Onde wɛ amboyalɔngɔsɔla dia mbɔtɔ lo dambo dia lo nyuma?
1. Ɔlɔngɔswɛlɔ akɔna walɔmbama dia sala dambo?
1 Dia sala dambo nɔmbamaka dia ndjalɔngɔsɔla dimɛna. Pombaka tana diangɔ dia ndɛ, dikatɛ dimɛna ndo disha anto. Anto wayodikahanya pombaka nɔngɔsɔma. Lâdiko dia lâsɔ, dihole diayoyɔlɛ anto dambo diakɔ pombaka nɔngɔsɔma. Angɛndangɛnda vɔ lawɔ pombaka nɔngɔsɔma, djekoleko naka wayoya oma l’etale. Kânga mbele ɔlɔngɔswɛlɔ wa dambo nɔmbaka olimu efula, ndɛ diangɔ di’amɛna kâmɛ l’angɛnyi ndo l’ase nkumbo ekɔ dui dia dimɛna efula. Kem’edja, Ɛmɛnyi wa Jehowa wa l’andja w’otondo wayosangana kâmɛ l’elui wa totshitshɛ ndo wa weke lo dambo dia lo nyuma diakongɛso, mbuta ate Losanganya la distrikɛ lele l’ɔtɛ a dui ɔnɛ: “Nyotetemale sungukala!” Olimu efula wambosalema dia nɔngɔsɔla ekongelo ka losanganya lɔsɔ di’awui tshɛ monga suke. Sho tshɛ tambelamɛ. Dia sho mbɔtɔ lo losanganya lakɔ ndo ndeka kondja wahɔ, sho lawɔ pombaka ndjalɔngɔsɔla.—Tuk. 21:5.
2. Kakɔna kalɔmbama dia monga lo tenyi diakɔ tshɛ dia losanganya?
2 Toyalɔngɔsɔlɛ dia ndeka kondja wahɔ: Onde wɛ amboshilaka ndjalɔngɔsɔla dia wɛ mbɔtɔ lo tenyi tshɛ dia dambo dia lo nyuma diakɔ? Naka ekɔ ohomba, kete sawola l’owandji ayɛ w’olimu dia mbotɛ dia wɛ ayotshɔ lo tenyi diakɔ tshɛ dia losanganya mbidja ndo lushi la ntondo. Onde wɛ amboshila ndjalɔngɔsɔla dia lɔkɛndɔ layoyonda ndo dihole diayoyotohanga? Dikumanyi pombaka mbidja esombe, anto wele la dikɔmɔ ndo weho ekina w’anto wele l’ohomba w’ekimanyielo yimba.—Jer. 23:4; Ngal. 6:10.
3. Lande na kahatahombe ntshɔ tɔtɔ lo losanganya la wedja efula lahatelame?
3 Lo ahole amɔtshi nsanganya ya wedja efula yayosalema. Tatohɛke dia tshumanelo dimɔtshi nto ndo anto amɔtshi ato mbakelamɛ dia mbɔtɔ lo nsanganya shɔ. Dia mbɔsa tɛdikɔ tɔsɔ, Bɛtɛlɛ akakambe akumi dimɛna dia mbeya anto angana wahomba mbelamɛ lo ndjela lofulo l’ahole wa mbidjasɛ ndo pango yatanema. Anto wayoleka monga efula naka apandjudi ntshɔ tɔtɔ lo losanganya la wedja efula lakiwɔ kombaelɛ.
4. Waohwelo akɔna wayotokimanyiya dia sho mongaka suke etena katatɛ losanganya lushi tshɛ?
4 Yalɔngɔsɔla dia koma k’ɔlɔmɔ lo dihole dia losanganya lushi tshɛ ndo tana dihole dia mbidjasɛ la ntondo ka losanganya tatɛ. Ɔsa minitɛ ngana la ntondo ka losanganya tatɛ dia mboka sso l’ekongelo ka losanganya. Kɛsɔ ayokokimanyiya dia wɛ nɔngɔsɔla otema ayɛ dikambo dia wetshelo wayoshama. (Ez. 7:10) Etena kɔtshiya ɔnɔmbɔdi w’etenyi ka losanganya yema ya mishiki, djasɛ dia mpokamɛ mishiki akɔ ndo onga suke dia memba osambo wa mbɔtwɛlɔ ndo ndjela dɔmbɛlɔ.
