Totetemale ‘ntɔ elowa efula’
1 Lo kamba la ɛtɛkɛta wa didjidji, Yeso akɛnya dia nde ekɔ osongo wa vinyɔ wa mɛtɛ, She ekɔ Okambi wa dikambɔ ndo ambeki ande w’akitami wa nyuma wekɔ tahe y’osongo wa vinyɔ yatɔ elowa. Etena kakatɛkɛta Yeso di’olimu wa Okambi wa dikambɔ wa didjidji, nde akatɔtɔmiya ohomba wa mamatana ma la osongo wa vinyɔ. (Joa. 15:1-4) Wetshelo wakondjaso ele, onto tshɛ lele la diɔtɔnganelo dia ma ma la Jehowa pombaka monga oko lotahe lɔmɔtshi latɔ elowa la ‘osongo wa vinyɔ wa mɛtɛ,’ mbuta ate Yeso Kristo. Sho pombaka tetemala ntɔ elowa efula, “elua wa nyuma” ndo elowa wa Diolelo.—Ngal. 5:22, 23; Mat. 24:14; 28:19-20.
2 Elowa wa nyuma: Ohamelo aso wa lo nyuma mɛnamaka lo yɛdikɔ ya woke la woho wakɛnɛmɔlaso elowa wa nyuma. Onde sho salaka la wolo dia ntɔ elowa wa nyuma ka Nzambi lo mbekaka ndo lo kanaka yimba la Ɔtɛkɛta wa Nzambi mbala la mbala? (Fil. 1:9-11) Tatengengake dia nɔmba Jehowa nyuma k’ekila kakoka tokimanyiya dia sho monga la waonga wôtombola ndo wakoka tokimanyiya dia sho tetemala pama lo nyuma.—Luka 11:13; Joa. 13:35.
3 Ntɔ elowa wa nyuma ayotokimanyiya nto dia sho nyomoleka monga ekambi w’ohetoheto. Ɛnyɛlɔ, ngandji ndo mbetawɔ totshutshuyaka dia sho ndjatshungwɛka etena ka sambishaka mbala la mbala kânga mbeso l’awui efula wa sala. Waonga wele oko wɔladi, solo dia lotutsha, lɔsɛngɔ, memakana ndo ndjakimɛ tokimanyiyaka dia sho salɛ atunyi aso awui lo yoho ya dimɛna. Ɔngɛnɔngɛnɔ tokimanyiyaka dia sho ngɛnangɛna l’olimu aso w’esambishelo etena kahetawɔ anto losango laso.
4 Elowa wa Diolelo: Sho nangaka nto ntɔ elowa wa Diolelo. Dui sɔ mendanaka ndo la nambola ‘olambo wa lotombo, mbuta ate elowa w’oma lo ɛlɔmɔ aso wewoya lokombo la Jehowa lo sɛkɛ.’ (Heb. 13:15) Sho salaka dui sɔ lo tetemalaka mbewoya lokumu l’ɔlɔlɔ l’ohetoheto. Onde sho salaka la wolo dia ntɔ elowa efula wa Diolelo lo ndowanya olimu aso w’esambishelo?
5 Yeso akɛnya dia ambeki ande wa kɔlamelo wayɔtɔ lofulo l’elowa lotshikitanyi. (Mat. 13:23) Ɔnkɔnɛ, hatohombe ndjaɛdika la anto akina koko sho pombaka mbishaka Jehowa kɛnɛ koleki dimɛna le so. (Ngal. 6:4) Ɔsɛdingwelo wa l’otema ɔtɔi w’awui wele laso lo ekimanyielo k’Ɔtɛkɛta wa Nzambi ayotokimanyiya dia sho tetemala tombola Jehowa lo ‘ntɔ elowa efula.’—Joa. 15:8.