Tâkimanyiya dia vɔ kalola aha la tshimbatshimba!
“Le na atshosu? We keli la aui wa lumu la pundju.”—JOA. 6:68.
1. Kakɔna kakate Petero etena kakatshike ambeki efula Yeso?
MBALA kɛmɔtshi, ambeki waki Yeso Kristo efula wakotshike l’ɔtɛ wa wetshelo ande ɔmɔtshi. Nde akambola apɔstɔlɔ ande ate: “Ndu nyu mbalanga ntsho?” Petero akokadimola ate: “Khumadiondjo, le na atshosu? We keli la aui wa lumu la pundju.” (Joa. 6:51-69) Ndoko dihole diakawahombe ntshɔ. Ɔtɛmwɛlɔ w’ase Juda komonga “la aui wa lumu la pundju,” ndo awui asɔ hawokoke tanema mɛtɛ lo Babilɔna ka Woke, mbuta ate tshunda dia lo andja w’otondo di’ɛtɛmwɛlɔ wa kashi. Le onto tshɛ lakatakɔ mboka oma lo lemba l’ɛkɔkɔ waki Nzambi koko lakombola ngɛnyangɛnya Jehowa, ‘ɔnɛ ekɔ etena ka nde memɔ’ ndo kalola lo lemba l’ɛkɔkɔ.—Romo 13:11.
2. Kakɔna kahombaso mbohɔka lo kɛnɛ kendana la awui wa kilombo kana wa lo sheke?
2 Jehowa akayakiyanyaka dikambo dia ɛkɔkɔ wakashishɔ wa lo Isariyɛlɛ. (Adia Ezekiyele 34:15, 16.) Woho akɔ wâmɛ mbele, dikumanyi di’Akristo wekɔ la nsaki ndo l’ɔkɛndɛ wa kimanyiya anto wele oko ɛkɔkɔ wambotakɔ mboka. Naka wambɔlɔmba opandjudi ɔmɔtshi dia mbeka Bible la onto ɔmɔtshi lambɔla lo nyuma lakombola kimanyiyama, kakɔna kakoka salema naka opandjudi ɔsɔ ambeya di’onto akɔ akasale pɛkato ka woke? Lo dihole dia mbisha alako lo kɛnɛ kendana la awui wa kilombo kana wa lo sheke, opandjudi pombaka mbotɛ dia nde totɛ dikumanyi dikambo diakɔ. Naka nde hasadi ngasɔ, kete opandjudi ndamɛ pombaka mbewoya dikumanyi.—Lew. 5:1; Ngal. 6:1.
3. Kakɔna kakasale pami kaki l’ɛkɔkɔ 100 etena kakandɛnyi ɔkɔkɔ wakashishɔ?
3 Lo sawo dia mbala ketshi, takatɛkɛta dikambo dia wɛɛla waki Yeso wendana la pami kaki l’ɛkɔkɔ 100. Etena kakashishɔ ɔkɔkɔ ɔmɔtshi, nde akatshike ɛkɔkɔ 99 dia toyanga wɔnɛ wakashishɔ. Pami kɛsɔ akangɛnangɛna efula etena kakandawɛnyi! (Luka 15:4-7) Sho mongaka la ɔngɛnɔngɛnɔ wa ngasɔ etena kakalola ɔkɔkɔ ɔmɔtshi waki Nzambi wakashishɔ. Ngandji tshutshuyaka dikumanyi ndo anto akina wa lo etshumanelo dia vɔ ntshɔ tembola onto lambɔla lo nyuma. Vɔ lawɔ ngɛnangɛnaka etena kɛnawɔ onto akalola oya lo lemba l’ɛkɔkɔ ndo kakondjande osukɔ, ekokelo ndo ɛtshɔkɔ waki Nzambi. (Euh. 33:27; Osam. 91:14; Tuk. 10:22) Kakɔna kakokawɔ sala dia kimanyiya onto ɔmɔtshi dia nde kalola lo etshumanelo?