5. Ngande wayokoka ase nkumbo ndeka kondja wahɔ oma lo losanganya?
5 Naka ase nkumbo mbidjasɛ dihole diâmɛ wonya wasalema losanganya, kete ambutshi wayokoka ndjashikikɛ di’anawɔ wekɔ lo mpokamɛ dimɛna. (Euh. 31:12) Anto tshɛ keketshamaka dia ndjela wadielo w’avɛsa lo Bible yawɔ. Mbɔsaka nɔtɛ ya tomondo mbeyaka nyokimanyiya dia ndjela la yambalo. L’ɔkɔngɔ, nɔtɛ shɔ yayonyokimanyiya dia mbohɔka awui w’ohomba wa l’asawo. Ewɔ dia tɛkɛtaka ndo mononɛka wonya wa losanganya. Naka wɛ ekɔ la telefɔnɛ, tetawɔke dia tɔ kofukutanya ndo fukutanya anto akina. L’ɔkɔngɔ wa etenyi tshɛ ka losanganya, lande na kahayakɛtshanya l’anto akina awui wakayangɛnyingɛnyi l’etenyi kakɔ?
6. Naa dui dimɔtshi dia ɔngɛnɔngɛnɔ diele la Losanganya la distrikɛ, ndo ngande wakokaso kamba la diɔ lo yoho y’efula?
6 Lo Losanganya la distrikɛ, tekɔ la diaaso dia lânde dia ngɛnangɛna dimama diele lam’asaso l’anangɛso l’akadiyɛso diele bu l’andja ɔnɛ. (Osam. 133:1-3; Mako 10:29, 30) Lande na kahayamɛ sawola la wanɛ wodjashi suke la yɛ wonya wa diomuyelo? Mbelaka yangɔ ya ndɛ y’osadi wonya wa diomuyelo tokimanyiyaka dia sawola l’anangɛso lo dihole dia shisha wenya lo ntshɔ tosomba diangɔ diakɔ. Sala la wolo dia kamba la diaaso sɔ dia keketshana.—Romo 1:11, 12.
7. Ɛlɔngɔswɛlɔ akɔna wahombaso sala lo kɛnɛ kendana l’ahɔndɔ wayotɔlɔta?
7 Ɔlɔtɔ: Jehowa akadjangɛ ase Isariyɛlɛ dia vɔ tɛla tofufɔ taki l’ɛkɔdi w’edima l’ehembo w’ahɔndɔ awɔ. (Wal. 15:37-41) Kɛsɔ akawaoholaka dia vɔ wakakitshama lânde dia tɛmɔlaka Jehowa. Ɛlɔ kɛnɛ, ɔlɔtɔ wa dimɛna ndo wa kɔmba walɔtaso lo losanganya la woke totshikitanyaka l’andja ɔnɛ. Vɔ kimanyiyaka efula dia sambisha anto watenda oyadi kânga etena katshɔso tosomba yangɔ ya ndɛ l’ɔkɔngɔ wa losanganya. Ɔnkɔnɛ, ekɔ ohomba takanyi yimba dimɛna la ntondo dia shikikɛ ahɔndɔ wayotɔlɔta.
8. Ngande wakokaso sambisha anto lo ngelo kasalema losanganya?
8 Tosambisha: Naka sho ndjalɔngɔsɔla, kete tayonga l’akoka wa sambisha anto lo ngelo kayosalema losanganya. Ɔnangɛso ɔmɔtshi lakatshu tosomba yangɔ ya ndɛ nde la wadɛnde l’ɔkɔngɔ wa losanganya, akatshume lohita lo tshapa yande ya losanganya ndo akambola ɔnɛ lakasondjaka ate: “Onde wɛ akɛnyi anto efula wɔlɔtshi tshapa nyɛ?” Ɔnɛ lakasondjaka akate dia akawaɛnyi ndo akayambolaka lande na kalɔta anto efula tshapa ya woho wâmɛ. Kɛsɔ akawakonya dia vɔ sawola ndo ɔnangɛso akawelɛ lo losanganya.
9. Ngande wakokaso mɛnya lowando laso otsha le Jehowa Ɔnɛ latokatɛ dambo dia lo nyuma?
9 Kânga mbele anangɛso mbayosha asawo tshɛ, ɛkɔnya ndo wɛnyɛlɔ, Jehowa Shɛso lele l’olongo mbatɔlɔngɔsɔlɛ dambo dia lo nyuma sɔ diasalema ɔnɔnyi l’ɔnɔnyi. (Is. 65:13, 14) Tayɛnya lowando laso otsha le Jehowa Ɔnɛ latokatɛ dambo sɔ lo mbɔtɔ lo tenyi tshɛ dia losanganya lɔsɔ. Onde wɛ amboyalɔngɔsɔla dia sala dui sɔ?
[Kiombo ya lo lɛkɛ 6]
Waohwelo wendana la Losanganya la distrikɛ
◼ Ekongelo ka wenya: Nshi yakɔ shato, losanganya layomɛka lo eshidi 9:20 wa pindju. Nkuke yayodihɔmaka lo eshidi 8:00 wa pindju. Etena katatɛ mishiki wa Diolelo, sho tshɛ pombaka mbidjasɛ lo ahole aso dia ekongelo tatɛ lo yoho ya dimɛna. Lushi la tanu ndo la samalo, losanganya layokomɛka lo eshidi 4:55 wa dikɔlɔ, ndo Lushi la lomingu lo eshidi 4:00 wa dikɔlɔ. Lo kɛnɛ kendana la nsanganya ya wedja efula, losanganya la lushi la nɛi layotatɛ lo 1:20 wa l’ɔkɔngɔ a midi ndo layokomɛ lo 4:55 wa dikɔlɔ.
