Kakɔna ketshaso lo dihole dia ntondo?
1 Ngande wayoyokadimola lo dimbola sɔ? Lo mɛtɛ, sho tshɛ kombolaka mbetsha wahɔ wa Diolelo lo dihole dia ntondo. (Mat. 6:33) Koko, sho koka ndjambola ɔnɛ: ‘Onde ɛsɔnwɛlɔ ami mɛnyaka woho w’onto wemi?’ Bible tokeketshaka dia sho ‘tetemala mɛnya weho w’anto weso.’ (2 Kor. 13:5) Ngande wakokaso ndjaɛnya dia tekɔ lo mbetsha wahɔ wa Diolelo lo dihole dia ntondo?
2 Woho wakambaso la wenya aso: Sho kokaka tatɛ lo sɛdingola woho wakambaso la wenya aso. (Ef. 5:15, 16) Wenya engana wetshaso lomingu tshɛ dia sawola la anto akina, dia menda televiziɔ, dia kamba la Ɛtɛrnɛtɛ kana dia mumuya? Naka sho funda lofulo la wenya wetshaso lo sala awui asɔ ndo mbɛdika la lofulo la wenya wetshaso dia sala awui wa lo nyuma, kete sho mbeyaka mamba heyama. Onde sho kambaka wenya ekina wa lâdiko la oyango wa kondja lomombo l’efula lo dihole dia kambaka olimu w’ekila? Mbala ngana yetshaso nsanganya kana olimu w’esambishelo dia mɛngɔla lo wikɛndɛ?
3 Toshikikɛ awui woleki ohomba: Efula ka l’atei aso kema la wenya efula wa sala oseka dikambo tshɛ dialangawɔ sala. Diakɔ diele, dia mbetsha wahɔ wa Diolelo lo dihole dia ntondo, sho pombaka shikikɛ awui woleki ohomba lo lɔsɛnɔ ko oma lâsɔ kongɛ dia ndjaombɛ etena ka sala ‘awui woleki ohomba.’ (Fil. 1:10) L’atei w’awui asɔ mbele ndo mbeka Ɔtɛkɛta wa Nzambi, sambisha, kokɛ nkumbo ndo mbɔtɔka lo nsanganya y’Akristo. (Osam. 1:1, 2; Romo 10:13, 14; 1 Tim. 5:8; Heb. 10:24, 25) Awui akina wele oko sutshasutsha demba ndo kɛnya tɔkɛnyɔ la wɛdimo ekɔ ohomba. (Mako 6:31; 1 Tim. 4:8) Koko awui wele kema ohomba efula asɔ hawohombe mbeta lo dihole dia ntondo.
4 Ɔlɔngɔlɔngɔ ɔmɔtshi w’Okristo akayange woho wa mbetsha wahɔ wa Diolelo lo dihole dia ntondo lo sala olimu wa lo tena tshɛ lo dihole dia mbɔtɔ kalasa ya lâdiko l’oyango wa ndjonga l’olimu wa l’emunyi wa falanga efula. Nde akeke ɔtɛkɛta okina ndo akonɔ dia tokamba lɛnɛ aki ohomba efula. Nde akate ate: “Lekɔ lo nsɛna nshi yoleki dimɛna ya lo lɔsɛnɔ lami lanɛ. Olimu w’esambishelo keketshakami efula! Dimi kombolaka dia ɔlɔngɔlɔngɔ tshɛ sala woho ɔnɛ ndo mboka woho wokami. Ndoko koleki kambɛ Jehowa la kɛnɛ tshɛ kele laso.” Eelo, mbetsha Diolelo lo dihole dia ntondo telaka ɛtshɔkɔ, koko kɛnɛ koleki ohomba ele, dui sɔ ngɛnyangɛnyaka Jehowa, Shɛso lele l’olongo.—Heb. 6:10.