‘Nyotetemale ntɔ elowa efula’
‘Nyotetemale ntɔ elowa efula, ɔnkɔnɛ nyu nyayoyala ambeki ami.’—JOANI 15:8.
1. (a) Naa dikambo diahomba anto kotsha dia monga ambeki waki Yeso diakandatɛ apɔstɔlɔ ande? (b) Wombola akɔna wahombaso ndjambola?
LA DIKƆLƆ di’ekomelo dia la ntondo ka nyɔi kande, Yeso akɔshi wenya efula dia keketsha apɔstɔlɔ ande l’otema ɔtɔi. Etena kɛsɔ ko midi k’otsho ambolekana, koko ngandji kaki la Yeso otsha le angɛnyi ande kakotshutshuya dia nde tetemala la sawola la wɔ. L’atei wa sawo diande, nde akawaohola dikambo dikina di’ohomba diahomba anto kotsha dia vɔ tshikala ambeki ande. Nde akawatɛ ate: “Papa ayutumbwama, dia nyu nto elua efula. Okone nyu nyayuyala ambeki ami.” (Joani 15:8) Onde ɛlɔ kɛnɛ sho kotshaka dikambo sɔ? ‘Ntɔ elowa efula’ alangande nembetshiya? Dia kadimola wembola ɛsɔ, nyɛsɔ tɔsɛdingole sawo diaki Yeso nde l’apɔstɔlɔ ande dia la dikɔlɔ sɔ.
2. Wɛla akɔna wendana l’elowa wakasha Yeso la dikɔlɔ dia la ntondo ka nyɔi kande?
2 Dako dialɔmba dia ntɔ elowa diekɔ etenyi kɛmɔtshi ka wɛla wakasha Yeso apɔstɔlɔ ande. Nde akate ate: “Dimi utundu w’okodi mete. Papa eli ukambi. Lutahi lami tshe lahato elua, ndi ayulunya. Lutahi tshe latotokaka elua, ndi ayulolongosola dia lo ndeka nto elua efula. Kakiane nyu nyambuyala pudipudi, ne dia diui diakamanyutela. Nyuyali l’utema ami, dimi ndjali l’etema anyu. Uku aheyi lutahi nto elua lame, tshikima lo mbeli l’okodi, osoku ndu nyu hanyeyi nto elua, tshikima nyu mbeli l’utema ami. Dimi leko utundu w’okodi, nyu nyeko tahi. . . . Papa ayutumbwama, [naka] nyu nto elua efula. Okone nyu nyayuyala ambeki ami. Dimi lambunyulanga uku akanangi Papa. Nyuyali lu ngandji kami. Naka nyu nyambukitanyia elembe ami, nyu nyayuyala lu ngandji kami.”—Joani 15:1-10.
3. Kakɔna kahomba ambeki waki Yeso sala dia vɔ ntɔ elowa?
3 Lo wɛla ɔsɔ Jehowa mbele Okambi wa vinyɔ, Yeso ekɔ ɔkɔdi wa vinyɔ ndo apɔstɔlɔ wanɛ wakasawolaka la Yeso wekɔ ntahe. Edja tshɛ kayosalaka apɔstɔlɔ la wolo dia ‘tshikala kamɛ’ la Yeso, vɔ wayɔtɔka elowa. Oma lâsɔ, Yeso akalembetshiya woho wakoka apɔstɔlɔ tondoya dia nama kamɛ kele lam’asawɔ la Nde lo mbuta ɔnɛ: “Naka nyu nyambukitanyia elembe ami, nyu nyayuyala lu ngandji kami.” L’ɔkɔngɔ diko, ɔpɔstɔlɔ Joani akayofundɛka asekande Akristo ɛtɛkɛta wa woho akɔ wamɛ ate: “Untu latulamaka elembe [wa Yeso], atuyalaka l’utema andi.”a (1 Joani 2:24; 3:24) Ɔnkɔnɛ, lo tetemala la kitanyiya ɛlɛmbɛ waki Yeso, ambeki ande tshikalaka kamɛ la nde, ndo kamɛ kɛsɔ mbakimanyiyaka dia vɔ ntɔ elowa. Weho akɔna w’elowa wahombaso ntɔ?