◼ Ahole wa mbidjasɛ: Ohɔ dia paka wanɛ woye la yɛ mbala ɔtɔi kana wele la yɛ lo luudu lâmɛ mbahombayɛ namɛ ahole wa mbidjasɛ.
◼ Olelo wa la midi: Sho nɔmbaka anto tshɛ dia ndjaka la yangɔ ya ndɛ y’osadi, koko ya dimɛna, ɛnyɛlɔ: mapa, oyoko, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete hatototshɔ dia tosomba diangɔ sɔ le wanɛ wasondja mbo ya ndɛ. Mbewɔ dia somba diangɔ dia ndɛ le anto asɔ ayokimanyiya dia pudipudi monga lo dihole dia losanganya. (Diewoyelo: Wanɛ wasondja mbo ya ndɛ hawokoke mbɔtɔ lo dihole diasalema losanganya oyadi wonya akɔna tshɛ.—Joa. 2:13-17.)
◼ Weshasha: Sho kokaka mɛnya lowando laso lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo.
◼ Aksida ndo awui wa wanyandja: Akɛnama di’anto ndjaka kânga lo awui wa totshitshɛ le wanɛ wakamba lo Departɛma diendana la esakelo ka wanyandja. Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo Departɛma diendana la esakelo ka wanyandja. Lâsɔ anto asɔ wa tomanamana wele lo losanganya wendana la olimu ɔsɔ wayoya ndjenda woke woke wa dikambo diakɔ ndo wayosha ekimanyielo kahombama.
◼ Osangwelo wa awui: Ndoko ehomɔ ɔtɔi ka sangola awui kahomba kɔhama lo ɛkɔdi wa kura kana lo dihomɔ dia sɔnɔrizasiɔ dia lo losanganya la woke ndo pombaka kamba la dihomɔ sɔ lo yoho yahatofukutanya anto akina.
◼ Wondelo wa foto: Lam’alangayɛ, naka wate munde foto wonya wa losanganya, kete tokambake la angadimu. Lam’alanganyu, tanyelɛke anto wanda waa foto lo dihole dia losanganya. Naka nyambowaɛna lo dihole dia losanganya, kete tanyâlɔmbake dia vɔ nyonda foto.—Joa. 2:13-17
◼ Telefɔnɛ: Sho pombaka ndjidima diaha yɔ mbekola timba t’anto akina.
◼ Pudipudi: Akɛnama dia mbala efula, wanɛ watosombaka mbo ya ndɛ mbikashaka mposo kana akatshi wa diangɔ sɔ lo sɛkɛ. Lâsɔ sɛkɛ di’otondo ndjololanɛka tɔɔ la akatshi, mposo, kana ɛlɔndɔ wa ponde la mindo nkina. Naka onto ambolanga somba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwiti, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha lo sɛkɛ. Naka tambɛna onto ambokasha dikatshi, lohoso kana ɔlɔndɔ wa ponde lo sɛkɛ, kete sho pombaka tɔngɔna ko tokasha lɛnɛ akashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa lânde dia tshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ sala kɛnɛ kahombande sala, kete sɛkɛ dia losanganya diayotshikala pudipudi. Sho nangaka kɛnɛmɔla waonga wa Nzambi ka ekila katɛmɔlaso.—1 Pet. 1:15, 16; Etum. 19:10; Euh. 23:14.
◼ Lɛnɛ ohangiso: 1) Tohangiyake anto efula oleki lofulo laketawɔ kanga luudu. 2) Naka wɛ aya bu l’ohomba wa luudu, lam’alangayɛ ewoya dikambo sɔ aha la tshimbatshimba. 3) La ntondo ka wɛ katɛ, tambodi kanga luudu kana ɔnangɛso lendana la ohangelo wa lo Mbalasa ka Diolelo tɛdikɔ tshɛ tɔsami. 4) Aha wɛ kamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga ladiɔ ele wɛdimo ndo kanɛ anto akina. 5) Pudipudi kakatana la omamemelo le Nzambi. Kotshikake pango kayɛ wonya tshɛ kɔmba ndo pudipudi. Dikambo sɔ mendanaka ndo la Mbalasa ka Diolelo, kakokawɔ pangiya anangɛso la akadiyɛso w’oma lo tshumanelo dia tale. 6) Kɛnɛmɔla olowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka panga la yɛ dihole ɔtɔi.—Ngal. 5:22, 23.