LƆSƐNƆ L’OKRISTO
Jehowa tokimanyiyaka dia mbikikɛ ehemba aso
Lo nshi y’ekomelo nyɛ, sho pomanaka l’ehemba efula wa wolo. Lo tena dimɔtshi, sho mbeyaka ndjaoka dia ehemba aso waya wolo efula le so dia mbikikɛ. Koko naka sho ntetemala ndjasukanya la Jehowa, nde ayotokimanyiya dia sho mbikikɛ kaanga ehemba woleki wolo. (Isa 43:2, 4) Ngande wakokaso ndjasukanya la Jehowa etena kahomanaso l’ehemba?
Dɔmbɛlɔ. Etena kadiholɛso Jehowa otema aso, nde toshaka wɔladi ndo wolo wa lo yimba dia mbikikɛ.—Flp 4:6, 7; 1Tɛ 5:17.
Nsanganya. L’etena kɛnɛ kambotoleka monga l’ohomba wa mbo ya ndɛ ya lo nyuma ndo lɔngɛnyi latokimanyiya Jehowa dia monga lalɔ lo nsanganya yaso. (Hɛb 10:24, 25) Naka sho nɔngɔsɔlaka, mbɔtɔka ndo mbishaka kɔmatɛrɛ lo nsanganya ya l’etshumanelo, kete tayokondja wahɔ tshɛ lo tshɛ l’ekimanyelo ka nyuma ka Jehowa.—Ɛny 2:29.
Esambishelo. Ayoleka monga dui dia wɔdu le so dia ndjasha l’awui w’amɛna, naka sho nsala kɛnɛ tshɛ kakokaso nsala dia ntetemala monga l’ohetoheto l’esambishelo. Tayokeketsha nto lɔngɛnyi lasaso la Jehowa ndo l’asekaso ambetawudi.—1Kɔ 3:5-10.
NYENDE VIDƐO YELE L’ƆTƐ A DUI ƆNƐ: JEHOWA AYOKƆSA NDO OMA LAASƆ, NYOKADIMOLE LO AMBOLA WAYELA ANƐ:
Kakɔna kakakimanyiya Malu dia ntshikala nsuke la Jehowa etena kakinde l’ehemba?
L’ɛnyɛlɔ ka Malu, ngande wakoka ɛtɛkɛta wa l’Osambo 34:18 tosamba etena keso l’ehemba?
Ngande wɛnya kɛnɛ kakakomɛ Malu dia Jehowa toshaka “wolo woleki wɔnɛ wokongaka l’onto” etena kahomanaso l’ehemba?—2Kɔ 4:7