Waaso wa pama
4. Wetshelo akɔna wakondjaso lo woho ‘wahembola’ Jehowa lotahe tshɛ lahatɔ elowa?
4 Lo wɛla w’ɔkɔdi wa vinyɔ, Jehowa ‘pembolaka’ lotahe naka lɔ halɔtɔ elowa. Dikambo sɔ alangadiɔ totɛ? Diɔ nangaka totɛ aha tsho di’ɔnɛ ambeki tshɛ waki Yeso nɔmbamaka dia ntɔ elowa koko nd’ɔnɛ ambeki tshɛ wekɔ l’akoka wa ntɔ elowa, oyadi awui kana wekamu wele lawɔ. Lo mɛtɛ, naka Jehowa ‘pembola’ ombeki waki Kristo l’ɔtɛ wahandakotshisha dikambo dimɔtshi dioleki akoka wele lande kana nde mɛnya ɔnɛ onto ɔsɔ hakoke monga ombeki wa Kristo, kete dikambo sɔ hatɔtɔnɛ la mboka yande yoludi la ngandji.—Osambu 103:14; Kolosai 3:23; 1 Joani 5:3.
5. (a) Ngande wɛnya wɛla wa Yeso dia sho koka pama lo nyomoleka ntɔ elowa efula? (b) Weho akɔna w’elowa ehende wayangaso sɛdingola?
5 Wɛla waki Yeso wendana la vinyɔ tɛnyaka nto dia oyadi awui kana wekamu wele laso, sho pombaka tana toho ta pama l’olimu aso oko weso ambeki. Tende woho wakɛnya Yeso dikambo sɔ: “Lutahi lami tshe lahato elua, [Papa] ayulunya. Lutahi tshe latotokaka elua, ndi ayulolongosola dia lo ndeka nto elua efula.” (Joani 15:2, sho mbɛnganyisha alɛta ango.) Otsha l’ekomelo ka wɛla ɔsɔ, Yeso akakeketsha ambeki ande dia vɔ ntɔ ‘elowa efula.’ (Joani 15 Divɛsa 8) Kakɔna kalangawɔ totɛ lanɛ na? Oko weso ambeki, hatohombe pondjo ndjangɛnyangɛnya shamɛ kana monga la wendjudi. (Enyelo 3:14, 15, 19) Koko sho pombaka nyanga toho ta sho nyomoleka ntɔ elowa efula. Weho akɔna w’elowa wahombaso sala la wolo dia ntɔ efula na? Ekɔ weho ehende w’elowa (1) ‘elowa wa nyuma’ ndo (2) elowa wa Diolelo.—Ngalatiya 5:22, 23; Mateu 24:14.
Elowa wa waonga w’Okristo
6. Ngande wakake Yeso Kristo epole ɔsɛkɛ lo kɛnɛ kendana l’ohomba w’olowa wa ntondo wa lo nyuma woshidiso ongo?
6 Ngandji mbele olowa wa ntondo l’ɔnɔngɔ “w’elua wa [n]yuma.” Nyuma k’ekila kaki Nzambi kimanyiyaka Akristo dia ntɔ olowa wa ngandji nɛ dia vɔ kitanyiyaka didjango diakasha Yeso yema tshitshɛ la ntondo ka nde tɛkɛta dikambo di’ɔkɔdi wa vinyɔ watɔ elowa. Nde akatɛ apɔstɔlɔ ande ate: “Olembe w’uyuyu mbamumunyusha, [ele w]a nyu mbukana ngandji.” (Joani 13:34) Lo mɛtɛ, l’edja tshɛ kakaviya sawo diakandasawola l’apɔstɔlɔ l’otsho w’ekomelo wa lɔsɛnɔ lande la lanɛ la nkɛtɛ, Yeso akawaohola mbala la mbala ohomba wa vɔ mbokana ngandji.—Joani 14:15, 21, 23, 24; 15:12, 13, 17.