4. Wetshelo akɔna wakondjaso oma lo Ngalatiya 6:2, 5?
4 Ondo vɔ kokaka keketsha onto dia kalola oya lo etshumanelo lo mbɛnya la ngandji tshɛ dia Jehowa nangaka ɛkɔkɔ Ande ndo nde mbalɔmbaka paka kɛnɛ kakokawɔ sala. Ekimanyielo kɛsɔ mendanaka nto la mbeka Bible, mbɔtɔka lo nsanganya y’Akristo ndo sambisha lokumu l’ɔlɔlɔ la Diolelo. Mbeyaka monga ohomba mbâdiɛ Ngalatiya 6:2, 5 ndo mɛnya dia Akristo kokaka kimanyiya asekawɔ dia mɛmba wetsho woleki, koko “untu l’untu ayemba wutshu andi” wendana la ɛkɛndɛ wa lo nyuma. Ndoko onto lakoka monga la kɔlamelo le Nzambi lo dihole diaso.
Onde ‘ekiyanu wa lo lɔsɛnɔ’ mbambowaɔdia lo nyuma?
5, 6. a) Lande na kele ekɔ ohomba sho mpokamɛ la yambalo tshɛ etena katotɛ osekaso ombetawudi lambɔla lo nyuma akambo wele lande? b) Ngande wakokaso kimanyiya anto wambɔla lo nyuma dia vɔ mbeya dia tshika dia sangana l’ekambi waki Nzambi bu dui dia lomba?
5 Dikumanyi ndo apandjudi akina wambotshunda lo nyuma pombaka mpokamɛ la yambalo tshɛ etena kawatɛ onto lambɔla lo nyuma akambo wele la nde dia vɔ mbeya woho wambokimanyiya. Tɔshi dia wɛ ekɔ ekumanyi kɛmɔtshi kotshwe dia tenda atshukanyi amɔtshi wambɔla lo nyuma l’ɔtɛ wa ‘ekiyanu wa lo lɔsɛnɔ.’ (Luka 21:34) Ekakatanu wendana la ekondjelo kana ohamelo w’ɛkɛndɛ wa lo nkumbo mbeyaka mbakonya dia vɔ mbɔla lo nyuma. Vɔ mbeyaka monga l’ohomba w’ekimanyielo, koko wɛ mbeyaka mbaɛnya dia hawotokondja ekimanyielo kakɔ lo ndjanganya l’etshumanelo. (Adia Tukedi 18:1.) Wɛ mbeyaka mbambola la yewo ɔnɛ: “Onde nyamboleka monga l’ɔngɛnɔngɛnɔ tatɛ lam’akanyatshike ndja lo nsanganya? Onde lɔsɛnɔ la lo nkumbo kanyu lamboleka monga dimɛna? Onde ɔngɛnɔngɛnɔ wa Jehowa wekekɔ longele lanyu?”—Neh. 8:10.
6 Kana yimba la ambola asɔ mbeyaka kimanyiya wanɛ wambɔla lo nyuma dia mbeya dia woho wahawayotshɔ lo nsanganya ya lo etshumanelo ambokitshakitsha lonyuma ndo ɔngɛnɔngɛnɔ awɔ. (Mat. 5:3; Heb. 10:24, 25) Kokaka mbakimanyiya dia vɔ mbeya dia woho wambowotshika sambisha lokumu l’ɔlɔlɔ ambashishɛ ɔngɛnɔngɛnɔ. (Mat. 28:19, 20) Ko, naa dui dia lomba diahomba sala onto lambɔla lo nyuma?
7. Kakɔna kakokaso keketsha wanɛ wakatakɔ mboka dia vɔ sala?
7 Yeso akate ate: “Nyuyalamaki, ne dia etema anyu watukuyala wutshu la dishi, la edjwelu ka wanu la edinganu wa lumu lone . . . Keli nyendaki, nyolombaki l’osengosengo dia nyu mpanda lu akambu aso tshe wayuya.” (Luka 21:34-36) Wanɛ wakatakɔ mboka ndo walanga monga l’ɔngɛnɔngɛnɔ waki lawɔ ntondo, kokaka keketshama dia nɔmba dia kondja nyuma k’ekila ndo ekimanyielo kaki Nzambi ndo dia vɔ sala akambo lo yoho yɔtɔnɛ la alɔmbɛlɔ awɔ.—Luka 11:13.
Onde onto kana dui dimɔtshi mbambatakanya?
8, 9. Ngande wakoka ekumanyi kana yimba l’onto lambotakana?
