Tokoya Kristo l’olimu aso w’esambishelo
1 Yeso akatotshikɛ ɛnyɛlɔ ka sho ndjela l’olimu aso w’esambishelo. Ngandji k’efula kakandokaka Nzambi ndo anto kakɛnama lo waaso efula ndo lo toho efula. Nde aketshaka akanga a memakana akambo wa mɛtɛ ndo akasalaka awui efula wɛnya ngandji kande ka lɔsɛngɔ kakandokaka wanɛ wakasowaka ndo wakahɛnyahɛnyamaka.—Mat. 9:35.
2 Ɛnyɛlɔ ndo wetshelo waki Yeso: Yeso kondjasha lo awui wa pɔlitikɛ kana lo elimu w’anyanya waki la wahɔ lo tshunda. Nde kombetawɔ di’eyango ekina mbêkola yimba ndo tshidia olimu ande wakaleke ohomba. (Luka 8:1) Nde akayasha tshɛ lo esambishelo ka lokumu l’ɔlɔlɔ la Diolelo dia Nzambi diele ehomɔ kâmɛ kayokandola ekakatanu w’anto lo pondjo. Yeso aki la olimu efula wa sala, koko nde komonga la etena k’efula ka kamba olimu akɔ. Etena kakalange anto wa la Kapɛrnauma dia Yeso tshikala lɛkɔ, nde akatɛ ambeki ande ate: “Tutshu l’ahuli akina . . . dia dimi ntusambisha ndu leko, ne dia dikambu diako mbakamayi.”—Mako 1:38.
3 L’ɔkɔngɔ wa nde mbetsha ambeki ande, Yeso akâtome ndo akawasha wetshelo wa shikaa ɔnɛ: “Kanyutasambishaka nyati: Diulelu dia l’ulungu diaya suki.” (Mat. 10:7) Nde aketsha ambeki ande dia vɔ pombaka mbetsha wahɔ wa Diolelo lo dihole dia ntondo lo nsɛnɔ yawɔ. (Mat. 6:33) Ɛtɛkɛta wa komelo wakatɛ Yeso ambeki ande la ntondo ka nde mbudɛ l’olongo mɛnyaka hwe kɛnɛ kakawahombe sala. Nde akate ate: “Okone nyutshu, nyete [anto wa lo] wedja tshe ambeki.”—Mat. 28:19.
4 Ohomba wa Diolelo dia Nzambi: Dui dioleki ohomba diakasawolaka Yeso l’anto ele dia Diolelo dia Nzambi ndo nde akakeketsha ambeki ande dia vɔ ndjela ɛnyɛlɔ kande. Welo wadja anto dia kandola ekakatanu w’anto wambokita tatala. (Jer. 10:23) Paka Diolelo dia Nzambi to mbayokidia lokombo laki Nzambi ndo tshungola anto lo pondjo. (Mat. 6:9, 10) Mbetsha anto “wakhuma akhumu ndu walela, ne dia akambu tshe wa wononyi [watshama]” akambo wa mɛtɛ wa Diolelo, mbâkimanyiyaka dia vɔ monga la lɔsɛnɔ l’ɔngɛnɔngɛnɔ oma ko kakianɛ ndo kukutɛ elongamelo ka shikaa kendana la nshi yayaye.—Ezek. 9:4.
5 Yeso ekɔ lo tetemala ndjasha l’esambishelo ka lokumu l’ɔlɔlɔ la Diolelo dia Nzambi ndo nde toshikikɛka dia ayotosukɛ. (Mat. 28:20) Polo lo yɛdikɔ yakɔna yahombaso mbɔtɔnganyiya olimu aso w’esambishelo la ɛnyɛlɔ kakatotshikɛ Yeso? (1 Pet. 2:21) Lo nshi y’ekomelo ya pâ efula nyɛ, nyɛsɔ tosale tshɛ kakokaso sala dia ndjela ɛnyɛlɔ kakatotshikɛ Yeso l’olimu w’esambishelo nna lo nna!