7. Ngande wakɛnya ɔpɔstɔlɔ Petero dia ntɔ elowa kakatana l’ɔkɛnɛmwɛlɔ wa waonga wele oko wa Kristo?
7 Petero, ɔnɛ laki lawɔ l’otsho ɔsɔ akashihodia dia ngandji kele oko ka Kristo kɛsɔ ndo waonga wokakatanyi la tɔ pombaka mɛnama le ambeki wa mɛtɛ waki Kristo. Ɛnɔnyi efula l’ɔkɔngɔ, Petero akakeketsha Akristo dia vɔ ndjala la waonga wele oko ndjakimɛ, ngandji k’anto l’ɔnango ndo ngandji. Nde akakotsha ate naka sho salaka akambo asɔ kete hatotonga “tusuasua kana uku antu wahato elua.” (2 Petero 1:5-8) Oyadi awui akɔna wele laso, sho koka ntɔ elowa wa nyuma. Lâsɔ, nyɛsɔ tosale la wolo dia mɛnya ngandji, kɛtshi, memakana ndo waonga akina wele oko wa Kristo lo yɛdikɔ y’efula, nɛ dia “kema olembe lu akambu wa wuhu oso,” kana olelo ɔmɔtshi. (Ngalatiya 5:23) Nyɛsɔ tɔtɔ ‘elowa efula.’
Tɔtɔ elowa wa diolelo
8. (a) Ngande wɔtɔnɛ elowa wa nyuma la elowa wa Diolelo? (b) Wembola akɔna wasungana sho sɛdingola?
8 Elowa wɛnama amɛna lo washo ndo wele l’ashi efula ndo mpɛ fudiaka dimɛna di’otamba. Koko nɛmɔ diele l’elowa ɛsɔ hakomɛ tsho lo dimɛna diawɔ dia lo washo. Elowa wekɔ nto ohomba efula dia tondja etamba ekina oma lo ntɔngɔ yawɔ. Woho akɔ wamɛ mbele elowa wa nyuma hawɔlɛngɛ tsho loto laso l’Okristo. Waonga wele oko ngandji ndo mbetawɔ totshutshuyaka dia sho dianganya losango la Diolelo lele l’Ɔtɛkɛta wa Nzambi lɛdikama la lɔtɔngɔ. Tende woho wakadje ɔpɔstɔlɔ Paulo dikako vɔlɛ lo diɔtɔnganelo di’ohomba sɔ. Nde akate ate: “Keli shu teko l’utema a mbetawo [olowa ɔmɔtshi wa nyuma], okone shu tamboteketa.” (2 Koreto 4:13) Lo yoho shɔ, Paulo nembetshiyaka nto ɔnɛ sho ‘mbishaka Nzambi olambo wa lotombo, mbut’ate elowa w’ɛlɔmɔ aso,’ vɔ mbele woho wa hende w’olowa wahombaso ntɔ. (Heberu 13:15) Onde tekɔ la waaso efula lo lɔsɛnɔ wa sho nyomoleka ntɔ elowa, oko weso apandjudi wa Diolelo diaki Nzambi?
9. Onde ntɔ elowa nembetshiyaka konya anto ambeki? Lembetshiya.
9 Dia sho kadimola dimɛna, sho pombaka ntondo mbeya kɛnɛ kakenga elowa wa nyuma. Onde ekɔ dimɛna mbuta ɔnɛ ntɔ elowa wa Diolelo nembetshiyaka konya anto ambeki? (Mateu 28:19) Onde elowa wahombaso ntɔ mendanaka ntondotondo l’anto wakimanyiyaso dia vɔ koma atɛmɔdi waki Jehowa wambobatizama? Ndooko. Otondonga ngasɔ mbediɔ tshike otonga lonyangu la mamba le Ɛmɛnyi tshɛ wakasambisha la kɔlamelo losango la Diolelo l’edja k’ɛnɔnyi efula lo bɛtshi dia nkɛtɛ diele anto hawetawɔ. Eelo, naka paka ambeki w’eyoyo mbele elowa wa Diolelo watɔso, kete Ɛmɛnyi wakamba la wolo ɛsɔ wayonga oko ntahe yahatɔ elowa ya lo wɛla waki Yeso! Mɛtɛ aha ngasɔ mbediɔ. Ko lâsɔ ele mɛtɛ elowa wa Diolelo w’olimu aso na?
