Toyele Kristo lo mɛnyaka kɛnɛmɔ kaso
1. Ngande wɔtɔnɛ ɔtɛ a dui wa losanganya la distrikɛ l’ɔnɔnyi ɔnɛ la tshelo ya kɛnɛmɔla kɛnɛmɔ kaso?
1 Lo dikambo dia Nkum’Olongo Jehowa, Bible mbutaka dia nde ndɔta kɛnɛmɔ. (Osam. 104:1) Yeso akatɛkɛtaka ndo akasalaka akambo nshi tshɛ lo yoho yakashaka She ndo tɛdikɔ tande nɛmɔ. (Joa. 17:4) Onto tshɛ la l’atei aso ayonga la diaaso dia mbokoya Yeso ndo tombola Jehowa lo losanganya laso la distrikɛ layasukana lele l’ɔtɛ a dui ɔnɛ: “Toyele Kristo!”
2. Ngande wele woho wayalɔngɔsɔlaso dia monga lo etenyi tshɛ ka losanganya mbishaka Jehowa nɛmɔ?
2 Ɔtɛmwɛlɔ wele la kɛnɛmɔ: Sho koka mɛnya nɛmɔ diashaso Jehowa lo ndjalɔngɔsɔla dia monga lo difɛstɔ dia lo nyuma diambondotɔlɔngɔsɔlɛ. Onde wɛ ambɔtɛkɛtaka la owandji ayɛ w’olimu ndo amboyalɔngɔsɔla dia mbɔtɔ nshi yakɔ shato ya losanganya, mbidja ndo Lushi la tanu? Onde wɛ amboyalɔngɔsɔla dia komaka la wonya ko tana dihole dia mbidjasɛ ndo memba osambo wa mbɔtwɛlɔ kâmɛ la anto akina ndo ndjela dɔmbɛlɔ dia mbɔtwɛlɔ? Onde wɛ ambɔlɔngɔsɔla yangɔ ya ndɛ yakokayɛ tɔlɛka la midi lo dihole dia losanganya kâmɛ la ananyɔ? Lo etatelo ka etenyi tshɛ ka losanganya, etena katɔlɔmba ɔnɛ lalɔmbɔla dia sho mbɔsa ahole la ntondo ka mishiki tatɛ, sho pombaka pembola asawo aso mbala kakɔ ɔtɔi ndo mbidjasɛ dia ndjela etatelo ka losanganya.
3. Ngande wele mbidja yimba lo losanganya mbishaka ɔtɛmwɛlɔ aso kɛnɛmɔ?
3 Mbidja yimba dimɛna lo losanganya mbishaka nto Shɛso lele l’olongo nɛmɔ. L’ɔkɔngɔ wa nde sɛdingola kɛnɛ kaketaka lo losanganya lɔmɔtshi la distrikɛ lakasalema lo ngelo kawɔ, ofundji ɔmɔ akafunde dia anto wakendaka wakambe heyama lo “lɔkɛwɔ l’ɔlɔlɔ l’anto waki lo losanganya, woho wakawayelaka kɛnɛ kakatamaka la dilɛmiɛlɔ tshɛ ndo aha la fukutanya ndo woho wakawayashaka tshɛ l’akambo wa lo nyuma.” Nde akatɛkɛta nto dia “lokema l’ana . . . , wele otshikitanyi la ana akina, vɔ waki la lɔkɛwɔ l’ɔlɔlɔ ndo wakayashaka dia mbadia avɛsa wa lo Bible k’Ekila.” Wonya wasalema losanganya kema etena ka sawola asawo w’anyanya, ka tomanɛ mesajɛ lo telefɔnɛ, ka ndɛ kana ka mbeteta l’ɛsɛsɛ. Ana pombaka mbidjasɛ lale ambutshi awɔ dia ambutsha awɔ mbakimanyiya dia vɔ kondja wahɔ oma lo losanganya. (Euh. 31:12; Tuk. 29:15) Welo ɛsɔ tshɛ mɛnyaka dia sho nɛmiyaka anto akina ndo tekɔ la lowando lo mbo ya ndɛ ya lo nyuma y’ohomba yashama.
