Tokeketshanake lam’asaso
1 Ɔpɔstɔlɔ Paulo akasale tshɛ kakandakoke sala dia keketsha anyande ambetawudi. (Etsha 14:19-22) Woho akɔ wâmɛ mbele, sho ndjakiyanyaka etena kahomana anangɛso la ekakatanu wa wolo ndo sho kombolaka mbakimanyiya. Bible mɛnyaka dia sho tshɛ pombaka ndjasha le anto akina, koko aha paka dikumanyi to. (Romo 15:1, 2) Tɔsɛdingole toho tohende takokaso kitanyiya dako dioludi la ngandji nɛ diata ɔnɛ: ‘Nyotetemale la sambana ndo la keketshana lam’asanyu.’—1 Tes. 5:11.
2 Teye ehomba w’anto akina: Ɔtɛkɛta wa Nzambi mbutaka dia Dɔrɔka “akatshaka akambu w’ololo efula ndu akambu wa ketshi.” (Etsha 9:36, 39) Nde akeye anto waki lo dihombo ndo akasale kɛnɛ kakinde la akoka wa sala dia mbakimanyiya. Nde mɛtɛ akatotshikɛ ɛnyɛlɔ ka dimɛna efula! Wɛ mbeyaka mbeya dia osombe ɔmɔtshi ekɔ l’ohomba wa onto mɛɛmbaka oya lo nsanganya. Kana ombatshi mboka ɔmɔtshi mbeyaka pomba onto lotshindɛ l’esambishelo la dikɔlɔ dia wikɛndɛ ɔmɔtshi. Naka wɛ ambɛna onto ɔmɔtshi lele lo dihombo ndo ambokimanyiya onto akɔ, kete nde mɛtɛ ayokeketshama efula!
3 Asawo wa lo nyuma: Sho koka nto keketsha anto akina oma lo ɛtɛkɛta aso. (Ef. 4:29) Ekumanyi kɛmɔtshi kambohokɔ akambo akate ate: “Naka wɛ nangaka monga onto lakeketsha akina, kete tɛkɛtaka awui wa lo nyuma. Dia tatɛ sawo diakeketsha, wɛ mbeyaka kamba la dimbola dia wɔdu diele oko: ‘Ngande wakayeke akambo wa mɛtɛ?’ ” Yasha la otema ɔtɔi le akɛnda wa lo etshumanelo. Yasha dikambo dia wanɛ wambɔkɔmɔ ndo wele ondo wekɔ ɛsɔnyi. (Tuk. 12:25) Tetawɔke dia asawo wendana la tɔkɛnyɔ ta lo andja ɔnɛ kɔsɛ wenya wahombayɛ mbetsha lo asawo wa lo nyuma wɛ la anyayɛ ambetawudi.—Romo 1:11, 12.
4 Ko kakɔna kakokayɛ mbuta dia keketsha anto akina? Lo wadielo ndo wekelo ayɛ wa Bible w’onto ndamɛ, onde wɛ akatane tɔndɔ dimɔtshi diakafudia ngandji ndo lowando layɛ otsha le Jehowa atete edja? Onde wɛ akakeketshama oma lo dikambo dimɔtshi diakayoke lo sawo dimɔtshi dia lo sɛkɛ kana lo wekelo wa Tshoto y’Etangelo? Kana onde otema ayɛ wakanandema oma lo ɛnyɛlɔ kɛmɔtshi kakeketsha mbetawɔ? Naka wɛ mbɔsaka awui wa lo nyuma la nɛmɔ, kete wɛ ayongaka nshi tshɛ la dui dimɔtshi diakeketsha dia kahana la anto akina.—Tuk. 2:1; Luke 6:45.
5 Nyɛsɔ tokeketshanake lam’asaso lo mbishanaka ekimanyielo k’oshika ndo lo kambaka dimɛna la nemi yaso.—Tuk. 12:18.