Tɔtɔ elowa efula lo dianganya lɔtɔngɔ la diolelo
10. Ngande wɛnya wɛla wakasha Yeso w’omboki wa woho ndo wa weho wa nkɛtɛ yotshikitanyi kɛnɛ kele elowa wa Diolelo ndo kɛnɛ kewɔ bu?
10 Wɛla waki Yeso w’omboki wa woho ndo wa weho wa nkɛtɛ yotshikitanyi mbishaka okadimwelo wakeketsha wanɛ wasambisha lo bɛtshi dia nkɛtɛ diele anto la wendjudi. Yeso akate dia lɔtɔngɔ kɛdikɛdi losango la Diolelo lele l’Ɔtɛkɛta wa Nzambi ndo ɔnɛ nkɛtɛ shɔ yekɔ otema w’onto wa didjidji. Lɔtɔngɔ lɔmɔtshi ‘lakakɔ lo nkɛtɛ y’ɔlɔlɔ ndo l’ɔkɔngɔ wa tomba, lɔ lakole polo ndo lo ndjɔtɔ elowa.’ (Luka 8:8) Naa elowa ɛsɔ na? L’ɔkɔngɔ wa lɔsɛkɛ l’eponga tomba ndo mbola, lɔ tondjaka aha tɔsɛkɛsɛkɛ tokina, koko lɔtɔngɔ l’oyoyo. Woho akɔ wamɛ mbele, elowa watɔ Okristo kema ambeki w’eyoyo, koko lɔtɔngɔ la Diolelo l’oyoyo.
11. Ngande wakokaso nembetshiya kɛnɛ kelamɛ elowa wa Diolelo?
11 Lâsɔ, elowa watɛkɛtawɔ lanɛ bu oyadi ambeki w’eyoyo kana waonga w’amɛna w’Okristo. Lam’ele lɔtɔngɔ lonɛma ekɔ ɔtɛkɛta wa Diolelo, elowa pombaka mendana l’ofudielo wa lɔtɔngɔ lakɔ. Ɔtwɛlɔ w’elowa watɛkɛtawɔ lanɛ mendanaka la wewoyelo wa losango lendana la Diolelo. (Mateu 24:14) Onde onto tshɛ l’atei aso kokaka ntɔ elowa ɛsɔ, mbut’ate sambisha lokumu l’ɔlɔlɔ la Diolelo, oyadi akambo akɔna wele lande? Eelo! Paka lo wɛla akɔ wamɛ, Yeso akalembetshiya lande na kediɔ ɔsɔku.
Toyasha lo yoho yoleki dikambo dia lotombo la Nzambi
12. Onde Okristo tshɛ kokaka ntɔ elowa wa Diolelo? Lembetshiya.
12 Yeso akate ate: ‘Ntɔngɔ yakonɛma lo nkɛtɛ y’ɔlɔlɔ yakatɔ elowa, mɔtshi lokama lokama, nkina akumi asamalo akumi asamalo, ndo nkina nto akumi asato akumi asato.’ (Mateu 13:23) Ntɔngɔ yonɛmi l’ekambɔ mbeyaka ntɔ elowa lo yoho yotshikitanyi lo ndjela akambo amɔtshi. Woho akɔ wamɛ mbele kɛnɛ kakokaso sala dia sambisha lokumu l’ɔlɔlɔ mbeyaka tshikitana lo ndjela akambo wele l’onto, ndo Yeso akɛnya dia nde mbeyaka dikambo sɔ. Anto amɔtshi mbeyaka monga la waaso efula; akina mbeyaka monga l’alemba w’amɛna ndo la wolo efula. Ɔnkɔnɛ, kɛnɛ keso l’akoka wa sala mbeyaka ndeka kana monga l’ɛse ka kɛnɛ kasala anto akina, koko Jehowa ngɛnangɛnaka la tɔ naka tɔ kekɔ mɛtɛ etombelo wa kɛnɛ tshɛ kakatakoke sala. (Ngalatiya 6:4) Oyadi kânga lotshundu, hemɔ kana ɛkɔmɔ kɛmɔtshi hayotosha diaaso dia sambisha woho wakombolaso, aha la tâmu, Jehowa, Shɛso ka kɛtshi tɔsaka oko anto ‘watɔ elowa efula.’ Lande na? Nɛ dia tekɔ lo mbosha ‘tshɛ kele laso’ mbut’ate tekɔ lo mbokambɛ l’anima aso tshɛ.b—Mako 12:43, 44; Luka 10:27.
