Tatohɛke wanɛ wahayosambisha

1. Lande na kahombaso keketsha wanɛ wahayosambisha?

¹ Onde wɛ mbeyaka onto ɔmɔtshi lahayosambisha? Ondo nde ambotshika sangana la etshumanelo ndo ambotakɔ mboka. Ondo wɛ akahomana la onto la ngasɔ etena kakiyɛ l’esambishelo ka lo luudu la luudu. Hatohombe mbohɛ di’onto la woho ɔsɔ êke ɔnangɛso kana kadiyɛso ka lo nyuma. Sho pombaka mbôshikikɛ dia sho mbôkaka ngandji ndo nangaka mbokimanyiya dia nde kalola l’etshumanelo ndo le ‘olami ndo omendji wa anima aso.’​—1 Pet. 2:25.

2. Ngande wakokaso keketsha onto lahayosambisha?

² Toyasha le wɔ: Mbelɛ onto lahayosambisha lo telefɔnɛ kana ntshɔ towenda mbeyaka mboshikikɛ dia sho hatowohe. Kakɔna kakokaso mbotɛ? Tayonga kiɔkɔ y’ekeketshelo le nde naka sho mbêwoya dia takakanyiyaka dikambo diande. Tonge la sawo diakeketsha ndo dia dimɛna. (Fil. 4:8) Sho mbeyaka mbotɛ dui dimɔtshi diakatangɛnangɛna lo losanganya lɔmɔtshi leke ka salema. Sho kokaka nto mbelɛ lo losanganya lɔmɔtshi la l’etshumanelo layaye kana lo losanganya la woke ndo mbotɛ dia tayowombɛ dihole kana tayowosha dikuta dia futa mutuka.

3. Ngande wakayotatɛ kadiyɛso kɛmɔtshi sambisha nto?

³ Lo ɛtshi ka nkɛtɛ kɛmɔtshi wakatane kadiyɛso kɛmɔtshi kakasale ɛnɔnyi ndekana 20 aha la sambisha. Kânga mbakinde kombetawɔ mbeka Bible, kadiyɛso kakawɛnyi akayaka mbala la mbala dia ndjowenda ndo ndjotshikɛ periodikɛ y’eyoyo. L’ɔkɔngɔ wa losanganya la distrikɛ lɔmɔtshi, kadiyɛso kɛsɔ akakɛtshanya la kadiyɛso kaki kosambishaka nto kɛsɔ akambo amɔtshi w’ohomba waki lo losanganya la woke ndo l’ɔkɔngɔ diko kadiyɛso kakɔ akayotatɛka sambisha nto.

4. Ngande wahombaso mbɔsa onto lambotatɛ ndja nto lo nsanganya?

⁴ Etena kakalola onto lahayosambisha oya l’etshumanelo: Naka ɔnangɛso kana kadiyɛsɔ kahayosambisha ambotatɛ ndja lo nsanganya, ngande wahombaso mbɔ̂sa? Ngande wakɔsɛ Yeso ambeki ande l’ɔkɔngɔ wa vɔ mbotshika lo tshanda mɔtshi? Nde akawaelɛ la wangasanu tshɛ ate “analingu” ndo aki la wɛkamu le wɔ. Nde akawasha ndo ɔkɛndɛ ɔmɔtshi w’ohomba efula. (Mat. 28:10, 18, 19) Yema tshitshɛ l’ɔkɔngɔ wa lâsɔ, vɔ wakayotatɛ ndjasha dia mbewoya lokumu l’ɔlɔlɔ ‘aha la mpekɔ.’​—Etsha 5:42.

5. Shila awui amɔtshi wahombaso mbutɛ dikumanyi lo kɛnɛ kendana la onto lahayosambisha.

⁵ La ntondo ka nɔmba onto ɔmɔtshi lahayosambisha dia sho mbeka la nde Bible kana la ntondo ka nɔmba ɔnangɛso kana kadiyɛso kɛmɔtshi kahayosambisha aya edja efula dia nde totshindɛ l’olimu w’esambishelo, sho pombaka nyanga ekimanyielo le dikumanyi. Naka tambohomana la opandjudi wahayosambisha lo ɛtshi kaso ka nkɛtɛ, kete sho pombaka mbewoya dikumanyi dia vɔ mbosha ekimanyielo kahombama.

6. Ɔngɛnɔngɛnɔ akɔna wayotokondja lo kimanyiya wanɛ wahayosambisha?

⁶ Oko wɛnya Bible hwe, paka wanɛ wasaka esakelo kawɔ ka lowango polo l’ekomelo mbayoshimbamɛ. (Mat. 24:13) Ɔnkɔnɛ, todjake wanɛ tshɛ wakatakana kana wakatakɔ mboka yimba. Naka la lotutsha tshɛ sho kɛnɛmɔla ngandji kaki Jehowa lo ndjasha l’otema ɔtɔi le wanɛ wahayosambisha, kete tayɔngɛnangɛna dia mɛna onto tatɛ nto sala olimu w’ekila kâmɛ la so.​—Luka 15:4-10.