‘Tônge la dionga dia lowando’
“Ki ka Kristu kuleli l’etema anyu . . . Nyukaki lusaka.”—KOLOSAI 3:15.
1. Otshikitanu akɔna wɛnaso lam’asa etshumanelo k’Akristo la andja ɔnɛ wele lo wolo waki Satana?
LO TSHUMANELO 94 600 di’Ɛmɛnyi wa Jehowa dia l’andja w’otondo, sho tanaka yimba ya lowando. Losanganya tshɛ tatɛka ndo komɛka la dɔmbɛlɔ diele l’ɛtɛkɛta wa lowando le Jehowa. Mbala la mbala sho tôkaka tɔtɛkɛta tele oko “losaka,” “losaka ndo wɛ lawɔ,” kana tɔtɛkɛta tokina ta woho ɔsɔ l’enyɔ w’akɛnda la w’epalanga ndo l’enyɔ w’Ɛmɛnyi wa Jehowa weke eyoyo kana waya edja etena kasanganawɔ kâmɛ l’ɔtɛmwɛlɔ kana kewɔ kâmɛ l’asekawɔ. (Osambu 133:1) Dionga sɔ tshikitana efula la dionga dia lokaki diele lam’asa anto “wane waheyi [Nzambi], la wahakitanyia lukumu l’ololo”! (2 Tesalonika 1:8) Tekɔ lo sɛna l’andja wambolola l’anto wele la lɔhɛndɛ. Ɔsɔku mbediɔ naka sho sɛdingola ɔnɛ lele jambizambi ya l’andja ɔnɛ, mbut’ate Satana Diabolo lele la lokaki loleki tshɛ ndo ɔnɛ lele yimba yande ya lotamanya ndo y’ɔtɔmbɔkwɛlɔ yambokokanɛ lo tshunda di’anto tshɛ!—Joani 8:44; 2 Koreto 4:4; 1 Joani 5:19.
2. Ɔhɛmwɛlɔ akɔna wahombaso kitanyiya, ndo wembola akɔna wayotɔsɛdingola?
2 Oko wasɛnaso l’andja ɔnɛ wele lo wolo waki Satana, tekɔ l’ohomba wa monga la yewo y’efula di’aha sho nanyema la waonga atɔ wa kɔlɔ. Lo ntambe ka ntondo, ɔpɔstɔlɔ Paulo akohola Akristo wa l’Ɛfɛsɔ ate: “Nyu nyakakendakenda lu akambu aso, uku atokendakendaka wa la kete nye, uku uwandji a wulu wa lopepe, wa nyuma katukambiaka ana a pami w’uhedia. Ndu shu tshe takakendakendaka l’atei awo ntundu la saki y’alimba asu, takayelaka saki y’alimba asu lu tukanyi tasu, takuto ana wa kele, uku aki akina.” (Efeso 2:2, 3) Ɔsɔ ekɔ dui dia mɛtɛ le anto efula ɛlɔ kɛnɛ. Lâsɔ, woho akɔna wakokaso nama yimba ya lowando? Ekimanyielo kakɔna katosha Jehowa? Lo toho takɔna ta shikaa takokaso mɛnya dia tekɔ mɛtɛ la lowando?
Ɛkɔkɔ watotshutshuya dia monga la lowando
3. L’ɔtɛ wa diangɔ diakɔna diashaso Jehowa losaka?
3 Paka Jehowa Nzambi, Otungi aso ndo Kiɔkɔ ya Lɔsɛnɔ Iaso, mbahombaso mbisha lowando, djekoleko etena kasɛdingolaso weshasha efula wa diambo watoshande la lokaho tshɛ. (Jakoba 1:17) Lushi la lushi, sho mbishaka Jehowa losaka nɛ dia tekɔ la lɔsɛnɔ. (Osambu 36:9) Tekɔ lo mɛna tolembetelo efula tɛnya olimu w’anya waki Jehowa, ɛnyɛlɔ oko wonya, ngɔndɔ ndo tɔɔtɔ. Lomombo lasukɛ lɔsɛnɔ lele l’okama aso wa nkɛtɛ, hiɛlɛlɛ ya dimɛna ndo otshikitanu wa waa deko mɛnyaka dibasa diele laso le Shɛso ka ngandji lele l’olongo. Nkumekanga Davidi akembe ate: “We [Jehowa], [Nzambi k]ami, akambu wa mamba wakayatshi, la tukanyi takayakani lu dikambu diasu, weko efula; nduku ledimi la ye. Kuyanga layuhimba mbata, vo weko efula kaheyama mbala.”—Osambu 40:5.