13. (a) Naa ɔkɔkɔ woleki tshɛ wahombaso ‘tetemala’ la ntɔ elowa wa Diolelo? (b) Kakɔna kayotokimanyiya dia sho tetemala la ntɔ elowa lo bɛtshi dia nkɛtɛ diele anto hawoleke mbetawɔ awui aso?—(Enda lo kiombo ya lo lɛkɛ 29).
13 Oyadi lo yɛdikɔ yakɔna yeso l’akoka wa ntɔ elowa wa Diolelo, tayotshutshuyama dia ‘tetemala la ntɔ elowa akɔ’ naka sho mbohɔka lande na kasalaso dikambo sɔ. (Joani 15:16) Yeso akɛnya ɔkɔkɔ woleki tshɛ lo mbuta ate: “Papa ayutumbwama, [naka] nyu nto elua efula.” (Joani 15:8) Eelo, olimu aso w’esambishelo kidiaka lokombo la Jehowa la ntondo k’anto tshɛ. (Osambu 109:30) Honor, Ɔmɛnyi wa Jehowa ɔmɔtshi wa womoto wa kɔlamelo wele l’ɛnɔnyi oko 75 akate ate: “Ekɔ diɛsɛ dia mamba dia tɛkɛta lo lokombo la Nkum’Olongo oyadi kânga l’ɛtshi ka nkɛtɛ kele anto hawoleke mbetawɔ awui akɔ.” Lam’akawambola Claudio, Ɔmɛnyi wa Jehowa ɔmɔtshi wele l’ohetoheto tatɛ l’ɔnɔnyi 1974, lande na katetemalande la sambisha, kânga mbele anto yema tshitshɛ tsho mbetawɔ awui wasambishande l’ɛtshi kande ka nkɛtɛ, nde akashile ɛtɛkɛta waki Yeso wele lo Joani 4:34, lɛnɛ akate Yeso ate: “Ma diami, dieli ntsha lulangu la one lakantumi, la dia nshidiya ulimu andi.” Claudio akakotsha ate: “Oko Yeso, dimi nangaka aha tsho tatɛ koko ndo dia shidiya olimu ami oko wemi opandjudi wa Diolelo.” (Joani 17:4) Ɛmɛnyi wa Jehowa wa l’andja w’otondo wekɔ la kanyi ya woho ɔsɔ.—Enda kiombo yata ɔnɛ: “Woho wa ‘Ntɔ Elowa oma l’Ekikelo.’ ” lo lɛkɛ 29.
Dia nsambisha ndo mbetsha
14. (a) Naa eyango ehende waki l’olimu waki Joani Obatizanyi ndo olimu waki Yeso? (b) Kakɔna kayoyota lo kɛnɛ kendana l’olimu w’Akristo ɛlɔ kɛnɛ?