4. Lande na kahombaso monga la ɛnamelo k’ɔlɔlɔ etena keso lo losanganya la woke?
4 Ɛnamelo k’ɔlɔlɔ: Anto efula wakandola waohwelo wakashama lo sawo dia lo losanganya la distrikɛ l’ɔnɔnyi wetshi diaki l’ɔtɛ a dui ɔnɛ: “Tɛnyake kɛnɛmɔ kaso k’Okristo tena tshɛ.” Diɔ diakɛnya dia ekambi waki Nzambi pombaka sala la wolo dia mɛnyaka kɛnɛmɔ kawɔ k’Okristo lo ɔlɔtɔ ndo lo ɔlɔngɔswɛlɔ awɔ wa divo. Ɔnɔnyi ɔnɛ nto, sho pombaka mbidja yimba efula lo dikambo sɔ. Ɛnamelo kaso mɛnyaka dionga diele laso otsha le Jehowa ndo woho wɔsaso diɛsɛ diele laso dia monga Ɛmɛnyi ande. Sho pombaka ndɔtaka nshi tshɛ oko wanɛ ‘wata dia vɔ mbishaka Nzambi nɛmɔ.’—1 Tim. 2:9, 10.
5. Ngande wakokaso nama ɛnamelo k’ɔlɔlɔ lo wenya ekina watatɔshi yema ya lɔpɛpɛ l’osomba wasalema losanganya?
5 Onde sho pombaka monga la ɛnamelo k’ɔlɔlɔ paka etena keso lo losanganya? Tohɔ dia etena keso l’osomba wasalema losanganya, anto efula wayotɛna tɔlɔtshi totshapa taso ta losanganya. Ɛnamelo kaso pombaka totshikitanya la anto akina. Ɔnkɔnɛ, kânga lo wenya ekina, ɛnyɛlɔ wonya watombaso dia tɔlɛ l’ɔkɔngɔ wa losanganya, sho pombaka ndɔta lo yoho yɛnya dia tekɔ mɛtɛ ekambi wele l’osomba l’oyango wa mbɔtɔ lo losanganya la Akristo. Omalɔkɔ hatohombe ndɔta todjinɛ, ahɔndɔ wa mwɛ, wa tomondo kana watshika tenyi dimɔtshi dia demba l’andja. Aha ahɔndɔ w’eshinga wolo mbasha onto kɛnɛmɔ, koko ahɔndɔ k’ahɔndɔ, w’amɛna ndo wa pudipudi. Ɔsɔ ayonga mɛtɛ tshondo y’esambishelo le anto wa l’osomba! Jehowa ngɛnangɛnaka etena kɛnya ɔlɔtɔ aso dia tekɔ ekambi ande.
6. Naa etombelo w’ɛlɔlɔ waya lo mɛnya kɛnɛmɔ kaso k’Okristo?
6 Etombelo w’ɛlɔlɔ: Mɛnya kɛnɛmɔ kaso k’Okristo lo nsanganya yaso ya weke toshaka waaso wa sambisha lo tshakitudi ndo wanɛ watenda tshikalaka la diambo di’efula. Lo ekomelo ka losanganya la distrikɛ lɔmɔtshi, owandji ɔmɔtshi akate ate: “Tatɛnaka anto wele la lɔkɛwɔ l’ɔlɔlɔ nganɛ. Nyu nyekɔ mɛtɛ woho w’anto walanga Nzambi sho ndjala.” Kɛnɛmɔla kɛnɛmɔ mɛnyaka dia sho nɛmiyaka anto akina, tekɔ la ngandji lam’asaso ndo dui sɔ tombolaka Jehowa. (1 Pet. 2:12) Dui sɔ mɛnyaka dia tekɔ la wɔma wa Nzambi ndo la lowando lo diɛsɛ dia mbetshama oma le Shɛso. (Heb. 12:28) Nyɛsɔ tosale tshɛ dia sho mɛnya kɛnɛmɔ kaso lo losanganya laso la distrikɛ l’ɔnɔnyi ɔnɛ lele l’ɔtɛ a dui ɔnɛ: “Toyele Kristo!”
[Kiombo ya lo lɛkɛ 5]
Waohwelo wendana la Losanganya la distrikɛ
◼ Ekongelo ka wenya: Nshi yakɔ shato, losanganya layomɛka lo eshidi 9:20 wa pindju. Nkuke yayodihɔmaka lo eshidi 8:00 wa pindju. Etena katatɛ mishiki wa Diolelo, sho tshɛ pombaka mbidjasɛ lo ahole aso dia ekongelo tatɛ lo yoho ya dimɛna. Lushi la tanu ndo la samalo, losanganya layokomɛka lo eshidi 5:05 wa dikɔlɔ, ndo Lushi la lomingu lo eshidi 4:10 wa dikɔlɔ.