4. Bonde kahombaso mbisha Jehowa losaka l’ɔtɛ wa lɔngɛnyi l’ɔlɔlɔ lele laso lo tshumanelo diaso?
4 Kânga mbele aya deko aha nɛ mbambonyɛma paradiso ka l’emunyi, ɛlɔ kɛnɛ ekambi waki Jehowa wekɔ lo sɛna lo paradiso ka lo nyuma. Lo Mbalasa yaso ya Diolelo ndo lo nsanganya yaso ya weke, sho mɛnaka di’elowa wa nyuma kaki Nzambi kambaka olimu le asekaso ambetawudi. Lo mɛtɛ, etena kasambishawɔ anto weya yema tshitshɛ kana waheye awui waki Nzambi kânga yema, Ɛmɛnyi wa Jehowa ɛmɔtshi ndjelaka kɛnɛ kakakɔndɔla Paulo lo mukanda wakandafundɛ ase Ngalatiya. Ntondotondo, vɔ kotolaka yambalo yawɔ l’“etsha wa lu dimba” ndo vɔ mumbolaka ampokami awɔ kɛnɛ kakawɛnyi. (Ngalatiya 5:19-23) Esadi eto anto efula ndjetawɔka dia kɛsɔ kasalema lo tshunda di’anto ɛlɔ kɛnɛ. Etena kawaɛnyaso kɛnɛ katama lo dikambo di’elowa wa nyuma kaki Nzambi ndo l’ɔkɔngɔ wa sho mbaelɛ lo Mbalasa ka Diolelo dia vɔ ndjɛna dui sɔ la washo awɔ vɔamɛmɛ, efula mbetawɔka esadi eto ɔnɛ: ‘Nzambi ekɔ mɛtɛ l’atei anyu.’ (1 Koreto 14:25) Aha paka lo mbalasa ka Diolelo oto mbɛnama dikambo sɔ. Oyadi dihole diakɔna diakokayɛ ntshɔ, etena kahomanayɛ l’ɔmɔtshi l’atei w’anto ndekana miliyɔ shamalo y’Ɛmɛnyi wa Jehowa, wɛ ayɛna dionga diakɔ diamɛ di’ɔngɛnɔngɛnɔ. Lo mɛtɛ, lɔngɛnyi l’oshika lɔsɔ ekɔ ɔkɔkɔ watotshutshuya dia mbisha Jehowa losaka, ɔnɛ latosha nyuma kande dia tɔ kamba olimu.—Zefaniya 3:9; Efeso 3:20, 21.
5, 6. Ngande wakokaso mɛnya lowando lo woshasha woleki woke waki Nzambi, mbut’ate tshungo?
5 Woshasha woleki woke, wa kokele wakatosha Jehowa, ekɔ Ɔnande Yeso lele lo tshimbo yande mbakandasha anto olambo wa tshungo. Ɔpɔstɔlɔ Joani akafunde ate: “Naka [Nzambi] akatuki ngandji dieli la su ndu shu mbukana ngandji.” (1 Joani 4:11) Eelo, sho mɛnyaka lowando laso lo tshungo aha paka lo mɛnya ngandji la lowando le Jehowa koko ndo lo sɛna yoho ya lɔsɛnɔ yɛnya ngandji kaso le anto akina.—Mateu 22:37-39.
6 Sho koka mbeka awui efula lo woho wa mɛnya lowando lo sɛdingola kɛnɛ kakasalɛ Jehowa Isariyɛlɛ w’edjedja. L’ekimanyielo k’Ɛlɛmbɛ wakandasha wodja lo tshimbo ya Mɔsɛ, Jehowa aketsha wodja ɔsɔ akambo efula. Oma l’ekimanyielo k’“utundu wa ewu la mete [k’oma] lu elembe,” sho kokaka mbeka awui efula wayotokimanyiya dia ndjela dako diaki Paulo diata ɔnɛ: ‘Tônge la dionga dia lowando.’—Romo 2:20; Kolosai 3:15.