14 Joani Obatizanyi mbele opandjudi wa ntondo wa Diolelo watɛkɛtama l’Evanjiliɔ. (Mateu 3:1, 2; Luka 3:18) Oyango ande wa ntondo aki wa ‘sambisha,’ ndo nde akasale dikambo sɔ la mbetawɔ k’efula ndo l’elongamelo k’ɔnɛ ‘weho w’anto tshɛ wayokoka mbetawɔ dui diande.’ (Joani 1:6, 7) Anto amɔtshi wakasambishama oma le Joani wakakome ambeki waki Kristo. (Joani 1:35-37) Omalɔkɔ, Joani aki osambisha ndo aketɛka anto ambeki. Yeso nde lawɔ aki osambisha ndo ombetsha. (Mateu 4:23; 11:1) Diakɔ diele, hatokoke mamba dia Yeso akadjangɛ ambeki ande di’aha sambisha tsho losango la Diolelo koko ndo dia kimanyiya anto walietawɔ dia vɔ koma ambeki ande. (Mateu 28:19, 20) Ɛlɔ kɛnɛ olimu wakiso ekɔ wa sambisha la mbetsha.
15. Naa diɔtɔnganelo diele lam’asa woho wakasalaka anto la ntondo ka losango la Diolelo lo ntambe ka ntondo T.D., la woho wasala anto wasambishaso ɛlɔ kɛnɛ la ntondo k’awui wasambishaso?
15 L’atei wa wanɛ wakoke esambishelo ndo wetshelo waki Paulo lo ntambe ka ntondo T.D., “amotshi waketawo akambu wakandati, amotshi wakâtuni.” (Etsha 28:24) Woho akɔ wamɛ mbasalema nd’ɛlɔ kɛnɛ. Lonyangu ko, ntɔngɔ mɔtshi ya Diolelo yekɔ lo nkɔ lo nkɛtɛ ya kɔlɔ. Koko kânga mbediɔ ngasɔ, ntɔngɔ mɔtshi yakɔ lo nkɛtɛ y’amɛna yekɔ lo mbika edio ndo tombaka oko wakadite Yeso. Diakɔ diele, l’andja w’otondo, yɛdikɔ ya l’atei y’anto ndekana 5000 wekɔ lo koma ambeki wa Kristo lomingu tshɛ la l’ɔnɔnyi! Ambeki w’eyoyo asɔ ‘wekɔ lo mbetawɔ akambo wawaetshawɔ,’ kânga mbele anto akina efula hawetawɔ. Kakɔna kakimanyiya di’etema awɔ munandema la losango la Diolelo? Mbala efula ekɔ woho wayasha Ɛmɛnyi wa Jehowa otsha le wɔ l’otema ɔtɔi, mbut’ate woho watɛwɔ ashi lo lɔtɔngɔ l’oyoyo lonɛma mongaka l’etombelo w’ɔlɔlɔ. (1 Koreto 3:6) Nyɛsɔ tɔsɛdingole bɛnyɛlɔ dihende to.
Woho wayashaso le anto mongaka l’etombelo w’ɔlɔlɔ
16, 17. Lande na kele ekɔ ohomba ndjasha l’otema ɔtɔi le anto wahomana laso l’esambishelo?
16 Karolien, osekaseka ɔmɔtshi w’Ɔmɛnyi wa Jehowa wa la Belgique akasambisha womoto ɔmɔtshi laki komɛnya nsaki lo losango la Diolelo. Karolien nde l’Ɔmɛnyi okina wakatombe la nde wakalange kimanyiya mama kɛsɔ nɛ dia lonya lande lɔmɔtshi lakɔmbama la bandɛ, koko womoto ɔsɔ akatone ekimanyielo kawɔ. L’ɔkɔngɔ wa nshi hiende, Ɛmɛnyi ɛsɔ wakakalola dia tenda mama kɛsɔ ndo wakawombola kana nde amboka yema dimɛna. Karolien akate ate: “Dikambo sɔ diakonge l’etombelo w’ɔlɔlɔ. Nde akâmbe heyama dia mɛna woho wakatayakiyanyaka mɛtɛ dikambo dia yonge yande ya demba. Nde akatɔtshiya lo luudu ndo wekelo wa Bible wakatatɛ.”
