Ekadimwelo lo ambola anyu
◼ Naa wâle wakoka tokomɛ lo sawola la anto wahateye lo Ɛtɛrnɛtɛ?
Waa site Web efula ya lo Ɛtɛrnɛtɛ yakakongɛma la oyango w’anto sawolaka ndo fundanɛka mikanda. Waa site efula l’atei ayɔ mbishaka anto diaaso dia vɔ sala ahole awɔ ndo mbidja esato awɔ ndo awui akina wendana la wɔ. L’ɔkɔngɔ, anto wayɛna awui akɔ wayoyotatɛka sawola la wɔ. Ɛlɔngɔlɔngɔ la esekaseka efula mbɔtɔka lo waa site ya woho ɔsɔ ndo ɛlɔngɔlɔngɔ l’esekaseka ɛmɔtshi wa lo etshumanelo wakɔtɔ lo waa site shɔ dia sawola la anto wayata ɔnɛ wekɔ Ɛmɛnyi wa Jehowa.
Bu wolo di’onto lasawola la so lo Ɛtɛrnɛtɛ tokesa lo dikambo dia lonto lande, lonyuma lande ndo eyango ande. (Osam. 26:4) Mbeyaka monga ko onto layata ɔnɛ Ɔmɛnyi wa Jehowa mbende ekɔ onto lele kema ombetawudi, onto lambotshanyemaka oma lo etshumanelo kana ɔpɔsta wayanga Akristo wa nde takoya mboka. (Ngal. 2:4) Akɛnama di’anto efula weyana la ana w’akɛnda la wolo kambaka la site shɔ dia nyanga ana w’akɛnda wa vɔ mbeyana la wɔ la wolo.
Oyadi tekɔ l’eshikikelo dia anto wasawola la so lo site shɔ wekɔ la lonyuma la dimɛna lo etshumanelo, asawo aso kokaka koma esadi eto asawo wa kɔlɔ. Dui sɔ salemaka nɛ dia anto efula hawoleke mboka sɔnyi etena kasawolawɔ l’anto wele aha elungi lo elungi mbasawolawɔ. Vɔ mbeyaka mbɔsa nto dia awui wasawolawɔ kana tshɛ katawɔ hateyama le anto akina, ɛnyɛlɔ le ambutshi awɔ kana le dikumanyi. Lonyangu ko, ɛlɔngɔlɔngɔ l’esekaseka efula wa lo nkumbo y’Akristo wambotalaka lo djonga shɔ ndo woyasha lo ɛtɛkɛta wa mindo. (Ef. 5:3, 4; Kol. 3:8) Anto akina mbidjaka foto yawɔ hita yemula nsaki ya dieyanelo, ndjasɔmɛka nkombo ya kɔlɔ kana mpokamɛka mishiki wa kɔlɔ lo ɔrdinatɛrɛ awɔ.
Lo menda kɛnɛ tshɛ komaso la mbuta kɛsɔ, ambutshi pombaka mendaka dimɛna dimɛna kɛnɛ kasala anawɔ lo ɔrdinatɛrɛ. (Tuk. 29:15) Ayonga dui dia wâle dia mbelɛ onto leso hateye la ngelo kana mbotshika ndamɛ la anaso. Woho akɔ wâmɛ mbele, ekɔ wâle le so ndo le anaso dia mbɔtɔ lɔngɛnyi l’anto wahateye lo tshimbo y’Ɛtɛrnɛtɛ, oyadi kânga vɔ wekɔ lo ndjata ɔnɛ wekɔ Ɛmɛnyi wa Jehowa.—Tuk. 22:3.