Wetshelo esato wakondjaso oma l’Ɛlɛmbɛ wa Mɔsɛ
7. Ngande wele yɛdikɔ yendana l’etenyi ka dikumi akashaka ase Isariyɛlɛ diaaso dia mɛnya lowando lawɔ le Jehowa?
7 L’Ɛlɛmbɛ wa Mɔsɛ, Jehowa akasha ase Isariyɛlɛ toho tosato takawakoke mɛnya lowando l’ɔlɔlɔ wakinde. Yoho ya ntondo, aki yɛdikɔ yendana l’etenyi ka dikumi. Ka dikumi ɔtɔi ka kɛnɛ kakawakondjaka oma lo dikambɔ kâmɛ la “tenyi dia dikumi tshe dia ngombe la ekoko,” diakayoyala “ekila le [Jehowa].” (Akambu w’Asi Lewi 27:30-32) Etena kakakitanyiyaka Isariyɛlɛ didjango sɔ, Jehowa akâtshɔkɔlaka efula. “Nyela tenyi dia dikumi tshe lu luudu l’eumbelu, dia mbu ya nde ndjala lu luudu lami. Nyumpimbi kakiane, mbata [Jehowa] Kanga lulimbilimbi, naka dimi halunyudihwela adidishi wa l’ulungu dia nyutshulwela otshoko, wuhu waha[ny]eyi nkuka lu luudu.”—Malaki 3:10.
8. Otshikitanu akɔna waki lam’asa weshasha wa la lolango la yɛdikɔ yendana l’etenyi ka dikumi?
8 Yoho ya hende, lâdiko wa yɛdikɔ yendana l’etenyi ka dikumi, Jehowa akalɔngɔsɔla di’ase Isariyɛlɛ kimɔka weshasha wa la lolango. Nde akatɛ Mɔsɛ dia nde mbutela ase Isariyɛlɛ ate: “Lam’ayunyukuma lu kete yatamanyolombola, lam’ayunyutole diango dia lu kete yako, kanyutulambulaki [Jehowa] ulambu.” Ɛlɔnga ɛmɔtshi wa ‘shima wele oko ekate w’ekama’ wakahombe kimɔma oko ‘woshasha le Jehowa’ lo nɔnga yawɔ tshɛ. Tolembete dia nde koshikikɛ lofulo shikaa lakahombaka nambɔma. (Walelu 15:18-21) Koko etena kakakimɔka ase Isariyɛlɛ woshasha wa eokelo ka losaka, vɔ waki l’eshikikelo dia wayokondja ɔtshɔkɔ oma le Jehowa. Yɛdikɔ ya woho akɔ wâmɛ shɔ mbakɛnama lo kɛnɛ kendana la tɛmpɛlɔ lo ɛnɛlɔ kaki Ezekiyɛlɛ. Sho mbadiaka ɔnɛ: “Elonga tshe wa diango dia dinela, la wehu tshe wa elambu wayuwulambula, wayuyala w’elombedi. Kanyushaki elombedi elonga wa shima ya pudipudi, dia etshoko ndjala lu luudu lanyu.”—Ezekiyele 44:30.
9. Kakɔna kaketsha Jehowa anto l’ekimanyielo ka yɛdikɔ yendana l’otshikelo wa washa amɔtshi l’ekambɔ?
9 Yoho ya sato, Jehowa akalɔngɔsɔla di’amunyi tatshikaka washa amɔtshi w’eponga kana w’asami l’ekambɔ. Nzambi akawatɛ ate: “Lam’ayunyuyala la dinela lu kete yanyu, tanyunaki lu atshuku tshe wa lu dikambo dianyu, kuyanga nkodiakodia l’okongo a dinela dianyu. Tanyumbaki elua tshe tshe wa lu dikambo dianyu di’elua, kuyanga ntongona elua wamboko lu dikambo dianyu. Kany[u]tshikeli asi wula la angendangenda. Dimi [Jehowa], [Nzambi k]anyu.” (Akambu w’Asi Lewi 19:9, 10) Mbala kɛnɛ nto, nde koshikikɛ lofulo shikaa. Ose Isariyɛlɛ ndamɛ mbakahombe shikikɛ lofulo lakandahombe tshika dikambo dia wanɛ waki lo dihombo. Diɔ diakɔ diakalembetshiya Sɔlɔmɔna Nkumekanga ka lomba ate: “One latukaka usi wula ketshi, atosondjaka [Jehowa] diango, ndi ako layûfuta uku ololo wakandatshi.” (Tukedi 19:17) Lo sala ngasɔ, Jehowa aketsha anto dia monga la kɛtshi ndo ngandji otsha le amɛnyi fɔnu.