17 Sandi, Ɔmɛnyi wa Jehowa ɔmɔtshi wa l’États–Unis ndjashaka l’otema ɔtɔi le anto wasambishande. Nde mendaka lo tojurunalɛ ahole wewoyawɔ ɔnɛ mama kapanda akotshi, oma lâsɔ, ko nde ntshɔ dia tenda ambutshi w’ɔna l’oyoyo ɔsɔ aha la nde mbohɛ Buku di’Ɛkɔndɔ wa lo Bible.c Lam’ele mbala efula nyango ɔna mongaka la ngelo ndo nangaka mɛnya angɛndangɛnda ɔna, mbala efula nde tondoyaka dia sawola l’anto asɔ. Sandi mbutaka ate: “Dimi sawolaka l’ambutshi di’ohomba wa sɔnga diɔtɔnganelo di’ɔlɔlɔ lam’asawɔ l’ɔnawɔ l’ekimanyielo ka wadielo. Oma lâsɔ, ko dimi ndjɔtɛkɛta di’okakatanu wele l’ambutshi dia mbodia ana ɛlɔ kɛnɛ.” Atete edja, diɛsɛ oma l’esambishelo kɛsɔ, mama kɛmɔtshi l’anande asamalo wakatatɛ kambɛ Jehowa. Mbɔsa yɛdikɔ ndo ndjasha l’otema ɔtɔi le onto mbeyaka tondja etombelo wa ngasɔ w’ɔngɛnɔngɛnɔ l’olimu aso.
18. (a) Bonde kele sho tshɛ tekɔ l’akoka wa ‘ntɔ elowa efula’ oko watɔlɔmbawɔ? (b) Akambo akɔna asato wofundami l’Evanjiliɔ waki Joani wahomba onto kotsha wahombaso sala la wolo dia mbakotsha?
18 Ekɔ mɛtɛ ekeketshelo dia mbeya ɔnɛ tekɔ l’akoka wa ‘tetemala la ntɔ elowa efula’ oko watɔlɔmbawɔ! Oyadi dikɛnda kana opalanga mbeso, oyadi tekɔ la demba dia wolo kana dia kɔnyangakɔnyanga, oyadi tekɔ lo sambisha l’ɛtshi ka nkɛtɛ ketawɔ anto kana kahetawɔ anto awui aso, sho tshɛ koka ntɔ elowa efula. Woho akɔna? Lo ntɔ elowa wa nyuma lo yɛdikɔ y’efula ndo lo dianganya losango la Diolelo diaki Nzambi lo yɛdikɔ yɛdimi l’akoka aso. L’etena kakɔ kâmɛ, sho salaka la wolo dia ‘tshikala l’ɔtɛkɛta wa Yeso ndo dia ‘mbokana ngandji lam’asaso.’ Eelo, lo kotsha akambo asato w’ohomba asɔ wofundami l’Evanjiliɔ waki Joani, wahomba onto kotsha dia monga ombeki waki Yeso, sho mɛnyaka dia ‘tekɔ mɛtɛ ambeki waki Yeso.’—Joani 8:31; 13:35.
[Nɔte ya l’ɛse ka dikatshi]
a Kânga mbele ntahe y’ɔkɔdi wa vinyɔ ya lo wɛla ɔsɔ nembetshiyaka apɔstɔlɔ waki Yeso ndo Akristo akina wanɛ wayolɛ lo Diolelo diaki Nzambi dia l’olongo, wɛla waki Yeso wekɔ l’akambo wa mɛtɛ wakoka ambeki wa Kristo tshɛ wa nshi nyɛ kondja wahɔ oma lɔkɔ.—Joani 3:16; 10:16.
b Wanɛ wele wodihamaka lo mvudu yawɔ l’ɔtɛ wa lotshundu kana hemɔ kɛmɔtshi mbeyaka monga l’akoka wa sambishaka lokumu l’ɔlɔlɔ lo mikanda, kana lo telefɔnɛ naka kokaka kana ondo vɔ koka sambishaka anto waya ndjowaenda.
c Diakatondjama oma le Ɛmɛnyi wa Jehowa.
Wembola w’ovuswelo
• Weho akɔna w’elowa wahombaso ntɔ efula na?
• Lande na kele sho tshɛ koka kotsha oyango ɔnɛ wendana la ‘ntɔ elowa efula’?
