Tɛnya Lowando Laso
1 Kânga mbasɛnaso lo ‘tena dia pâ dia wolo mbikikɛ,’ tekɔ l’ɛkɔkɔ efula wa mɛnya lowando laso le Jehowa. (2 Tim. 3:1) Ɔkɔkɔ woleki woke ele woshasha w’oshinga wolo w’Ɔnande lakandakimɔ dikambo diaso. (Joa. 3:16) Ndo nto, kânga mbele wanɛ wele l’ɛtɛmwɛlɔ wa kashi wekɔ lo diɛnɛ la ndjala ka lo nyuma, sho tekɔ la mbo ya ndɛ efula ya lo nyuma. (Is. 65:13) Tekɔ l’atei wa nkumbo k’anto l’ɔnango ka l’andja w’otondo ndo tekɔ la diɛsɛ dia lânde dia kamba olimu w’ɔngɛnɔngɛnɔ dia pamia ɔtɛmwɛlɔ wa mɛtɛ. (Is. 2:3, 4; 60:4-10, 22) Ngande wakokaso mɛnya lowando laso otsha le Jehowa l’ɔtɛ w’ɛtshɔkɔ efula watoshande?—Kol. 3:15, 17.
2 Olimu wa l’Ɔngɛnɔngɛnɔ ndo l’Otema Ɔtɔi: Lam’akandatɛkɛtaka dia weshasha wa l’emunyi, ɔpɔstɔlɔ Paulo akafunde ate: “[Nzambi] nangaka onto latukimoka l’ongenongeno.” (2 Kor. 9:7) Tɔndɔ sɔ mendanaka nto ndo l’olimu wakambɛso Nzambi. Lowando laso mɛnamaka oma lo wangasanu wele laso l’akambo wa mɛtɛ, ɔngɛnɔngɛnɔ wele laso lo nsanganya y’Akristo, ohetoheto wele laso l’olimu w’esambishelo ndo woho wakotshaso lolango laki Nzambi.—Esam. 107:21, 22; 119:14; 122:1; Romo 12:8, 11.
3 Lo Isariyɛlɛ w’edjedja, Ɛlɛmbɛ kɔmɛnyaka lofulo shikaa lakahombaka anto kimɔ lo kɛnɛ kendana la weshasha ɛmɔtshi. Ɔtɛmɔdi tshɛ akakokaka mɛnya lowando lande lo kimɔ “uku etshoko wa [Jehowa]” wakandakondjaka. (Euh. 16:16, 17) Woho akɔ wâmɛ mbele ɛlɔ kɛnɛ, otema wele la lowando totshutshuyaka dia sho kamba efula olimu w’esambishelo ka Diolelo ndo wa mbetɛ anto ambeki lo ndjela diaaso diele laso. Ngɔndɔ ka Samalo polo k’Enanɛi toshaka mbala efula waaso akina wa sho mɛnya lowando laso. Amɔtshi kambaka dimɛna la nshi yɔsawɔ vakashi oma l’olimu kana la kalasa kana lo waaso akina w’ɔlɔlɔ dia pamia olimu awɔ w’esambishelo, lo kamba olimu w’ombatshi mboka wa tshanda. Onde wɛ hakoke pamia olimu ayɛ?
4 Etema Aso Walole la Eokelo ka Losaka: Yoho ya dimɛna efula yokaso Jehowa losaka ele oma lo dɔmbɛlɔ. (1 Tes. 5:17, 18) Ɔtɛkɛta wa Nzambi tokeketshaka dia ‘etema aso ndola la mbetawɔ ndo la eokelo ka losaka.’ (Kol. 2:7) Oyadi tekɔ la wesanu ndo l’ekakatanu efula, sho pombaka mbôkaka losaka mbala tshɛ l’alɔmbɛlɔ aso wa lushi la lushi. (Fil. 4:6) Eelo, oma lo tshimbo y’olimu aso ndo y’alɔmbɛlɔ aso, nyɛsɔ ‘tokake Nzambi losaka efula.’—2 Kor. 9:12.