10. Etombelo akɔna wakakondja ase Isariyɛlɛ etena kakawatonaka mɛnya lowando?
10 Jehowa akatshɔkɔlaka ase Isariyɛlɛ etena kakawakimɔka etenyi ka dikumi, kakawakimɔka weshasha wa la lolango, ndo kakawatshikaka yangɔ dikambo di’ase wola. Koko, etena kakatonaka wodja w’Isariyɛlɛ dia mɛnya lowando lawɔ, Jehowa akawaokaka ɔkɔngɔ. Dui sɔ akakonya lo mpokoso ndo l’ɔkɔngɔ diko wakatɔlama lo fumbe. (2 Ekondo 36:17-21) Wetshelo akɔna wakokaso kondja lâsɔ na?
Woho wɛnyaso lowando laso
11. Yoho yakɔna yoleki dimɛna yakokaso mɛnya lowando laso le Jehowa?
11 Woho akɔ wâmɛ, yoho yoleki dimɛna yakokaso tombola Jehowa ndo mɛnya lowando ele kimɔka ‘weshasha.’ Lo mɛtɛ, oko weso Akristo, sho bu l’ɛse k’Ɛlɛmbɛ wa Mɔsɛ, ndo sho bu l’ɔkɛndɛ wa nambolaka elambo wa waa nyama kana w’eponga. (Kolosai 2:14) Koko, ɔpɔstɔlɔ Paulo akakeketsha Akristo w’ase Hɛbɛru ate: “Dia dikambu diandi, tukimoki ulambu wa mandulaka [Nzambi] nshi tshe, uku elua uma lu elomo watetawoka lukumbu landi.” (Heberu 13:15) Lo kamba l’akoka ndo l’ekundji aso dia nambola Jehowa elambo wa lotombo, oyadi l’esambishelo kana ‘l’atei wa nyemba y’anto wotshumani’ y’asekaso ambetawudi, sho koka mɛnya lowando l’oma k’ɛse otema le Shɛso lele l’olongo, Jehowa Nzambi. (Osambu 26:12) Lo salaka ngasɔ, kakɔna kakokaso mbeka lo toho takɛnyaka ase Isariyɛlɛ lowando lawɔ le Jehowa?
12. Lo kɛnɛ kendana l’ɔkɛndɛ aso w’Okristo, kakɔna kakokaso mbeka lo dikambo dia yɛdikɔ yendana l’etenyi ka dikumi?
12 Ntondotondo, oko wɛnyiso, yɛdikɔ yendana l’etenyi ka dikumi komonga yɛdikɔ y’ɔnɛ naka onto alanga; ose Isariyɛlɛ tshɛ aki l’ɔkɛndɛ wa kimɔ etenyi ka dikumi. Oko weso Akristo, tekɔ l’ɔkɛndɛ wa sambishaka ndo wa mbɔtɔka lo nsanganya y’Akristo. Elimu ɛsɔ bu w’ɔnɛ naka lalanga layosambishaka kana layɔtɔka nsanganya. Yeso akate lo prɔfɛsiya kande ka woke kendana la nshi y’ekomelo ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14; 28:19, 20) Lo kɛnɛ kendana la nsanganya y’Akristo, ɔpɔstɔlɔ Paulo akasambiyama dia funda ate: “Tukananeli untu l’untu dia ntomboshanya lu ngandji la lu elimu w’ololo. Tatukimoki nsangana kame, uku eli etshelu k’amotshi, keli tukikitshanyaki. Tuleki ntsha okone, ne dia [t]ambena [sh]ati: lushi lako laya suki.” (Heberu 10:24, 25) Sho mɛnyaka lowando laso le Jehowa etena ketawɔso l’ɔngɛnɔngɛnɔ tshɛ ɔkɛndɛ aso wa sambisha, wa mbetsha ndo wa nsanganaka kâmɛ l’anangɛso mbala la mbala lo nsanganya ya l’etshumanelo, lo mbɔsa awui akɔ oko diɛsɛ ndo oko nɛmɔ.
13. Wetshelo akɔna wakondjaso lo yɛdikɔ yendana la weshasha wa la lolango ndo yɛdikɔ ya tatshikaka washa amɔtshi l’ekambɔ?