8 Lam’ele anto kema kokele, ekakatanu tombaka ndo kɛsɔ mbeyaka takanya anto amɔtshi. Anto amɔtshi wakatakana etena kakasale onto ɔmɔtshi lalɛmiyama l’etshumanelo dui dia kɔlɔ. Naka l’ɔtɛ wa dui dia ngasɔ mbambɔla onto ɔmɔtshi lo nyuma, kete ekumanyi kotshwe towembola kokaka mɛ̂nya dia Jehowa hatakanya ndoko onto. Lâsɔ, lande na kahombande mbetawɔ dia kɛnɛ kakasale onto ndanya diɔtɔnganelo diasande la Nzambi ndo la ekambi Ande? Lo dihole dia sala ngasɔ, shi nde pombaka tetemala kambɛ Nzambi, ele l’eshikikelo dia “Umbadi wa kete tshe” mbeyaka kɛnɛ keta ndo ayosambola akambo lo yoho ya dimɛna? (Etat. 18:25; Kol. 3:23-25) Naka onto ambotakana lo yoho ya mɛtɛ mɛtɛ ko ambɔkɔ, onde nde hatosala la wolo dia mbetɔ?
9 Lo welo wadjande dia kimanyiya onto dia nde kalola, ekumanyi mbeyaka mbuta dia lam’atete nshi anto amɔtshi ndjɛnaka dia awui wakatakanya bu mɛtɛ ohomba. Lo mɛtɛ, ondo dui diakatakanya diaya bu. Naka onto ɔsɔ akatakana l’ɔtɛ wakandalongola lohango, kete kana yimba lo dɔmbɛlɔ mbeyaka mbokimanyiya dia ndamɛ shikikɛ dia nde aki lo mboka ka kɔlɔ ndo nde hahombe mbetawɔ dia lohango lakandalongola mbotakanya.—Osam. 119:165; Heb. 12:5-13.
Onde l’ɔtɛ wa wetshelo ɔmɔtshi?
10, 11. Ekanelo kakɔna kakoka monga ohomba etena kayangaso dia kimanyiya onto lele la eokelo kotshikitanyi ka wetshelo ɔmɔtshi wa lo Bible?
10 Anto amɔtshi mbeyaka tomba oma lo lemba l’ɛkɔkɔ waki Nzambi l’ɔtɛ wahawetawɔ wetshelo ɔmɔtshi wa lo Afundelo. Ase Isariyɛlɛ wakatombe oma lo lɔhɔmbɔ l’Edjibito “wakuhela elimu” wakasale Nzambi lo wahɔ awɔ ndo vɔ ‘kokonga alako ande.’ (Osam. 106:13) Ayonga dimɛna mbohola onto lambɔla lo nyuma dia ‘ɔhɔmbɔ wa kɔlamelo ndo wa kɛsɔ’ ekɔ lo tosha mbo ya ndɛ ya lo nyuma y’amɛna efula. (Mat. 24:45) Ngasɔ mbakeke onto akɔ akambo wa mɛtɛ ntondo. Lâsɔ, lande na kahandayotetemala kɛndakɛnda lo akambo wa mɛtɛ?—2 Joa. 4.
11 Etena kasala ekumanyi la wolo dia kimanyiya wanɛ wambotakɔ mboka, nde mbeyaka tɛkɛta dikambo di’ambeki waki Yeso wakotshike l’ɔtɛ wakiwɔ kombetawɔ wetshelo ande ɔmɔtshi. (Joa. 6:53, 66) Lo pembola diɔtɔnganelo diasawɔ la Akristo ndo la ambeki ande wa kɔlamelo, vɔ wakashisha lonyuma ndo ɔngɛnɔngɛnɔ awɔ. Onde wanɛ wakatshike mbɔtɔ nsanganya ya l’etshumanelo k’Akristo wakatane dihole dikina diele la mbo ya ndɛ ya lo nyuma y’amɛna efula? Ndooko!
Onde vɔ wakasale pɛkato kɛmɔtshi ka woke?
12, 13. Naka onto lakatakɔ mboka ambosuya dia nde akasale pɛkato ka woke, ngande wakoka onto ɔsɔ kimanyiyama?