◼ Ahole wa mbidjasɛ: Ohɔ dia paka wanɛ woye la yɛ mbala ɔtɔi kana wele la yɛ lo luudu lâmɛ mbahombayɛ namɛ ahole wa mbidjasɛ.
◼ Olelo wa la midi: Sho nɔmbaka anto tshɛ dia ndjaka la yangɔ ya ndɛ y’osadi, koko ya dimɛna, ɛnyɛlɔ: mapa, oyoko, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete hatototshɔ dia tosomba diangɔ sɔ le wanɛ wasondja mbo ya ndɛ. (Diewoyelo: Wanɛ wasondja mbo ya ndɛ hawokoke mbɔtɔ lo dihole diasalema losanganya oyadi wonya akɔna tshɛ.—Joa. 2:13-17.) Wanɛ wayokamba la waa babola dia katɛ mbo ya ndɛ lo dihole dia losanganya pombaka kondja lotshungɔ oma le anangɛso wendana la dikambo sɔ dia mbeya lɛnɛ akokawɔ ndjikitsha. Tɛdikɔ pombaka mbɔsama diaha aksida monga.—Luka 10:38-42.
◼ Weshasha: Akuta efula tshɔka dia kongɛ losanganya la distrikɛ. Sho kokaka mɛnya lowando laso lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo.
◼ Aksida ndo awui wa wanyandja: Wanɛ wakamba lo departɛma di’esakelo ka wanyandja wekɔ la lonyangu nɛ dia anto mbaelɛka mbala efula kânga lo awui wa totshitshɛ. Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo departɛma sɔ. Lâsɔ anto aso wa tomanamana wele lo losanganya wendana la olimu ɔsɔ wayoya ndjenda woke woke wa dikambo diakɔ ndo wayosha ekimanyielo kahombama.
◼ Osangwelo wa awui: Ndoko ehomɔ ɔtɔi ka sangola awui kahomba kɔhama lo kiɔkɔ y’atɔtɔ kana lo ekongelo ka sɔnɔrizasiɔ ka lo losanganya la woke ndo pombaka kamba la dihomɔ sɔ lo yoho yahatofukutanya anto akina.
◼ Wɔsɛlɔ wa fɔtɔ: Lam’alangayɛ, naka wate munde fɔtɔ wonya wa losanganya, kete tokambake la angadimu.
◼ Telefɔnɛ: Sho pombaka ndjidima diaha yɔ mbekola timba t’anto akina.
◼ Pudipudi: Akɛnama dia mbala efula, wanɛ watosombaka mbo ya ndɛ mbikashaka mposo kana akatshi wa diangɔ sɔ lo sɛkɛ. Lâsɔ sɛkɛ di’otondo ndjololanɛka la akatshi, mposo, kana ɛlɔndɔ wa ponde la mindo nkina. Naka onto ambolanga somba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwiti, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha lo sɛkɛ. Naka tambɛna onto ambokasha dikatshi, lohoso kana ɔlɔndɔ wa ponde lo sɛkɛ, kete sho pombaka tɔngɔna ko tokasha lɛnɛ akashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa lânde dia tshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ sala kɛnɛ kahombande sala, kete sɛkɛ dia losanganya diayotshikala pudipudi. Sho nangaka kɛnɛmɔla waonga wa Nzambi ka ekila katɛmɔlaso.—1 Pet. 1:15, 16; Etum. 19:10; Euh. 23:14.
◼ Lɛnɛ ohangiso: 1) Tohangiyake anto efula oleki lofulo laketawɔ kanga luudu. 2) Naka wɛ aya bu l’ohomba wa luudu, lam’alangayɛ ewoya dikambo sɔ aha la tshimbatshimba. 3) La ntondo ka wɛ katɛ, tambudi kanga luudu kana ɔnangɛso lendana la ohangelo wa lo Mbalasa ka Diolelo tɛdikɔ tshɛ tɔsami. 4) Aha wɛ kamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga ladiɔ ele wɛdimo ndo kanɛ anto akina. 5) Pudipudi kakatana la omamemelo le Nzambi. Kotshikake pango kayɛ wonya tshɛ kɔmba, ndo pudipudi. Dikambo sɔ mendanaka ndo la Mbalasa ka Diolelo, kakokawɔ pangiya anangɛso la akadiyɛso w’oma lo tshumanelo dia tale. 6) Kɛnɛmɔla elowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka panga la yɛ dihole ɔtɔi.—Ngal. 5:22, 23.