• Naa akambo asato w’ohomba wofundami l’Evanjiliɔ waki Joani wahomba onto lalanga monga ombeki waki Yeso kotsha wambotɔsɛdingola na?
[Kiombo/Osato wa lo lɛkɛ 29]
WOHO WA ‘NTƆ ELOWA OMA L’EKIKELO’
KAKƆNA kakokimanyiya dia tetemala sambisha losango la Diolelo la kɔlamelo tshɛ lo mbilo yele anto hawoleke mbetawɔ losango lɔsɔ na? Ekadimwelo ɛmɔtshi w’ohomba efula wendana la dimbola sɔ vɔ ɛnɛ.
“Mbeya dia Yeso ekɔ lo tosukɛ kimanyiyakami dia dimi mɛna akambo la sso di’ɔlɔlɔ ndo tetemala, oyadi woho akɔna wayɔsa anto losango latamawaɛmbɛ.”—Harry, ɛnɔnyi 72; akabatizama lo 1946.
“Divɛsa dia 2 Koreto 2:17 keketshakami mbala tshɛ. Diɔ mbutaka dia sho kambaka olimu aso lo ‘endelo kaki Nzambi ndo ɔnɛ tekɔ lo kamba dihɛka lo dihɛka sho la Kristo.’ Lam’emi l’esambishelo, dimi ngɛnangɛnaka woho wemi kamɛ l’angɛnyi ami woleki tshɛ.”—Claudio, ɛnɔnyi 43; akabatizama lo 1974.
“Lo mɛtɛ, le mi, olimu w’esambishelo ekɔ ta di’onto ndamɛ. Koko, lambɛna mɛtɛ k’ɛtɛkɛta wa l’Osambu 18:29 wata ɔnɛ: ‘Oma l’ekimanyielo ka Nzambi kami, dimi koka fumbɔ lokombo’”—Gerard, ɛnɔnyi 79; akabatizama lo 1955.
“Etena kadiami kânga divɛsa ɔtɔi l’esambishelo, dimi ngɛnangɛnaka efula nɛ dia dimi mbeyaka di’otema w’onto ɔmɔtshi ambɔsɛdingɔma oma l’ekimanyielo ka Bible.”—Eleanor, ɛnɔnyi 26; akabatizama lo 1989.
“Dimi tetemalaka kamba la weho wa mbɔtwɛlɔ yotshikitanyi. Mbɔtwɛlɔ yekɔ efula woho ɔnɛ wele hakokaki kamba layɔ tshɛ lo yema y’ɛnɔnyi yambotshikalɛ nyɛ.”—Paul, ɛnɔnyi 79; akabatizama lo 1940.
“Dimi halonyange naka onto hetawe losango lami. Dimi pembaka dia monga la mbɔtwɛlɔ ka dimɛna, lo sawola l’anto oko angɛnyi ndo lo mpokamɛ tokanyi tawɔ.”—Daniel, ɛnɔnyi 75; akabatizama lo 1946.
“Dimi lakahomana l’anto amɔtshi weke esadi wa batizama wanɛ wakambutɛ di’esambishelo kami akakimanyiya yema dia vɔ koma Ɛmɛnyi wa Jehowa. Onto ɔmɔtshi lahameye akeke la wɔ Bible ndo akâkimanyiya dia vɔ pama. Dimi mongaka l’ɔngɛnɔngɛnɔ dia mbeya ɔnɛ olimu aso wekɔ lo kambema oma lo wolo wadja onto l’onto.”—Joan, ɛnɔnyi 66; akabatizama lo 1954.
Kakɔna kakokimanyiya dia ‘ntɔ elowa oma l’ekikelo’?—Luka 8:15.
[Esato wa lo lɛkɛ 28]
Lo ntɔ elowa wa nyuma ndo lo sambisha losango la Diolelo, sho ntɔ̂ka elowa efula
[Osato wa lo lɛkɛ 31]
Kakɔna kakalange Yeso mbuta lam’akandatɛ apɔstɔlɔ ande ate: ‘Nyotetemale ntɔ elowa efula’?