12 Anto amɔtshi wakatshike sambisha ndo mbɔtɔ lo nsanganya nɛ dia vɔ wakasale pɛkato kɛmɔtshi ka woke. Vɔ mbeyaka fɔnya dia naka vɔ mbisholɛ dikumanyi pɛkato yawɔ, kete vɔ wayotshanyema oma l’etshumanelo. Koko, vɔ hawototshanyema oma l’etshumanelo naka vɔ wambotshika ditshelo diawɔ diahɔtɔnɛ la Afundelo ndo naka wamboyatshumoya l’otema ɔtɔi. (2 Kor. 7:10, 11) Vɔ wayolongɔma ndo dikumanyi wayowasha ekimanyielo ka lo nyuma kele lawɔ ohomba.
13 Naka wɛ ekɔ opandjudi wambotshunda lo nyuma wakalongola ɔkɛndɛ wa kimanyiya onto ɔmɔtshi lambɔla lo nyuma, kakɔna kahombayɛ sala naka nde ambokotɛ dia nde akasale pɛkato ka woke? Oko wakataditshi la diko, lo dihole dia wɛ ndjatambiya lo dikambo sɔ, tɛnde dia nde pombaka totɛ dikumanyi. Naka nde halange mbuta, kete wɛ ayɛnya woho wayakiyanyayɛ dikambo dia lokombo laki Jehowa ndo dikambo dia pudipudi ka lo nyuma k’etshumanelo lo sala akambo lo yoho yɔtɔnɛ la ɛlɔmbwɛlɔ kaki Nzambi lo dikambo sɔ. (Adia Akambu w’Asi Lewi 5:1.) Dikumanyi wayeya woho wa kimanyiya onto tshɛ lalanga kalola ndo nsɛna lo yoho yɔtɔnɛ la lolango laki Nzambi. Nde mbeyaka monga l’ohomba wa lohango la la ngandji. (Heb. 12:7-11) Naka nde ambosuya dia nde akasalɛ Nzambi pɛkato, ambotshika kɔlɔ kakɔ ndo amboyatshumoya l’otema ɔtɔi, kete dikumanyi wayowokimanyiya ndo Jehowa kokaka mbodimanyiya.—Is. 1:18; 55:7; Jak. 5:13-16.
Okalwelo w’ɔna mbelaka ɔngɛnɔngɛnɔ
14. Kɔndɔla wɛɛla waki Yeso wendana la ɔna la lotshito lo ɛtɛkɛta ayɛ hita.
14 Etena kayangande dia kimanyiya ɔkɔkɔ wakatakɔ mboka, onto lele l’ɔkɛndɛ wa mbokimanyiya mbeyaka kamba la wɛɛla waki Yeso wele lo Luka 15:11-24. Lo wɛɛla ɔsɔ, ɔlɔngɔlɔngɔ ɔmɔtshi akatomana sango diande lo yoho ya lɔsɛnɔ la kɔlɔ. L’ekomelo, nde akayohetshaka yoho ya lɔsɛnɔ la mindo laki lande. Nde ekɔ la ndjala, l’olengolengo dia nkumbo kande ndo ambɔsa yɛdikɔ ya kalola lakawɔ! Etena kekende yema etale, she ambolawɔ, ambokumbatɛ la ngandji tshɛ ndo ambolola l’ɔngɛnɔngɛnɔ. Kana yimba lo wɛɛla ɔsɔ mbeyaka tshutshuya onto lambotakɔ mboka dia nde kalola lo lemba l’ɛkɔkɔ. Lam’ele kema edja dikongɛ di’akambo nɛ diayanga ndanyema, nde pombaka ‘kalola la ngelo’ aha la tshimbatshimba.
15. Lande na katakɔ anto amɔtshi mboka oma l’etshumanelo?
15 Anto efula wakatakɔ mboka oma l’etshumanelo hawɔfɔnɛ la ɔna la lotshito tshɛ lo tshɛ. Le amɔtshi, vɔ tatakɔka mboka yema yema oko watanganaka wato yema yema oma lo dibongo. Etema w’anto akina mbeyaka koma wetsho l’ɔtɛ w’ekiyanu wa lo lɔsɛnɔ polo ndo lo vɔ ndjonya yimba lo awui wa lo nyuma. Koko, anto akina mbetawɔka vɔamɛ dia vɔ takanyemaka oma le anto akina wa l’etshumanelo kana vɔ mimɔka nɛ dia vɔ hawetawɔ wetshelo ɔmɔtshi w’oma lo Afundelo. Anto angana ato mbamɔ l’ɔtɛ wa lɔkɛwɔ la kɔlɔ. Koko, alako woshami lo kɛnɛ kendana la awui asɔ tshɛ mbeyaka kokimanyiya dia wɛ kimanyiya wanɛ wambotakɔ mboka l’ɔtɛ w’ɛkɔkɔ ɛsɔ kana ekina dia vɔ kalola la ntondo ka ndjohɔ okanga a kɔngɔlɔ wanyu amboshila.