13 Ndo nto, sho koka kondja wahɔ lo sɛdingola toho tokina tohende takakokaka ase Isariyɛlɛ mɛnya lowando lawɔ, toho takɔ tohende ko weshasha wa la lolango la otshikelo wa washa amɔtshi l’ekambɔ. Otshikitanyi l’etenyi ka dikumi kaki la lofulo lakahombamaka, weshasha wa la lolango ndo otshikelo wa washa amɔtshi l’ekambɔ komongaka la lofulo shikaa lakawahombaka kimɔ. Koko, lowando laki l’okambi waki Jehowa l’otema ande mbakahombaka mbôtshutshuya dia sala dui sɔ. Lo woho akɔ wâmɛ, kânga mbeyaso di’olimu w’esambishelo ndo wɔtwɛlɔ wa lo nsanganya y’Akristo ekɔ ɔkɛndɛ w’ohomba efula le okambi tshɛ waki Jehowa, onde sho kotshaka ɛkɛndɛ ɛsɔ l’otema aso tshɛ ndo la yimba ya ndjâsha? Onde sho mbaɔsaka oko diaaso dia mɛnya lowando laso l’oma k’ɛse otema lo kɛnɛ tshɛ katosalɛ Jehowa? Onde sho ndjashaka l’elimu ɛsɔ lo yɛdikɔ yɛdimi l’akoka aso aha l’onto totshutshuya? Ko kana, onde sho mbɔsaka elimu akɔ paka oko ɛkɛndɛ wahombaso kotsha? Ɔsɔ mɛtɛ ekɔ wembola wahombaso kadimola l’onto ndo l’onto. Lo kɛnɛ kendana la dikambo sɔ, ɔpɔstɔlɔ Paulo mbutaka ɔnɛ: “Keli untu l’untu ediki ulimu andi, ku ndi ayuyala la dikambu dia ndjatumbula ndame, aha lu dikambu dia antu akina.”—Ngalatiya 6:4.
14. Kakɔna katɔlɔmba Jehowa l’olimu wokambɛso?
14 Jehowa Nzambi mbeyaka dimɛna akambo wele laso. Nde mbeyaka elelo aso. Nde ngɛnangɛnaka elambo wawolambola ekambi ande la lolango tshɛ, oyadi wa weke kana wa tshitshɛ. Ndo nde halongamɛ dia sho tshɛ kimɔ yɛdikɔ yakɔ yâmɛ oleki kɛnɛ kokukiso mbosha. Etena kakandatɛkɛtaka dia weshasha wa l’emunyi, ɔpɔstɔlɔ Paulo akatela Akristo wa la Kɔrɛtɔ ate: “Naka lulangu leko, layetawoma uku yediko le untu, aha yediko yaha la ndi.” (2 Koreto 8:12) Tɔndɔ sɔ mbɔtɔnɛka dimɛna l’olimu wakambɛso Nzambi. Kɛnɛ katshutshuya Jehowa dia mbetawɔ olimu aso bu efula k’olimu wakambaso koko yoho yakambaso olimu akɔ, mbut’ate l’ɔngɛnɔngɛnɔ ndo l’otema aso tshɛ.—Osambu 100:1-5; Kolosai 3:23.
Tonge ndo tolame yimba y’ombatshi mboka
15, 16. (a) Diɔtɔnganelo diakɔna diele lam’asa olimu w’ombatshi mboka la lowando? (b) Ngande wakoka wanɛ wele bu l’akoka wa kamba olimu w’ombatshi mboka mɛnya yimba y’ombatshi mboka?
15 Yoho ya dimɛna efula ya mɛnya lowando laso le Jehowa ele kamba olimu wa lo tena tshɛ. Oma lo ngandji kele lawɔ le Jehowa ndo oma lo lowando lele lawɔ lo ngandji kande ka mamba, ekambi efula waki Nzambi wakasale etshikitanu wa weke lo nsɛnɔ yawɔ dia ndjatshungwɛ etena ka nyomoleka kambɛ Jehowa olimu. Amɔtshi wekɔ l’akoka wa kamba oko ambatshi mboka wa pondjo, lo mbetshaka wenya 70 ngɔndɔ tshɛ l’olimu w’esambishelo ka lokumu l’ɔlɔlɔ ndo wa mbetsha anto akambo wa mɛtɛ. Akina wele la wekamu efula nɛ dia ekakatanu wotshikitanyi wele lawɔ, kambaka mbala mɔtshi oko ambatshi mboka wa tshanda lo sambishaka wenya 50 lo ngɔndɔ.
