la kiɔmba. Nshi nyɛ anto efula wamboleka monga dipakapaka. Koko, aha dikambo dia amembi wa mishiki kana akɛnyi wa tɔkɛnyɔ wa lokumu wekɔ lo ndjalɔtshiya lo yoho ya kɔlɔ mbahomba Akristo mbaokoya. Naka sho ndjela toho tɔsɔ, kete anto mbeyaka monga l’okakatanu dia mɛna otshikitanu wele lam’asa wanɛ wakambɛ Nzambi ka mɛtɛ la wanɛ wahokambɛ.—Mal. 3:18.
3. Ngande wakokaso ndjashikikɛ dia kana ɛnamelo kaso mbɔtɔnɛka la dako dia lo 1 Tim. 2:9, 10?
3 Ɔlɔtɔ Wakoka le Ekambi w’Akristo: Lam’akafundɛ ɔpɔstɔlɔ Paulo Timɔtɛ laki omendji w’Okristo, nde akokeketsha ate: ‘Wamato walɔtɛ ɔlɔtɔ wa dimɛna la wɔlamu ndo la memakana, . . . kele vɔ wayale wamato watsha elimu wa Nzambi oma l’elimu w’ɔlɔlɔ.’ (1 Tim. 2:9, 10) Dia shikikɛ kana ɔlɔtɔ aso wekɔ dimɛna sho pombaka mbidja yimba lɔkɔ. Ɔlɔtɔ pombaka monga kiɔmba, pudipudi, ndo aha la tshambandeko, mbut’ate aha ndjalɔtshiya lo yoho ya kawotake kana yakoka takanya anto.—1 Pet. 3:3.
4, 5. Alako akɔna wahomba Akristo w’apami ndo wa wamato ndjela?
4 Paulo akawaewola nto lo kɛnɛ kendana ‘la wɛlɛlɔ wa divo, ndo l’ɔlɔtɛlɔ wa paunyi kana mbɔkɔ y’akɛsɔ kana ahɔndɔ w’oshinga wolo’ lo yoho ya tshambandeko. (1 Tim. 2:9) Monga la wɛdimu lo kɛnɛ kendana l’ɔlɔtɛlɔ wa dɛngalɛnga, l’ɔlɔngɔswɛlɔ wa demba, ndo la weho ekina wa dɛngalɛnga ekɔ wetshelo wa lomba wahomba wamato w’Akristo ndjela.—Tuk. 11:2.
5 Dako diakasha Paulo wamato w’Akristo mendanaka nto ndo l’apami w’Akristo. Anangɛso pombaka mbewɔ toho t’ɛlɔtɔ takɛnɛmɔla yimba ya l’andja ɔnɛ. (1 Joa. 2:16) Ɛnyɛlɔ, lo wedja ɛmɔtshi anto efula nangaka ndɔta ahɔndɔ wa weke kana w’etshobobo, koko ɔlɔtɔ wa woho ɔsɔ hasungana le ekambi waki Nzambi.
6. Bonde kahombaso ndɔtaka ndo nɔngɔsɔlaka divo etena katatatshu ndo kayatakalola oma lo losanganya, kana lam’eso lo losanganya, ndo oma l’ɔkɔngɔ wa losanganya lushi tshɛ?
6 Lo Wenya wa l’Ɔkɔngɔ wa Losanganya: Etena keso lo losanganya anangɛso efula mbishaka ɛnyɛlɔ ka dimɛna lo kɛnɛ kendana l’ɔlɔtɔ ndo l’ɔlɔngɔswɛlɔ wa divo. Koko alapɔlɔ mɛnyaka dia anto efula ndjonyaka yimba l’akambo asɔ etena katshɔwɔ ndo kakalolawɔ oma lo losanganya, kana lo wenya wa l’ɔkɔngɔ wa losanganya. Lo mɛtɛ, ɛnamelo kaso oyadi wonya wa losanganya kana l’ɔkɔngɔ wa losanganya ekɔ la shɛngiya lo woho wɔsa anto akina ekambi waki Nzambi. Lam’ele sho ndɔtaka totshapa ta losanganya, sho pombaka nshi tshɛ ndɔtaka lo yoho yasungana l’ekambi w’Akristo. Mbala efula, dikambo sɔ tshutshuyaka anto akina dia tandola ndo toshaka diaaso dia mbasambisha.—1 Kor. 10:31-33.
7. Shɛngiya yakɔna yakoka monga l’ɔlɔtɔ aso ndo l’ɔlɔngɔswɛlɔ aso wa divo otsha le anto akina?
7 Oko walɔngɔsɔla ɔmɔnɔmɔnɔ wa la lɔngɛnyi ɛnamelo ka dungi diaso, mbele ndo ɔlɔtɔ la ɔlɔngɔswɛlɔ wa divo wa dimɛna mbishaka losango latatɛmbɛ ndo ɔlɔngɔswɛlɔ wototomi kɛnɛmɔ. Anto amɔtshi watenda lo Losanganya la Distrikɛ la l’ɔnɔnyi ɔnɛ lele l’ɔtɛ a dui ɔnɛ: “Tosha Nzambi Lotombo” mbeyaka ndjotshutshuyama dia mimbola dia mbeya lande na kotshikitanyiso l’anto akina, ndo vɔ mbeyaka ndjokoma dia mbita ɔnɛ: “Shu tayutsho kame la nyu, ne dia shu takuki lukumu [ndo takɛnyi sh]ati: [Nzambi] eko kame la nyu.” (Zek. 8:23) Sho tshɛ mbeyaka mɛnya dilɛmiyɛlɔ diaso otsha le Jehowa oma l’ɔlɔtɔ aso ndo oma l’ɔlɔngɔswɛlɔ aso wa divo.
[Kiombo ya lo lɛkɛ 5]
Tonge la Ɛnamelo ka Dimɛna
▪ Etena katatatshu otsha lo losanganya
▪ Etena keso lo losanganya
▪ Lo wenya wa l’ɔkɔngɔ wa losanganya