“Okalwelo w’ɔlɔlɔ, Ɔna!”
16-18. a) Ngande wakakimanyiya ekumanyi kɛmɔtshi ɔnangɛso ɔmɔ lakɔlɛ lo nyuma l’edja k’ɛnɔnyi efula? b) Lande na kakɔlɛ ɔnangɛso ɔsɔ lo nyuma, ngande wakandakimanyiyama, ndo ngande wakandalongɔma l’etshumanelo?
16 Ekumanyi kɛmɔtshi k’Okristo mbutaka ate: “Olui wa dikumanyi wa lo etshumanelo kaso ndjashaka efula dia membola wanɛ wambɔla lo nyuma. Dimi mbohɔka dikambo di’ɔnangɛso ɔmɔtshi lakametsha Bible ndo lakamakimanyiya dia mbeya akambo wa mɛtɛ. Nde akɔlɛ lo nyuma l’edja k’ɛnɔnyi oko 25 ndo nde akatalekaka ntshɔ tsho, ɔnkɔnɛ lakolembetshiya woho wele kamba la atɔndɔ w’oma lo Afundelo akakoke mbokimanyiya. L’ɔkɔngɔ w’etena kɛmɔtshi, nde akatatɛ ndja lo Mbalasa ka Diolelo ndo aketawɔ di’onto ɔmɔtshi nyomeka la nde Bible dia mbokimanyiya dia nde keketsha yɛdikɔ yande ya kalola lo lemba l’ɛkɔkɔ.”
17 Lande na kakɔlɛ ɔnangɛso ɔsɔ lo nyuma? Nde suyaka ate: “Dimi lakayotatɛ ndeka ndjasha l’akambo wa lo andja ɔnɛ oleki lo akambo wa lo nyuma. Oma lâsɔ, lakayotshikaka mbeka, sambisha ndo mbɔtɔ lo nsanganya. Aha la dimi mbeya, lakakakitɔna l’etshumanelo k’Akristo. Koko woho wakayashaka ekumanyi kɛmɔtshi akakimanyiya dia dimi kalola.” Ekakatanu waki l’ɔnangɛso ɔsɔ wakatatɛ kitakita l’ɔkɔngɔ wa nde mbetawɔ di’onto ndjekaka la nde Bible. Nde mbutaka ate: “Lakayeyaka dia kɛnɛ kakamashisha lo lɔsɛnɔ la mi ele ngandji ndo ɛlɔmbwɛlɔ kaki Jehowa ndo k’okongamelo ande.”
18 Ngande wakalongɔma ɔnangɛso ɔsɔ lo etshumanelo? Nde mbutaka ate: “Lakayaoke oko ɔna la lotshito lakatɛkɛta Yeso Kristo. Lo mɛtɛ, kadiyɛso kɛmɔtshi kaya osombe kaki aya ɛnɔnyi 30 wende lo etshumanelo ndo katetemala kambɛ Jehowa la kɔlamelo akambutɛ ate: ‘Okalwelo w’ɔlɔlɔ, Ɔna!’ Dui sɔ diakananda mɛtɛ otema ami. Lakakalola mɛtɛ la ngelo. Ndo dimi nangaka mɛnya lowando lami l’oma k’ɛse otema lo ngandji, waasaso, solo dia lotutsha ndo woho wakayasha ekumanyi kɛsɔ ndo etshumanelo k’otondo oya le mi. Ngandji kokawɔ Jehowa ndo anyawɔ anto akakimanyiya dia dimi kalola lo lemba l’ɛkɔkɔ.”
Tâkeketsha dia vɔ mbɔsa yɛdikɔ aha la tshimbatshimba!