16 Kayotota dikambo dia ekambi waki Jehowa efula wele bu l’akoka wa kamba oko ambatshi mboka wa pondjo kana wa tshanda? Vɔ koka mɛnya lowando lawɔ lo monga ndo namaka yimba y’ombatshi mboka. Woho akɔna na? Lo keketshaka wanɛ wakoka kamba oko ambatshi mboka, lo kɔkɔmiya l’etema w’anawɔ nsaki ka kamba olimu w’ombatshi mboka lo lɔsɛnɔ lawɔ, ndo lo sambishaka l’etete lo ndjela akoka awɔ. Kɛnɛ kashaso l’olimu w’esambishelo nemanɛka efula la lowando lele l’etema aso lo kɛnɛ kakatosalɛ Jehowa, lo kɛnɛ katosalɛnde ndo lo kɛnɛ kayondotosalɛ.
Tɛnya lowando lo kamba la ‘diangɔ diaso di’oshinga wolo’
17, 18. (a) Ngande wakokaso mɛnya lowando la ‘diangɔ diaso di’oshinga wolo’? (b) Kakɔna kakate Yeso lo kɛnɛ kendana la woshasha waki wadi aki odo, ndo lande na?
17 Tukedi 3:9 mbutaka ɔnɛ: ‘Tɔlɛmiya Jehowa la diangɔ diaso di’oshinga wolo ndo l’ɛlɔnga tshɛ w’oma lo dikambɔ diaso.’ Ekambi waki Jehowa hawoyokimɔ etenyi ka dikumi. Ɔnkɔnɛ, ɔpɔstɔlɔ Paulo akafundɛ etshumanelo ka la Kɔrɛtɔ ate: “Untu l’untu akimo uku akandati l’utema andi, aha la lunyangu, aha la khudu, ne dia [Nzambi] nangaka untu latukimoka l’ongenongeno.” (2 Koreto 9:7) Mbisha weshasha wa la lolango dia sukɛ olimu w’esambishelo ka Diolelo wa l’andja w’otondo mɛnyaka nto lowando laso. Oko wakasalaka Akristo wa ntondo, lowando laso l’oma k’ɛse otema totshutshuyaka dia salaka ngasɔ tena la tena, mbala mɔtshi lo kitshaka yangɔ mɔtshi lomingu la lomingu l’omamu.—1 Koreto 16:1, 2.
18 Aha lofulo lashaso kakɛnɛmɔla lowando laso le Jehowa, koko yimba yatotshutshuya dia kimɔ. Kɛsɔ mbakɛnyi Yeso etena kakadjaka anto weshasha l’ɔshɛtɛ wa weshasha waki lo tɛmpɛlɔ. Etena kakɛnyi Yeso wadi aki odo kanga wola adja “ekinga ehende loko,” nde akate ate: “Wadi aki udu, kanga wula, akadjisha ushasha wuleki eshasha wudjishawo, vo tshe. Ne dia vo wakadjisha eshasha awo uma l’efula ka diango dieli la wo; keli ndi, uma lu wula andi, mbudjishandi kene tshe kaki la ndi, kakandahumbi ndjakimanyia.”—Luka 21:1-4.
19. Bonde kele ekɔ ohomba sho nyomɔsɛdingola dimɛna toho tɛnyaso lowando laso?
19 Wekelo ɔnɛ wa woho wakokaso mɛnya lowando, watotshutshuya dia sho nyomɔsɛdingola toho tɛnyaso lowando laso. Onde sho kokaka pamia elambo aso wa lotombo le Jehowa ndo woho wasukɛso olimu wa l’andja w’otondo la diangɔ diaso dia l’emunyi? Lo sala kɛnɛ kɛdimi l’akoka aso, sho koka monga l’eshikikelo ɔnɛ Shɛso ka ngandji Jehowa ayɔngɛnangɛna efula nɛ dia tekɔ lo mɛnya lowando sho shoamɛmɛ.
Onde wɛ akohɔ?
• L’ɔtɛ w’ɛkɔkɔ akɔna wahombaso monga la lowando le Jehowa?
• Wetshelo akɔna wambotokondja lo yɛdikɔ yendana l’etenyi ka dikumi, weshasha wa la lolango ndo yɛdikɔ ya tatshikaka washa amɔtshi l’ekambɔ?
• Ngande wakokaso monga la yimba y’ombatshi mboka?
• Ngande wakokaso kamba la ‘diangɔ diaso di’oshinga wolo’ dia mbisha Jehowa losaka?
[Esato wa lo lɛkɛ 28]
“Mboya tshe k’ololo la k’uluwanyi katuyalaka uma l’ulungu”
[Esato wa lo lɛkɛ 31]
Elambo akɔna wakokaso nambolaka?