‘Onto latetemala mbikikɛ ehemba ekɔ la ɔngɛnɔngɛnɔ’
1 Akristo tshɛ pomanaka la ehemba. (2 Tim. 3:12) Ehemba wakoka onto pomana la wɔ mbeyaka monga hemɔ, ekakatanu wendana la ekondjelo, ɔlɔshamelo kana lo toho tokina. Satana tohembaka la oyango wa sho kitshakitsha olimu aso wa Okristo kana dia sho tshika kambɛ Nzambi. (Jobo 1:9-11) Ngande wakoka wokikelo w’ehemba mbisha onto ɔngɛnɔngɛnɔ?—2 Pet. 2:9.
2 Toyalɔngɔsɔlɛ dikambo dia ehemba: Jehowa akatosha Ɔtɛkɛta ande w’akambo wa mɛtɛ, kâmɛ ndo ɔkɔndɔ wa lɔsɛnɔ laki Yeso ndo wa wetshelo ande. Etena kahokamɛso ɛtɛkɛta waki Yeso ndo kâkitanyiyaso, sho ndjalɔngɔsɔlaka dikambo dia ehemba. (Luka 6:47-49) Sho keketshamaka nto oma le anangɛso la akadiyɛso w’Akristo, oma lo nsanganya ya l’etshumanelo ndo oma l’ekanda walembetshiya Bible watondja olui w’ɔhɔmbɔ wa kɔlamelo ndo wa kɛsɔ. Sho kambaka mbala la mbala la woshasha wakatosha Nzambi wa dɔmbɛlɔ.—Mat. 6:13.
3 Jehowa akatosha nto elongamelo. Naka tekɔ la mbetawɔ ka wolo lo alaka waki Jehowa, kete elongamelo kaso ayokoma ‘oko longo la masuwa ndo tɔ kayonga ka mɛtɛ ndo ka shikaa.’ (Heb. 6:19) Lo nshi yakafundamaka Bible, kânga lo etena kaki lɔpɛpɛ bu, masuwa kokokaka mimɔ oma lo dibongo aha la longo. Longo lakawokaka lo ashi akakimanyiyaka diaha masuwa kɔmama lo ave wa weke etena kaya lɔpɛpɛ la shashimoya. Woho akɔ wâmɛ mbele monga la mbetawɔ ka wolo lo alaka waki Jehowa ɛlɔ kɛnɛ ayoyotokimanyiya etena kayotokomɛ ehemba wele oko mpɛpɛ ya wolo. Ekakatanu koka tokomɛ la shashimoya y’efula. Kânga mbele anto wa la Lustɛra waketawɔ esambishelo ka Paulo la Baranaba ntondo, awui wakayotshikitanaka esadi eto etena kakaye andɔshi w’ase Juda.—Etsha 14:8-19.
4 Ekikelo mbishaka onto ɔngɛnɔngɛnɔ: Tetemala sambisha kânga l’atei w’ɔlɔshamelo toshaka wɔladi wa lo yimba. Sho ngɛnangɛnaka etena katɔtɛngawɔ l’ɔtɛ wa lokombo la Kristo. (Etsha 5:40, 41) Mbikikɛ ehemba tokimanyiyaka dia sho monga la okitshakitsha, la okitanyiya ndo dia sho ndeka monga la ekikelo. (Euh. 8:16; Heb. 5:8; Jak. 1:2, 3) Ekikelo tetshaka woho wa sho ndjaɛkɛ le Jehowa, ndjaɛkɛ lo alaka ande ndo kondja eshamelo le nde.—Tuk. 18:10.
5 Sho mbeyaka dia ehemba wekɔ paka lo tshanda mɔtshi tsho. (2 Kor. 4:17, 18) Ehemba toshaka waaso wa sho mɛnya woke woke wa ngandji kokaso Jehowa. Etena kakikɛso ehemba, sho mbishaka Satana okadimwelo lo emamatanyiya ande. Ɔnkɔnɛ, hatohombe mpekɔ! ‘Onto latetemala mbikikɛ ehemba ekɔ la ɔngɛnɔngɛnɔ, nɛ dia lam’ayondoleka ehemba wolo, nde ayolongola dɛmbɔ dia koso dia lɔsɛnɔ.’—Jak. 1:12.