19, 20. Ngande wakokaso keketsha wanɛ wambɔla lo nyuma dia vɔ kalola lo lemba l’ɛkɔkɔ aha la tshimbatshimba, ndo ngande wakokaso mbaɛnya dia Nzambi hatɔlɔmbɛ kɛnɛ kahatakoke sala?
19 Tekɔ lo nsɛna lo nshi y’ekomelo ndo ekomelo ka dikongɛ nɛ di’akambo kamboleka sukana. Omalɔkɔ, tokeketsha wanɛ wambɔla lo nyuma dia vɔ mbɔtɔka lo nsanganya y’Akristo. Tâkeketsha dia vɔ tatɛ mbɔtɔ aha la tshimbatshimba. Towaohole dia Satana ekɔ lo sala la wolo dia ndanya diɔtɔnganelo diasawɔ la Nzambi ndo dia nde mbakonya dia vɔ mbɔsa dia tshika ɔtɛmwɛlɔ wa mɛtɛ ayowakimanyiya dia vɔ kitshakitsha ekakatanu wa lo lɔsɛnɔ. Sho kokaka mbashikikɛ dia paka lo monga ambeki waki Yeso wa kɔlamelo mbakokawɔ kondja ekeketshelo ka mɛtɛ.—Adia Mateu 11:28-30.
20 Tohole wanɛ wambɔla dia Nzambi nongamɛka dia sho sala kɛnɛ kakokaso sala. Etena kakawanya Mariya wa kadiyɔ aki Lazaro lam’akandatɛ Yeso malashi w’oshinga wolo yema tshitshɛ la ntondo ka nyɔi kande, Yeso akate ate: “Nyuwete. . . . Ndi akatshi uku akandeyi ntsha.” (Mako 14:6-8) Yeso akandola wadi aki odo l’ose wola lakakimɔ woshasha waki tshitshɛ efula lo tɛmpɛlɔ. Womoto ɔsɔ nde lawɔ akasale kɛnɛ kakandakoke sala. (Luka 21:1-4) Efula ka l’atei aso tekɔ l’akoka wa mbɔtɔka lo nsanganya y’Akristo ndo wa sambishaka lokumu l’ɔlɔlɔ la Diolelo. La ekimanyielo ka Jehowa, anto efula wambɔla kakianɛ lo nyuma wayokoka sala dikambo sɔ.
21, 22. Dui diakɔna diakokayɛ shikikɛ wanɛ wakalola le Jehowa?
21 Naka ɔkɔkɔ wambotakɔ mboka mbokaka wɔma dia mbɔtɔ lo nsanganya, kete oholande dia ɔngɛnɔngɛnɔ waki etena kakakalola ɔna la lotshito la ngelo. Wanɛ wakalola lo etshumanelo mongaka kiɔkɔ y’ɔngɛnɔngɛnɔ wa ngasɔ. Keketshawɔ dia mbɔsa yɛdikɔ kakianɛ dia ndɔshana la Diabolo ndo ndjasukanya la Nzambi.—Jak. 4:7, 8.
22 Wanɛ wakalola le Jehowa wayolongɔma l’ɔngɛnɔngɛnɔ. (Del. 3:40) Aha la tâmu, akambo wakahomana la wɔ l’olimu waki Nzambi akawashaka ɔngɛnɔngɛnɔ w’efula. Wanɛ wakalola lo lemba l’ɛkɔkɔ waki Nzambi aha la tshimbatshimba wayokondja ɛtshɔkɔ efula lo nshi yayaye!
Ngande wayoyokadimola?
• Ngande wakokayɛ kimanyiya Akristo wakatakana ndo wakɔlɛ lo nyuma?
• Ngande wakokaso kimanyiya onto lakamɔ oma lo lemba l’ɛkɔkɔ waki Nzambi l’ɔtɛ wa wetshelo ɔmɔtshi?
• Ngande wakokaso kimanyiya onto lengenga dia kalola l’etshumanelo?
[Osato wa lo lɛkɛ 13]
Hokamɛ la yambalo tshɛ etena katɛkɛta osekaso ombetawudi wambɔla lo nyuma
[Osato wa lo lɛkɛ 15]
Kana yimba lo wɛɛla waki Yeso w’ɔna la lotshito mbeyaka tshutshuya anto amɔtshi dia vɔ kalola lo lemba l’ɛkɔkɔ